وزیرآباد دی پہچان ۔۔طاہر وزیرآبادی

لِکھت:افضل طاہر وزیرآبادی

طاہر وزیرآبادی 1958 وچ وزیرآباد شہر گلی شیشیانوالی وچ پیدا ہوئے اوہناں میٹرک تیکر تعلیم گورنمنٹ پبلک ہائی سکول وزیرآباد وچ حاصل کیتی اوس توں بعد اوہناں پنجابی زبان دی تعلیم حاصل کیتی تے پنجابی تے چوکھا عبور وی حاصل کیتا طاہر وزیرآبادی دی پہچان دیاں کئی وجہ نیں پر وڈی وجہ اوہناں دی پنجابی شاعری تے کالم نگاری سی طاہر وزیرآبادی ایک نڈر بے باک صاف دل دے تے غیرت مند انسان سن وزیرآباد دی عوام تے او لوگ جیڑے طاہر وزیرآبادی ہوراں توں واقف نیں او با خوبی اوہناں توں واقف نیں کہ او جوٹھ بولن والے تے ٹائم دی پابندی ناں کرن والیاں دی سخت خلاف سن بلکہ میں کئی واری اوہناں نوں ایہو جے موقیاں تے غصے دا اظہار کردیاں وی ویکھیا اے او ٹائم دے بڑے پابند سن ماڑے بندیاں دا درد رکھن والے سن اوہناں کئی ایسے لوکاں دی مدد وی کیتی کہ جدا کسے نوں پتہ وی نہیں سی تے اوہناں دی فوت ہون توں بعد کئی لوکاں سانوں دسیا کہ طاہر صاحب ساڈے اوکھے ویلے ساڈے کم آے نیں تے اوہناں کسے نوں پتہ وی نہیں لگن دتا شہر دے وچ اثرورسوح ہون پاروں اوہناں کدی وی کسے دے جائز کم توں انکار نہیں کیتا جیڑا وی کوئی کم آکھدا او اوسے ویلے اوہدا کم کروا دیندے یا کر دیندے او شعبہ صحافت نال وی منسلک رہے وزیرآباد دی صحافی برادری اوہناں دے نال صلاح مشورے نال ہر کم کردی سی شاعری دے حوالے نال تے صحافت دے حوالے نال زیادہ تر لوگ طاہر وزیرآبادی ہوراں نوں استاد جی دے ناں نال مخاطب کردے سن اونج وی اوہناں دے صحافت وچ تے شاعری وچ سینکڑاں شاگرد وی نیں طاہر وزیرآبادی ہوراں نوں پنجابی زبان دے نال واہوا چوکھا پیار سی ایسے لئی اوہناں دیاں پنجابی شاعری وچ ست کتاباں وی چھپیاں جناں وچ پونجی سنگھنی چھاں دھحدے اکھر ہجر دیاں کرلاٹاں ٹیساں رتڑا امبر تے اساں مرناں ناہیں شامل نیں ایس توں علاوہ اوہناں مستقل کالم نگاری وی کیتی اوہناں دے کالم محتلف اخباراں وچ چھپدے رہے طاہر وزیرآبادی ہوراں پنجابی دے نال نال اردو زبان وچ وی شاعری کیتی تے کالم وی لکھے پر زیادہ ترجیح پنجابی زبان نوں ہی دیندے سن او آکھدے سن کہ اسیں پنجابی ہاں تے سانوں پنجابی ہی بولنی تے لکھنی چاہیدی اے جدوں گورہ انگریزی بولدا اے چائینہ والا چینی زبان بولدا اے پٹھان پشتو بولدا اے ایتھوں تک کے ہر بندہ آپنی بولی بولدا اے تے فیر اسیں پنجابی ہی کیوں احساس کمتری دا شکار ہاں اسیں کیوں پنجابی بولن توں چکنے ہاں اوہناں دا کہنا سی کہ سانوں اہنی ماں بولی تے فخر ہونا چاہیدا اے او اپنی ہوری حیاتی پنجابی مشاعرے کرواندے رہے تے ملک بھر وچ مشاعرے پڑھن وی جاندے رہے اوہناں اپنا پہناوا وی پنجابیاں والا رکھیا او زیادہ تر لاچا تے کرتا پاندے سن جے کسے وزیر نوں وی ملن گئے تے تاں وی لاچا کرتا ای پاندے سن تے اوہناں دا کھان پیین وی پنجابیاں والا سی طاہر وزیرآبادی پیشے ولوں ایک گھڑی ساز سن تے او وزیرآباد لاہوری دروازہ چوک وچ ایک دوکان تے گھڑیاں دا کم کردے رہے او گھڑیاں دے ایک مہان استاد وی سن اوہناں پوری کوشش کیتی کہ میرے ولوں کسے نوں کوئی تکلیف نہ ہووے پر فیر وی انسان ہون دے ناطے کدی بندے کولوں اچا نیواں بولیا وی جاندا اے تے میں اوہناں دا پتر ہر اوس بندے کولوں معافی منگدا ہاں جے کسے نوں کوئی تکلیف پہنچی ہووے اساں ویکھیا اے کہ اوہناں کدی کسے دا گلہ شکوہ نہیں سی کیتا ہاں البتہ جے اوہناں دی شاعری پڑھیے تے کئی گلے شکوے نظر آندے نیں جسراں کہ
تن من میرا تھکیا ہویا
میں سکیاں توں اکیا ہویا
سینے اتے سک دا پھوڑا
وریاں بدی پکیا ہویا
بے لحاظ شریکے اندر
کیڑا دکھ نہیں تکیا ہویا
مینوں تماں کی آکھے گا
میں ساکاں نوں چکھیا یویا
میرے دل نے سانبھیا جو جو
لگدے لانیاں بکیا ہویا
میں طاہر کمزور کدوں ساں
مینوں غیرت ڈکیا ہویا
اوہناں دے اے شور پڑھ کے لگدا اے کہ او واہوا گلے شکوے اپنے نال ای ایس دنیا توں لے گئے نیں کیوں کہ اوہناں حیاتی وچ کدی کسے نال کوئی گلہ شکوہ نہیں سی کیتا طاہر وزیرآبادی ہوراں دی روحانی نسبت علی پور سیداں نارووال پیر سید جماعت علی شاہ ہوراں نال سی او پیر سید علی حسین شاہ ہوراں دی ہتھ تے بیت سن تے اوہناں دی نسبت آخری دم تک آپنے مرشداں نال رہی اوہناں اپنے پیراں دے متعلق کئی منقبتاں وی لکھیاں تے اکثر خاضری وی دین جاندے سن طاہر وزیرآبادی اپنی زندگی دے آخری دناں وچ آپنے نکے پتر دے ویاہ دیاں تیاریاں کر رہے سن او صحت دے لحاظ نال وی ٹھیک سن کوئی تکلیف یا بیماری وی نہیں سی ہر کم آپنی روٹین دے مطابق کر دے رہے تے فیر 14 فروری 2020 جمعہ والے دن راتیں 8 وجے دل دے اٹیک پاروں ایس فانی دنیا توں چلانا کر گئے انا للہ وانا الیہ راجعون اللہ پاک طاہر وزیرآبادی ہوراں دیاں اگلیاں منزلاں آسان فرماے اوہناں دی کامل مغفرت فرماے تے جنت الفردوس وچ اعلی مقام عطا فرماے آمین۔