مٹی دا انسان
راحت ثمر
انسان ایس کائنات دی سب توں بہترین مخلوق ہوندیاں ہوئیاں وی بدترین مخلوق بن کے سامنے آندا اے تے قرآن دی گل وی جھٹلان دی کوشش کر دا اے قرآن نے انسان نوں سب توں ودھ سوہنا آکھیا اے تے تمام مخلوقاں توں وی اشرف تے افضل ہون دا مقام دتا اے پر انسان بے قدرا تے نا شکرا اے تے نال ای رب دا نافرمان وی اے کہ رب دے دتے گئے حکماں نوں مندا ای نہیں۔لالچ تے دنیاداری نے انسان دیاں اکھاں بند کر چھڈیاں نیں پچھلے کجھ دناں وچ دو تن تکلیف دہ واقعات ہوئے نیں جنہاں وچوں اک سانحہ انار کلی لاہور اے جیہڑا کہ اک منصوبہ بندی نال کیتا گیا دھماکا سی جہدے وچ معصوم بچے تے پردیسی شہید ہو گئے دھماکے نال لگن والی بے رحم اگ نے ارد گرد دی ہر چیز نوں ساڑ کے سواہ کر دتا پانی نال اگ بجھا ن تے شہیداں دا خون اس پانی وچ رل کے خون ہی لگدا پیا سی ایس دہشت دے عالم وچ وی پیسے دا پجاری لالچی انسان اپنے سامنے موت نوں ویکھ کے وی لٹ مار کردا رہیا افسوس دا مقام اے کہ دھماکے والی جگہ جتھے کرنسی ایکسچینج تے پرائز بانڈاں دیاں دکاناں وی ہے سن کجھ لوکاں اوتھے لٹ مچائی تے دھماکے توں وی فائدہ چکیا۔بھلا کنے دن لٹے ہوئے پیسیاں نال گزار لین گے دو چار دن بس تے فیر کیہ کرن گے؟ کسے ہور دھماکے دی اڈیک رکھن گے؟ تے جے ایہو جہے کسے حادثے دا کدی آپ وی شکار ہو جان گے تے فیر کیہ کرن گے؟۔
میں تاریخ دی کتاب وچ پاکستان بنن توں پہلاں 1935 وچ کوئٹہ بلوچستان دے علاقے وچ آئے شدید زلزلے دا حال پڑھیا تے دکھ ہویا سی کہ اوس زلزلے دا کنے مہینے کسے نوں پتہ ای نہیں سی لگیا کیوں جے ذرائع ابلاغ نہیں سی تے جدوں اوتھوں کوئی قافلہ لنگھیا تے اوہناں لوکاں آکے دسیا کہ زلزلا آیا سی پر اوتھے عورتاں دے ہتھ بانہواں تک کٹے ہوئے سن بڑی گوڑھی تفتیش تے بچ گئے لوکاں کولوں پچھ دس وچ پتہ لگیا کہ اودوں وی لوکاں نے موت نال اکھ مچولی کھیڈی تے لٹ مار کیتی تاں فر عورتاں دے زیور لٹدیاں اوہناں دے ہتھ وی کٹ دتے۔ ایہ کجھ واقعات تے اوہ نیں جیہڑے سامنے آ گئے جیہڑے سامنے نہیں آندے اوہناں دا کوئی شمار ای نہیں کہ جے کدھرے کوئی بس گڈی دا حادثہ ہو جاوے تے لٹن والے مسافراں وچوں ای نکل آندے نیں۔پتہ نہیں ایہو جہے لوک اپنی موت بھلے ہوئے نیں تے اوہناں دے لالچ دا منہ تے پیٹ کدوں بھرنا ایں یاں فیر قبر دی کالی مٹی نال اوہناں دا منہ تے پیٹ بھرنا ایں۔٭٭
