جیون جوبن رُت بہار
خالد حسین تھتھال
جیون جوبن رُت بہار
جوبن لُوں لُوں وچ خمار
تھل بریتے بیلے دریا
جیون پربت ساگر
جیون چھپر کُلی جھُگی
منھے منڈپ ماڑی محل
سوکے سئیاں لُواں کانگاں
جھکھڑ گڑے مینہہ پھوار
جیون جوبن رُت بہار
جوبن لُوں لُوں وچ خمار
جیون اپنا آپ ملاحظہ
اپنا آپ اُ دھیڑن سیون
تن من اندے پاون
مُڑ مُڑ مجھو واہ وچوں کڈھ کے
بیڑی دندے لاون
گھاٹے وادھے مار
جیون جوبن رُت بہار
جوبن لُوں لُوں وچ خمار
اپنی مٹی آپے گو کے
چاک چڑھا کے
بھٹھی تا ء کے ،آپے اپنا آپ پکا کے
آپوں چا کے، لیاؤنا وچ بزار
جیون جوبن رُت بہار
جوبن لُوں لُوں وچ خمار
جیون دُکھ سُکھ چنتے چاء
وین واجے شگن سنبھال
جیون گھڑی گھڑی بھچال
جیون مستی مدھ دھمال
لے لگن دی وجے تار
جیون جوبن رُت بہار
جوبن لُوں لُوں وچ خمار
جیون میل مکاؤنی میلے
موج مہماں مانگھے
وختاں ویہنیں ڈُبنا ترنا
ورتن بھاجی مرنا پرنا
اپنی آپ گھڑولی بھرنی
اپنا رانجھا راضی کرنا
کجھ وس وچ کجھ وسّوں باہر
جیون جوبن رُت بہار
جوبن لُوں لُوں وچ خمار
