منے پرمنے نعت گوہ شاعر حضرت حفیظ تائب دے جنم دیہاڑ اتے اُچیچا لیکھ

میں ایس گل تے جنا وی مان کراں گھٹ اے پئی اپنے عہد دے سبھ توں وڈے نعت نگار حضرت حفیظ تائب جی ہوراں نوں نہ جے ایہ پئی میں اپنیاں اکھاں نال ویکھیا سگوں اوہناں دے پیراںوچ بہن دی وی سعادت نصیب ہوئی‘ ان گنت رسمی تے غیر رسمی ملاقاتاں توں وکھ بے شمار مشاعریاں وچ اوہناں دی اپنی زبانی حضور پاکؐ دی نعت سن کے اپنے من نوں ذکر رسولؐ دی ٹھنڈک نال ٹھارن دا شرف وی ملیا۔
تائب صاحب نال میری اک ہور وی بڑی انملی تے رشک جوگ نسبت اے تے اوہ ایہ پئی میں اورینٹل کالج دے پنجابی شعبے وچ اوہناں دا شاگرد ساں۔ سچی گل اے ایم اے پنجابی وچ داخلا لین ویلے مینوں ایس گل دا اُکا پتا نہیں سی پئی میں کنی وڈی ہستی کولوں فیض حاصل کر رہیاں۔
ہولی ہولی جویں جویں اوہناں دی نیڑتا نصیب ہوئی اوہناں دی ہستی دے گن تے سہپن آشکار ہون لگ پیا تے اوس ویلے تے میری خوشی تے خوش نصیبی دا کوئی اَنت نہ رہیا جدوں مینوں ایہہ پتا چلیا پئی تائب صاحب صرف ماہر تعلیم ای نہیں اپنے زمانے دے بڑے مشہور شاعر تے صف اول دے نعت نگار وی نیں۔
تائب ہوری اک باکمال صوفی بزرگ سن‘ اک شفیق استاد‘ دیانت دار پارکھ سچے کھوج کار تے بے پناہ خوبیاں رکھن والے ہدمرد‘ مخلص تے وسیع المشرب عالم ہون دے نال نال‘ روا داری‘ حسن سلوک‘ دردمندی‘ عاجزی‘ انکساری‘ نیاز مندی‘ درویشی‘ فقیری‘ مہرو وفا‘ خلوص تے سادگی اوہناں دی شخصیت دے اگھڑویں پکھ سن۔
میں اپنی زندگی وچ تائب ہوراں نوں کدی غصے وچ نہیں ویکھیا۔ آپ تحمل بردباری تے صبرو رضا دی چلدی پھردی تے جیوندی جاگدی تصویر سن‘ میں جدوں کدی وی اوہناں نوں ویکھیا تبسم دی حالت وچ ای ویکھیا‘ شدید بیماری دی حالت وچ وی کرب تے درد نوں صبر تے برداشت دی چادر وچ لکوئی رکھدے سن۔ میری ذاتی رائے دے مطابق اوہ شاہ حسین دے اس لازوال مصرعے
؎ میں ناہیں سبھ توں
دی عملی تفسیر تے اگلے وقتاں دے صالحین دی من موہنی مورت سن‘ تریخ دیاں کتاباں تے نیک لوکاں دے تذکریاں وچ اللہ دے ولیاں دا جہڑا سراپا تے کردار ملدا اے تائب ہوری وی اوسے دی ہوبہو شبیہ لگدے نیں۔
رب سوہنا حفیظ تائب ہوراں تے بڑا ای مہربان سی تے اوہناں نوں اپنے انعاماں نال نوازیا ہویا سی‘ تائب ہوراں تے اللہ تعالیٰ دی ایس توں وڈی کرم نوازی‘ مہربانی تے عنایت ہور کیہ ہو سکدی اے پئی مالک نے اوہناں دے دل دی ہٹی وچ اپنے محبوب حضرت محمدؐ دی محبت دے سودے توں وکھ ہور کوئی سودا رہن ای نہیں سی دتا۔ حفیظ تائب اک باکمال شاعر سن‘ فکری تے فنی ہر دو حوالیاں نال اوہناں دا شمار مہان تے بے مثال فنکاراں وچ ہوندا اے۔
