عثمان بزدار 2023 توں بعد……

حسن جلیل

ملک ایس ویلے نازک دور توں لنگھ رہیا اے تے ایہہ کیفیت ملک اتے پچھلے 70 ورھیاں توں طاری اے۔ کدی پڑوس وچ بیٹھے دشمن کولوں وار دا خطرہ تے کدی دور مغرب وچ بیٹھے چالاں بن رہے فریبیاں کولوں ڈر‘ کدی اپنی اندر لکے دوستاں کولوں ڈر جہڑے موقع ملن تے سارا نظام الٹن دے در تے ہون۔ شروع توں لے کے ہن تک اغیار تے اپنے دونویں ای ایس ملک نوں اک وبا وانگوں چمٹے ہوئے نیں تے کسے نا کسے طرحاں ملک اتے اپنی مرضیاں نافذ کرن دی کوشش وچ کجھ نہ کجھ الٹا سدھا چلدا رہندا اے۔ ہن اوہناں دے ایس الٹا سدھا دے چکر وچ ایہہ سارے تے بہت ای اگے نکل گئے نیں مگر پاکستان تے اوہدے عام شہری اوتھے اوسے نازک دور وچ اپنی زندگی گزار رہے نیں۔ کروی کیہ سکدے نیں؟ جنہے وی ہتھ پیر مارو آسے پاسے اینے وڈے شیطان صفت جن بیٹھے ہوئے نیں کہ اوہ تہانوں کجھ بدلن دین گے ای نہیں۔ جناب مثال دے طور تے ایس حکومت نے صرف نظام تعلیم وج کجھ بہتری دے اقدام کیتے تے سرکاری سکولاں دا معیار بہتر کرن دی کوشش کیتی۔ اک مخصوص میڈیا گروپ کھل کے حکومت دے خلاف آ گیا کیوں جے مالکان دا دھندہ تعلیم نال جڑیا ہویا اے تے اوہ نہیں چاہندے کہ اک ایسا نظام تعلیم لیایا جاوے کہ جہدے وچ سرکاری سکول حقیقی طور تے اَپ لفٹ ہون تے عام بندہ اپنے بالاں نوں اوہناں دے سکول توں چک کے ایہناں بہترین سرکاری سکولاں وچ لے جاوے۔ ایس لئی تسیں کوئی نویں تعلیمی پالیسی لیان دی جنی مرضی کوششاں کرو ایہہ تہاڈے اتے
دبائو ودھان گے تے تہانوں مجبور کرن گے کہ تسیں نویں پیکنگ وچ اوہو پرانا چورن ویچو جہڑا کہ پنج ورھے پورے ہون تے منہ اتے کالک ملن دے برابر ہووے گا۔ ایہ مسئلہ صرف تعلیم وچ نہیں اے بلکہ ہر شعبے وچ جتھے وی تسیں اپنی مرضی چلانا چاہو گے ایہہ پرائیویٹ سیکٹر اوہدے وچ اینا سراہیت کر چکیا اے کہ جناب تسیں بس آہ کر کے رہ جائو گے۔ ہن چونکہ ایہہ اک مافیا دی شکل اختیار کر چکے نیںتے ایہہ مافیا گروہ تہانوں کدی ہلن نہیں دینگے۔ ایس لئی سانوں کجھ وی کر کے سب توں پہلے ایہناں کولوں جان چھڈانی ہووے گی۔
عثمان بزدار، عمران خان دے نال ملک وچ تبدیلی دے علمبردار بن کے آئے‘ لوکاں نوں اوہناں کولوں بہت ساری امیداں نیں تے اوہ جاندے نیں کہ جہڑا کم اوہ کر رہے نیں اوہ بالکل ٹھیک اے۔ جے حکومت ہور چلدی اے تے ناصر ف عوام نوں حقیقی ریلیف ملے گا بلکہ عین ممکن اے کہ ملک وی ایس ستر سالہ نازک صورتحال توں نکل آوے۔ ایس لئی اوہناں دی ہن تک دی کارکردگی شاندار اے۔ اوہناں ہن تک جہڑے کم کیتے نیں بلاشبہ پاکستان دی تریخ وچ ایس توں پہلے ایسے کم کسے نے نہیں کیتے تے حالیہ دناں وچ صحت کارڈ دا جہڑا تحفہ اوہناں پورے پنجاب دے لوکاں لئی لے کے آئے اوہ بہت خوش آئند اے۔ من لو حضور دلوں جان لو کہ تسیں ملک دی تریخ بدل رہے او مگر ڈر اے کہ کدھرے تریخ تہانوں نا بدل دیوے! تہاڈے مگروں فیر نظام جے اوہناں چوراں ڈاکوواں دے حوالے ہو گیا تے ملک وچ تباہی تے بربادی دے سوا کجھ نہیں بچے گا۔ ایس لئی ایس مافیا توں بچن لئی کجھ ہور کرنا ہووے گا۔ ہن چونکہ ایہناںلئی لفظ مافیا دااستعمال ہویا اے تے ایہ میں نہیں ساری دنیا ایہناں نوں آکھ رہی اے تے جناب تہانوں ایہناں نال مقابلہ کرن لئی اک مضبوط فورس دی لوڑ اے۔ ویکھو جدوں احتجاج ہوندا اے تے ایہدے لئی انسداد احتجاج فورس سامنے آندی اے۔ معاشرے وچ جرماں دی روک تھام لئی پلس تے بہت ساری فورساں اپنا کم کر رہیاں نیں۔
جناب وزیراعلیٰ عثمان بزدار صاحب اک گل جان لو۔تہاڈی حقیقی دفاعی فورس تے اصل طاقت جتھے تہاڈے لائے ہوئے منصوبے نیں جنہاں دا ثمر تسیں چاہندے او کہ ہمیشہ پنجاب تے پاکستان دی عوام نوں ملدا رہوے تے جناب ایہدے لئی تہانوں ایہناں لوکاں نوں وی ویکھنا ہووے گا جہڑے درحقیقت ایہہ ساری سہولتاں عوام نوں فراہم کرن وچ اپنا کردار ادا کر رہے نیں۔ ایتھے گل ہو رہی ا ے لکھاں سرکاری ملازماں دی جہڑے تہاڈے ہر منصوبے نوں عملی جامہ پہنان لئی دن رات کوشاں نیں تے جاندے نیں کہ تہاڈے منصوبے ملک نوں بدل رہے نیں تے سائیں ایہناں بیچارے ملازماں دے حالات وی بدلن دا سوچو۔ متوازی تنخواہ پیکج لئی ہور کجھ محنت درکار ہووے گی مگرجناب فی الحال جے تسیں ایس بجٹ وچ سارے پے سکیل ریوائیز کردیندے او تے پچھلے کئی سالاں دے ایڈہاک الائونسز نوں بنیادی تنخواہ وچ ضم کر کے اوہناں دی تنخواہ سیکریٹریٹ دے ملازماں دے برابر ناسہی مگر اینا بہتر کردیو کہ ا وہ آسانی نال اپنا گزر بسر کر سکن تے جناب دعاواں تے تہانوں اک پاسیوں ملن گئیاں‘ دوام وی تہانوں ملے گا۔ پچھلے سال تسیں جدوں ایہناں ملازماں نوں خاص گھاس نہیںپائی تے اپوزیشن نے بھرواں ایہناں دا ساتھ دتا تے ایہناں دے اندر حکومت مخالف جذبات اُبھارے۔ زرداری صاحب نے حکومت وچ آ کے سو فیصد اضافے دا لالچ دتا‘ایس لئی ایس سال تسیں ایہناں دا بھلا کرو جہڑے کہ ہر حال وچ تہاڈے حق وچ جاوے گا۔ اگلے سال الیکشن وچ ایہناں لوکاں نے فیر تہاڈا بازو بننا اے ایس لئی اسیں چاہنے آں کہ تسیں 2023مگروں اگلے پنج سال وی اقتدار وچ رہو تے ملک ایس نازک حالات توں نکل کے حقیقی ترقی ول گامزن ہووے۔