جماعت اسلامی تے اوہدے امیرصاحبان

طلعت عباس خان

جماعت اسلامی پاکستان بنن توں پہلاں دی اے۔ قیام 16اپریل 1948ء نوں عمل وچ آیا۔ جماعت اسلامی لوکاں نوں پوری زندگی وچ اللہ تے اوہدے رسولؐ دی پیروی اختیار کرن دی دعوت دیندی اے۔ منافقت تے شرک چھڈن دی تلقین کردی اے۔ ایہناں گلاں تے جماعت دے لیڈرز تے عمل کردے نیں پر اجہے عہدیداراں تے ورکراں دی گنتی گھٹ اے۔ ایہناں سارے رہنماواں تے جماعت دا اصل رنگ ویکھیا جاندا ہوندا تے اج ایہ سیاسی جماعت ملک دی سب توں وڈی پارٹی بن چکی ہوندی۔ جماعت دے اوہ ہیرو جہناں نوں مل کے دل خوش ہویا اوہناں وچ پروفیسر غفور احمد‘ قاضی حسین احمد تے سیدمنورحسن دے ناں سرفہرست نیں۔ ایہ صاحب کردار سن جو دنیا توں جا چکے نیں پر دلاں وچ اج وی وسدے نیں۔ سیدمنور حسن نے 1977ء دے الیکشن وچ پورے پاکستان وچ سب توں ودھ ووٹ لے کے قومی اسمبلی دے ممبر منتخب ہوئے اوہناں دی بیوی وی ممبر قومی اسمبلی رہ چکیاں نیں۔ سیدمنور حسن ویہہ ورھے جماعت اسلامی دے سیکرٹری جنرل تے پنج ورھے امیر جماعت رہے۔ جدوں اوہ امیر جماعت اسلامی سن تے پُتر دی دعوت ولیمہ دا پربندھ کیتا۔ جتھے پروہنیاں دی خاطرتواضع سموسیاں‘ پکوڑیاں تے چائے نال کیتی گئی حالاں کہ ولیمے وچ وزیراعظم‘ گورنر‘ وزرائے اعلیٰ تے اعلیٰ حکام شریک سن۔ ایسے طرح جدوں دھی دا ویاہ کیتا تے ڈھیر سارے تحفے ملے جو سارے چک کے جماعت اسلامی دے بیت المال وچ جمع کرا دتے۔ ساری عمر اپنے سوہریاں دے دتے گئے سو گز مکان وچ گزارے۔ اوہناں دا جنازہ وی ایسے مکان توں اٹھایا گیا ہمیشہ پبلک ٹرانسپورٹ تے سفر کردے رہے۔ جے جماعت دے کسے کم تے کدھرے جانا ہوندا تے پارٹی دی گڈی د ااستعمال کردے ایس طرح کپڑیاں دے تن چار جوڑے رکھدے سن۔ اوہناں نوں بدل بدل کے پاندے رہندے جہدی وجہ نال ایہ پرانے لگن لگدے پر کیہ مجال کہ بناں ضرورت نویں کپڑے خریدن دا سوچیا ہووے۔
آخری عمر وچ آپ ستاراں ہزار روپیاں دے مقروض سن ایسے فکر وچ پریشان رہندے کو کوئی وسیلہ بن جاوے کہ دنیا تو ںرخصت ہون توں پہلاں میں ایہ قرض ادا کر سکاں تے ایہدے وچ کامیاب وی ہوئے۔ ہر نماز دے بعد چہرہ اتھروئواں نال تر ویکھیا جاندا جو ایہ سوچدے نیں کہ سیاست بڑا اوکھا کم اے ایہدے لئی ان گنت پیسہ چاہیدا اے پر جدوں سوگز دے مکان وچ رہن والیاں نوں اسمبلی وچ ویکھنے آں تے سوچ بدل جاندی اے کہ انج ممکن اے۔ جس بندے دے قول و فعل وچ تضاد نہ ہووے لوک اوہدے دوالے آپ ای اکٹھے ہو جاندے نیں۔ جماعت دی خوبی ایہ رہی اے کہ انساناں لئی ویلفیئر دے کم کردے رہندے نیں ہسپتال بناندے نیں‘ مشکل گھڑی وچ امدادی کماں وچ وی ودھ چڑھ کے حصہ لیندے نیں۔ اوہناں توں ایس گل تے اختلاف اے کہ ایہ کالجاں‘ یونیورسٹیاں وچ طلباء تنظیماں وچ پائے جان والے تشدد تے اوناں دا کنٹرول کیوں نہیں۔ ماردھاڑ وچ حصہ کیوں لیندے نیں ایہ وی تے ہو سکدا اے بناں لڑے خدمات نبھان پر اکثر ہر ورھے طالب علماں وچ جدوں وی جنگ وجدل ہوندی اے اوہناں دی جماعت اوہدے وچ شامل ضرور ہوندی اے۔ ایس تنظیم وچ برداشت دا مادہ پیدا کر کے ایس جنگ نوں روکیا جا سکدا اے۔ جماعت وچ ورکراں دی کمی نہیں جو پڑھ لکھ کے اک چنگا شہری بنن دے خواب سجائے تعلیمی اداریاں وچ پڑھن آندے نیں۔ کیہ لڑے بناں اپنی جنگ ایہ جت نہیں سکدے ایہدے تے دھیان دیو۔
مینوں قاضی حسین احمد دے نال مل بیٹھن دا اتفاق رہیا آپ سنن دی طاقت رکھدے سن۔ غصے تے کنٹرول سی‘ غلطیاں تے یقین رکھدے سن‘ سچے کھرے انسان سن‘ اسلام دیاں دسیاں گلاں تے عمل کردے۔ اسلام تے عمل کرن وچ اوہدے تے کسے پیسے دی لوڑ نہیں ہوندی سگوں سوچ تے عمل دی ضرورت چاہیدی ہوندی اے۔ کاش ایس جماعت وچ تشدد دا عنصر ختم ہو جاوے تے ایہ جماعت سب توں وڈی سیاسی پارٹی بن سکدی اے۔ ایس جماعت نوں ایس ویلے کالجاں‘ یونیورسٹیاں تے بار کونسلاں‘ بار ایسوسی ایشناں وچ کم کرن دی ڈاڈھی لوڑ اے۔ ایہناں نوں چاہیدا اے کہ نوجواناں دی تربیت تے زور دین۔ لڑائی جھگڑیاں توں ایہناں نوں دور رکھن۔ کدی پنجاب یونیورسٹی وچ تے کدی اسلامک یونیورسٹی وچ طلباء دے وچکار جنگلاں ویکھن وچ آندیاں نیں۔ ایہ سلسلہ فوراً بند کیتا جاوے ایہدے نال کوئی چنگا پیغام نہیں جاندا۔ بار کونسلاں تے بار ایسوسی ایشناں وچ وی میرٹ تے حصہ لین۔ نویں وکیلاں نوں غلط کماں توں دور رکھن۔ ہر صورت وچ الیکشن نوں جتن دا سلسلہ بند کرن۔ کریکٹر تے وضع داری تے زور دین غلط طریقیاں نال الیکشن جتن توں گریز کرن۔ چھوٹے وڈے دا احترام سکھایا جاوے۔ ملکی لیول تے ایشو تے دھڑن دین۔ سندھ دے کالے بلدیاتی قنون تے دھرنا دتا جا رہیا اے پر منی بجٹ توں مہنگائی دے بمب ڈگن نال لوکاں دی زندگی تنگ ہو چکی اے اوتھے چپ اے دھرنے نہیں دے رہے تھوڑا ایس پاسے وی دھیان دیو۔ ایہ جماعت چنگے کم کر رہی اے پر ہور چنگے کم کرن دی گنجائش موجود اے ۔ اک پرانا قصہ اے فاختہ تے گدھ اک رُکھ تے بیٹھے سن۔ فیر اک شکاری وکھائی دتا۔ فاختہ نے گدھ نوں کہیا اڑ جائیے۔ گدھ نے کہیا میں تے حرام آں مینوں کیوں مارے گا اینے وچ شکاری نے گدھ نوں اپنا نشانہ بنایا گدھ زخمی ہو کے ڈگ گیا فاختہ گدھ دے کول آئی کہ میں کہندی سی کہ اڑ جائیے۔ ایتھے حرام حلال نہیں ویکھیا جاندا‘ موٹا مال ویکھیا جاندا اے پیارے۔٭٭