تائب جی دے اک بڑے ای گوڑھے سجن تے وڈے شاعر بشیر منذر اک تھاں لکھدے نیں۔
’’حفیظ تائب نے اردو تے پنجابی دی ہر صنف وچ شاعری کیتی اے۔ نعت دے علاوہ نظماں‘ غزلاں‘ قومی گیت تے قومی نظماں سبھے کجھ لکھیا ہر نعت اوہدی روح دا حصا بن گئی تے ہن ایہ حال اے کہ اوہدے شریر دا لوں لوں حضور دی مدح سرائی کردا جاپدا اے تے اوہ سر توں لیکے پیراں توڑی مینوں نعت لگدا اے‘‘۔
مولا سائیں نے اپنے محبوب دے سچے تے وفادار غلام حفیظ تائب نوں بڑے ای رنگ لائے ہوئے سن‘ اک توں زیادہ واری اپنے گھر دی زیارت کرائی تے اپنے پیارے دے روضے دے سامنے بہہ کے نعت لکھن دا شرف عطا کیتا۔ تائب ہوراں دی شاعری نظم‘ غزل گیت کسے وی روپ وچ ہووے اوہدی روح اللہ تے اوہدے رسول دی سچی محبت اے۔
اوہناں دا سارے دا سارا شعری سرمایا دینی تعلیمات دے سنہری رنگاں وچ رنگیا ہویا اے۔
اوہناں دی شاعری وچ فکر و نظر وی بلندی تے پاکیزگی وی حضورﷺ دی محبت دا ای ثمر اے۔ نعت نال قلبی رغبت تے حقیقی لگن آپ دی شاعری دا نمایاں وصف اے۔
شاعری وچ آپ دی اول آخر پچھان نعت تے صرف نعت اے۔ نعت لکھن دے حوالے نال اوہناں دا کوئی دعوا نہیں سی‘ پر اللہ تعالیٰ نے ایسے جہان وچ اوہناں نوں اینی عزت بخشی پئی اوہناں دے نال دے سارے شاعراں‘ لکھاریاں تے نعت نگاراں نے اوہناں نوں نعت لکھن والیاں دا مجدد منیا۔
اللہ تعالیٰ نے آپ نوں حضور دی محبت عطا کر کے دنیا تے دنیا دیاں ساریاں لوڑاں تھوڑاں توں بے پرواہ کیتا ہویا سی ایسے لئی تے شکران نعمت کردیاں ہویاں تائب صاحب عجیب بے نیازی دے عالم وچ آکھدے نیں۔
اولاد مال جان توں کردتا بے نیاز
تائب نوں رب نے دے کے محبت حضورؐ دی
تائب صاحب دی شہرت تے خوش نصیبی دا سبھ توں وڈا حوالا بے شک حضورﷺ دی محبت وچ ڈب کے لکھیاں جان والیاں اردو تے پنجابی نعتاں ای نیں پر آپ نے خالق کائنات دی حمدوثنا دا وی پورا پورا حق ادا کیتا اے۔
اپنے شعری پراگے ’’سگ متراں دی‘‘ وچ آپ فرماندے نیں۔
رب سچے دیاں اُچیاں شاناں
آ نہیں سکدیاں وچ بیاناں
گن سکن اوہدے فضلاں نوں
کد اس قابل ہن زباناں
اوہدی وڈیائی کردی اے
ہر شے وچ زمیں اسماناں
رزق پچاوے تھاں تھاں اوہنوں
جو شے اے وچ جہاناں
وچ فضاواں پکھوواں تائیں
کیڑے تائیں وچ چٹاناں
اوہدی قدرت دے گن گاون
جثیاں اندر وسدیاں جاناں
اوسے دے ناویں نیں تائب
من ونجھلی دیاں سبھے تاناں
