انقلاب اسلامی ایران دے ثمرات

تحریر: شبیر احمد شگری

برادر ملک اسلامی جمہوریہ ایران دی عوام انقلاب اسلامی ایران دی 43ویں سالگرہ منا رہی اے۔ ایس موقع تے اسیں ایرانی بھراواں نوں مبارکباد پیش کرنے آں۔ بظاہر ایہہ اسلامی انقلاب ایران وچ آیا سی لیکن ایہدے اثرات سارے عالم بالخصوص عالم اسلام اتے خصوصی طور تے نظر آندے نیں۔
11فروری 1979 نوں بانی انقلاب اسلامی ایران حضرت امام خمینیؒ نے مغرب نواز ایرانی شاہ دا تختہ اُلٹ کے رکھ دتا سی تے عوام دے استصواب رائے نوں استعمال کردے ہوئے ایران وچ اسلامی جمہوری نظام دی بنیاد رکھی۔ اج اسیں ویکھنے آں کہ ایران وچ اسلامی انقلاب مگروں ہر میدان وچ حیرت انگیز تبدیلیاں رونما ہوئیاں نیں۔ معاشرتی تبدیلی‘ علمی‘ فرہنگی‘ آرٹ‘ فنون لطیفہ‘ سائنس و ٹیکنالوجی یا کوئی وی میدان ہووے اج ایران نے ہر میدان وچ اک نویں تریخ رقم کر دتی اے۔
انقلاب اسلامی مگرون ایران نوں بہت ساری مشکلاں دا سامنا کرنا پیا۔ ساری دنیا ولوں ایران اتے پابندیاں عائد کردتیاں گئیاں۔ جے اسیں اوس ویلے نوں ویکھیے تے 1979 وچ ایران دی آبادی تن کروڑ سٹھ لکھ سی جد کہ ایس ویلے ایران دی آبادی اٹھ کروڑ توں اتے جا چکی اے۔ اسلامی انقلاب مگروں ایران دی آبادی وچ وادھے‘ بیرونی دبائو تے بہت ساری مشکلاں دے باجود آفرین ہووے ایران دے اسلامی نظام تے کہ آغاز وچ امام خمینیؒ دی قیادت تے اوہدے مگروں آیت اللہ خامنہ ای دی قیادت وچ ہن تک ایران نے ساری مشکلاں دا ڈٹ کے مقابلہ کیتا اے تے ایرانی قوم نے ثابت قدم رہ کے ساری دنیا نوں ایہہ دس دتا اے کہ جے صحیح معنیاں وچ اسلامی نظام نافذ ہووے تے پوری دنیا دی مخالفت دے باوجود کفر دے مقابلے وچ دین حق نوں ہمیشہ کامیاب و کامرانی نصیب ہوندی اے تے ساڈے سامنے واضح اے کہ دنیا دے وڈے وڈے تے اپنے آپ نوں سپر پاور آکھن والے ملک اج جھکن تے مجبور نیں۔ طاقت دے نشے وچ چور سامراجی طاقتاں نے اپنے ولوں بھرویاں کوششاں کیتیاں کہ کسے طرحاں ایران نوں جھکن تے مجبور کر دین لیکن جہڑی قوم خدا دی واحدانیت اتے کامل یقین تے ایمان رکھدی ہووے اوہنوں جھکن تے کون مجبور کر سکدا اے بلکہ ہر موقعے تے ایہناں عالمی سازشاں طاقتاں نوں خود منہ دی کھانا پئی اے۔ دن بہ دن اسیں ویکھ رہے آں کہ ایران ہر شعبے وچ کامیابی دے پنجے گاڑدا چلا جا رہیا اے چاہے اوہ معاشڑتی‘ سیاسی‘ تعلیم دا نظام ہووے یا سائنس و ٹیکنالوجی دا ایران نے ہر میدان وچ اپنا لوہا منوایا اے۔
حالیہ سالاں وچ کورونا پاروں وی ایران نوں بہت مشکلاں دا سامنا کرنا پیا لیکن سپرپاور کہلان والے نام نہاد ملکاں نے ایہ سمجھیا کہ ایران نوں ایس موقع تے شکست دتی جا سکدی اے۔ بین الاقوامی امداد تک روکی گئی جہڑا کہ دنیا دے کسے وی شہری دا حق ہوندا اے۔ بین الاقوامی حقوق تے انسانیت دی دھجیاں اڑائی گئیاں لیکن ایران نے ایہدی وی پرواہ نہیں کیتی تے ایہناں سخت ترین مشکل حالات وچ وی نہ صرف ثابت قدم رہیا بلکہ اپنی ویکسین وی تیار کر لئی تے کورونا دی صورتحال تے وی اپنے زور بازو تے قابو پا لیتا۔
