عالمی ماں بولی دیہاڑ اُپر ’’پنجاب سیوَک سانجھ‘‘ولوں راولپنڈی وچ احتجاجی مظاہرہ تے پنجابی کانفرنس

علی قیصر

21 فروری نوں عالمی ماں بولی دیہاڑ دے موقع اُپر ’’پنجاب سیوَک سانجھ‘‘ دے پربندھ ہیٹھ لیاقت باغ، راولپنڈی پریس کلب دے سامنے عدالتی حکم دے باوجود پنجابی زبان نوں نصاب دا حصہ نہ بنائے جاون دے خلاف احتجاجی مظاہرہ کیتا گیا۔ مظاہرے وِچ راولپنڈی، اسلام آباد توں اَڈ چکوال، جہلم تے گجرات توں پنجابی لیکھکاں، سُوجھواناں، شاعراں، صحافیاں تے پنجاب سیوَکاں دی وَڈی گنتری نے بھرویں رَلت کیتی۔ پنڈی گھیب (اٹک) توں شفقت حسین بھٹی اک بھرویں قافلے سنگ شریک ہوئے۔ جدکہ پنجاب سٹوڈنٹ کونسل جہلم دے آگو فیضان گوندل تے رائے توصیف وی اپنی تنظیم دے قافلے سنگ مظاہرے وِچ شریک ہوئے۔
مظاہرے دے رَلتیاں نے اپنی مَنگاں دے حق وِچ بینرز تے پلے کارڈز چکے ہوئے سن. جہناں اُپر پنجابی زبان لگوتی دے حق وِچ نعرے درج سن۔ رَلتی وقفے وقفے نال اپنی مَنگاں دے حق وِچ نعرے بازی وی کردے رہے.۔رَلتیاں نے احتجاجاً کالے جھنڈے وی لہرائے۔
وکھالے نال چراغ الدین وانہ، جلال گجر، راجہ وسیم جنجوعہ، شفقت بھٹی، آفتاب سندھو، سفیان امجد گجر اور دوجیاں نے خطاب کیتا۔ اور کہیا کہ پنجاب سرکار پنجابی زبان نوں نصاب دا حصہ نہ بنا کے نہ صرف پنجابی بالاں دا لسانی استحصال کر رہی اے، بلکہ عدالتی فیصلے توں بعد توہینِ عدالت دی وی مرتکب ہو رہی اے۔
وکھالے توں بعد راولپنڈی پریس کلب وِچ ’’پنجاب سیوک سانجھ‘‘ ولوں ’’پنجابی ماں بولی کانفرنس‘‘ دا وی پربندھ کیتا گیا۔
کانفرنس دی صدارت پنجابی تحریک دے بزرگ سْوجھوان محمد حنیف حنفی (گوجرخان) ہوراں کیتی۔ جدکہ ممبر قومی اسمبلی تے وفاقی پارلیمانی سیکرٹری شیخ راشد شفیق ہوراں اُچیچے پروہنے وجوں رلت کیتی۔ راجہ وسیم جنجوعہ نے سٹیج سیکرٹری دے فرائض سانبھے۔کانفرنس وِچ چوہدری سہیل مہدی گجر (کھاریاں)، پیرزادہ سید حامد بخاری (راولپنڈی)، الحاج اظہر اقبال ستی (راولپنڈی)، راجہ عثمان ایڈووکیٹ (جہلم)، آصف علی، ریاست علی ثانی (اسلام آباد)، ملک مہر خان (پنڈی گھیب) تے فیضان گوندل نے ’’ماں بولی دی اہمیت تے قوماں دی ترقی وِچ ایہدے کردار‘‘ دے وشے اُپر گل بات کیتی۔
کانفرنس دے میزبان تے ’’پنجاب سیوک سانجھ‘‘ دے چیئرمین چراغ الدین وانہ نے اپنی تقریر وچ کہیا کہ زباناں صرف اظہار دا وسیلہ ہی نہیں ہوندیاں بلکہ اپنے اندر اس خطے دی ہزاراں سالاں دی قدیم لوک سیانپ، تاریخ، تہذیب تے ادبی بھنڈار دیاں وی امین ہوندیاں نیں۔ پنجابی زبان توں محروم کر کے پنجابی بالاں نوں اپنی پنج ہزار سالہ تاریخ، تہذیب، تمدن تے ادب توں وی محروم کر دتا گیا اے۔ اسیں اس لسانی غلامی دے خلاف جدوجہد کر رہے ہاں۔ اوہناں نے پنجابی زبان دے لہجیاں نوں وکھری زباناں قرار دین دے عمل اور پنجاب نوں وَنڈن دی سازشاں دی وی شدید نندیا کیتی۔ اْچیچے پروہنے شیخ راشد شفیق نے پنجابی زبان دی وسعت تے خوبصورتی اُپر گل بات کردے ہوئیاں کہیا، کہ پنجابی صوفیا دی زبان اے اور سانوں ہر سطح اُپر اپنی ماں بولی دے تحفظ تے ترقی دی بھرویں کوشش کرنی چاہیدی اے۔ صدر محفل محمد حنیف حنفی نے اپنے خطاب وچ حکومت توں پنجابی نوں نصاب دا لازمی حصہ بناون دی منگ کیتی۔
اختتام اُپر پروہنیاں تے رلتیاں وچ پنجابی روایت مطابق ٹکر پانی وی ورتایا گیا۔