نکی بحر تے سادا لفظاں نال اساری گئی ایہ حمد رب تعالیٰ دی وڈیائی کبریائی تے اوہدی عظمت دا قابل رشک اظہار اے۔
ایہ شاعری اپنے کجھ نہ ہون تے مالک دے سبھ کجھ ہون دے عقیدے دی خوبصورت شرح اے۔
تائب صاحب اک نگھے عالم تے قرآن حدیث دے سچے طالبعلم سن اوہناں دی شاعری دے مُڈھلے ماخذ وی قرآن تے حدیث ای نیں جس طرحاں ایس حمد وچ وی اوہناں ساریاں صفتاں نوں بیانیا گیا اے جنہاں دی گواہی قرآن پاک دیاں آیتاں دیندیاں نیں۔
’’سگ متراں دی‘‘ وچ ای تائب ہوراں سورۃ فاتحہ دا بڑا سوہنا منظوم پنجابی ترجمہ کیتااے۔
سبھ تعریفاں تیرے لئی نیں سوہنیا ربا
ہر جگ دی ہر شے نوں پالن والیا ربا
توں رحمن رحیم تے توں ای حشر دا مالک
ہر کوئی صرف عبادت تیری کردا ربا
ہر کوئی ربا تیریاں ای امداداں لوڑے
سانوں دسیں رستا سدھا دپھرا ربا
رستہ اوہناں لوکاں دا توں جنہاں اتے
دان انعاماں اکراماں دا کیتا ربا
دسیں نہ اوہناں دا رستا جنہاں اتے
تیرے قہر غضب دا جھکھڑ جھلیا ربا
نہ دسیں راہ اوہناں دا جو پئے کراہے
ایہ عرضاں کر پوریاں ربا سبھ دیا ربا
سورۃ فاتحہ دا ایہ ترجما بڑا ای من کچھواں‘ پیارا تے دلاں تے اثر کرن والا اے‘ قرآن دی کسے سورۃ یا آیت نوں شعری روپ دینا کوئی سوکھا کم نہیں تے ترجماوی انج کرنا پئی سارے دا سارا مضمون مختصر لفظاں وچ سماجاوے۔
ایہہ ترجمان جتھے ترجمے دے فنی تے فکری تقاضے پورے کردا اے اوتھے ای قاری نوں عین اوسے مفہوم توں جانکاری دواندا اے جہڑا منشاالٰہی اے۔
ایڈے سوہنے تے سلکھنے ترجمے دی سعادت وی توفیق ربی توں بغیر ممکن نہیں۔ حفیظ تائب ہوراں دی کتاب لیکھ وچ وی اوہناں دی لکھی پنجابی حمد دے کجھ نمونے ملدے نیں اوہناں وچ کجھ ونگیان ویکھنے آں۔
اسم اللہ دا لب تے کھڑیا اللہ اللہ ہو
اندر باہر تے سجے کھبے چانن کیتا اللہ ہو
ازلی جلوا جس دا پل پل نواں نرویا اللہ ہو
سبھ توں وکھرا پر مخلوق اچ رچیا رسیا اللہ ہو
جناں انساناں دا اکو سنگ سہارا اللہ ہو
تائب ٹٹُے ہوئے دل وچ جس دا ڈیرا اللہ ہو
اللہ ہوے آوازے نال رچی ہوئی ایس حمد وچ حفیظ تائب ہوراں اوس زندا تے قائم سبھ دے پالن ہار اللہ دی شان دا نغما الاپیا اے‘ جہدا دلاں تے وی زور اے تے جہڑا زمیناں‘ آسماناں‘ سبھناں دا مالک تے مختار اے‘ تارا تارا‘ پتا پتا جہدا جس گائوندا اے۔ جہدی یاد دا ابدی جھرنا فکراں نال بہت اچا اے‘ اوسے مولا سائیں دی حمد حفیظ تائب ہوراں انپے پیارے مٹھے مٹھے سبھا نال کیتی اے‘ اک ہور انداز حفیظ تائب ہوراں دی حمد دا ویکھنے آں۔
فجر دے رنگ ثناء تیری کرن یااللہ
