وزیراعلی پنجاب عثمان بزدار دا صحت دے میدان وچ وَڈا کارنامہ

تحریر:عفیزا اعجاز بٹ

انصاف صحت کارڈ اک تریخی اقدام اے تے ایس طرحاں دی سہولتاں فلاحی ریاست وچ ای میسر ہُندیاں نیں۔ ڈیرہ غازیخان تے ساہیوال دی ڈویژن وچ ایہ سہولت پہلے فراہم کیتی جا چکی اے۔ وزیر صحت ڈاکٹر یاسمین راشد نے آکھیا کہ صحت دی سہولتاں سب توں اہم نیں۔ انصاف صحت کارڈ دا سلسلہ جنوری 2019نوں راجن پور توں شروع ہویا تے ایہدا اختتام لہور وچ جنوری 2022وچ ہویا۔ ایس ویلے 52لکھ کارڈاں نوں 52لکھ خانداناں وچ تقسیم کیتا جا چکیا اے۔ انصاف صحت کارڈ اوہناں لوکاں وچ تقسیم کیتے گئے جہڑے غربت دی سطح توں تھلے نیں۔ ایہناں 52 لکھ خانداناں وچوں اج دے دن تک ست لکھ خانداناں نے ایس کارڈ راہیں اپنا علاج کروایا۔ وزیراعظم عمران خان دے ایس مشن اتے عملدرآمد کردیاں ہویاں وزیراعلیٰ پنجاب نے کارڈ دی تقسیم نوں جاری رکھیا کہ عوام ایس توں ودھ توں ودھ فیدہ چک سکن۔ وزیراعظم دامشن اے کہ صحت دی سہولتاں پہلے دتیاں جاون۔ ایس توں اگلا قدم ہے کہ ایس سال دے شروع وچ ایس کامیاب پروگرام نوں ہور ودھایا جاوے گا۔ ایس سہولت توں عوام بہت خوش اے کہ ایس واحد حکومت نے آندے ای سب توں پہلے
صحت نوں مدنظر رکھیا تے بہتر توں بہتر اقدامات کیتے نیں۔ ایس توں پہلے کسے حکومت نے اینے انقلابی فیصلے نہیں کیتے۔ انصاف صحت کارڈ دے حوالے نال KPKتوں جدوں بہترین نتیجے آنا شروع ہوئے تے وزیراعظم نے ایس گل نوں ضروری سمجھیا کہ ایس پروگرام نوں ہور کامیاب بنان لئی صوبہ پنجاب وچ وی کارڈاں نوں تقسیم کیتا جاوے۔ کارڈ غربت والے علاقیاں وچ پہلے تقسیم کیتے گئے جنہاں وچ ڈی جی خان ڈویژن تے ساہیوال سو فیصد خانداناں نوں کارڈ دے کے تقریباً 85 لکھ خانداناں وچ تقسیم کر دتے گئے۔ انصاف صحت کارڈ پاروں پرائیویٹ سیکٹر اتے بہت اثر ہویا۔ ایس پروگرام وچ پرائیویٹ سیکٹر نے وی انویسٹ کرنا شروع کر دتا۔ تن کروڑ خانداناں نوں کارڈ مل گئے۔ ہر خاندان ایہدی سہولت توں فیدہ چک سکے گا۔ ایس توں پہلی حکومتاں دی گل کیتی جاوے تے صحت دے حوالے نال کوئی منصوبہ تے دور دی گل کوئی پالیسی نہیں بنائی گئی لیکن موجودہ دور حکومت نے ایس بارے سوچیا کہ صحت نوں زیادہ اہمیت دتی جاوے۔ ایہہ واحد حکومت اے جنہے بوہتی اہمیت صحت نوں دتی کیوں جے عوام دی صحت وچ ملک دی بہتری اے ایس لئی وزیراعظم نے صحت کارڈ نوں متعارف کروایا کہ عوام ایس سہولت توں مستفید ہو سکے۔ ایسے بہت سارے وڈے وڈے ملک نیں جہڑے اکانومی لیول وچ بہت چنگے نیں۔ اوہ وی اپنی عوام نوں ایسی سہولت نہ دے سکے۔ وزیراعلیٰ پنجاب سردار عثمان بزدار نے رات دن اک کر کے ایس پروگرام دی سہولت نال عوام نوں مستفید کیتا۔ اک معاشرہ کنا صحت مند اے۔ ایہدا اندازہ معاشرے دے لوکاں دی صحت تے اوہناں نوں دستیاب سہولتاں توں بخوبی لایا جا سکدا اے۔ پچھلے سالاں وچ ودھدی ہوئی آبادی تے ماحولیاتی آلودگی کارن کئی مہلک امراضاں نے جنم لیا اے جہدے کارن اک وڈی گنتی وچ بندے متاثر ہو رہے نیں۔ ایہناںبیماریاں دے علاج تے معالجہ دے اخراجات چکنا غریب بندے دے وَس وچ نہیں رہیا۔ غریب طبقے دی ایہناں مشکلاں نوں پیش نظر رکھدے ہوئے موجودہ حکومت نے انصاف صحت کارڈ دا آغاز کیتا اے۔ سردار عثمان بزدار نے وزیراعظم دے حکم نال پنجاب دی عوام لئی صحت اتے بوہتا دھیان دین نوں آکھیا جہدے لئی وزیراعلیٰ نے تعلیم‘ صحت‘ عوام دی فلاح و بہبود‘ سماجی مساوات‘ انصاف تے وسائل دی یکساں تقسیم نوں آئین پاکستان تے پاکستان تحریک انصاف دے منشور دا حصہ قرار دتا۔ جس طرحاںدُجے منصوبیاں وچ وزیراعلیٰ پنجاب نے اپنے وعدے پورے کیتے ایسے طرحاں صحت دے منصوبے وچ وی اپنا وعدہ پورا کیتا۔ پنجاب وچ صحت انصاف کارڈ دا آغاز ہو چکیا اے۔ صحت کارڈ بہترین اقدام اے جہدے بدولت پنجاب دی عوام نوں 10,10لکھ دی انشورنس ہووے گی۔ کورونا دی صورتحال پاروں حکومت نوں بہت سارے مسئلے درپیش سن۔ لیکن سارے چیلنجاں نال لڑدیاں ہویاں حکومت ثابت قدم رہی تے عوام دی صحت نوں مدنظر رکھیا۔ موجودہ دور حکومت وچ سب توں ودھ صحت اتے غور کیتا گیا۔ جے پچھلی حکومت دی صحت دے حوالے نال گل کیتی جاوے تے اوہناں دا بجٹ 179 ارب روپے سی تے موجودہ حکومت دا صحت دا بجٹ 399 ارب روپے اے۔ انصاف صحت کارڈ دا آغاز پنجاب دی دو ڈویژن وچ ہو چکیا اے تے باقی ست ڈویژناں وچ وی صحت کارڈ تقسیم کیتے جا رہے نیں۔ انصاف صحت کارڈ دے علاوہ صحت دے شعبے وچ کئی اہم اقدامات کیتے گئے نیں جنہاں توں عوام نوں بہت فیدے ہوئے نیں۔ خصوصی طور تے کورونا ویکسی نیشن مہم وی انتہائی کامیابی نال چلائی گئی تے ایہدے مطلوبہ نتائج حاصل کیتے گئے۔ محکمہ صحت پنجاب وچ کورونا وبا دی دوجی تے تیجی لہر دے دوران دستیاب ڈیٹا دی مدد نال اندازہ لایا کہ کورونا پاروں مسئلیاں دا شکار ہون والے 65 فیصد بندے اوہ نیں جنہاں نے ویکسی نیشن نہیں کرائی تے ایس مقصد لئی پنجاب حکومت نے گھٹ ویکسی نیشن دی شرح والے شہراں وچ کورونا ویکسی نیشن دی خصوصی مہم دا آغاز کیتا ۔ جہدے تحت محکمہ صحت دی ٹیماں گھر گھر جا کے شہریاں نوں کورونا ویکسی نیشن دی ترغیب دیندی اے تے اوہناں دے گھر دے کول کول جگہ اتے کورونا ویکسی نیشن دا انتظام کیتا گیا اے۔ راولپنڈی وچ وی کورونا ویکسی نیشن دے گھر گھر مہم دا آغاز کیتا گیا تے دومرحلیاں وچ چلائی گئی ایس مہم دے تحت راولپنڈی دی 70فیصد آبادی توں ودھ آبادی نوں کورونا ویکسی نیشن لائی گئی۔ کورونا دے آغاز وچ ای وزیراعظم دی ہدایت اتے راولپنڈی وچ یورولوجی اینڈ لیورٹرانسپلانٹ نوں کورونا ہسپتال وچ تبدیل کیتا گیا تے ایتھے جدید ترین سہولتاں مہیا کیتی گئیاں۔ ایسی طبی سہولتاں وفاقی دارالحکومت اسلام آباد تے راولپنڈی شہر دے نجی ہسپتالاں وچ وی موجود نہیں سن۔ ہن ایس ہسپتال دی بطور یورولوجی اینڈ لیو ٹرانسپلانٹ کرن دا عمل وی جاری اے تے امید اے چالو سال ایہ ہسپتال پوری صلاحیتاں دے نال اپنا کم شروع کر دیوے گا۔ 36 ڈسٹرکٹ دے اندر تن کروڑ خانداناں وچ ساڈھے گیارہ کروڑ عوام نوں ایہ سہولت میسر اے۔ پنجاب حکومت ہیلتھ سیکٹر وچ بہت زیادہ کم کر رہی اے۔ تقریباً 25ہسپتال بنائے گئے نیں۔ ایس دے علاوہ سوشل سکیورٹی انسٹی ٹیوشن نے 9ہسپتال بنائے جہدے وچ قصور ڈیرہ غازی‘ فیصل آباد‘ تونسہ‘ کوٹ لکھپت‘ ملتان وغیرہ شامل نیں۔ حکومت پنجاب جہڑے ہسپتال شروع کر رہی اے اوہناں وچ میانوالی‘ اٹک‘ گنگارام ہسپتال لہور‘ بہاولنگر‘ لیہ‘ نشتر‘ 2شیخ زید 2‘ کارڈیالوجی ڈیرہ غازیخان‘ نیورولوجی‘ 2گوجرانوالہ ٹیچنگ ہسپتال‘ 1000بیڈ لہور دے ہسپتالاں لئی‘ 3ایمرجنسی 1000بیڈ لہور وچ بنن جا رہے نیں۔ بہاولپور چلڈرن ہسپتال‘ بہاولپور بون میروٹرانسپلانٹ سنٹر‘ پی کے ایل آئی دی تکمیل‘ ڈی ایچ کیو ملتان‘ فیصل آباد‘ وزیرآباد انسٹیٹیوٹ نوں فنکشنل کرنا‘ ڈی ایچ کیو چکوال‘ حافظ آباد‘ کوہ سلیمان ڈی ایچ کیو‘ چائلڈ ہیلتھ یونیورسٹی آف لہور‘ ڈینٹل کالج آف لاہور‘ ڈینٹل کالج راولپنڈی‘ چنیوٹ‘ سکھر‘ بہاولنگر‘ ملتان‘ راجن پور وغیرہ شامل نیں۔ ایس دے علاوہ 158مرکز صحت نوں اپ گریڈ کردتا گیا اے تے 78نویں سہولتاں فراہم کیتیاں جا رہیاں نیں۔ 91 سکیماں پروگرام ڈسٹرکٹ دے اندر صحت سیکٹر دی امپلیمنٹ ہو رہی اے۔ صحت کارڈ خاندان دے سربراہ نوں فراہم کیتا جاوے گا۔ خاندان دے بندیاں دی گنتی دی کوئی حد نہیں۔ایس صحت کارڈ نال مفت علاج ہووے گا تے ایہدے سارے زیر کفالت اہل خانہ ایہدے توں مستفید ہو سکن گے۔ صحت کارڈ ہر شادی شدہ مرد نوں فراہم کیتا جاوے گا۔ جہدے توںایہدی بیوی تے غیر شادی شدہ بچے وی مستفید ہون گے۔ طلاق شدہ یا بیوہ خاتون نوں وی خاندان دا سربراہ تصور کردے ہوئے ایہدے زیر کفالت غیر شادی شدہ بالاں نوں وی ایہ سہولت میسر ہووے گی۔ نادرا دے ریکارڈ وچ کسے وی کوتاہی یا غلطی دی صورت وچ شہری ایس سہولت توں مستفید نہ ہو سکن گے لہٰذا ضروری اے کہ پہلی فرصت وچ نادرا وچ اپنا ریکارڈ درست کیتا جاوے۔ 18 سال توں گھٹ عمر بالاں دا ب فارم لازمی طور تے موجود ہووے تے جہڑے بچے 18سال توں ودھ عمر دے نیں اوہناں دا اپنا شناختی کارڈ ہونا ضروری اے۔ صحت کارڈ لئی 440 ارب روپے رکھے گئے نیں جہدے وچ پنجاب دی عوام لئی مختص کیتے گئے نیں۔سارے قومی اخباراں وچ اشتہاراں دے زریعے سارے اضلاع دے اوہناں ہسپتالاں دے نام دتے جا چکے نیں جتھے صحت کارڈ دے ذریعے علاج و معالجہ دی سہولت حاصل کر سکن گے۔ جنہاں دا صحت کارڈ بن جاوے گا تے اوہدا اٹھ لکھ دا مفت علاج ہووے گا۔ ایہدے نال نال 60 ہزار روپے امداد وی دتی جاوے گی۔ جہڑے ہسپتال وچ علاج ہووے گااوتھے کرایہ وی معاف ہووے گا۔ ایہ سہولت صرف ہسپتال وچ داخلے دی صورت وچ ای میسر ہووے گی۔ ایس دے علاوہ ٹول فری نمبر 080009009 اتے کال کر کے وی معلومات حاصل کیتی جا سکدی اے۔ نیشنل ڈیٹا بیس اینڈ نادرا ولوں فراہم کیتے گئے ڈیٹا دے مطابق فراہم کرے گی‘ ایس لئی سارے شہریاں لئی ضروری اے۔ نادرا وچ اپنے درست ریکارڈ دی موجودگی یقینی بناوے۔ لہور ڈویژن وچ انصاف صحت کارڈ دی تقسیم دا عمل شروع ہو گیا تے ایہ یقینی طور تے اہل لہور لئی نویں سال دا تحفہ اے۔ حکومت پنجاب ولوں 51 لکھ خاندان صحت کارڈ وصول کر چکے نیں۔ حکومت پنجاب ولوں دوجے مرحلے وچ ابتدائی طور تے باقی لوکاں نوں وی سہولت کارڈ مل جان گے۔ ایہدے مگروں سرکاری ملازمین مدارس وچ پڑھن والے طلبا‘استاد وغیرہ نوں وی صحت کارڈ دتے جان گے۔ ایہ حکومت پنجاب دا بہترین اقدام اے جہڑی پنجاب دی عوام لئی چنگی خبر اے۔صحت کارڈ دی معلومات ویب سائٹ دے ذریعے وی حاصل کیتی جا سکدی اے تے ایہدے لئی رجسٹریشن کیویں کردے نیں ایہ سارا طریقہ کار وی موجود اے یا تصدیق لئی 8500 تے اپنا قومی شناختی کارڈ نمبر ایس ایم ایس کرو تے معلومات حاصل کر سکدے او۔ وزیراعلیٰ پنجاب سردار عثمان بزدار نے خصوصی لوکاں نوں وی مدنظر رکھیا تاں جے اوہ وی ایس صحت کارڈ توں فیدہ چک سکن۔ وزیراعلیٰ پنجاب سردار عثمان بزدار نے انٹرنیشنل ڈے دے موقع تے خصوصی (Special) لوکاں دی موجودگی وچ 70 ہزار توں ودھ خانداناں دے علاج معالجے لئی صحت کارڈ تقسیم کیتے جہدے پاروں 10,000,00 روپے وچ اپنے ملک دے کسے وی قریبی ہسپتال وچ مفت علاج کروا سکدے او۔ایس موقع تے سردار عثمان بزدار دے نال وزیر صحت ڈاکٹر یاسمین راشد‘ سپیشل ایجوکیشن دے منسٹر محمد اخلاق (SHC) نبیل احمد اعوان شامل سن۔ صحت کارڈ دے ذریعے امراض قلب‘ ذیابطیس تے ایسے امراض جنہاں لئی ہسپتال وچ داخل ہونا ضروری اے۔ ایس اعصابی نظام دا علاج‘ گردیاں دی بیماریاں دا علاج‘ پیوندکاری تے دوجے امراض دا علاج‘ سڑک دے حادثے دا علاج‘ کالے یرقان دا علاج‘ کینسر داعلاج ایہ اوہ ساری بیماریاں نیں جنہاں دا علاج صحت کارڈ نال ممکن اے۔ مقرر کردہ ہسپتال وچ پہنچدے ای صحت سہولت پروگرام دا نمائندہ ہسپتال دے اندر استقبال کرے گا تے رہنمائی لئی موجود ہووے گا۔ نمائندہ تہاڈے قومی صحت کارڈ دی جانچ مگروں تہانوں متعلقہ شعبے دے متعلق رہنمائی کرے گا۔ داخلی علاج دی صورت وچ مریض نوں کرائے دی مد وچ 1000ہزار روپے دتے جان گے جہڑے کہ اک سال وچ ودھ توں ودھ تن واری ادا کیتے جان گے۔ عوام دی سہولت لئی انصاف صحت کارڈ موبائل اپیلی کیشن صوبہ بھر وچ متعارف کروا دتی گئی اے۔ نویں سال دے آغاز وچ موبائل اپیلی کیشن دا اجرا کردتا گیا اے تے ایہدی رجسٹریشن دا عمل صوبے بھر توں جاری اے۔ بھرویں عوامی پذیرائی تے صوبے بھر توں رجسٹریشن دا عمل جاری اے جہڑا 7جنوری2022تک 86,409صارفین دی رجسٹریشن مکمل ہو چکی اے۔ وزیراعلیٰ پنجاب سردار عثمان بزدار ولوں تے محکمہ خزانہ دی سرپرستی وچ کمیٹی بنان دا حکم دتا گیا جہدے وچ صحت کارڈ اتے علاج تے ہسپتالاں دے بلاں دi سکروٹنی کرے گا۔ آئندہ وی عوام ایس اپیلی کیشن توں فیدہ چکدی رہی اے۔ عوام وزیراعلیٰ دی بہت شکرگزار اے کہ اوہناں نے عوام دی صحت دے بارے سوچیا تے ایہ سب توں پہلا قدم جہڑا اے اوہ پہلا قطرہ اے جہڑا انشاء اللہ دریا بنے گا کیوں جے باقی منصوبیاں وانگوں ایس پروگرام دے تحت عوام نوں غربت دی سطح توں اتے لیایا جاوے گا۔