امام خمینیؒ دی کرشمہ ساز شخصیت نے نواسہ رسول حضرت امام حسین علیہ السلام دے نقش قدم تے چلدے ہوئے اک ایسی تریخ ساز ریاست دی بنیاد رکھی جہڑی ہن تک یزیدیت نوں کھٹک رہی اے۔ اوہناں نے نہ صرف ایران دی عوام دے حقوق دی جنگ لڑی اے بلکہ ایہدے نال نال عالم اسلام دے حقوق دی وی گل کیتی اے۔ ساری دنیا دے مظلوماں دا ساتھ دتا اے تے اوہناں لئی آواز بلند کیتی اے۔
انقلاب اسلامی ایران مگروں عوام دے فلاح و بہبود دے پروگراماںتے اوہناں دی تعلیم و تربیت تے خصوصی توجہ دتی گئی۔ ایران وچ بجلی‘ گیس‘ ٹیلی فون‘ انٹرنیٹ دی فراہمی‘ تعلیم تے ریلوے دا نظام‘ دفاعی اداریاں دا قیام ہر میدان وچ ایران دی قوم انقلاب دے شروع توں ہن تک ایسے جذبے نال سرشار اے جہدے تحت ایرانیاں نے رہبر کبیر حضرت آیت اللہ خامنہ ای دی سربراہی وچ اپنی جدوجہد قائم رکھی تے جہدے نتیجے وچ کامیابی اوہناں دا مقدر رہی اے۔ اج ایران نہ صرف دنیا دی نظراں دا مرکز بن گیا اے بلکہ خود بین الاقوامی معاملات وچ دنیا دا ساتھ دے رہیا اے۔ مسئلہ فلسطین‘ شام‘ عراق‘ یمن ہووے یا کشمیر ہر تھاں ایران نے مثبت تے مضبوط موقف اپنایا اے۔
ایرانی انقلاب دے دراصل دو پہلو نیں نظری تے عملی۔ نظری تے فکری پہلو خود ایرانیاں دی تریخ وچ موجود اے تے ایرانیاں دی پیداوار وی اے کیوں جے اوہناں نے چودہ سو سال پہلے اسلام قبول کیتا سی تے ایس لئی اسلام دے اصلی تے اساسی عنصر اوہناں دے عقیدے وچ موجود سن ایس لئی اوہناں نے خدا دی ذات اتے تکیہ کیتا تے ایران کامیابی نال ہمکنار ہویا۔ ایسے طرحاں انقلاب ایران عاشورائی وی اے کیوں جے ایران دے انقلاب دی ابتدا ای امام خمینیؒ دی ایس تقریر توں ہوئی سی جہڑی عاشورہ دے موقع تے اوہناں نے کیتی سی تے شاہ نوں للکاریا سی تے جس طرحاں عاشور ی مقصد وچ شہادت طلبی‘ ظلم نال ٹکرائو‘ اللہ دی رضامندی تے پیروی تے امر بالمعروف تے نہی عن المنکر جئے نصب الدین موجود نیں۔ انقلاب اسلامی ایران وچ وی ایسے طرحاں دی خصوصیات نوں اہمیت دتی گئی۔
حالانکہ انقلاب ایران اک اسلامی انقلاب سی مگر اوہنوں نکام کرن لئی طرحاں طرحاں دے ہتھکنڈے استعمال کیتے گئے۔ ایس انقلاب نوں اک خاص مسلک نال وی جوڑن دی کوشش کیتی گئی۔ ایہدے وچ کوئی شک نہیں کہ ایران اک شیعہ مسلم اکثریتی ملک اے لیکن ایتھے دوجے مسالک تے مذاہب دے لوک وی آزادی دے نال اپنی زندگی گزار رہے نیں جہڑی بذات خود ایہناں پروپیگنڈیاں دی نفی اے بلکہ امام خمینیؒ تے وحدت دے علمبردار سن۔ امام خمینیؒ عالم اسلام نال مخاطب ہو کے فرماندے نیں کہ تسیں ہتھ بنھ کے تے ہتھ چھڈ کے نماز پڑھن تے جھگر رہے ہووے جد کہ دشمن تہاڈے ہتھ وچ وڈ دین دی فکر وچ اے۔ ایسے طرحاں امام خمینیؒ ہمیشہ مسلماناں نوں وحدت دا درس دیندے رہے تے اوہناں دے نقش قدم تے چلدے ہوئے ایران دے روحانی پیشوا حضرت آیت اللہ خامنہ ای وی دنیا لئی وحدت دی مثال بنے ہوئے نیں۔ جہڑا وی ایران دے اسلامی انقلاب نوں یا اسلامی جمہوریہ ایران نوں کسے اک خاص مسلک نال جوڑن دی کوشش کردا اے اوہناں لئی اک واضح مثال جواب دی صورت وچ ایہہ اے کہ انقلاب مگروں امام خمینیؒ نے فلسطینیاں دے حقوق لئی آواز بلند کیتی تے اوہناں نے اک اہم اعلان کیتا کہ سارے مسلمان رمضان المبارک دے جمعۃ الوداع نوں یوم القدس دے طور تے منایے تے اج تسیں ویکھدے او کہ یوم القدس فلسطینیاں نال اظہار یکجہتی لئی پوری دنیا دا اک اہم ذریعہ تے آواز اے جد کہ فلسطین وچ اہل سنت مسلمان وسدے نیں لیکن امام خمینیؒ دی نظر صرف ایرانی قوم یا کسے خاص مسلک اتے نہیں بلکہ پورے اسلام دے وحدت تے اوہناں دے مسئلے حل کرن تے سی۔
بانی انقلاب اسلامی نے انقلابی نظریہ نوں صرف مملکت ایران تک محدود نہیں رکھیا بلکہ دنیا دے سارے ستم رسیدہ انساناں نوں ظلم و ستم توں نجات دوان دا ذریعہ وی سمجھیا اے ایس لئی اسیں اج ویکھنے آں کہ دنیا دے کمزور‘ محروم تے مظلوم انساناں نوں جے کوئی اک ریاست امید دواندی اے تے اوہ ملک ایران اے۔
اسلامی انقلابی نظریے دی وجہ نال اج ایرانی قوم نوں آزادی‘ خودمختاری‘ سربلندی تے خوداعتمادی جئی نعمتاں حاصل ہوئیاں نیں ۔ اگرچہ سامراج انقلاب توں لے کے ہن تک بچگانہ طریقے نال اسلامی انقلاب نوں نقصان پہنچان دے در تے رہیا اے لیکن ایرانی عوام دی بابصیرت قیادت دی حکمت عملیاں توں اج تک ساری سازشاں نوں نکام بنا دتا گیا اے۔
سادہ تے عوامی شکل وچ انقلاب دی روش دا اندازہ اوہدے نعریاں توں ہوندا اے تے ایہناں نعریاں توں ای اہداف دی شناسائی ہوندی اے۔ انقلاب اسلامی ایران استقلال‘ آزادی تے جمہوری اسلامی دے اہداف اتے مشتمل سی۔ ظالم شاہی نظام دے خلاف سب توں بنیادی نعرہ استقلال طلبی سی۔ ایہو وجہ اے کہ استقلال تے آزادی ایرانی عوام لئی انقلاب اسلامی دا بہت وڈا تحفہ اے کیوں جے ظالم تے ڈکٹیٹر شاہ پہلوی نے گھٹن دا ماحول بنا کے ایرانی قوم نوں معمولی جئی آزادی توں وی محروم کر رکھیا سی۔ ایسے طرحاں جمہوری اسلامی نے 98 فیصد توں ودھ عوام دے ووٹ حاصل کر کے کامیابی حاصل کیتی۔ امام خمینیؒ نے ایس دن نوں عید دا دن اعلان قرار دتا تے اپنے پیغام وچ فرمایا ایہ د ن مبارک ہووے جواناں دی شہادت تے مصیبتاں مگروں ایرانی عوام نے دیو صفت دشمن تے فرعون وقت نوں زمین بوس کر دتا تے ایہنوں ایران توں فرار ہون تے مجبور کردتا تے اپنے قیمتی ووٹ دی اکثریت دے ذریعے شاہی سلطنت دی جگہ جمہوری اسلامی نوں بٹھا کے حکومت عدل الٰہی دا اعلان کیتا۔ اک ایسی حکومت جہدے وچ سب نوں اک ای نظر نال ویکھیا جاوے تے عدل الٰہی دا سورج سب تے یکساں نورافشانی کرے تے قرآن و سنت دی باران رحمت سب تے یکساں نازل ہووے۔