واء دے مردنگ ثنا تیری کرن یا اللہ
سبھ جہاناں نوں بنا کے تے چلاندا توں ایں
پھل تے پھل سنگ ثناء تیری کرن یااللہ
گھیر صحراواں خلاواں دے تے اسماناں دے
ہو کے سبھ دنگ ثناء تیری کرن یااللہ
حفیظ تائب ہوراں دا حمد بیان کرن دا ایہہ نویکلا انداز اپنے اندر اک خاص مترنم فضا رکھدا اے تے حمد پڑھن والا واقعی حیران تے دنگ ہو کے اوس خاص محبت وچ ڈب جاندا اے تے اوس حیرت دے جہان وچ غوطے کھاندا اے جہدا ذکر حفیظ تائب ہوریں حمد بیان کردیاں ہویاں کردے نیں اوس وڈی ذات دا ای کم اے پئی اوہ رنگاں تے خوشبواں دے قافلے ٹور دی اے تے رتاں دے سبھ رنگ اوہدی ثناء وچ رجھے ہوئے ملدے نیں‘ راتاں دیاں چپاں ہون‘ تھلاں دے نھیرے ہون یا تاریاں دی لو‘ ہر شے اوس اچی ذات دے گون گائوندی اے۔
حفیظ تائب ہوری ساڈی حمد یا تے نعتیا شاعری دا اک بڑا وڈا ناں اے۔ ایہ اوہ سنگھنا تے نگھ دین والا رکھ اے جہدیاں چھاواں دوجے شاعراں مانیاں ایہناں توں روحانی تے فکری فیض حاصل کیتا‘ پنجابی دی حمد یا شاعری دا چانن بھریا باب حضرت حفیظ تائب دے ذکر توں بغیر کدی مکمل نہیں ہو سکدا۔
مینارہ نور دی یاد وچِ
حضرت تائبؒ نوں ایہ فانی جگ چھڈیاں کئی ورھے بیت گئے نیں پر ہجے وی اوہناں دی خشبو ساڈے آل دوالے انج ای کھلری اے جویں اوہ ساڈے کول ای موجود نیں‘ اوہناں دی شخصیت کئی حوالیاں نال معتبر سی اوہ اک شفیق استاد وی سن نالے محترم تے معتبر سوجھوان وی سن‘ سچے عاشق رسولﷺ تے سوہنے رب دے ولی سن‘ اوہ اللہ تعالیٰ دے اجہے نیک تے برگیزدہ بندے سن جنہاں نوں بھلے بھٹکے بندیاں دی روحانی اصلاح تے جیون دا وَل سکھان دی ذما واری عطا ہوئی سی‘ ایس گل وچ کوئی شک نہیں کہ اوہناں نوں ویکھنا وی ثواب توں گھٹ نہیں سی‘ اسیں بوہت ای خش بخت آں کہ اوہناں دی گود وچ کھیڈددے رہے‘ اوہ میرے والد مدثر اقبال بٹ ہوراں نال بوہت ای پیار کردے سن تے اپنے والد راہیں اسیں اوہناں دی محبت تے شفقت توں ڈھیر سرفراز رہے‘ اوہ بلاشبا اک مرد قلندر سن جنہاں دی ساری حیاتی اللہ سوہنے تے اوہدے محبوب پاکﷺ دی حمدوثنا وچ ای گزری‘ اوہ سبھناں نوں سدھے رستے اتے ٹرن تے برائیاں توں بچن دی ہدایت کردے سن‘ اپنے کردار تے عمل نال اوہ وگڑیاں تگڑیاں نوں وی اپنی اصلاح کرن ول راغب کر لیندے سن۔
