پاکستانیاں لئی خوشخبریاں

لکھت: حسن جلیل

کجھ دن پہلاںماشاء اللہ سویرے سویرے اللہ دی رحمت ویکھن نوں ملی، معلوم ہویا کہ ساری رات بارانِ رحمت وسدا رہیا ، میں تاں شکر ادا کیتا کہ کئی دناں توں جاری کھنگ تے ہور مسئلیاں توں جان چُھٹی، دل خوش ہو گیا ، اللہ پاک دالکھ لکھ شکر ادا کیتا۔
ایسی خوشی وچ میری ماں نے ناشتہ بنایا،جس نال میرا مزہ ہور دُگنا ہو گیا،مگر کہندے نیں نا کہ اکثر خوشیاں نوں نظر لگ جاندی اے، میں جیوں ہی چائے دے کپ دا پہلاں گُھٹ لیاتے آسے پاسے دے حالات جانن لئی میں ٹی وی دا سوئچ آن کیتا،جیتھے اِک مہمان اینکرجیہڑے کئی ورھیاں توں حکومت ڈیگ رہے سن ملک تے سارے نظام تے حکومت نوں بس اُلٹ پُلٹ کر رہے سن،پاکستان دے حالات او اینج بیان کردے سن کہ اسیں شاید پتھر دے دور وچ وسدے ہاں،بس اوے ٹائم ریموٹ نال جناب ہوراں نوں آف کردتا،تے اپنے بوہت پیارے بزرگ غلام محی الدین ہوراں نال رابطہ کیتا،فیر کیہ ہویا کہ ویکھدیاں ہی ویکھڈیاں خوشخبریاں دیاں ٹوکریاں ہی کُھلن لگیاںتے میں ایہہ سوچیاکہ پچھلے کجھ ہفتیاں وچ ایہناں کجھ ہویا اے کیوں نہ ساریاں خوشخبریاں اپنے پڑھن والیاں نال شیئر کیتیاں جان۔
تے سبھ توں پہلاں پاکستان دی عوام تے ساڈھے وزیر اعظم جیہڑے پچھلے3ورھیاں توں اسلام دے تشخص نوں پوری دُنیا وچ بحال کرن دی خاطرجس جہاد اُتے لڑ رہے نیں، ہن اوس دے اثرات ساہمنے آنا شرور ہورہے نیں۔جداں کے اسیں جاندے ہاںکہ اسلامو فوبیا مغربی ریاستی ادرایاں وچ ڈُونگھیاں جڑاں پھڑ چُکیا سی کہ نال ہی ناموس رسالت مابﷺ دا مسئلہ کھڑا کر دتا گیا۔
اُتوں بھارتی میڈیا دا پراپیگنڈہ جیہڑا پوری دُنیا وچ پھیلے ہوئے اپنے جعلی نیٹ ورک دے ذریعے اسلام تے پاکستان نوں پوری دُنیا وچ بدنام کر رہیا سی۔
مغربی ملکاں تے امریکہ سنے بر طانیہ وچ رہن والے مسلمان وی شدت پسندی دا شکار ہوئے، لیکن کسے مسلم ملک دی قیادت یا حکمران نے ایس مسئلہ نوں عالمی سطح اتے نہیں چُکیا، ایس وچ عمران خان نے پاکستان دے وزیر اعظم دے عہدے دا حلف چُکن توں بعد اسلامی ملکاں دے سربراہواں تے فیراو آئی سی دے اجلاس وچ سارے مسلمان ملکاں نوں اکھٹے ہوکے ایس مسئلہ نال نبڑن دی درخواست کیتی۔
