کشمیر۔۔۔ پاکستان دا لازمی جزو

تحریر: مرزا عثمان بیگ

یوم یکجہتی کشمیر ہر سال 5فروری نوں پورے پاکستان تے پوری دنیا وچ مقیم پاکستانی تے کشمیری بڑے جوش و خروش نال مناندے نیں۔ 5فروری نوں پاکستان وچ سرکاری تے نیم سرکاری سطح اتے مختلف پروگراماں دا انعقاد کیتا جاندا اے۔ سڑکاں اتے ریلیاں کڈی جاندیاں نیں تے اپنے کشمیری بھین بھراواں دے نال ااظہار یکجہتی کیتا جاندا اے۔
پاکستان وچ پہلی واری ایس دیہاڑنوں منان لئی امیر جماعت اسلامی قاضی حسین احمد نے 1990وچ ایہ مطالبہ کیتا کہ کشمیریاں نال تجدید عہد لئی اک دن مقرر کیتا جاوے۔ قاضی حسین ا حمد دے مطالبے نوں نہ صرف پنجاب‘ وفاق بلکہ باقی صوبیاں نے وی اہمیت دتی تے پہلی واری ایہ 5فروری 1990نوں منایا گیا۔
یوم یکجہتی کشمیر توں پہلے تھوڑی مسئلہ کشمیر دے بارے وچ گل کرنی ضروری اے۔ پاکستان تے بھارت وچ مسئلہ کشمیر ای اوہ واحد مسئلہ اے جنہے دونواں ملکاں نوں کئی واری جنگ وچ الجھایا اے۔ ایہ مسئلہ اوس ویلے تک سمجھ نہیںآ سکدا جدوں تک کہ ایہدا پس منظر نہ بیان کیتا جاوے۔
ریاست جموں کشمیر برصغیر دی انتہائی شمال وچ کوہ ہمالیہ دے تھلے تے وسطی ایشیا دے جنوبی سرے اتے واقع اے۔ ایہدا رقبہ 84000مربع میل تے آبادی اک کروڑ 35ہزار لکھ اے۔ ایہ چار ملکاں چین‘ افغانستان ‘ پاکستان تے بھارت وچ گھریا ہویا اے ایہدے سارے دریا پاکستان وچ بہندے نیں۔ ایہدی راویتی شاہراواں ریاست وچ داخل ہون لئی پاکستان توں ای جاندیاں نیں۔ کشمیر دا کثیر حصہ پاکستان نال ملدا اے۔
وادی کشمیر جہڑی اپنی خوبصورتی دے اعتبار نال دنیا بھر وچ مشہو راے۔ ریاست دی کل آبادی دا اسی فیصد مسلمان نیں تے ایہ مذہبی‘ ثقافتی تے خونی رشتیاں دے اعتبار نال پاکستان لئی شہ رگ دی حیثیت رکھدی اے۔ پاکستان تے کشمیر وچ اقتصادی تعلقات وی قائم نیں۔ 192دے کول ملک ایسے نیں جہڑے رقبے وچ کشمیرتوں گھٹ نیں جد کہ آبادی وچ ایہ نوے دی تعداد وچ نیں۔
1846 وچ ریاست جموں کشمیر نوں ایسٹ انڈیا کمپنی نے صرف 75لکھ روپے وچ راجا گلاب سنگھ دے ہتھوں فروخت کردتا۔ راجا دی وفات مگروں اوہدا پتر ہری سنگھ ایہدا جان نشین بنیا تے ایتھوں کشمیر وچ آباد مسلماناں دے نال ہندوواں دے ناروا سلوک دی شروعات ہوئی۔
جون 1947وچ تقسیم ہند دے منصوبے دا اعلان ہویا تے ایہدے تحت سارے ریاستی حکمراناں نوں ایہ اختیار دتا گیا کہ اوہ پاکستان یا بھارت جہدے نال چاہن الحاق کر لین۔مگر کشمیر دے غیر مسلم راجہ نے ریاست وچ ہندو تے سکھ جماعتاں دے ذریعے مسلماناں دا قتل عام شروع کرا دتا۔ جہدے نتیجے وچ مسلماناں نے راجا دے ظلم و تشدد دے خلاف علم بغاوت بلند کردتا تے کشمیر دے تقریباًاک تہائی رقبے اتے 24ا کتوبر 1947 نوں قبضہ کر کے آزاد کشمیر دے نام نال اپنی وکھری حکومت بنائی۔ تراڑحیل نویں حکومت دا صدر مقام تے سردار ابراہیم صدر مقرر ہوئے۔ 26 اکتوبر 1947 نوں مہاراجہ وادی کشمیر توں نس گیا تے اوہنے جموں وچ پناہ لیتی۔ اوتھوں اوہنے بھارتی گورنر جنرل مائونٹ بیٹن نوں خط لکھیا جہدے وچ اوہنے کشمیر وچ بھارتی فوج دے دستے گھلن دی درخواست کیتی۔ نیز بھارت دے نال الحاق کرن اتے وی رضامندی دا اظہار کیتا۔ 27اکتوبر نوں بھارتی حکومت نے مہاراجہ دی پیشکش نوں قبول کر کے بھارتی فوج دے دستے کشمیر وچ بھیج دتے جہدے نتیجے وچ پورا کشمیر جنگ دی لپیٹ وچ آیا۔ اکتوبر تے دسمبر 1947 وچ آزاد کشمیر دی فوجاں نے بڑی کامیابی دے نال بھارتی فوج دی مزاحمت کیتی۔
70سال توں ودھ عرصہ گزر جان دے باوجود کشمیری آزادی لئی اج وی جدوجہد کر رہے نیں۔ بھارتی ظلم پوری دنیا دے سامنے نیں۔ بھارت ویسے تے دنیا دی سب توں وڈا جمہوری ملک ہون دا دعویدار اے مگر کشمیر اتے زبردستی اپنا تسلط قائم کیتا ہویا اے۔
پاکستان دنیا بھر دے مظلوم عوام دے حق خودارادیت تے آزادی دا حامی اے۔ آزادی ہر بندے دا بنیادی حق اے فیر کشمیر تے ایہدا اپنا مسئلہ اے۔ جدوں تک ایہ حل نہیں ہوندا اوہدوں تک پاکستان کشمیریاں دے حق خودارادیت دی حمایت جاری رکھے گا۔
ہر سال لکھاں کشمیری اپنی جاناں دا نذرانہ پیش کردے نیںمگر دنیا دی انسانی حقوق دی تنظیماں دے کن اتے جوں تک نہیں رینگدی۔اج دے زمانے وچ انسانی حقوق دی تنظیماں پوری دنیا وچ امن و بھائی چارے دا پیغام دیندیاں نیں مگر کشمیریاں لئی کسے دی کوئی قرارداد کوئی آواز کم نہیں آندی۔ انسانی حقوق دی ساری تنظیماں تے اقوام متحدہ دی قرارداداں دے باوجود بھارت اپنی ہٹ دھرمی اتے قائم اے۔ بھارتی فوج دے ودھدے ظلم تے کشمیریاں اتے ظلم و ستم پوری دنیا دی تنظیماں تے اقوام متحدہ دی انسانی حقوق دی تنظیماں دے منہ اتے اک زور دی چپیڑ اے۔
مسئلہ کشمیر کئی واری اقوام متحدہ وچ پیش ہویا تے کئی قرارداد وی منظور ہو چکیاں نیں مگر مسئلہ کشمیر دا کوئی حل نہیں نکل سکیا۔مسئلہ کشمیر اقوام متحدہ دی قرارداداں دے مطابق حل ہونا چاہیدا اے۔ اسیں اپنے کشمیری بھراواں دی اخلاقی‘ سفارتی مدد جاری رکھاں گے۔ بھارت نوں چاہیدا اے کہ نہتے کشمیریاں اتے ظلم و ستم بند کرے۔ پچھلے کئی ورھیاں توں کئی ماواں دی گود اجڑ گئی‘ کئی زنانیاں دے سہاگ اجڑ گئے۔ کئی بچے بچپن وچ ای یتیم ہوگئے مگر کوئی وی شے کشمیریاں دی جدوجہد نوں گھٹ نہ کر سکی۔ بھارت اج وی اپنی ہٹ دھرمی اتے قائم اے۔
سنا ہے بہت سستا ہے خون وہاں کا
اک بستی جسے لوگ کشمیر کہتے ہیں
انشاء اللہ اک دن کشمیریاں نوں آزادی ضرور ملے گی تے بھارتی مظالم توں نجات ملے گی۔اوہ دن دور نہیں جدوں بھارتی تسلط توں آزادی نصیب ہووے گی۔پاکستان تے پاکستانی قوم کشمیری عوام دے دکھ سکھ نال کھڑے نیں۔جدوں تک کشمیریاں نوں اوہناں دا حق نہیں مل جاندا پاکستان سفارتی تے بین الاقوامی فورماں اتے کشمیر دا مسئلہ چکدا رہوے گا۔ مسئلہ کشمیر پاکستان دی خارجہ پالیسی دا اہم حصہ اے تے پاکستان نے ہمیشہ پوری دنیا وچ اپنے کشمیری بھراواں لئی آواز اچی کیتی اے تے بھارتی مظالم پوری دنیا دے سامنے کھل کے بیان کیتے نیں۔