اقتدار توں نکلن اتے خطرناک ہون دا دعویٰ

عمران خان نوں الیکشن کمیشن دے علاوہ جہڑاخطرہ اے اوہ نواز شریف دی ملک وچ آمد اے

حمید اللہ بھٹی

اتوار نوں تہاڈا وزیراعظم تہاڈے نال عوام دے سوالاں دا براہ راست جواب دیندیاں ہویاں عمران خان نے کئی ایسی گلاں کیتیاں نیں جنہاں توں ایسی افواہاں نوں تقویت ملی اے کہ اپوزیشن دی بے دلی نال چلائی جان والی تبدیلی دی تحریک تے عدم اعتماد جئی آئینی راہ اتے نہ چلن دے باوجود کدھرے تبدیلی دے نکتے اتے کم ہو رہیا اے ایسے لئی وزیراعظم نوں آکھنا پیا اے کہ ا قتدار توں نکلیا تے بوہتا خطرناک ہوواں گا حالانکہ اپوزیشن ولوں کسے وڈی تحریک دی تیاری اتے کم نہیں ہو رہیا نہ ای ان ہائوس تبدیلی وچ سنجیدہ اے فیر وی وزیراعظم کیہڑے اندیشیاں تے خدشات توں پریشان نیں کہ اوہناں نوں اقتدار توں کڈن تے خطرناک ہون دی دھمکی دین دی لوڑ محسوس ہوئی اے۔ ظاہر اے کہ اوہناں دے کول ایسی کجھ اطلاعات ہوسکدیاں نیں جنہاں پاروں اوہ اپنے اقتدار نوں خطرہ محسوس کر رہے نیں وگرنہ ایسا دھمکی آمیز لہجہ کیوں اختیار کردے؟ البتہ حیرانگی دی گل ایہہ ہے کہ اقتدار توں کڈن دا طریقہ کیہ ہووے گا ایہدی کسے نوں سمجھ نہیں آ رہی کیوں جے اپوزیشن ساری کوشش دے باوجود حکومت تبدیل کرن وچ کامیاب نہیں ہو سکی۔ ہن وی زوردار تحریک دی بجائے محض ویلا گزار رہی اے تے عدم اعتماد دی کامیابی دے وی دور دور تک آثار نہیں۔ آ جا کے اک ای طریقہ سمجھ وچ آندا اے کہ عمران خان آپ اسمبلیاں توڑن دا انتہائی فیصلہ کر گزرن۔ بظاہر تبدیلی دا کوئی رستہ سمجھ وچ نہیں آندا۔الیکشن کمیشن وچ بیرونی عطیات دے حوالے نال جاری کیس جیویں جیویں انجام ول ودھ رہیا اے۔ قنونی موشگافیاں نال آشنا ماہرین آکھدے نیں کہ دانستہ طور تے معلومات لکان تے غیر قنونی ذرائع نال عطیات لین دی بنا تے عمران خان دی نااہلی سنے پوری تحریک انصاف دے کالعدم ہون دا خطرہ اے حالانکہ حکمران جماعت نے انکوائری کمیٹی ولوں پیش کیتی گئی رپورٹ دے کجھ نکات الیکشن کمیشن توں صیغہ راز وچ رکھن دی التجا کیتی سی جنہوں الیکشن کمیشن ولوں رد کردتا گیا۔ ایسے لئی حکومتی حلقیاں نوں خدشہ اے کہ الیکشن کمیشن دی دلیری دے پس پردہ کجھ ہو سکدا اے کیوں جے انصاف ہون دی صورت وچ الیکشن کمیشن دا اک فیصلہ ای نہ صرف پوری حکومت نوں رخصت کرن دے نال حکمران جماعت دا نام وی سیاسی افق توں مٹ سکدا اے۔ مگر اقتدار توں نکلن تے خطرناک ہون دی دھمکی الیکشن کمیشن دے حوالے نال ویکھنا قطعی غلط اے۔ انج لگدا اے عمران خان نوں دُجے پاسوںوی خطرے محسوس ہو رہے نیں ایسے لئی اوہ خطرناک ہون دی انتباہ دین دی لوڑ محسوس کرن لگے نیں مگر اوہناں نوں ایہ نہیں بھلنا چاہیدا کہ اقتدار وچ ہوندیاں ہویاں دھمکان یا الزام تراشی کرن توں کسے نوں چنگا پیغام نہیں ملدا بلکہ لوکاں نوں گلاں بنان دا موقع ملدا اے۔
