عوامی تحفظ لئی پنجاب حکومت دی جامع اصلاحات

پہلی واری پُلس سیاسی دبائو توں آزاد ہو کے فرائض سرانجام دین وچ مصروف

جاوید یونس

ریاست دی ذمہ واری اے کہ اوہ عوام دے جان ومال دے تحفظ‘جرماں دے قلع قمع‘ مجرماں دی سرکوبی تے امن و امان دے قیام لئی ناصرف بھرویں اقدامات کرے بلکہ اوہناں اتے عملدرآمد نوں ہر ممکن یقینی بناوے۔ حکومت ایس مقصد لئی باقاعدہ مشینری ترتیب دیندی اے جہڑی مقننہ‘ انتظامیہ تے عدلیہ اتے مشتمل ہوندی اے۔ مقننہ عوام لئی قنون بناندی اے تے بدلدے تقاضیاں دے پیش نظر عوام دی بہتری لئی نویں قنون مرتب کرن دے نال نال پہلے توں موجود قنوناں وچ ترامیم وی کردی اے۔ انتظامیہ مقننہ دے بنائے ہوئے قنوناں دا نفاذ عمل وچ لیاندی تے قنون شکن عناصر نوں پابند سلاسل کر کے عدلیہ توں سزاواں دواندی اے۔ عدلیہ انصاف دے تقاضے پورے کردے ہوئے ظالماں تے مجرماں نوں سزاواں سنان دے علاوہ قنونی تشریح وی کردی اے۔ انتظامیہ یعنی پلس دا بنیادی کم معاشرے وچ امن و سکون قائم کرنا‘ ظالم دی سرکوبی‘ مظلوم دی دادرسی‘ قنون توڑن والے عناصر نوں پھڑ کے پابند سلاسل کرنا تے بغیر کسے دبائو دے مقدمیاں دی صحیح خطوط اتے تفتیش کر کے مجرماں نوں سزا دوانا اے۔ امن و امان دے قیام نال عوام دی خوشحالی تے ملکی معیشت تے استحکام دا نظام جڑیا ہویا اے۔ امن وامان بہتر ہون نال غیر ملکی سرمایہ کاری آندی اے تے ملکی معیشت مستحکم ہون دے نال روزگار دے موقعے ملدے نیں۔ انج ملک خوشحالی تے ترقی دی راہ اتے گامزن ہوندا اے۔ پلس دا شعبہ شروع توں ای سارے حلقیاں وچ زیر بحث رہیا۔ شہریاں دی اکثریت نوں انصاف دی فراہمی دے سلسلے وچ شکایت ای رہی اے۔ حصول انصاف لئی عام بندا تھانیاں وچ جان دے نام توں خوف زدہ ہو جاندا اے۔ ماضی وچ حکومتاں نے ایس ادارے نوں ذاتی غلام بنا لیا تے ہر جائز تے ناجائز کماں لئی استعمال کیتا۔ سیاسی حریفاں نوں دبان لئی جھوٹے مقدمے قائم کیتے۔ خاص طور تے پچھلے دوراں وچ سیاسی بنیاداں اتے نااہل بندیاں نوں بھرتی کیتا گیا۔ وزیراعلیٰ سردار عثمان بزدار نے پاکستان دے سب توں وڈے صوبے دی بھاگ دوڑ سنبھالی تے صوبے وچ امن و امان دا قیام اوہناں دی پہلی ترجیح سی۔ سردار عثمان بزدار نے تھانیاں دی حالت زار نوں بہتر بنان‘ پلس ملازماں نوں شاندار ورکنگ ماحول دی فراہمی تے پلس نوں عوام لئی دادرسی دا ذریعہ بنان لئی متعدد عملی اقدامات کیتے۔ بزدار حکومت نے جدید ٹیکنالوجی تے آئی ٹی دے شعبے وچ مثالی اصلاحات کیتیاں نیں جہدی تقلید دُجے صوبے وی کر رہے نیں۔ اج پنجاب تے دوجے صوبیاں دے درمیان جرائم پیشہ بندیاں دے حوالے نال کوائف دی شیئرنگ وی ہو رہی اے جہدے نال اک صوبے دے مجرم جہڑے دوجے صوبیاں وچ پناہ لیندے سن ہن اوہ پلس دی دسترس وچ آ گئے نیں۔حکومت دے جامع اقدامات پاروں تھانہ کلچر بتدریج تبدیلی ول گامزن اے۔ ایہدے وچ کوئی شک نہیں کہ وزیراعلیٰ عثمان بزدار نے پلس نوں وسائل دی فراہمی وچ ہمیشہ فراخدلی دا مظاہرہ کیتا اے۔
وزیراعلیٰ اپنجاب سردار عثمان بزدار نے سنٹرل پلس آفس دا دورہ کیتا۔ سنٹرل پلس آفس آمد تے وزیراعلیٰ عثمان بزدار نوں پلس دے چاق و چوبند دستے نے سلامی پیش کیتی تے سنٹرل پلس آفس دے لان وچ پودا لایا۔ وزیراعلیٰ عثمان بزدار نے پلس میوزیم وچ رکھی شیواں خصوصاً اسلحے‘ یونیفارم تے میڈلاں وچ بوہتی دلچسپی دا اظہار کیتا تے برٹش دور دے ہتھیاراں تے پلس وردیاں دا وی مشاہدہ کیتا۔ وزیراعلیٰ نے سنٹرل پولیس آفس وچ سینئر پلس افسراں دے اجلاس نال خطاب کردیاں ہویاں آکھیا کہ پلس نوں کم کرن دی پوری آزادی دتی اے تے پلس نوں سیاسی دبائو توں مکمل آزاد کیتا اے جہدے چنگے نتیجے سامنے آ رہے نیں۔ پلس وچ میرٹ اتے تعیناتیاں کیتیاں نیں۔ پلس افسراں نوں باقاعدگی نال کھلی کچہریاں لان دی ہدایت کردے ہوئے آکھیاکہ پلس افسر عوام تے سب توں ودھ کے اللہ تعالیٰ نوں وی جواب دہ نیں۔ ہر مظلوم شخص دی فوری دادرسی تہاڈا فرض اولین اے۔
پلس افسر اپنے دفتراں دے بوہے عوام لئی کھلے رکھن۔ ڈی پی اوز تے آر پی اوز تھانیاں دے سرپرائز وزٹ کرن تے کسے وی بے ضابطگی یا قنون دی خلاف ورزی اتے کارروائی کرن۔ا وہناں نے آکھیا کہ انارکلی دھماکے دے ملزم چھیتی قنون دی گرفت وچ ہون گے۔ وزیراعلیٰ عثمان بزدار نے پلس دے شہیداں دے خانداناں دے 2بندیاں نوں ملازمت دین دی اصولی منظوری دا اعلان کیتا۔ تاہم ایس ضمن وچ قنونی تقاضیاں نوں مدنظر رکھ کے ہور اقدامات کیتے جان گے۔ ایسے طرحاں پنجاب سیف سٹی اتھارٹی دا دائرہ کار پنجاب بھر وچ ودھایا جاوے گا تے سیف سٹی اتھارٹی وچ بھرتیاں دی منظوری دے دتی اے۔ ڈیرہ غازیخان تے راجن پور وچ بلوچ لیوی دی کمانڈ پلس دے حوالے کردتی اے تے پلس دے 9ہزار توں ودھ اہلکاراں نوں پروموٹ کیتا گیا اے۔ انسپکٹر توں ڈی ایس پی تے ڈی ایس پی توں ایس پی دے عہدیاں اتے افسراں دی ترقی دے کیس چھیتی نمٹائے جان۔ حکومت نے پلس افسراں نوں ایگزیکٹو الائونس دتا اے تے منجمد الائونس نوں بحال کر کے اوہدے وچ وادھا وی کیتا اے۔
