خدارا! کدی تے قوم بن کے سوچو!

ڈاکٹر رزاق شاہد

نویں ورھے دا پہلا ہفتہ اجے نہیں سی گزریا کہ مری وچ 23 قیمتی جاناں برفانی طوفان دی نذر ہو گئیاں۔ اک پاسے ایس سانحے پاروں ملک بھر وچ فضا سوگوار اے تے دوجے پاسے سوشل میڈیا سنے سارے الیکٹرانک تے پرنٹ میڈیا تے چور جیہا پیا اے۔ ایہدے وچ کوئی دو رائے نہیں کہ انتظامیہ اوہ کردار نہیں نبھا سکی جو اوہدی بنیادی ذمہ داری سی یاں جہدی اوہدے توں توقعات بنھیاں گئیاں سن۔ جے انتظامیہ ویلے سر اقدامات اٹھاندی تے کسے حد تک حالات دی سنگینی توں بچیا جا سکدا سی۔ ایہناں سطراں دے قارئین تک اپڑن تک عدالت دے ریمارکس میڈیا دی زینت بن چکے ہون گے کہ این ڈی اے سنے ساری ریاست سانحے دی ذمہ وار اے۔ تحقیقات دی لوڑ نہیں ذمہ داراں نوں پھاہے لایا جاوے ہن عدالت اگے سوال کون کرن دی جرأت کرے کہ پھانسی کہڑے ذمہ داراں نوں دتی جاوے؟ تحقیقات تے ہوندی ای ذمہ داراں دے تعین لئی اے۔ ایس حوالے نال ویکھیا جاوے تے سب توں پہلی ذمہ داری تے برف باری دے طوفان دی اے نہ صرف باری ہوندی نہ ایہ سانحہ ہوندا۔ ایس توں وی وڈی ذمہ داری آپ لوکاں دی سی جو اجہے حالات وچ نہ برف باری دا نظارہ کرن جاندے نہ ای حالات دے ڈھائے چڑھدے۔
حالات دا تجزیہ کیتے بناں تے کارناں نوں اکھوں اولھے رکھ کے بناں سوچے سمجھے‘ غیرمحتاط گل بات توں اسیں نہ تے غمزدہ خانداناں دا دکھ گھٹ کر سکنے آں تے نہ ای اوہناں دے پھٹاں تے مرہم رکھ رہے آں۔ اک تے ساڈے ایتھوں دا سیاستدان صرف ناں دا سیاستدان اے حقیقت وچ زیادہ طالع آزما سیاستداناں دیاں صفاں وچ گھسے ہوئے نیں۔ ایس توں وی وڈی بدقسمتی یاں بدبختی ایہہ وے کہ ماضی وچ سیاست نوں تجارت تے کاروبار بنا دتا گیا اے کروڑاں لا کے ارباں روپیے کمان لئی بہترین کاروبار سیاست ای اے ایہ صرف ہوائی گلاں نہیں سگوں اج ساڈے آل دوالے اجہے بے شمار لوگ نیں جو بہت پہلے نہیں سگوں کجھ ورھے پہلاں کیہ سن تے اج کیہ نیں ریڑھے تے برف ڈھون والیاں توںلے کے میٹر ریڈر تک تے سینما ٹکٹ دی بلیک کرن توں کھرب پتی ہون تک دیاں کہانیاں ساڈے اپنے دور دیاں نیں ایس توں وی ودھ کے سیسلین مافیا تے گارڈ فادر دے الفاظ تے ساڈی مقدس عدالتاں دی کاروائی دے دوران سنن وچ آئے۔ حکمران تے اپوزیشن دوہاں ولوں غیرمحتاط رویہ پھٹاں تے لون لان دے مترادف اے۔ ایہناں دوہاں توں کسے سنجیدہ رویے دی توقع کرنا خودفریبی توں اڈ کجھ نہیں پر سوشل میڈیا تے الیکٹرانک میڈیا تے ہون والے شور وچ اصل منظر اکھاں توں اولھے ہو گیا اے تے لوکاں دے جذبات ساری اخلاقیات تے غالب آ گئے۔ نجی چینلز نوں اک موقع قدرت نے دتا جہدے توں اوہناں نے پورا پورا فائدہ چکدے ہوئے سارا ملبہ وزیراعظم تے پایا تے اوہناں نوںنالائق ثابت کرن لئی پورا ٹل لاندے رہے ایہناں توں وی ودھ لوک انتظامیہ سنے وزیراعلیٰ تے وزیراعظم نوں کوسدے رہے۔ ایس سانحے نے ساریاں دے اعصاب شل کر کے رکھ دتے پر حالات کجھ وی ہون احتیاط تے سنجیدگی دا پلا نہیں چھڈنا چاہیدا۔ ایہ حقیقت وی ریکارڈ اُتے اے کہ پنج تریخ نوں محکمہ موسمیات نے الرٹ جاری کر دتا سی کہ مری‘ گلیات‘ نتھیاگلی‘ ن اران‘ کاغان تے دوجے پہاڑیاں علاقیاں وچ چھ جنوری توں 9جنوری دی دوپہر تک ڈاڈھی برف باری پاروں سڑکاں بند ہو سکدیاں نیں۔ ایہدے تے انتظامیہ ولوں ٹریول ایڈوائزری وی جاری ہوئی کہ سیاحتی تھاواں تے جان والے موسم دی سجری جانکاری تے ٹریفک صورتحال بارے جانکاری حاصل کرن۔ بدقسمتی نال اسیں قوت ایمانی نال اینے بھرے ہوئے آں کہ خطرناک صورتحال وچ توکل دا مظاہرہ کردے ہوئے سارے خطریاں نوں کنڈ پچھے کر دینے آں۔ ایہو کجھ مری دے سانحے دا پس منظر سی کہ شاید زندگی وچ انج دا لمحہ فیر نہ آوے‘ لوڑ توں ودھ تے مکمل تیاری دے بناں لوکاں تے پاگل پن سوار سی۔ اُتوں سموگ تے موسم سرما دی وجہ نال چھٹیاں نے اکھاں تے پٹی بنھ دتی کسے برفانی طوفان دے خطرناک امکانات نوں سامنے رکھ کے کسے قسم دے حفاظتی انتظامات دے بناں صرف بھیڑچال دے مصداق ہر کسے نے مری دا رخ کیتا۔
ایہ حقیقت کسے توں لکی چھپی نہیں کہ مری سنے شمالی علاقیاں وچ موسم سرما دے ایہو کجھ دن کمائی دا سیزن سمجھے جاندے نیں کسے نوں نہیں پتا کہ رش ودھن نال ہوٹلز دے ریٹ پہلے ای اسمان نال گلاں کرن لگدے نیں۔ جے برف دا طوفان نہ آندا تے حالات دی سنگینی دے نال انتظامیہ دی نااہلی وی کسے دے نوٹس وچ نہ آندی کہ صرف اک ہفتہ پہلاں نیوایئرنائٹ تے وی ایناں ای رش‘ ایہناں علاقیاں وچ ویکھیا گیا۔ اودوں بناں کسے نقصان دے‘ سارے خیریت نال گھراں نوں پرتے۔ سارے جان دے نیں کہ معمولی برف باری نال راہ بند ہو جاندے نیں دوجے پاسے لوڑ توں ودھ رش وی پریشان کن ہوندا اے ایس سارے دے باوجود اسیں جنونی مشہور آں۔ اپنی جان دی پرواہ کیتے بناں سانوں خطریاں نال کھیڈنا انج وی بڑا پیارا اے۔ عام حالات وچ معمولی ٹریفک دبائو تے اسیں ہر طرح دا ڈسپلن ہوا وچ اڑا دینے آں جہدا مظاہرہ اسیں روزانہ سڑکاں تے ویکھنے آں جو عوام نارمل حالات وچ قابو توں باہر ہو جاندے نیں اوہناں توں کسے وی غیرمعمولی حالات وچ ڈسپلن دے مظاہرے دی توقع کرنا ای پاگل پن اے خدارا کدی تے قوم بن کے سوچو…!٭٭