بس سانوں بھُل جان دی عادت اے

شکیل امجد صادق

اک بادشاہ نے اعلان کر رکھیا سی کہ جہڑا چنگی گل کہوے گا اوہنوں چار سو دینار دتے جان گے اک دن بادشاہ رعایا دی دیکھ بھال کرن نکلیا اوہنے ویکھیا اک 90 سال دی بڈھی عورت زیتون دے پودے لا رہی اے۔ بادشاہ نے کہیا تسیں پنج دس ورھیاں وچ مر جاویں گی تے ایہ رُکھ ویہہ ورھے بعد پھل دین گے تے اینی مشقت کرن دا کیہ فائدہ؟ بڈھی عورت نے جواباً کہیا جو اسیں پھل کھادے اوہ ساڈے وڈیاںنے لائے سن تے ہن اسیں لا رہے آں تاں جے ساڈی اولاد کھاوے۔ بادشاہ نوں اوس بڈھی عورت دی گل پسند آئی حکم دتا ایہنوں چار سو دینار دے دتے جان جدوں بڈھی عورت نوں دینار دتے گئے اوہ مسکران لگی بادشاہ نے پچھیا کیوں مسکرا رہی ایں؟ بڈھی عورت نے کہیا کہ زیتون دے رُکھاں نے ویہہ ورھے بعد پھل دینا سی جد کہ مینوں میرا پھل وی مل گیا اے۔ بادشاہ نوں اوہدی ایہ گل وی چنگی لگی تے حکم جاری کیتا ایہنوں ہور چار سو دینار دتے جان جدوں اوس عورت نوں ہور چار سو دینار دتے گئے تے اوہ فیر مسکران لگی۔ بادشاہ نے پچھیا ہن کیوں مسکرائی ایں؟ بڈھی عورت نے کہیا زیتون دا درخت پورے سال وچ صرف اک واری پھل دیندا اے جد کہ میرے درخت نے دو واری پھل دے دتا اے۔ بادشاہ نے فیر حکم دتا ایہنوں ہور چار سو دینار دتے جان ایہ حکم دیندیاں ای بادشاہ تیزی نال اوتھوں ٹر گیا۔ وزیر نے کہیا حضور تسیں چھیتی کیوں نکل آئے؟۔بادشاہ نے کہیا جے میں ہور اوس عورت دے کول رہندا تے میرا سارا خزانہ خالی ہو جاندا پر عورت دیاں حکمت بھریاں گلاں ختم نہ ہوندیاں۔
اک ساڈے حکمران جہڑے زیتون دا پودا لاندے نیں نہ ای اوہناں دے کند ذہن وچ کدی کوئی گل بہترین قول یاں زندگی نوں بدل دین والی گل کیتی ہووے۔ اوہناں نے جدوں وی گل کیتی اپنے مفادات دی گل کیتی۔ اوہناں نوں جدوں وی گل کیتی سابق حکومتاں نوں چور‘ کرپٹ تے بے ایمان ثابت کرن دی کیتی اے۔ حالاں کہ ایہ سارے دا سارا ٹولا پچھلیاں حکومتاں وچ وی وزیر‘ مشیر تے کرتا دھرتا رہیا اے۔ تریخ تے آئینہ جھوٹ نہیں بولدے۔ بس سانوں بھل جان دی عادت اے۔ تریخ دسدی اے۔ ہوا بازی دے وزیر سرور خان نیں 1985ء توں 1988ء تے 1990ء وچ ایہ پاکستان پیپلزپارٹی دے ایم پی اے منتخب ہوئے۔ 1997ء وچ پاکستان پیپلزپارٹی دے ٹکٹ تے الیکشن لڑے پر ہار گئے۔ 2004ء وچ شوکت عزیز دی کابینہ وچ محنت تے افرادی قوت دے وزیر سن۔ ہن کہندے نیں کہ ساڈا تے کوئی قصور نہیں ملک تے پہلے والیاں نے تباہ کیتا سی۔ خسرو بختیار صاحب اکنامک افیئرز دے وفاقی وزیر نیں۔ 1997ء وچ پاکستان مسلم لیگ ن وچ سن۔ 2002ء وچ ق لیگ دے ٹکٹ تے ایم این اے بنے۔ شوکت عزیز دی کابینہ وچ امورخارجہ دے وزیر مملکت سن۔ 2013ء وچ فیر پاکستان مسلم لیگ ن وچ شامل ہوگئے۔ 2018ء وچ پی ٹی آئی وچ جا بیٹھے ہن اوہناں دا وی ایہو خیال ہووے کہ ملک تے پہلے والیاں نے ایس حال تک اپڑایا۔