پلس نوں3سال وچ 670 گڈیاں تے 235 موٹرسائیکلاں فراہم کیتیاں گئیاں نیں۔ ہائی وے پٹرولنگ لئی ہور 825 گڈیاں دتیاں جا رہیاں نیں۔304 تھانیاں نوں سپیشل انیشی ایٹو پولیس سٹیشن دا درجہ دتا جا رہیا اے جد کہ 90تھانے سپیشل اینشی ایٹو پولیس سٹیشن وچ تبدیل کیتے گئے نیں۔ فیصل آباد‘ راولپنڈی‘ ملتان تے ڈی جی خان وچ ڈولفن فورس تعینات کیتی گئی اے۔ پنجاب پلس دی 12278 اسامیاں اتے بھرتی کیتی جا رہی اے تے پلس وچ 5774 بھرتیاں مکمل ہو چکیاں نیں۔ سی ٹی ڈی ہیڈ کوارٹر لئی 54 کنال اراضی فراہم کیتی اے۔ ساہیوال‘ سرگودھا‘ ٹوبہ ٹیک سنگھ تے ڈی جی خان وچ پلس ٹریننگ سکول دا قیام عمل وچ لیایا جا رہیا اے۔ 64 کنال اتے چنیوٹ پولیس لائنز دی تعمیر ایسے سال مکمل ہووے گی تے ایس منصوبے لئی ہور اراضی وی دتی جاوے گی۔ اینٹی رائٹ فورس سنے سارے شعبیاں دے افسراں تے اہل کاراں دی ٹریننگ لئی سکول آف پبلک آرڈر قائم کیتا جاوے گا۔جنوبی پنجاب وچ فرانزک لیب دے قیام دی منظوری دے دتی اے جد کہ ضلعی ہیڈ کوارٹر وچ فرانزک لیب دے کولیکشن سنٹر بنن گے۔ وفاقی حکومت دے اشتراک نال سیالکوٹ موٹروے جئے واقعات دے تدارک لئی نویں ہیلپ لائن پہل 911 بنائی جا رہی اے تے ایس ضمن وچ 20کروڑ روپے دی رقم مختص کیتی گئی اے۔ ایس ایچ اوز نوں مالی طور تے بااختیار بنان لئی ڈی ڈی او پاورز دتی گئیاں نیں۔ جنوبی پنجاب وچ ایڈیشنل آئی جی نوں تعینات کیتا گیا اے۔ وزیراعلیٰ عثمان بزدار نے آکھیا کہ انویسٹی گیشن تے کیس دے فالواپ نوں موثر تے بہترین بنایا جاوے تاں جے ظالم نوں سزا ملے تے مظلوم نوں انصاف۔ اوہناں نے آکھیا کہ ا وورسیز پاکستانیز دے مسائل نوں ترجیحی بنیاداں اتے حل کیتا جاوے۔ جرم تے مجرم دی نگرانی تے نشاندہی لئی جدید ٹیکنالوجی خاص طور تے آئی ٹی توں معاونت لئی جاوے۔ محکمہ پلس وچ وی محکمہ تعلیم وانگوں ای ٹرانسفر تے ای پنشن دا نظام رائج کیتا جاوے۔ انسپکٹر جنرل پولیس رائو سردار علی خان نے پلس دی کارکردگی تے اصلاحات بارے بریفنگ دتی۔ وزیراعلیٰ نے چنگی کارکردگی دا مظاہرہ کرن والے پلس افسراں تے اہلکاراں وچ انعامات تقسیم کیتے۔
