قصور تے فیر وی نورجہاں دا اے

سعد اللہ شاہ

ایسے لگتا ہے کسی کا بھی قصیدہ لکھنا
جیسے خود کو ہو کسی آس پہ جھوٹا لکھنا
دست دیگر پہ نہ آ جائیں منافق سارے
میرے دشمن سے کہو سوچ کے دعوی لکھنا
سمجھ وچ نہیں آندا کہ کس رخ توں گل کیتی جاوے۔ اوہ ویلا گیا کہ جدوں حمیت تے غیرت دا عمل دخل بہت سی۔ کیہ کریئے دوست لہجے وچ جہڑی تلخی اے کسے دکھ توں اے۔ سخن دے لہجے توں باہر نکل کے ویکھو تے گل ثقیل ہو جاندی اے۔ سب کھیڈ تماشا ای تے لگدا اے۔ ہر پاسے اک لایعنی صورتحال اے شورشرابا تے بلیم گیم شور باہر دا گھٹ نہیں ہوندا۔ گل باہر دی کیہ سنائی دیوے۔ باقی گلاں تے بعد وچ کراں گے پہلے ذرا حریم شاہ دی ای سن لوو کہ ہولی ہولی اوہدے اندر کناں اعتماد تے حوصلہ پیدا ہو گیا اے تے ایہ سب کجھ اوہنے اپنی صلاحیت نال اشرافیہ تک اپڑ کے ای حاصل کیتا اے۔ اوہدی اک ویڈیو وائرل ہوئی سی جہدے وچ اوہ نوٹاں دے ڈھیر وکھا رہی اے تے دسدی اے کہ اوہ آرام نال کڈھ لیائی اے پر تسیں احتیاط کرنا کہ ایئرپورٹ تے ساریاں دے نال ایہ آسانی نہیں ہوندی۔ یقینا اوہ اک کامیاب آیان علی دے روپ وچ سامنے آئی۔ ایہدے بعد حرکت وچ آن والے حرکت وچ آئے پر اسیں ساری تفصیلی نوں چھڈ دینے آں کہ غیرضروری اے۔ حریم شاہ دا موجودہ بیان بڑا دلچسپ اے کہ شہزاد اکبر نوازشریف دے کیس تے دھیان دین اوہنے آکھیا کہ سچیاں گلاں کوڑیاں ہوندیاں نیں حکومتی نااہلی توں روپیے دی قدر گھٹ ہوئی ایہ اوہنے ایس پس منظر وچ کہیا کہ اوہ اینے نوٹ لے کے آئی پر باہر روپیے نوں کوئی نہیں پچھدا۔ ایویں ای یعقوب پرواز دا مشہور شعر یاد آگیا:
ماضی کا انسان سنا ہے
غیرت سے بھی مر جاتا تھا
میرے پیارے قارئین! تسیں حریم شاہ نوں اک پاسے رکھ دیو تے شہزاداکبر دی کارکردگی دا جائزہ لوو کنے تجزیہ کار نیں جو کھلا ڈلھا ایہہ کہہ چکے نیں کہ شہزاداکبر نے ان گنت کانفرنساں تے کروڑاں روپیے خرچ کیتے پر حکومت نوں اک دھیلے دا فائدہ نہیں ہویا۔ ویلا وکھرا ضائع ہویا۔ ایہ گل خواجہ جواد نے کہی جو پی ٹی آئی دے بڑے اہم رہنما نیں تے پچھلے دیہاڑیاں تے اوہ پھٹ ای پئے تے کہیا کہ اوہ ساڑھے تن ورھیاں توں نکامیاں دی صفائیاں دے دے کے تھک چکے نیں۔ ذرا ہور اگے آئو پی ٹی آئی دے لوکاں نے جلوس کڈھیا تے پیراشوٹرز دے خلاف نعرے لائے یعنی اوہ لوک جو اُتوں نافذ کیتے گئے منتخب تے نظریاتی لوکاں نوں پچھے کر دتا۔ ہن فرنٹ مین نیں‘ منزل اوہناں نوں ملی جو شریک سفر نہیں سن ایہ جو پیراشوٹرز تے گراس روٹرز دا مقابلہ اے ایہ پی ٹی آئی دے اندر اے:
