سائیں سردار علی سردار باجوہ

لکھاری:محمدعارف ناز

کوئی وی مقام پان لئی دن رات دی محنت تے لگن دی لوڑ ہوندی اے،شعبہ کوئی وی ہووے اہدے وچ ڈب جاو فئیر ای تہانوں کامیابی تے کامرانی ملے دی اہدے لئی ضروری نئیں بندہ بڑا مالدار ہووے، وڈے شہر وچ جمیا ہووے، بہت وڈی خانوادے نال واسطہ ہووے تے اوہ ای ناں کماندا اے، سچ اے وے شہر گھرانے ہوندے نیں نہ پنڈ گھرانے ہوندے نیں، گھر گھرانے ہوندے نیں،اج میں پنجابی دے بڑے معروف شاعر،عاشق رسول ? دا ذکر کرن جاریاں جنہاں دا ناں سائیں سردار علی سردار اے، اوہناں تحصیل وزیرآباد دے اک قصبے احمدنگر دے نیڑے اک چھوٹے جئے پنڈ ککہ کولو دے اک باجوہ ٹبر وچ 1922 نوں اکھ کھولی بچپن توں ای محنتی سن جو متھ لیندے سن پورا کرن تے تل جاندے سن۔ شاعری ول قدرتی رجحان سی، اللہ دی دتیاں صلاحتاں دا کمال اظہار کیتا۔ اوہناں شاعری نوں ہتھ پایا تے اپنانام پیدا کیتا اوہناں دے چار پنجابی مجموعے چھپے جنہاں وچوں ذکرخیر، دھخدادوھواں، ملنگ دی گودھڑی، ملنگ دی مالا نے،اوناں دی کتاب ”دھخدا دھواں ”دا اک شعر جیہڑا اوہناں دی اس کتاب دے پہلے صفحے تے لکھیا اے سوز فراق تے ہڈیاں بالن دید یار دی بھکھ دا دھواں سیکیں نال پیار دے بہہ کے درد عشق دا دھخدا دھواں”
اوہناں دی ایہہ رباعی مینوں بڑی چنگی لگدی اے
” مندے بول کبول نہ بولیاکرصدا کھسم ناراض بڑھ بولیاں د ے کاں کن کھائے کوئل ٹھنڈ پائے بڑے فرق نے سجناں بولیاں دے
جہیڑیاں کھسم دی وچ رضا چلن کم سور جاندے اوہناں گولیاں دے آپ ہدریاں ہون سردار کھجل شرماں والیاں ہونٹے ڈولیاں دے،”