وزیراعلیٰ پنجاب سردار عثمان بزدار نے ٹھوکر نیاز بیگ دے کول پنجاب فرانزک سائنس ایجنسی وچ تعمیر کردہ جدید سنٹر آف فرانزک سائنسز ٹریننگ لیب دا افتتاح کیتا۔ وزیراعلیٰ عثمان بزدار نے سنٹر آف فرانزک سائنسز‘ ٹریننگ لیب دا دورہ کیتا تے سنٹر آف فرانزک ٹریننگ لیب دے مختلف شعبے ویکھے۔ وزیراعلیٰ عثمان بزدار نے آڈیو‘ ویڈیو لیب‘ ڈی این اے لیب‘ آرمز لیب تے دوجی لیبز دا معائنہ کیتا۔ وزیراعلیٰ عثمان بزدار نے لیبز وچ ٹریننگ دی سٹیٹ آف دی آرٹ سہولتاں نوں سراہیا۔ وزیراعلیٰ سردار عثمان بزدار نے اعلان کیتا کہ پنجاب حکومت پنجاب فرانزک سائنس ایجنسی لئی جدید آلات دی خریداری لئی اک ارب روپے دی سنٹر آف فرانزک سائنسز ٹریننگ لیب ناصرف پنجاب بلکہ پورے پاکستان لئی اک اعزاز اے۔ اک ارب 90کروڑ روپے دی لاگت نال جدید ترین ٹریننگ لیب بنائی گئی اے۔ ایہ منصوبہ کیسز دی جدید انداز وچ تحقیقات وچ معاونت تے شفافیت لئی مثالی حیثیت رکھدا اے۔ ٹریننگ لیب وچ 16جدید ترین فرانزک لیبارٹریاں بنائیاں گئیاں نیں۔ جدید ٹریننگ لیب وچ فرانزک سائنس دے 14 شعبیاں توں متعلق جدید ترین خطوط اتے تربیت دتی جاوے گی۔ فرانزک سائنسدان‘ پولیس پراسیکیوٹرز تے قنون نافذ کرن والے دوجے اداریاں دے افسر تربیت حاصل کر سکن گے۔ اوہناں نے آکھیا کہ پنجاب فرانزک سائنس ایجنسی دا ناصرف پاکستان بلکہ بین الاقوامی سطح اتے منفرد مقام اے تے ایس ایجنسی وچ کیسز دی تحقیقات لئی انتہائی جدید انداز نال کم کیتا جاندا اے۔ سنٹر آف فرانزک سائنسز ٹریننگ لیب لئی سٹاف دی بھرتیاں مکمل ہو چکیاں نیں جد کہ پنجاب فوڈ ڈرگ اینڈ ایگریکلچر اتھارٹی عمارت نوں چھیتی مکمل کیتا جاوے گا جہدے لئی ہر ممکن وسائل دیاں گے۔ سنٹر آف فرانزک سائنسز ٹریننگ لیب وچ خیبر پختوانخوا‘ سندھ تے بلوچستان دے عملے نوں وی تربیت دتی جاوے گی۔ جدید تربیت نال عملے دی استعداد کار وچ وادھا ہووے گا۔ سنٹر آف فرانزک سائنسز ٹریننگ لیب نال پلس‘ پراسیکیوشن تے عدلیہ نوں کیسز دی تفتیش وچ بے پناہ فیدہ پہنچے گا۔ ساڈھے 3سال دے دوران پنجاب فرانزک سائنس ایجنسی نے جدید خطوط اتے تحقیقات کر کے سارے ہائی پروفائل کیسز نوں ٹریس کیتا اے تے ایس ضمن وچ پلس نے وی بڑی محنت نال کم کیتا اے تے کیسز دے ملزماں نوں قنون دے کٹہرے وچ لیایا گیا اے۔
