وزیراعلیٰ پنجاب سردار عثمان بزدار دی اعلیٰ کارکردگی

پنجاب سبھ توں وَڈا صوبہ اے تے ایہدے انتظامات سامبھنا وی اوکھا کَم اے،لیکن عثمان بزدار نے ثابت کیتا کہ او ایس کرسی دے اہل نیں

عتیق انور راجہ

پنجاب دے لوکی وَڈے دل والے نیں۔ ایتھے دے نوجوان محنتی نیں۔ جے ویکھیا جاوے تے باقی صوبیاں وچ سیاسی بیان بازی اتے ای بوہتا زور لایا جاندا رہیا اے جد کہ پنجابی ہمیشہ وانگوں محنت تے لگن نال دھرتی نوں سنوار رہے نیں۔ پنجابی قوم قدیم ترین تہذیب و تمدن رکھدی اے۔ ایتھے دے لوک مہمان نوازی تے چنگے سلوک پاروں اک خاص شہرت رکھدے نیں۔ اپنے وطن دی حفاظت لئی ہر ویلے تیار نظر آندے نیں۔ پنجاب دی مخصوص رہتل‘ قدراں تے روایتاں ای ایہنوں دنیا وچ منفرد بناندیاں نیں۔ ساڈی زبان و ثقافت ساڈی طاقت اے جہدے اتے سانوں فخر ہونا چاہیدا اے۔ اپنے پنجابی ہیروواں نون سراہن وچ سانوں کوئی شرمندگی محسوس نہیں ہونی چاہیدی بلکہ اوہناں دی بہادری اتے فخر کرنا چاہیدا اے جنہاں نے سامراج دا جوانمردی نال مقابلہ کیتا۔ کجھ دن پہلے انسٹی ٹیوٹ آف پبلک اوپی نے پاکستان دے چار صوبیاں دے وزرائے اعلیٰ دی کارکردگی بارے نواں سروے جاری کیتا اے۔ ایس سروے دے مطابق وزیراعلیٰ پنجاب سردار عثمان بزدار 3سالہ کارکردگی دے لحاظ نال سارے وزرائے اعلیٰ توں اگے نیں۔ سروے دے مطابق پنجاب دے 45 فیصد رائے دہندگان نے کارکردگی دے لحاظ نال سردار عثمان بزدار نون سب توں بہترین وزیراعلیٰ قرار دتا اے۔ خیبر پختوانخوا دے وزیراعلیٰ محمود خان دُجے‘ سندھ دے وزیراعلیٰ مراد علی شاہ تیجے تے بلوچستان دے وزیراعلیٰ میر عبدالقدوس بزنجو چوتھے نمبر تے رہے۔ خیبر پختوانخوا دے 41فیصد نے وزیراعلیٰ محمود خان‘ سندھ دے 38 فیصد نے وزیراعلیٰ مراد علی شاہ تے بلوچستان دے 32فیصد رائے دہندگان نے وزیراعلیٰ بلوچستان عبدالقدوس بزنجو دے حق وچ رائے دتی۔ سروے ہوندے رہندے نیں تے اوہناں دا مقصد مختلف ویلیاں وچ مختلف لوکاں یا حکومتاں دی کارکردگی بارے عوامی رائے حاصل کرنا ای ہُندا اے۔ لوکی اجیہی سروے رپورٹاں بارے مختلف رائے رکھدے نیں۔ کجھ لوکی جنہاں نوں سردار عثمان بزدار دے نام توں چڑ اے اوہ ایس سروے توں بالکل خوش نظر نہیں آندے نیں لیکن اج جے ایس سروے توں ہٹ کے ویکھیا جاوے تے اک گل کھل کے سامنے آندی اے کہ پچھلے تن سالاں وچ وزیراعلیٰ پنجاب سردار عثمان بزدار نے تعلیم‘ صحت تے عوامی فلاح دے دوجے بہت سارے منصوبیاں دا اجرا کر کے تے عوام دی آسانی دے پیش نظر بنیادی ضرورت دی سہولتاں دی فراہمی وچ وی دوجے وزرائے اعلیٰ دے مقابلے بہت زیادہ کم کیتا اے۔ کجھ لوکاں دے خیال وچ پنجاب عثمان بزدار دی قیادت وچ درست سمت گامزن اے۔ ایہناں تناں سالاں وچ کورونا وبا نے جس طرحاں دنیا نوں متاثر کیتا بالکل اُنج ای پنجاب دے لوکی وی ایس وبا دے ہتھوں بے وَس نظر آئے لیکن ایس سب دے باوجود پنجاب دے لوک اپنی حکومت دے ہر حکم اتے عمل کیتے جاندے رہے نیں۔ عمران خان دی ایس گل نال مکمل اتفاق اے کہ قنون دی حکمرانی دے بغیر ملک کمزور ہوندے نیں تے معاشی کمزوری آئی ایم ایف جئے اداریاں دی ایسی شرطاں تسلیم کرن تے مجبور کر دیندی اے جو ملک دی سلامتی دے حوالے نال درست نہیں ہُندیاں۔ ایتھے سوال تے ایہہ اے کہ قنون دی حکمرانی انتظامی اداریاں دے ذریعے حکومت یقینی بناندی اے لیکن موجودہ دور وچ کیہ ایس حوالے نال کجھ کم ہویا اے؟ بدقسمتی نال ایسا نہیں ہویا بلکہ ایس حوالے نال موجود ابتری وچ ہور وادھا ہویا اے۔ کوئی وی گروہ اٹھ کے جدوں چاہوے ریاست نوں اپنی شرطاں اتے تصفیے اتے مجبور کر سکدا اے۔ علاوہ ازیں پاکستان بار بار قرض لین لئی آئی ایم ایف دی کڑی شرطاں تسلیم کرن اتے مجبور اے مگر ایسی معاشی پالیسی دا اجرا نہیں ہو سکیا جہدے توں عالمی مالیاتی اداریاں دے چنگل توں آزادی مل سکے۔ اجے حال ای وچ اک ارب پنج کروڑ ڈالر دی قسط لین دے عوض اسٹیٹ بینک نوں خودمختاری دتی گئی تے ٹیکساں وچ وادھا کیتا گیا اے جہدے توں عام تے غریب بندے اتے بجھ ہور ودھ گیا اے۔ جانے قومی سلامتی پالیسی بناندے ہوئے ارباب اختیار ایس اہم پہلو نوں کیوں نظر انداز کر گئے؟ علاوہ ازیں وسائل دی غیر منصفانہ تقسیم احساس محرومی پیدا کردی اے جہڑی شہری نوں ریاست توں متنفر کرن دا کارن بندی اے۔
پاکستان نے ہمیشہ بھارتی خطرے نوں مدنظر رکھدیاں ہویاں فوجی توازن قائم رکھن دی کوشش کیتی۔ ہن وی ایس پہلو نوں نظرانداز نہیں کیتا جا سکدا لیکن دونواں ملکاں دے جوہری طاقت بنن نال براہ راست ٹکرائو دا امکان گھٹ ہو گیا اے۔ ایسے لئی بھارت خطریاں دی نوعیت بدل رہیا اے۔ ہن اوہ پاکستان نوں اندرونی طور تے غیر مستحکم کرن دی کوشش وچ اے۔ ایہدے لئی کدی افغانستان تے کدی ایران دی سرزمین استعمال کردا اے۔ روسی حملے نال سرحدی خطریاں دے نال منشیات تے اسلحہ کلچر آیا فیر جہادی گروہ خطرہ بنے۔ مگروں امریکی آئے تے ملک تے معاشرے نوں ہور نویں تنازعیاں نے گرفت وچ لیتا۔ کدی روس تے بھارت دونویں سانوں نقصان پہنچان دے حوالے نال اک سن۔ ہن روس دے بجائے بھارت دی امریکہ نال شراکت داری اے۔ مقصد دنیا دے واحد اسلامی جوہری ملک نوں اندرونی طور تے غیر مستحکم بنا کے ایٹمی اثاثیاں توں محروم کرنا اے۔ ایف اے ٹی ایف ولوں مسلسل گرے لسٹ وچ نام رکھنا ایسے شراکت داری دا کمال اے لیکن ہمہ پہلو خارجہ پالیسی نہ ہون پاروں اسیں اج وی ایہ طے نہیں کر سکے کہ ساڈی منزل کیہ اے بلکہ فیصلے کردیاں ہویاں کسے نہ کسے عالمی طاقت ول ویکھنے آں جہدے توں قومی سلامتی نوں لاحق خطریاں وچ کمی نہیں آ رہی۔
پنجاب پاکستان وچ سب توں ودھ آبادی والا صوبہ اے ایس لئی ایتھے بوہتے مسئلے سامنے آن دے امکانات ہُندے نیں لیکن باقی صوبیاں دے مقابلہ وچ پنجاب ایس آفت توں بہتر طور تے عوام نوں محفوظ رکھن لئی کم کردا نظر آ رہیا اے۔ ایس نقطے نوں سارے مندے نیں کہ پنجاب وچ کورونا دے حوالے نال حکومتی اقدامات بہت حوصلہ افزا رہے نیں۔ ایس سارے عمل وچ وزیراعلیٰ پنجاب عثمان بزدار بہت متحرک تے فعال نظر آندے نیں تے ویکھیا جاوے تے سارے صوبیاں دے وزرائے صحت وچ پنجاب دی وزیر صحت ڈاکٹر یاسمین راشد سب توں ودھ متحرک رہیاں نیں لیکن کجھ لوکاں نے سوچ رکھیا اے کہ اوہناں نے ہر حال وچ مخالفت دے رستے اتے چلنا اے۔ میں آکھنا واں کہ پنجاب دے رہنماواں نوں دوجے صوبیاں خاص کر سندھ دے لیڈراں کولوں ایہہ پچھنا چاہیدا اے کہ اوہ ترقیاتی کماں دے نام تے فنڈز ہڑپ کر کے اپنی عوام نوں کدوں تک احساس محرومی دا شکار رکھن گے تے پچھلے پنج عشریاں توں مختلف رنگاں نال سندھ اتے حکومت کرن والی پیپلز پارٹی نے سندھ تے خاص کر لاڑکانہ وچ حالات جنوبی پنجاب دے برابر وی کیوں نہیں کر سکی اے۔ کیوں سندھ وچ اَج وی عوام دی معیار زندگی باقی صوبیاں توں تھلے اے۔ ہُن الیکشن دا ویلا کول آ رہیا اے تے بہت سارے لوک بہت سارے نویں نویں نعریاں دے نال میدان وچ نکل پین گے لیکن عثمان بزدار صاحب جے تسیں ایسے ویلے اپنی کارکردگی اتے ای دھیان رکھدے او تے اگلے الیکشن وچ جت تہاڈی پکی ہوسکدی اے۔ تسیں پنجابیاں دے دل جتن لئی پنجابی زبان نوں سکولاں وچ پڑھن تے دفتراں وچ پنجابی وچ گل بات کرن دی روایت شروع کر سکدے او۔