پنجابی یونین دے پربندھ ہیٹھ امریکا وچ پنجابی زبان و ادب لئی متحرک شہزاد ناصر دے ناں اک شام
ظ عباس
شہزاد ناصر امریکا وچ مقیم دانشور نیں جہڑے پنجابی زبان وادب دا اک معتبر حوالہ نیں۔ اوہ وشل میڈیا اتے سرگرم نیں تے پنجابی کاز اتے دنیا بھر وچ اپنی آواز پہنچان لئی سرگرم وی نیں۔ اوہ پنجابی زبان و ادب دے ترقی نہ کرن دے باب وچ واضح فکر رکھدے نیں۔ اوہناں دے خیال وچ‘ پنجابی ای درحقیقت اپنی دھرتی دی ترقی دے دشمن نیں۔
اوہناں نے کجھ عرصہ پہلے اک انٹرویو وچ آکھیا سی‘ میری ایس سوچ‘ ایس فکر دی وجہ ایہہ ہے کہ پنجاب دے لوکاں دا جہڑا ویلا‘ بے وقت ملک تے مذہب دے حوالے نال جذبہ بیدار ہوندا رہندا اے تے ایہہ اوہ بنیادی وجہ اے جہدے کارن پنجاب دھرتی دے واسی کجھ ہور ویکھ یا سوچ نہیں سکدے۔
اوہناں نے ایس حقیقت وَل وی اشارہ کیتا سی کہ پنج دریاواںدی ایس سرزمین اتے غیر پنجابی حکمران نیں جہدی تازہ ترین مثال عمران خان دی اے جہڑے اپنے آپ نوں پشتون آکھدے نیں تے پنجاب دی ترقی دے باب وچ اوہ ہن تک کوئی قابل فخر مثال قائم نہیں کر سکے۔
اوہناں دا ایہہ بیانیہ وی درست اے کہ سانوں پنجاب دے فروغ لئی ذہن سازی کرن دی بہتی لوڑ اے جہدے لئی غیر معمولی کم کرنا ہووے گا۔ سندھی‘ اردو‘ پشتون تے بلوچ قوماں اپنی قومیت‘ زبان دی شناخت اتے فخر کردیاں نیں لیکن پنجابی احساس کمتری دا شکار نیں‘ سوال مگر ایہ پیدا ہوندا اے کہ ایہدی وجہ کیہ اے؟ سوال تے ایہہ وی اے کہ پنجابی جے اسلام تے پاکستان داماما بن جاوے گا تے ایہدے توں سندھی‘ بلوچ یا پٹھان نوں کیہ فیدہ تے خود پنجابیاں نوں کیہ فیدہ ہو رہیا اے یا ہووے گا؟ ایہہ نظر یہ تصوراتی دنیا وچ رہن دے سوا کجھ وی نہیں‘ پنجابیاں نوں پاکستان وچ اک قوم دی حیثیت نال رہنا چاہیدا اے۔ پورا پاکستان یا پورا عالم اسلام دا نمائندہ بنن دی بچگانہ کوشش نہیں کرنی چاہیدی کیوں جے پنجابی صرف اپنے صوبے دے عوام نوں ای دھوکہ دے سکدا اے۔
اوہ پچھلے دناں خاص طور تے مادری زباناں دے عالمی دن دی تقریباں وچ رلت لئی لہور تشریف لیائے تے پنجابی یونین نے ایس موقع نوں غنیمت جانیا تے پنجابی زبان تے ادب تے صوبے دے حقوق دی گل کرن والے ایس سیوک دے نال اک شام منان دا موقع ہتھوں جان نہیں دتا جہدا انعقاد لہور دے علاقے مصطفی ٹائون وچ قائم پنجاب ہائوس وچ کیتا گیا سی۔
ایس پروقار مگر سادہ تقریب دی صدارت شہزاد ناصر نے کیتی۔ مہمانان خصوصی وچ چانڈیو انور عزیز‘ احمد رضا وٹو‘ ملک سعید مکرم تے پنجابی میڈیا گروپ دے صدر ندیم رضا شامل سن جد کہ منے پرمنے شاعر تے میزبان افضل ساحرنے سٹیج سیکرٹری دے فرائض انجام دتے۔
میاں آصف علی ایڈیٹر روزنامہ پنجابی زبان ہوراں آکھیا کہ سوشل میڈیا نوں پنجابی تحریک لئی بااثر طریقے نال استعمال کرن والے کجھ وڈے ناواں وچ شہزاد ناصر دا نام وی شامل اے۔