اوہناں نے ادیان الٰہی بالخصوص اسلام دے پیغام دا صحیح تعارف کرایا تے گھنائونی سازشاں توں پردہ چک کے عالمی سطح تے لوکاں نوں ایہدے پس پردہ عناصر دے خلاف متحد کیتا تے بے مقصد سامراجی دین دا مقابلہ کرن لئی امریکی اسلام دے مقابلے وچ خالص محمدیﷺ دے اصلی چہرے دا خاکہ پیش کرنا امام خمینیؒ دے موثر اقدامات وچوں اے۔
امام خمینیؒ دا ایہہ اقدام نہ صرف دنیا دی سامراجی طاقتاں دے کارندیاں دے مفادات لئی خطرہ سی بلکہ ایہناں لوکاں دی طبیعت دے وی خلاف سی جہڑے خراج لین دے حامی سن۔ ایہو وجہ اے کہ اوہناں نوں اندر تے باہر دونواں جگہ ردعمل دا سامنا کرنا پیا۔ امام خمینیؒ نے ایس ردعمل دے مقابلے وچ ہمیشہ انقلاب اسلامی تے اسلامی پیغام دے عالمی ہون دی گل کیتی تے انبیاء دی تحریک دے فلسفے دی تشریح دے ضمن وچ اعلان فرمایا کہ انقلاب اسلامی انبیاء دی تحریک ای دا سلسلہ تے اک عالمی تحریک اے۔ اسلام صرف مسلماناں یا فقط ایران لئی نہیں بلکہ انسانیت لئی آیا اے۔ انبیاء تمام انساناں لئی مبعوث ہوئے نیں تے پیغمبر اسلام حضرت محمدﷺ سارے انساناں لئی آئے نیں۔ ایس لئی امام خمینیؒ دا فرمانا سی کہ ساڈی تحریک صرف اسلام تک یا اسلامی ملکاں تک محدود نہیں اے بلکہ اسلامی تحریک انبیاء دی تحریک دا سلسلہ اے کیوں جے آپﷺ دی دعوت صرف خطہ عرب تک محدود نہیں سی بلکہ تہاڈی دعوت پوری دنیا لئی اے۔ ویسے تے دنیا وچ بہت ساری تحریکاں تے انقلاب جنم لیندے رہے نیں لیکن ایہناں سارے انقلاب تے تحریکاں تے ایران دے اسلامی انقلاب وچ بنیادی فرق ایہا ے کہ دوجے انقلاب مادی مقصداں لئی برپا ہوئے تے جدوں تک مادیت دا تقاضا سی اوہ انقلاب وی قائم رہے مگر جدوں مادیت جہڑی کہ فنا ہون والی شے اے ختم ہوئی تے اوہ انقلاب وی خود بخود ختم ہو گئے لیکن ایران وچ آن والا انقلاب اسلام دی اساس تے بنیاد تے سی تے ایہ اوہ شے اے جہڑی ہمیشہ قائم رہن والی حقیقت اے۔
انقلاب ایران دی کامیابی مگروں امریکا تے یورپی ملکاں نے اقتصادی پابندیاں‘ میڈیا تے مختلف قسم دی دوجی یلغاراں دے ذریعے ایرانی قوم نوں سرنگوں کرن دی مذموم تے نکام کوششاں کیتیاں لیکن ایرانی قوم نے ہر سازش دا ڈٹ کے مقابلہ کیتا تے ہر واری طاغوتی قوتاں نوں منہ دی کھانا پئی تے ایران دا اسلامی انقلاب اج وی نہ صرف اپنی پوری آب و تاب دے نال ایران وچ موجود اے بلکہ ایہدا چانن پورے عالم تک پہنچ رہیا اے۔تے اج دنیا وچ اٹھن والی اسلامی بیداری دی لہر وی ایران دے اسلامی انقلاب دے دنیا اتے پین والے اثرات دا منہ بولدا ثبوت اے۔