صاحبزادہ محبوب سلطان وی وفاقی وزیر نیں۔ 2002ء تے 2008ء دا الیکشن ق لیگ دے ٹکٹ تے لڑیا۔ 2013ء دے الیکشن وچ اپکستان مسلم لیگ ن دے امیدوار سن۔ 2018ء وچ پی ٹی آئی اوہناں دی منزل مراد بن گئی تے اوہناں دی خدمات دے صلے وچ اوہناں نوں وفاقی وزارت عطا فرما دتی گئی۔ اوہناں دا وی ایہو خیال ہووے گا کہ سارا ستیاناس تے پہلے والیاں نے کیتا سی۔ فواد چوہدری جہڑے سائنس اینڈ ٹیکنالوجی دی وزارت وچ نیں پر دوجے ملک سیٹلائٹ دا ڈیٹا خرید کے اپنا سیٹلائٹ نہیں بناندے۔ ایہدی مدد نال عیداں تے چن چڑھاندے رہندے نیں۔ مشرف دی آل پاکستان مسلم لیگ وچ سن۔ فیر پی پی پی تے بہار آئی تے اوہدی شاخ تے جا بیٹھے۔ ہن اوہ پی ٹی آئی دے سدابہار ملک الشعراء نیں۔ ذرا پچھ کے ویکھو اوہ تہانوں دسن گے کہ ساریاں خرابیاں پہلے والیاں نے پیدا کیتیاں سن۔ انوارالحق قادری وفاقی وزیر برائے مذہبی امور نیں۔ زرداری دور وچ قادری صاحب زکوٰۃ و عشر دے وفاقی وزیر سن۔ اینے نظریاتی واقع ہوئے کہ پی پی پی نے اوہناں نوں بناں کسے محکمہ دے وزیر وی بنائے رکھیا تے اوہ بدمزہ نہ ہوئے۔ اوہناں نوں وی یقینا شرح صدر ہووے گا کہ خرابی تے ساری پہلے والیاں نے کیتی سی۔۔
محمد میاں سومرو الیکشن والے سال پی ٹی آئی دا حصہ بنے۔ ایس ویلے وفاقی وزیر نیں۔ اوہ چیئرمین سینٹ قائم مقام وزیراعظم تے صدر وی رہ چکے تے مشرف دور وچ گورنر سندھ۔ ایس لئی اوہ زیادہ بہتر طریقے نال دس سکدے نیں کہ ملک تے پہلے والیاں نے تباہ کیتا سی۔ موجودہ حکومت دا تے کوئی قصور نہیں۔ عمرایوب وفاقی وزیر نیں 2002ء دا الیکشن ق لیگ دے ٹکٹ توں لڑیا۔ شوکت عزیز دی کابینہ وچ وزیر مملکت رہے۔ 2012ء وچ ن لیگ وچ چلے گئے۔ الیکشن تو ںکجھ مہینے پہلاں پی ٹی آئی وچ شامل ہو گئے۔ اک صدر مملکت دے پوترے تے وزیر خارجہ دے صاحبزادہ ہون دے ناطے اوہ وی دس سکدے نیں کہ ملک پہلے والیاں نے خراب کیتا ساڈا کیہ قصور اے۔ سید فخرامام وفاقی وزیر نیں۔ سابق سپیکر تے قائد حزب اختلاف وی رہ چکے نیں۔ اوہناں دی بیوی نوازشریف دور وچ وزیرخارجہ رہ چکیاں۔ ایہ وی تہانوں دس سکدے نیں کہ ملک تے پہلے والیاں نے خراب کیتا سانوں تے اقتدار وچ آئے اجے دو ورھے وی نہیں ہوئے اسیں ستر ورھے دا گند دو ورھیاں وچ کیویں صاف کر سکنے آں؟ طارق بشیر چیمہ صاحب وی وفاقی وزیر نیں۔ سیاسی سفر وچ اوہ پی پی پی وچ رہے‘ ق لیگ وچ رہے۔ بہاولپور دے ناظم رہے‘ ایم پی اے رہے پنجاب دے وزیر خوراک و زراعت رہے۔ 2016ء وچ ق لیگ دے سیکرٹری جنرل سن۔ ہن اوہ وی شاید کہندے ہون گے کہ سانوں تے دو ورھے ہوئے نیں آئے ہوئے ملک تے پہلے والیاں نے لٹیا۔
شیخ رشید 1985ء تے 1988ء‘ 1990ء 1993ء تے 1997ء دے انتخابات وچ کامیابی نوازشریف دے دور وچ مشیر اطلاعات و نشریات فیر وزیر صنعت و حرفت اضافی چارج سیاحت و ثقافت۔ 2002ء وچ پاکستان مسلم لیگ ق وچ وزیر اطلاعات فیر وزیر ریلوے۔ 2013ء وچ ایم این اے‘ موجودہ وزیر داخلہ۔ ایہناں توں پچھن دی وی لوڑ نہیں کہ تباہی وچ کہدا ہتھ اے۔ اعظم سواتی وی وفاقی وزیر نیں۔ یوسف رضا گیلانی دی حکومت وچ وی صاحب وفاقی وزیر سن۔ باقی دی ساری داستان توں تسیں واقف ای ہوو گے۔ زبیدہ جلال‘ فروغ نسیم‘ فہمیدہ مرزا‘ عبدالحفیظ شیخ ورگیاں دی تے گل ای کیہ‘ اجے تے مشیران تے وزرائے مملکت دی فہرست وی باقی اے پر فیر وی ایہ گل تسلیم تے سر اکھاں تے کہ پہلے والیاں نے ملک لٹ لیا تے ایہناں دا کھلاریا گندا دو ورھے وچ صاف نہیں ہو سکدا پر عالی جاہ ایہ تے دس دیو اوہ پہلے والے کون سن تے ایہ جو کابینہ وچ نیں ایہ کیہ بعد والے نیں؟ بقول خوبصورت لہجے دے جدید شاعر ڈاکٹر صغیراحمد صغیر
امیر ِ شہر کو جا کے کوئی خبر کر دے
ترے سبب سے ہی سارا نگر پریشاں ہے