تعریفی سنداں تے زمینی حقائق؟
حناپرویزبٹ
ایران‘ بھارت‘ امریکہ تے چین توں شٹ اپ کال ملن دے بعد غیرمرئی اعلیٰ کارکردگی تے ایوارڈ دے کے حکومت نے اپنی نااہلی آپ واضح کر دتی اے۔ لوکاں دا کہنا اے کہ حکومتی کارکردگی سیونک وانگوں کھلے عام ریاست تے اوہدے تھماں نوں کھوکھلا کیتی جا رہی اے پر کوئی منن نوں تیار نہیں۔ نام نہاد اعلیٰ کارکردگی ایوارڈز دے ناں تے دس پیاریاں نوں جہڑیاں ریوڑیاں ونڈیاں گئیاں ایہدے تے پارٹی وچ سخت رنجش پیدا ہو گئی اے پارٹی وچ کھلے عام ایہناں ایوارڈاں دی موزونیت تے انتخاب تے اختلافی جملے کسّے جا رہے نیں لوک تے کہہ رہے نیں جے اول نمبر ایہہ وے تے سوچو پوری کابینہ دی کارکردگی رپورٹ کیہ ہووے گی۔ رائے عامہ ایہ وی پکار رہی اے کہ پہلا نمبر ایویں نہیں ملدا ایہدے لئی ڈاک ٹکٹاں دونیاں مہنگیاں کرنیاں پیندیاں نیں۔ ٹول دی رقم 300 توں ودھا کے 1300 روپیے کرکے لوکاں دا لک بھننا پیندا اے۔ پاکستان پوسٹل سروسز دی ڈیجیٹلائزیشن لئی اک نجی بینک دے نال 118 ارب روپیے دا مبینہ غیرقنونی معاہدہ کرنا پیندا اے۔
ٹرانسپرنسی انٹرنیشنل تے پبلک پروکیورمنٹ ریگولیٹری اتھارٹی بھاویں ایس معاہدے وچ پیپرارولز دی خلاف ورزی دی نشاندہی وی کر لوے پر ریاست مدینہ دے والی دے کن تے جوں تک نہیں رینگن والی‘ پہلے پہل جذباتی لوکاں نوں امید سی کہ نہ صرف ایہ معاہدہ کالعدم قرار دتا جاوے گا سگوں ذمہ داراں نوں قرار واقعی سزا وی دتی جاوے گی پر ہن عوامی امیداں دا تاج محل ڈھیہہ گیا اے کیوں جے انکوائری تے دور ایس معاہدے تے اک وی تشویشی لفظ تک سامنے نہیں آیا۔ عوام سنجیدگی نال پچھ رہے نیں کہ قومی خزانہ لٹن والیاں دے خلاف جہاد کرنا کدوں شروع کرو گے؟ اوس نعرے دا کیہ ہویا؟ عوام غصے وچ نیں‘ ماضی دا پیار تے جوش نفرت وچ بدل رہیا اے عوام منتظر نیں کہ کدوں اوہناں دی چنگی بھلی زندگیاں نوں اجیرن بنان والے اوہناں توں ووٹ منگن آن گے تے اوہ اوہناں دے وعدے اوہناں دے منہ تے مار دین گے۔ لوک سمجھ چکے نیں کہ کرپشن دے خلاف جعلی احتساب دا جال پھیلایا گیا۔ سستے سیاسی یتیماں نوں ترجمان لا کے جھوٹ دی بساط بچھائی گئی۔ ہکڑاں دے بدلے غیرمنتخب ترجماناں توں من مرضی دے کم لئے گئے ایہ وی طے سی کہ مطلوبہ نتیجے مرتب نہ ہون تے سارا الزام مشیراں تے ترجماناں تے دھر کے باہر کڈھیاجاوے۔
نوازشریف دی سیاست ختم ہو گئی اے دی گردان پڑھن والیاں دا ہن کوئی نام لیوا نہیں‘ اوہناں دا سیاسی مستقبل ایہہ وے کہ اوہناں نوں ہن کسے پارٹی وچ پناہ نہیں ملے گی۔ بلدیاتی انتخابات تے عوامی رابطیاں وچ تیزی لیان دا اعلان کرن والے سوشل میڈیا توں باہر نکل آن۔ عوام دشمنی دے بوئے بیج توں فصل تیار ہو چکی اے۔ ہر گلی‘ ہرنکڑ‘ ہر میدان‘ ہر جہاز‘ ہر جلسے وچ اجہی عزت افزائی ہووے گی کہ سیاست توں توبہ کرنی پوے گی ہن تے ایہو فلمی مکالمہ دہرانا بن دا اے تیرا کیہ ہووے گا کالیا؟۔٭٭