عمران خان نوں الیکشن کمیشن دے علاوہ جہڑا خطرہ اے اوہ نواز شریف دی ملک وچ آمد تے متوقع تحریک اے ایسے لئی پیش بندی دے طور تے کدی میڈیکل رپورٹاں چیک کران دی گلاں کیتیاں جاندیاں نیں تے کدی شہباز شریف نوں دھمکایا جاندا اے تاں جے اوہ خموش رہے حالانکہ فوری طور تے نواز شریف دی آمد دا امکان گھٹ اے البتہ برطانیہ ہور رہن دی اجازت نہیں دیندا تے پاسپورٹ دی تجدید وی نہیں ہوندی تے برطانیہ توں نکلن دے سوا چارہ نہیں۔ جے ایسی صورتحال پیدا ہوندی اے تے اوہناں دی پاکستان واپس آن دے سوا کدھرے جان دی راہواں مسدود ہو جاندیاں نیں۔ ایسا ہون دی صورت وچ عوام دے نکلن دا امکان موجود اے ایہو وجہ اے کہ حکومتی سطح اتے خوف محسوس کیتا جا رہیا اے تے کوشش کیتی جا رہی اے کہ اک تے نواز شریف وطن نہ آئے‘ دوجا شہباز شریف کسے قسم دی تحریک چلان توں باز رہے لیکن ایسا کہن دی بجائے بلیک میلنگ دے حالات بنا کے کم کڈن دی کوشش اے مگر مشیر احتساب شہزاد اکبر دے مستعفی ہون توں بعد ہن بلیک میلنگ دے امکانات وی گھٹ ہو جان گے۔ ایسے لئی اقتدار توں نکلن تے خطرناک ہون دا دعویٰ کرن دی نوبت آئی اے جہڑی حالات نوں مدنظر رکھدیاں ہویاں فضول مشق لگدی اے۔
خطرناک ہون دا دعویٰ کردیاں ہویاں ایہہ نہیں بھلنا چاہیدا کہ اسلام آباد دے دھرنے دے آخری دناں وچ جدوں طاہر القادری وکھ ہوئے تے لوکاں دی حاضری نہ ہون دے برابر رہ گئی سی تے دھرنا صرف شام نوں کجھ لوکاں ولوں عمران خان دی تقریر سنن تک محدود رہ گیا سی۔ شام دی تقریر سنن وی ایس لئی لوکی آ جاندے سن کیوں جے نچن گان جئے تفریح دے موقعے ملدے سن فیر اے پی ایس دا واقعہ ہون نال عمران خان نوں باعزت نکلن دی سہولت ملی۔ ہن جدوں اقتدار توں نکل کے خطرناک ہون دی دھمکی دتی جاندی اے تے ایس دھمکی اتے کوئی وی فہمیدہ شخص یقین کرن نوں ایس لئی تیار نہیں کہ اقتدار وچ نہ ہوندے ہوئے جہڑا کوئی تیر نہیں چلا سکے اقتدار وچ ہو کے وعدے پورے نہیں کر سکے‘ ہن اقتدار توں نکل کے کہڑا معرکہ سر کر سکدے نیں لیکن دھمکیاں دین توں اک گل بحر حل طے ہو گئی اے کہ حکومت شدید دبائو وچ اے ‘ ایس لئی بوکھلاہٹ وچ الٹے سدھے بیان دتے جارہے نیں لیکن بڑھکاں لاندیاں ہویاں ایہ نہیں بھلنا چاہیدا کہ جنہاں نوں پیغام دتا جا رہیا اے اوہناں نوں ایسا نہ وی پیغام دتا جاوے تے اوہ نجی محفلاں وچ ہون والی گلاں توں وی بہت کجھ سمجھ جاندے نیں۔
گل ایہ ہے کہ حکمران اپنے دعویاں نوں پورا کرن وچ ہنوز نکام نیں۔ احتساب دا عمل مخالف سیاستداناں نوں لگام دین تک محدود ہو چکیا اے حالانکہ جے مقدمات بنان توں پہلے تحقیقات اتے دھیان دتا جاندا تے گرفتاری توں پہلے شواہد اکٹھے کر لیتے جاندے تے احتساب دا عمل انج بے توقیر نہ ہوندا تے نہ ای اپوزیشن رہنماواں نوں نیب اتے تنقید دے نشتر چلان دے مواقع ملدے۔ ہن عمران خان چاہے اقتدار توں نکل کے خطرناک ہون دے لکھ دعوے کرن مگر جدوں ایوان وچ بولن دا موقعہ نہ ملن دا شکوہ کردے نیں تے لوکی سمجھ جاندے نیں کہ حکمران نکام ہو چکے نیں۔ ذرا دل اتے ہتھ رکھ کے دسو جہڑا حکومت وچ ہوندیاں ہویاں سارے اختیارات دے باوجود نکام رہوے اوہ اقتدار توں نکل کے کہڑی قسم دی خطرناکی وکھا سکدا اے؟ بظاہر ایہ کوئی چنگی مثال نہیں مگر ایس توں حالات دی بہترین تصویر کشی ہو سکدی اے۔ اک سپ وچ جے زہر نہ رہے تے محض کیچوا رہ جاندا اے۔ زہر توں محرومی مگروں اوہ کسے نوں نقصان پہنچان دے قابل نہیں رہندا‘ تسیں کیہ فرماندے او ایس مسئلے بارے؟