مینوں یاد اے میں سیالکوٹ ایک مرگ تے گیا تے اوتھے ختم شریف تے اک مولوی صاحب اہناں دا کلام پڑھ رے سن مینوں خوشی ہوئی کہ سائیں ہوراں داکلام ایڈی ایڈی دور پڑھیا جاندااے سائیں ہوراں دی شاعری وچہ بڑی جدت سی اوہناں دی شاعری خالص تے سادی سی، جیدی وجہ توں لوگ چھیتی سمجھ جاندے سن، سائیں ہوری جس پائے دے شاعر سن جے کر اوہ لہور دا رخ کر جاندے کیونکہ لہور شہر فن دا سمندر اے اوتھے تے جہیڑا وی فن لے کے گیا اوہ ای شہرت دی بلندیاں تک پہنچیااے، پر سائیں ہوراں اپنا پنڈنیئں چھڈیا تے ایتھے ای رہ کے شاعری دی دنیا وجہ بڑا ناں پیدا کتیا ککہ کولو وچ اہناں توں علاوہ صوفی عظمت،حوالدار محمددین صادق عبدالحفیظ،صابر بٹ، سادھوگلزار، غلام سرور ککوی، بابا اروڑھ،ہوراں بھی لکھیا اے،ساڈے علاقے دے جانے پہچانے شاعر سلیم دلاوری ہوری آکھدے نیں جد سائیں ہوراں دی زندگی دا چھیکڑ ویلا سی میں روز اہناں نوں ملن جاندا ساں حال پچھدا ساں سائیں ہوراں مینوں کدی وی سلیم نئیں سی آکھیا سلیم صاحب آکھدے سن سائیں ہوراں اک دن مینوں آکھیاسلیم ایہہ نعت لکھنی نہ چھڈیں میں تنیوں پچھے چھڈ چلیاں واں میں پچھیا سائیں جی اینے شاعر نے تے ایہ گل مینوں ای کیوں آکھدے اوہ،تے اوہ آکھن لگے پچھے بس توں کلاں ای ایں اج مینوں احساس ہوندا اے کہ میں واقع ای کلاں رہ گیا واں سائیں ہوری مراز صاحبہ میاں محمددین کلام دے حافظ سن،انج دے لوک ساڈے کولوں لنگھ گے اسی اوہناں دی قدر نہ کرسکے ایہہ اوہناں جیہڑا چانن ونڈیا اے اوہدی روشنی ہمیش قائم رہوے دی،سائیں ہوراں دے ہمصر شاعر ہمیشہ اہناں دی شاعری نوں سراہندے سن، تے آکھدے سن اہناں دا ناں سردار اے، اونج وی سردار اے،سچ وی اے وے کہ سائیں ہوری واقع ای سردار سن،تحصیل وزیر آباد بڑی زرخیز دھرتی اے ایتے بڑے بڑے شاعر جمے نے پرجنہاں لہور جا بسیرا کیتا اوہ بڑے اگے نکل گئے ساڈے قصبے احمدنگردیاں دو ایسی ہستیاں نے لہور دا رخ کیتاتے اج اوہناں دی شہرت نوں چار چن لگ گئے اوہناں وچوں ایک حضرت حفیظ تائب نے جیہڑے نعت گو شاعری وچ اک مقام رکھدے نے اوہناں دی مقبولیت دااے عالم اے کہ اقبال ٹاون وچ ایک سڑک اوہناں دے ناں توں منسوب اے ”حفیظ تائب روڈ”جدکے دوسرا ناں مدثر اقبال بٹ ہوراں دا اے بٹ صاحب نے وی لہور جا کے بڑی محنت تے لگن تو بعد اک مقام حاصل کیتا اج صحافت،کالم نگاری،شاعری دی دنیا اچ اہناں داناں اے، ایناں دی طرح سائیں ہوری وی لہور ہوندے تے فئیر کوئی ہور ای پوزیشن ہونی سی خیر سائیں ہوراں دی کاوشاں نوں سلام پیش کرنے آں سائیں ہوراں دی اولاد وچوں کوئی وی شاعری ول نہیں آیا جد کہ اوہناں دے چلے جان توں بعد اوہناں دی تحریراں نوں کتابی شکل دین وچ اوہناں دی اولاد نے بڑا کم کیتااے،سائیں ہوری 24نومبر 2008 نوں اس فانی دنیا توں کوچ کر گئے اوہناں نوں ککہ تے کولو دے وچکار دفنا دتا گیا جھتے اوہناں دا دربار اے،سائیں ہورا ں دا ہر سال 30نومبر نوں عرس ہوند اے جہدے وچہ پورے پنچاب وچوں شاعر،ادیب تے فنکار آندے نے پروگرام سرگی تک چلدرہندا ے جہدے وچ شاعر اپنا اپنا کلام پڑھدے نے جد کے سائیں ہوراں دے کلام نوں ترجیح دتی جاندی اے،ساری رات کھانا تے چاہ جاری رہندی اے،اہناں تے عرس وچہ ہر سال سیالکوٹ توں اہناں نوں منن والیاں دا یک جتھا بڑے اہتمام نال آوندا اے، سائیں ہوراں دا کلام اج وی علما کرام،نعت خواں حضرات تے قوال پڑھدے نیں میری سائیں ہوراں نال اوہناں دے آخری ایام وچ ملاقات ہوئی بڑے اعلی شخصیت دے مالک سن، سچے تے سوچجھے بندے سن، مہمانداری تے میٹھی بولی اوہناں دی زندگی دا سلیقہ سی اوہناں دا ناں شاعری دی دنیا وچہ ہمیشہ جگ مگ کردا روے دا۔ اللہ تعالی اوہناں نوں بلند مقام عطا کرے ت اوہناں دے کلام نوں زبان زد عام کرے۔