اوہ ملک توں باہر ہزاراں میل دور بیٹھ کے پنجابی زبان تے ثقافت دے پرچار لئی کم کر رہے نیں، اسیںاوہناں نوں مغربی پنجاب دے دل لہور وچ جی آیاں نوں آکھدے ہاں۔ نوجوان صحافی مخدوم عدیل عزیز ہوراں آکھیا کہ مینوں پنجابی نیشنلزم تے پنجابی تحریک ول لیان وچ شہزاد ناصر دا وڈا ہتھ اے۔ ساہنوں مسلمان تے پاکستانی ہون دے نال پنجابی قوم پرست وی ہونا چاہیدا اے ، ساڈے لئی فخر دی گل اے کہ اسیں پنجابی ہاں ۔ پاکستان دے پہلے پی ایچ ڈی سکھ سکالر کلیان سنگھ کلیان ہوراں دا آکھنا سی کہ پنجابی زبان و ادب دے ودھا لئی مدثر اقبال بٹ تے پنجابی میڈیا گروپ دیاںخدمتاں نوں سُنہرے اَکھراں وچ لکھیا جائے گا، مینوں روزوار بھلیکھا نال جُڑیاں20 ورھے لنگ گئے۔ ناصر شہزاد
بارے گل کر دیاں اوہناں دا آکھنا سی کہ ایہہ لوگ ساڈے لئی بوہت ای قابل احترام نیں جیہڑے بیگانے ملکاں وچ وسدیاں ہویاں وی اپنی اصل نوں نہیں بھُلے بلکہ اپنی زبان تے ثقافت دے فروغ لئی مسلسل کوششاں وچ نیں۔
پنجابی سیوک ، استاد تے کوک پاکستان کوک دے روح رواں حسنین بھٹی ہوراں دا آکھنا سی کہ پنجابی ساڈی شناخت اے، ایس دور وچ پنجابی تحریک نوں سوشل میڈیا نے بوہت فائدہ پہنچایا، سوشل میڈیا نے پنجابیاں نوں آپس وچ جوڑ دتا اے تے سوشل میڈیا نوں ایس کم لئی استعمال کرن والیاں وچ سبھ توں اہم نام شہزاد ناصر دا اے۔ پنجابی شاعر، ادیب، ناول نگار تے استاد زاہد حسن ہوراں دا کہنا سی کہ پنجابی تحریک مدثر اقبال بٹ دی قیادت وچ خوب ترقی کر رہی اے، مادری زباناں دے عالمی دن اُتے پورے پنجاب وچ پنجابی زبان دے حق لئی جیہڑیاں تقریباں تے مظاہرے ہوئے ایہہ ایس گل دا ثبوت نیں کہ ہن اوہ ویلا دور نہیں جد پنجابی اپنا حق حاصل کر لین گے۔اوہناں دا کہنا سی کہ شہزاد ناصر ورگے لوگ ساڈا اثاثہ نیں اوہناں دے نال اینج دے پروگرام کروان نال باقی دوستاں نوں وی تحریک ملے گی۔ پنجابی میڈیا گروپ دے صدر ندیم رضا ہوراں آکھیا کہ پنجابی تہذیب صدیاں اُتے محیط اے پنجابی تے اوس ویلے وی سی جد مہا بھارت لکھی گئی سی پختون تہذیب تے کل دی گل اے ایس دی ثقافت دے بوہت وڈے حصہ نے پنجابی توں جنم لیا اے پنجاب ہاؤس تعلیمی تحقیقی مرکز دے نال نال اج پنجابی دیاں تحریکاں دا گڑھ وی بن گیا اے جس دے پیچھے مدثر اقبال بٹ تے اوہناں دوستاں دی طویل جدوجہد تے قربانیاں ہین ۔ شہزاد ناصر دے ایتھے آن نال پنجاب ہاؤس دا مان ودھیا اے۔ چانڈیو انور عزیز ہوراں آکھیا کہ شہزاد ناصر بوہت خوبصورت شخصیت دے مالک تے امریکہ وسن دے باوجود پنجاب تے پنجابیاں نال محبت کرن والے نیں، پنجاب دی رہتل دنیا دی قدیم تہذیباں وچ شمار ہندی اے ۔ شہزاد ناصر دی ایہ خوبی اے کہ اوہ دوستاں اُتے تنقید تے اپنے مخالفاں نوں سراہن وچ کنجوسی نہیں کردے۔اوہناں دا بوہت زیادہ ویلا سندھ وچ لنگیا اے جیتھوں متاثر ہوکے اوہناں نے لہور ول منہ کیتا اوس ویلے پنجابی دے حوالے نال گل کرن اُتے اوہناں نوں تنقید داساہمنا کرنا پیا تے فیر امریکہ چلے گئے لیکن اج وی پنجاب تے شہزاد ناصر اک دُوجے دے دل وچ وسدھے ہیں۔ زاہدحسین ہوراں آکھیا کہ کدی اوہ ویلا سی کے پنجابی بارے گل کرنا مشکل سی لیکن ہن وڈھے وڈھے تعلیمی ادارے وی پنجابی نوں اپنے پروگراماں دا حصہ بنان لگے نیں۔اقبال ریسرچ انسٹیٹیوٹ نے وی ہن پنجابی دے پروگرام کرن دا فیصلہ کر لیا اے جیہڑاحوصلہ افزا اے۔رانا احتشام ہوراں آکھیا کہ ساڈھے بزرگ اپنے بالاں نال پنجابی وچ گل کرن وچ شرم محسوس کردے سن لیکن میں پنجابی سِکھ لئی اے تے میں ہر جگہ پنجابی وچ گل کردا ہاں جس دا سارا کریڈٹ شہزاد ناصر نوں جاندا اے۔احمد رضا وٹو ہوراں آکھیا کہ شہزاد ناصر سبھ نوںنال لے کے چلن والی شخصیت اے۔اختلاف کرنا کوئی مشکل کم نہیں مشکل کم اے اختلاف دے باوجود سبھ نوں نال لے کے چلنا ۔سوشل میڈیا پیغام رسانی دا اک ذریعہ اے۔اصل عملی کم پیغام دین توں بعد شروع ہندا اے۔ساڈھے بزرگاں نے جیہڑے بیج بوئے سن ہن اوہناں بیجاں توں کِھڑن والے پھُلاں نوں اِکٹھا کرن دا ویلا اے۔ سوشل میڈیا نے پنجابی دے خلاف تعصب نوں توڑن وچ اہم کردار ادا کیتا اے جس وچ شہزاد ناصر دیاں خدمتاں قابل ذکر نیں۔
پنجابی یونین دے چیئرمین مدثر اقبال بٹ ہوراں آکھیا کہ شہزاد ناصر دا کم بوہت چنگا اے جس دی تعریف وی کرنی چاہیدی تے ستائش وی۔احمد رضا وٹو نے پنجابی تحریک نوں اگے ودھان وچ اہم کردار ادا کیتا اے میں اوہناں دی ایس گل توں اختلاف کردا ہاں کہ لہور وچ ایس سال تحریک وچ کمی آئی اے بلکہ ایس سال ایس وچ بوہت تیزی آئی اے 21 فروری دے جلسہ وچ اوہ لوگ وی وڈھی تعداد وچ آئے جیہڑے اینج دیاںتقریباں وچ نہیں آندے سن۔کدی پنجابی دل گل کرنا غداری سمجھیا جاندا سی لیکن ہن پنجابی لئی کم کرنا بوہت آسان اے۔ اسیں 31 ورھے توں پنجابی دا اخبار بھلیکھا چھاپ رہے ہاں تے ثابت کیتا اے کہ پنجابی صحافت گھاٹے دا سودا نہیں اے ۔ساڈھی جدو جہد جاری اے جس وچ نکامی دا کوئی تصور نہیں اے اسیں اگے ودھ رہے ہاں تے ودھ دے رہاں گے آن والا ویلا پنجابی دا اے ۔ اسیں پنجابی دے فروغ لئی باہر دے ملک وسن والے پاکستانیاں نوں وی اپنے نال جوڑاں گے تے پاکستان دے اندر وی اختلاف رکھن والیاں نوں پنجابی کاز لئی اکٹھا کراں گے تے اپنی منزل پا لاں گے۔ تقریب دے آخر اُتے صدر محفل شہزاد ناصر ہوراں آکھیا کہ سندھ وچ خصوصی طور اُتے کراچی تے دُوجے صوبیاں وچ قوم پرستی دیاں تحریکاںپنجاب نال نفرت دی بنیاد اُتے پروان چڑھیاں نیں لیکن پنجابیاں نے کدی ایس گل نوں اہمیت نہیں دتی۔ہن ویلا آگیا اے کہ اسیں وی اپنی قوم دی گل کریئے تے پنجاب دی ونڈ کرن والیاں دے خلاف اکٹھے ہو جائیے تے اینج دیاں قوتاں دا مقابلہ کریئے اوہناں نے پنجابی دے فروغ لئی کم کرن اُتے مدثر اقبال بٹ ،احمد رضا وٹو تے اوہناں دے ساتھیاں دا شکریہ ادا کیتا۔اسٹیج سیکرٹری افضل ساحر نے تقریب وچ رلتیاں دا شکریہ ادا کیتا۔
