اقتدار دیاں راہداریاں توں
حناپرویزبٹ
کوچہ اقتدار دیاں راہداریاں وچ موت ورگا سناٹا چھا چکیا اے الوداعی گھڑی دی سیکنڈ دی سوئی دی ٹک ٹک وی واضح طور تے گونجنا شروع ہو گئی اے۔ صاف نظر آ رہیا اے کہ عوامی اوکڑاں تے پریشانیاں دے نال نال مسلط زادیاں دے وی دن گنے جا چکے نیں۔ فریقین اپنیاں اپنیاں صفاں ترتیب دے کے طے کر رہے نیں کہ کس طرح پیش قدمی کرنی اے۔ اقتداری موم بتی بجھن توں پہلاں تیزی نال پھڑپھڑا رہی اے۔ ساریاں دے چہریاں تے سوگ نمایاں ہو چکیا اے کجھ موسمی بٹیرے ڈبدی بیڑی توں چھال مارن دی تیاری وچ نیں۔ بہت ساریاں نوں متبادل بیڑی والے لفٹ کروان دے موڈ وچ نہیں۔ سونامی توں مخالفین نوں دھمکان والیاں دے گلے وچ جدوں آپ کیتی کمائی خالص بدنامی تے نااہلی دا بھاری بھر کم طوق پیا تے اوہناں دے سارے ای طوطے اڈ گئے نیں۔ انج کناں اذیت ناک ہوندا اے کہ مشکل وقت وچ نہ کوئی بھائی نال ہووے تے نہ ای کوئی تہاڈا نام لیوا ہووے‘ ایتھے تے ہر کوئی ایہدی لنکا ڈھان لئی ثبوتاں سنے تیار کھلوتا اے۔
ذریعاں دا کہنا اے کہ چوکھی تنقید دے ڈر توں قومی اسمبلی وچ بولن دی جرأت کرن دی تھاں خالہ جی دے گھروں آخری وار دھماچوکڑی کر دتی لفظاں نوں بے آبرو کرکے اپنا ای سافٹ ویئر ایناں وائرس زدہ کر چکیا اے کہ خطاب دوان نہ زبان ساتھ دے رہی سی نہ بیان تے نہ ای چہرے دے جذبات‘ ایہ تے ہونا ای سی کیوں جے نفرت دا بیں بون تے منافقت دی راہ اپنائے جان دا انجام بخیر ہونا ممکن ای نہیں۔ پہلے دن توں ہر تقریر دا موضوع نوازشریف تے حملے توں شروع ہو کے نوازشریف دی سیاست دے اختتام تے ای ختم کیتا جانا طے ہویا سی۔ سوچیا سی کہ مقامی توں لے کے بین الاقوامی میڈیا تک نوازشریف دے تعلقات نوں سرے توں ای ختم کیتا جاوے گا۔ اخلاقیات دی ریڈلائن پار کرکے لہور توں لندن شریف خاندان نوں زچ کیتا گیا۔ کلثوم نواز دی موت نوں جس طرح نال متنازعہ بنان دی بھیانک کوشش کیتی گئی اوہ ساریاں نوں یاد اے۔ توقع کیتی گئی سی کہ سختیاں تے عدالتی کاروائیاں توں گھابر کے میاں نوازشریف اپنے ٹبر سنے سیاست نوں ہمیشہ لئی خیرباد کہہ دین گے تے اوہناں دی پارٹی دی نویں پیکنگ کر دتی جاوے گی پر مسلط زدہ سیٹ اپ جیویں جیویں لوکاں لئی کڑوی دوا بن دا گیا اویں اویں میاں نوازشریف دی مقبولیت واپس آندی گئی۔ سونے تے سہاگہ اودوں ہویا جدوں غیرمتوقع طور تے میاں نوازشریف نثاری انتظام دے تحت جھوٹی سزا بھگتن لئی دھی دے نال لندن توں پاکستان واپس آ گئے۔ ایہ عمل اوہناں لئی ترپ دا پتہ ثابت ہویا دنیا وچ میاں نوازشریف تے مریم نواز دے ایس عمل نوں بہادرانہ فعل قرار دتا گیا مریم نواز نے جس طرح مردانہ وار اوہناں دا مقابلہ کیتا اے اوہ تریخ وچ سنہرے حرفاں وچ لکھیا جاوے گا۔
خلاف توقع نہ ن لیگ ٹُٹ سکی تے نہ نویں پیکنگ ہو سکی۔ ہن صورتحال ایہہ وے کہ اک پاسے جواری گروہ اپنی مصدقہ کرپشن دی دلدل چوں بچن لئی ہتھ پیر مار رہیا اے تے دوجے پاسے ن لیگی لشکر جعلسازاں نوں تنکیاں وانگوں بہان نوں بے تاب کھڑا اے۔ مہنگائی توں تنگ عوام جھوٹے بھاشناں تے یقین کرن دے موڈ وچ نہیں نفرت دی سیاست اپنے منطقی انجام ول اگے ودھ رہی اے۔ مورخ لکھے گا کہ پہلے جدوں نوازشریف نوں اقتدار توں بے دخل کیتا گیا تے اوہ بزنس مین توں سیاستدان بنے‘ دوجی واری اوہ رہنما دے روپ وچ ڈھل گئے۔ تریجی واری اوہ مقبولیت دے کوہ ہمالیہ تے جا بیٹھے ہن اوہ حقیقی عوامی سنہری نظریہ بن چکے نیں۔ مورخ ایہ وی لکھے گا کہ میاں نوازشریف نوں گران دی کوشش وچ اوہناں دے کجھ مخالفین سیاست دی صف توں ای مٹ گئے۔ دلاں دے بادشاہ دا سیاسی قد ایناں ودھ چکیا اے کہ آمد دا اعلان ہوندیاں ای لوکاں دا جم غفیر نوازشریف دا سواگت کرن ایئرپورٹ امڈ آوے گا تے بینظیر بھٹو دے تریخی استقبال دا ریکارڈ ٹُٹ جاوے گا۔٭٭
