پنجابی پرچار تے پنجابیکا دے آہر نال اسلام آباد وچ ماں بولی دیہاڑ دے موقعے اتے واک سَنے وَکھو وَکھ پروگرام
رپورٹ: سید علی قیصر
مادری زباناں دے عالمی دن دی مناسبت نال پنجابی ادبی پرچار ، اسلام آباد، پنجابی پرچار تے پنجابیکا دے آہر نال اک واک دا آہر کیتا گیا۔ واک شہیدِ ملت سیکریٹریٹ توں شروع ہو کے اسلام آباد پریس کلب ختم ہوئی۔ واک دے رلتیاں نے سکولاں وچ پنجابی زبان دی لگوتی دی منگ لئی پلے کارڈ تے بینر چکے ہوئے سن۔ پنجابی تنظیماں تے سول سوسائٹی دے رلتیاں وچ سوانیاں تے بال وی شامل سن۔
واک توں بعد اسلام آباد پریس کلب دے سامنے ڈھول دی تھاپ تے بھنگڑے پائے گئے تے آخر تے واک دے آگواں نے میڈیا نوں اپنی منگ بارے دسیا تے حکومت کولوں پنجابی زبان نوں لازمی مضمون دے طور تے پڑھائے جان بارے اک یادداشت وی پیش کیتی۔
ہر سال وانگوں ماں بولی تے رہتل دے ودھاوے لئی پاکستان اکادمی ادبیات تے پنجابی ادبی پرچار دی سانجھ نال اکادمی ادبیات دے فیض احمد فیض آڈیٹوریم
وچ شام پنج وجے توں رات گئے تک رنگا رنگ پروگرام کیتے گئے۔ ایس سلسلے دا پہلا پروگرام ‘‘کہانی دربار’’ پنج وجے شام شروع ہویا جس وچ پنجاب دے چونویں کہانی کاراں کہانیاں پڑھیاں۔ ایس پروگرام وچ چیئرمین پاکستان اکادمی ادبیات نے اُچیچی رلت کیتی۔
کہانی دربار توں بعد ہر سال طراں پنجابی صنف’’ڈھولے‘‘دا مقابلہ کروایا گیا جنہوں ہال وچ موجود سارے پنجابیاں نے بہت پسند کیتا۔ ایس توں بعد مرحوم نصیر خان بلوچ ہوراں دی یاد وچ پنجابی مشاعرہ منعقد ہویا جس وچ میزبان تے مہمان شاعراں نے اپنا کلام پڑھیا تے حاضرین کولوں خوب داد وصول کیتی۔ مشاعرے دی صدارت مشہور شاعر انجم سلیمی ہوراں کیتی۔ مشاعرے توں بعد رات گئے پنجابی فوک پروگرام شروع ہویا جس وچ مبینہ اکبر نے پنجابی صوفیاں دا کلام پیش کیتا جیہڑا صبح چار وجے ختم ہویا۔
