چج ادبی پروار جہانیاں منڈی خانیوال ولوںجَگت ماں بولی دیہاڑ دی مناسبت نال مظاہرہ تے ریلی

رپورٹ: آفاق بٹ

ماں بولی دیہاڑ دی مناسبت نال گورنمنٹ ایسوسی ایٹ کالج فار گرلز طارق آباد وچ پنجابی زبان دی اہمیت بارے گل بات کیتی گئی تے نال اک مشاعرے دا پربندھ کیتاگیا۔ کالج دے صاف ستھرے کمرے نوں انتظامیہ تے طالبات نے بڑے سلیقے نال سجایا ہویا سی۔ انج لگ رہیا سی جیویں کدھرے کوئی بڑی خوشی دا دن ہووے۔ طالبات ماں بولی پنجابی بارے بہت پرجوش سن۔ چیف آرگنائزر سائبان خرم شہزاد بھٹہ نے بابا بُلھے شاہؒ‘ وارث شاہؒ دا کلام تے کالج دی اک طالبہ آمنہ ادریس نے پنجابی نظم ایس خوبصورت انداز وچ پڑھی کہ ہر پاسوں واہ واہ دی صداواں آندیاں رہیاں۔ عتیق انور راجہ نے آکھیا کہ پنجابی زبان دی اہمیت نوں سجمھے بنا اسیں ترقی دا سفر شروع نہیں کر سکدے ۔ پنجابی زبان وچ صدیاں دی لوک دانش تے لوک ورثہ موجود اے۔ پرنسپل محترمہ ثروت سہیل نے آکھیا کہ اج دے دن ایس ادارے وچ ایہہ تقریب منعقد کروان دا مقصد ایہہ ہے کہ اسیں طالبات نوں پنجابی زبان دی اہمیت توں آگاہ کر سکیے۔ ایہ پہلی واری ہویا اے کہ کالج وچ شہر دے وَڈے وَڈے دانشور شاعر تے انتظامی افسر تشریف لیائے نیں۔ اسیں ایہہ عہد کیتا ہویا اے کہ کالج وچ طالبات نوں نہ صرف چنگی تعلیم دین دی کوشش کر رہے آں بلکہ اوہناں نوں اپنی دھرتی نال محبت دا سبق وی دتا جا رہیا اے۔ پنجابی بولی نوں انپڑھاں دی بولی آکھن والیاں نوں اپنی عقل دا علاج کروانا چاہیدا اے کہ بابا فریدؒتوں غلام فریدؒ تک جہڑی بولی صوفیا نے بولی جہدے وچ لکھیا‘ جنہاں دا لکھیا اج وی ہر امیر‘ غریب گھر وچ پڑھیا تے سنیا جا رہیا اے۔ شبیر بٹ دا آکھنا سی کہ زبان دا تعلق مٹی نال ہوندا اے۔

حضرت آدم علیہ السلام دے پتر جتھے جتھے آباد ہوئے اوتھے اوتھے اک نویں زبان وجود وچ آئی۔ اج وی اسیں ویکھنے آں کہ ہر بارہ میل مگروں لوکاں دا لب و لہجہ بدل جاندا اے۔ ایس لئی ماں بولی دا مطلب صرف ماں دی زبان نہیں بلکہ ایہنوں دھرتی ماں دے تناظر وچ ویکھیا ‘سمجھیا تے جانیا جاندا اے۔ سعید تاج ہوراں دا کہنا سی کہ پنجابی زبان وچ وسعت اے اوہ اردو یا کسے دوجی زبان دے کول نہیں اے۔ جہڑے لفظ پنجابی وچ نیں اوہناں نوں کسے زبان وچ ترجمہ تک کرنا ممکن نہیں۔ پنجابی پنجاب دی زبان اے‘ایہ پنجاب دھرتی دی زبان اے ایس لئی سکول تے کالج توں باہر ہون دے باوجود اج وی نہ صرف پنجاب بھر وچ بلکہ باقی صوبیاں تے دنیا دے بہت سارے علاقیاں وچ بولی سمجھی جا رہی اے۔ مقررین وچ صدر محفل عتیق انور راجہ،مہمان خصوصی اسسٹنٹ کمشنر ہیڈ کوارٹر شبیر بٹ،محترمہ ثروت سہیل پرنسپل کالج، الحاج سعید احمد تاج،چوہدری محمد شاھد،چوہدری طاہر جاوید نمبردارتے شعرا وچ ادریس ناز،قاضی اعجاز محور،عرفانہ امر،افتخار شاہد،عامر رفیق عامر،ڈاکٹر اعجاز بیگ،نوشین حسین نوشی،یاسر مشتاق،عبید اللہ توحیدی،شریف فیاض وزیر آبادی،زیڈ اے زلفی،روبینا ناز تے دوجے شامل سن۔