یہ سماعتوں پہ جو شور ہے
یہ ہوائے وقت کا زور ہے
یا مرے ہی دل کا یہ چور ہے
جو چھپا ہے میری ہی گھات میں
اک لمحے لئی ایہ گل من لئی جاوے کہ ساری اپوزیشن چور اے تے اوہ صادق و امین وزیراعظم دے سامنے نہیں ٹھہر سکدی تے فواد چوہدری دا کہنا اے کہ 2008ء توں 2018ء تک 23 ہزار ارب دے قرضے لئے گئے کتھے گئے نال ای اوہناں نے اک ہور گنڈھ لا دتی کہ مہنگائی دا براہ راست تعلق نوازشریف خاندان نال اے۔ مہنگائی گھٹ نہیں کیتی جا سکدی ہن دسو کہ کوئی مسئلہ فیثاغورث یاں جوہری تھیوری نہیں کہ سمجھنی اوکھی اے؟ جے ایہ حقیقت اے تے فیر لوکاں تے ترس آندا اے کہ اینے بے وقوف نیں فیر اوہناں چوراں تے ڈاکوئواں نوں آوازاں دے رہے نیں تسیں ضمنی الیکشن ویکھ لوو‘ کے پی کے بلدیاتی الیکشن دیکھ لوو۔ ایس توں وی پہلاں کنٹونمنٹ انتخابات دے نتیجے‘ کسے ذی شعور توں پچھ لوو کہ پنجاب تے خاص طور تے لہور وچ کیہ صورتحال اے۔ لوک بلدیاتی انتخابات وچ فیصلہ کر دین گے۔ ایہ سب کجھ حکومت دی بری سگوں بدترین کارکردگی دا نتیجہ اے۔ ہن تسیں جو مرضی کہندے رہوو کہ این آر او نہیں دیاں گے ہن تے تہاڈا ایہ تکیہ کلام بچیاں نوں وی حفظ ہو گیا اے کجھ ہور گل کریئے:
جسم کانٹوں سے بھرا ہے میری امیدوں کا
وہ جو اک پھول ہے دیکھیے کھلتا کب ہے
خبر دی تفصیل تے تسیں ٹی وی تے ویکھ سکدے او کہ پاکستانی ڈاکٹر منصور نے یونیورسٹی آف میری لینڈ میڈیکل سنٹر و چ ڈاکٹراں دی ٹیم دے نال رَل کے اک مریض وچ جینیاتی طور تے تبدیل شدہ خنزیر دا دل لا دتا اے۔ ٹرانسپلانٹ دے بعد امریکہ نال تعلق رکھن والے 57 سالہ کے ڈیوڈبینٹ دنیا دے پہلے انسان بن گئے جہناں وچ جینیاتی طور تے تبدیل کیتا گیا خنزیر دا دل لایا گیا اے ایہدے تے اک کروڑ 75 لکھ روپیے خرچا آیا اے ہن ماہرین دے مطابق ہن حیوانی اعضا نوں انساناں لئی ورتن دی راہ سدھی ہو گئی اے ایہنوں قابل فخر گھڑی دسیا جا رہیا اے پر میں سوچنا واں کہ ہن جہڑے جانوراں دی شامت آوے گی اوہ کوئی نہیں جان دا۔ ایتھے تے کسے نے پپیتے دے پتے نوں ڈینگی لئی مفید دس دتا اے تے سارے پپیتے دے رُکھ ٹنڈ منڈ ہو گئے۔ خیر اجے تے دل لئی تے سور ای مارے جان گے۔٭٭