حضرت حفیظ تائب ہوراں دی کہڑی کہڑی صفت بیان کراں اوہ تاں سراپا ای صفت سن‘ دھیمے لہجے وچ ہدایت دیان گلاں کردے ہوئیاں اوہناں دے چہرے اتے عجیب ای نور پھیلیا ہوندا سی‘ مثالاں دے کے گل سمجھان لگیاں اجہیا انداز اپناندے سن کہ اوہناں دیاں گلاں دل وچ گھر جاندیاں سن تے من اپنے آپ اوہناں دی ہدایت اتے عمل کرن لئی مچل جاندا سی۔ اوہناں ہمیش سادگی‘ سچائی‘ چنگے عمل تے ماڑے لوکاں دی بھلائی دا درس دتا۔ اوہناں کول حاضری دین والے سوجھواناں موجب حضرت حفیظ تائب دی طبیعت وچ اک عجیب جہی بے قراری تے بے اختیاری دا عنصر غالب ہوندا سی۔ اوہ لکھن تے بولن لگیاں عشق حقیقی نال مغلوب ہو جاندے سن۔ اوہناں دی اک نعت دے اکھر نیں۔
ہر فصل میں پایا‘ گل صحرا‘ تروتازہ
جب دیکھا‘ لگا‘ قبۂ خضرا‘ تروتازہ
رہتا ہے شب و روز ہر اک منظر طیبہ
آراستہ‘ پیراستہ ‘ اجلا‘ تروتازہ
حضرت حفیظ تائب کسے اک بندے دا ناں نہیں سگوں محبت تے عشق وچ ڈبی اوس کیفیت دا ناں اے جہڑی آل دوالے دی ہر شے اتے اپنا گوڑھا اثر چھڈدی تے نیڑے بیٹھے بندیاں دے دل موم کرن دی صلاحیت رکھدی اے‘ اجہیا مقام و مرتبہ کروڑاں وچوں کسے اک دے نصیب ہوندا اے تے حضرت حفیظ تائب نوں ایہ مقام تے مرتبہ جچدا سی‘ اوہناں بارے ایہ گل بڑے مان دے نال آکھی جا سکدی اے کہ اوہناں دی حیاتی انج گزری اے کہ اوہ دین تے دنیا دوواں جہاناں وچ سرخرو سن‘ سرخرونیں تے ہمیش سرخ رو ای رہن گے‘ ایہو جہی ہور کیہ خوش بختی ہونا اے کہ سوہنے رب نے اپنے پیارے محبوبﷺ دی مدح سرائی لئی اوہناں نوں چنیا تے حضرت حفیظ تائبؒ نے وی سوہنے رب دے ایس فیصلے دی ایہو جہی فرمانبرادری کیتی کہ اخیری ساہ تیک نعت رسول مقبولﷺ نوں نویں ہار سنگھار نال لوکائی اگے سجاندے رہئے۔
حضرت حفیظ تائب نے 14فروری 1931نوں پشور وچ حاجی چراغ دین منہاس سروری دے گھر اکھ کھولی۔ اوہناں دا ناں ’’محمد حفیظ‘‘ رکھیا گیا۔ اوس ویلے کسے نوں وی ایہ اندازا نہیں سی کہ محمد حفیظ رہندی دنیا تیک جگمگ کرن والے روشن تارے دا روپ دھارے گا تے ہمیش لئی امر ہو جائے گا‘ محمد حفیظ دے جنم تے اوہناں دے والد حاجی چراغ دین منہاس سروری قادری نے بھرے مجمعے وچ ایہ دعا ضرور منگی سی کہ سوہنا رب اپنے پیارے محبوب پاکﷺ دے صدقے ایس بال نوں نیک راہ تے ٹورے تے اجہی نعمت نال نوازے کہ ایہ اپنی تے اپنے بزرگاں دی آخرت سنوار سکے‘ سوہنے رب نے خلوص تے خشوع و خضوع نال کیتی گئی ایہ دعا قبول فرمائی تے اج اوہناں دے والدین وی اوہناں دی نسبت نال پچھانے تے سراہے جاندے نیں۔ حضرت حفیظ تائب نے وی روایتی شاعری دی طرحاں اپنی شاعری دا آغاز غزل توں کیتا۔ پر ہولی ہولی اوہ اپنے اصل ول آ گئے تے عشق رسولﷺ وچ ڈب کے اوہناں دی مدح لکھنا شروع کیتی تے فیر اخیر لے ساہ تیک اوہ نعتاں ای لکھدے رہے۔