اوہناں نے آکھیا کہ پنجاب فرانزک سائنس ایجنسی دے ڈویژنل سنٹراں نوں فعال کیتا جاوے گا تے جنوبی پنجاب وچ پنجاب فرانزک سائنس ایجنسی دا پراجیکٹ اگلے مالی سال شروع کیتا جاوے گا۔ وزیراعلیٰ نے آکھیا کہ میں ڈی جی پنجاب فرانزک سائنس ایجنسی ڈاکٹر طاہر اشرف تے اوہناں دی پوری ٹیم نوں مبارکباد دینا واں۔ ڈی جی پنجاب فرانزک سائنس ایجنسی نوں سول ایوارڈ لئی نامزد کرن دی سفارش کیتی جاوے گی۔ صوبائی وزیر راجہ بشارت تے ایڈیشنل چیف سیکرٹری داخلہ نے وی ایس ادارے دی استعداد کار ودھان لئی محنت نال کم کیتا اے۔ پنجاب فرانزک سائنس ایجنسی دے سائنسدان تے ملازمین جذبے دے نال اپنے فرائض جاری رکھن‘ حکومت پورا سپورٹ کرے گی۔
وزیراعلیٰ پنجاب سردار عثمان بزدار دی قیادت وچ ریسکیو 1122 سروس دا مرحلہ وار باضابطہ آغاز کردتا گیا اے۔ پہلے مرحلے وچ 11تحصیلاں وچ عوام نوں ایمرجنسی سروس دی بروقت فراہمی لئی 22نویں ایمبولینساں متعلقہ حکام دے حوالے کرن دی تقریب وزیراعلیٰ آفس وچ منعقد ہوئی تے ایمبولینساں دی چابیاں ایمرجنسی آفیسرز نوں دتیاں۔ وزیراعلیٰ عثمان بزدار نے نویں ایمبولینساں دا معائنہ کرن دے علاوہ نویں ایمبولینساں وچ ریسکیو لئی جدید سہولتاں دا مشاہدہ کیتا۔ وزیراعلیٰ عثمان بزدار نے آکھیا کہ پہلے مرحلے وچ شرقپور شریف‘ صفدر آباد‘ نارنگ منڈی‘ نوشہرہ ورکاں‘ نورپور‘ قائد آباد‘ کہروڑ پکا‘ رنالہ خورد‘ پنڈی بھٹیاں‘ دریا خان تے جلال پور پیروالا دی تحصیلاں وچ ریسکیو1122 دا آغاز کیتا اے۔ ہر تحصیل وچ اک ریسکیو سٹیشن‘ 2ایمبولینساں تے 29بندیاں اتے مشتمل ایمرجنسی سٹاف مہیا کیتا جا رہیا اے۔ پہلے مرحلے وچ 11 تحصیلاں وچ عوام نوں ایمرجنسی سروس دی بروقت فراہمی لئی 22نویں ایمبولینساں فراہم کردتیاں نیں۔ ساڈی حکومت نے ریسکیو سروس دا دائرہ کار تحصیل دی سطح تک وسیع کیتا اے۔ پنجاب دی 79 تحصیلاں تے ٹائوناں وچ نویں ریسکیو سٹیشن بنائے گئے نیں۔ اوہناں نے آکھیا کہ ایناں تحصیلاں وچ جون تک ایمرجنسی سروس دا آغاز کردتا جاوے گا۔ ایسے طرحاں ایمرجنسی سروسز نوں ہور منظم کرن لئی ریسیکورز لئی سروس سٹرکچر مرتب کیتا اے تے ہن ریسکیورز ترقی دے موقعے حاصل کر سکن گے۔ پنجاب پاکستان دا پہلا صوبہ ہووے گا جتھے ہنگامی صورتحال لئی ریسکیو ائیر ایمبولینس سروس شروع کیتی جا رہی اے۔ ریسکیو ائیر ایمبولینس دے آغاز نال ریسکیو سروسز نوں نویں شناخت ملے گی۔ ریسکیو ائیر ایمبولینس سروس توں دوردراز علاقیاں تک ریسکیو دا دائرہ کار وسیع ہووے گا۔ ریسکیو ائیر ایمبولینس سروس دا اجرا ویلے دا تقاضا اے۔ اوہناں نے آکھیا کہ ہر انسانی جان قیمتی اے تے بروقت علاج معالجہ ہر فرد دا حق اے۔ ریسیکیو 1122سروس وچ اصلاحات متعارف کران تے ڈائریکٹر جنرل ڈاکٹر رضوان نصیر تے اوہناں دی ٹیم نوں مبارکباد پیش کیتی۔