فیر اقوام متحدہ دی جنرل اسمبلی وچ ناموس رسالتﷺ دی اہمیت نوں بیان کیتا کہ مسلمان اپنے پیارے تے آخری نبیﷺ دی حُرمت لئی جان دی بازی لان نوں تیار رہندے نیں،دُنیا نوں ایس مسئلہ دی اہمیت تے حل لئی سوچنا چاہیدا اے۔ الحمد اللہ مسلمان ملکاں دے اکھٹے ہون نال، نیوزی لینڈدی وزیر اعظم نے ملک وچ اسلامو فوبیا پاروں اَت گردی دے واقعہ توں بعد کُھل کے مخالفت کیتی،تے مسلماناں نال یکجہتی دا اظہار کیتا،فیر چین دے صدر دی پاکستان دی آواز وچ ہاں ملان توں بعدروسی صدر ولا دی میر پوٹن نے آواز چُکی کہ شخصی آزادی دی آڑ وچ مسلماناں دے آخری نبیﷺدی شان دے خلاف لکھن یا بولن دی آزادی نہیں دتی جاسکدی، امریکہ دے صدر تے برطانیہ دے وزیر اعظم وی ہولی جئی آواز وچ اسلاموفوبیا دے خلاف گلاں کر رہے نیں ،لیکن سبھ توں اُچی آواز کینیڈا دے وزیر اعظم جسٹن ٹروڈو نے چُکی اے کہ کینیڈا وچ اسلاموفوبیا موجود اے ، جس نال معاشرے وچ امن نہیں رہ سکداتے اوہ ایس مسئلے دے حل لئی نمائندہ رکھ رہے نیں، جیہڑا ایس مسئلہ دے حل لئی عملی قدم چُکے گا۔
وزیر اعظم پاکستان عمران خان نے کینیڈین وزیر اعظم دے کھلے اعتراف تے مسئلے لئی عملی حل دی تعریف کیتی اے ، ایس توں پہلاں عمران خان نے چین تے روسی صدر دے بیاناں دا وی خیر مقدم کیتا سی،اُمید اے کہ ایس مسئلے اُتے ہون والی پیش رفت دا چنگا نتیجہ نکلے گابلاشبہ ایہہ معاملے ہِن کہ جناں نوں حل کر کے اسیں دُنیا تے آخرت وچ اپنے آپ نوں بچا سکدے ہاں،دُوجے پاسے جِتھے ملک سی پیک دے رول بیک دیاں خبراں سناندے نیں تے اینج سی پیک دے دُوجے فیز دے تحت، پاک چائنہ زرعی ریسرچ سنٹر پاکستان وچ8سنٹر کھولن جا رہیا اے۔
جدکہ ایس سکیم دے تحت13زرعی ریسرچ سنٹر پرائیویٹ کمپنیاں کھول رہیاں نیں،ایس دے نال
نال پی ٹی آئی خیبر پختونخوا دی صوبائی حکومت ولوں شروع کیتا جان والا صحت انشورنس کارڈ، پی ٹی آئی دی مرکزی حکومت نے ہور صوبیاں، پنجاب، بلوچستان، آزاد کشمیر تے گلگت بلتستان وچ دیون دا کم شروع کیتا۔
، ایسے ہفتے پنجاب دے بہاولپور ڈویژن نوں وی ایس وِچ شامل کر لیا گیا اے تے ہن ایتھوں دی عوام وی سالانہ10لکھ روپے دے علاج دیاں سہولتاں لے سکے گی۔
مگر افسوس کہ پیپلز پارٹی دی سندھ حکومت نے صوبہ سندھ وچ صحت کارڈ نہ لین دا فیصلہ کیتا تے ایتھے وی پارٹی دی سیاست نوں عوامی مفاد اُتے ترجیح دتی، ایس لئی بہانہ ایہ بنایا گیاکہ ایس سکیم دے خرچے50فیصد مرکز تے50فیصد صوبہ ادا کردا اے،تے سندھ نے ایتھے وی کیش گھٹ ہون دا بہانہ کر دتا،تے معاملہ گول کر دتا،مگر مرکزی حکومت نے فیصلہ کیتا اے کہ صوبہ سندھ دے لوکاں نوں وی ایس سکیم وچ شامل کرے گی تے صوبائی حکومت دے حصہ دا50فیصد وی آپئی ادا کرے گی۔