حضرت حفیظ تائب دے حوالے نال ساہنوں ایس گل دا وی ڈھیرای مان اے کہ اوہ وی ’’احمد نگر تحصیل وزیرآباد‘‘ نال تعلق رکھدے سن جہڑی ساڈی جنم بھوں اے تے ٹیلنٹ راہیں پورے جگ وچ مشہور وی اے اوہ اکثر اپنے علاقے بارے ایہ شعر پڑھدے رہندے سن کہ
خوش ہوں کہ میری خاک بھی احمد نگر کی ہے
مجھ پر نظر‘ ازل سے‘ شاہ بحرو بر کی ہے
پشور وچ حضرت حفیظ تائبؒ دے نانکے رہندے سن۔ تعلیم پوری ہون تے اوہناں واپڈا وچ ملازمت وی کیتی۔ بعدوں اوہناں ایم اے کر کے پنجاب یونیورسٹی اورینٹل کالج وچ پڑھان دی ذماواری سنبھال لئی‘ایسے دوران اوہ نعت لکھنا شروع ہوئے تے فیر سوہنے رب دا اجہیا کرم ہویا کہ فیر ساری حیاتی اوہناں حمدوثنا توں وکھ کجھ لکھیا ای نہیں۔ 1978 وچ اوہناں دے نعتیہ کلام تے اوہناں نوں ’’آدم جی ادبی ایوارڈ‘‘ دتا گیا۔ اوہناں پنجابی زبان وچ وی بوہت سوہنیاں نعتاں لکھیاں اوہناں دیاں پنجابی نعتاں دا مجموعہ ’’وسلیمو تسلیما‘‘ بوہت ای پڑھیا تے پسند کیتا گیا۔ اردو وچ اوہناں دیاں نعتاں دا پہلا مجموعہ ’’صلو علیہ وآلہ‘‘ 1973 وچ چھپیا سی تے ہن تیک ا وہدے 8ایڈیشن چھپ چکے نیں۔ اوہ بے حد سادہ مزاج تے عاجزی دا پیکر سن‘ کوئی وی اوہناں نوں ملن آندا تاں بوہت ای راضی ہوندا کیوں جے اوہناں دے ہونٹاں اتے بوہت ای مشفق مسکراہٹ تے محبت ہوندی سی‘ دھیمے لہجے وچ اپنائیت نال جہڑی وی گل سمجھاندے اوہ سنن والیان دے دل ودماغ اتے نقش ہو کے رہ جاندی سی۔ اوہناں دی ہمیش ایہو ای کوشش رہی کہ ا وہناں دی گل بات نالے عمل تے کردار توں کسے بندے نوں کوئی دکھ تکلیف نہ پہنچے‘ اوہ تاں دوجیاں دے بھارونڈا کے خش رہندے سن۔ کسے دے کم آ کے سکون حاصل کردے سن تے اوہناں دا من ہر ویلے حمدوثنا وچ ای ڈبیا رہندا سی۔
حضرت حفیظ تائب اخیر لے دناں وچ بیماری پاروں کمزور ہو گئے سن پر اوہناں دے ارادے اخیری ساہ تیک جوان ای رہے‘ تگڑے رہے تے اوہ لوکاں وچ خشیاں ای ونڈدے رہے‘ آپ اوہ صبر شکر تے راضی برضا رہن والی ہستی سن تے دوجیاں نوں وی صبر شکر دی تلقین کردے رہندے سن۔ اوہناں دے سوہنے کلام دیاں 10کتاباں چھپ کے لوکائی وچ فیض ونڈ رہیاں نیں پر اجے اوہناں دا بوہت سارا کلام چھپن والا اے‘ ساڈی کوشش اے کہ اوس کلام نوں چھاپ کے ونڈن دی سعادت ’’پنجابی یونین‘‘ حاصل کرے۔ اوہناں دی پیروی کرن دا چنگا‘ سوکھا تے بہتر طریقا ایہو ای اے کہ اوہناں دے کلام نوں پڑھیا‘ سنیا‘ سمجھیا ای ناجاوے سگوں اوہدے اتے عمل وی کیتا جاوے…