جگت ماں بولی دیہاڑ تے پنجاب لوک لہر

قسور مبارک بٹ ہوراں دی اگوائی وچ پنجابی بولی تے رہتل دے ودھا لئی کم کرن والی تنظیم دا ناںہمیش زندہ رہے گا

پڑھن ہاروں وادی سپت سندھو جہڑی کہ ہمیشہ دریاواں دی تعداد تے ایتھوں دے پانیاں توں موسوم رہی اے۔ اس دا موجودہ ناں ’’پنجاب‘‘ وی دنیا دی اس قدیم ترین تہذیب ورگا پرانا اے جہڑا کہ مختلف علاقیاں تے زباناں دے ہندو دھارمک لکھاریاں ، ایرانی ، افغانی ، ترک ، منگول تے کئی ہور وسط ایشیائی حمل آوراں ، قابضین ، فاتحین ، تاجرین ، سیاحواں جنہاں دا کہ سلسلہ قبل از اسلام توں شروع سی تے بعد از اسلام انہاں ہی لوکاں نے اپنے مفاد دی خاطر مذہب نوں ہتھیار دے طور تے ورتنا شروع کر دتہ سی \ ہائی تاکہ مذہب نوں ہتھیار دے طور تے ورت کے مقامی مسلماناں دی تائید حاصل کیتی جا سکے۔ ساڈا خطہ انہاں مختلف حاکمین دے ادوار وچ سپت سندھو ، ملوہا ، پچاندا ، پنج ندا ، پنج ند توں اپنے ناں دا ارتقائی سفر طے کردا ہویا ماضی قریب وچ ایرانی فارسی باناں دے دور حکومت وچ موجودہ ناں’’ پنجاب‘‘ تے آن اختتام پزیر ہویا اے۔

اُنج تے ساڈی وادی دے ناں’’ پنجاب‘‘ دا ارتقائی عمل تے تہذیب و تمدن دے آثار دس ہزار سال تک دے موجود نیں پر 1866 انگریز دور وچ ملتان لاہور دی ریل پٹڑی وچھاندیاں ہویاں ہڑپہ دی ساڈی ساڈھے پنج ہزار سال پرانی تہذیب دی دریافتگی ہوئی جس نے اج دے جدید زمانے دی ساری دنیا وچ ساڈیاں ہزاراں سالاں دیاں روایات ، رہن سہن دا انداز ، کھیڈاں ، کھڈونے ، صفائی پسندی ، تجارتی نظام تے اک سلیقہ مند قوم دا ظاہری ثبوت پیش کر کے خوبصورت چہرہ دنیا دے سامنے رکھیا۔ اس دے بعد 1922وچ وادی سندھ دی اسے تہذیب دا حصہ موجودہ صوبہ سندھ وچ موہنجو داڑو دے مقام تے دریافت ہویا۔ اج دے موجودہ پنجاب تے پنجابی مخالف دور وچ جتھے کہ سانوں اندرونی تے بیرونی مخالفتاں دا سامنا اے تے پنجابی قوم دے مخالفین ہر ویلے سانوں ذات ‘ فرقہ ‘ علاقائی لہجیاں تے بولیاں وچ ونڈن دے دوالے رہندے نیں۔
ساڈی قومی خوش بختی اے کہ مصروفیت دے اج دے دور وچ وی ساڈے مہان پنجابی قوم پسند قائدین اس افراتفری تے خود پسندی دے دور وچ کھلری ہوئی پنجابی ایکتا نوں کٹھا کرن وچ مصروف عمل نیں۔
انہاں مہان ہستیاں وچوں جناب قسور مبارک بٹ جی دا ناں کسے کولوں ڈھکیا چھپیا نہیں اے۔ آپ نے اج توں 35 ورہے پہلے جدوں پنجابی قوم غلامی دا جام پی کے خواب خرگوش وچ ستی پئی سی قومیت تے بیداری دی ایہوجہی روح پھونکی جس دا کہ اثر اج ہر پنجابی قوم پسند تے واضح ہو چکیا اے۔ ’’پنجاب لوک لہر‘‘ دے مرکزی صدر قسور مبارک بٹ جی پنجابی ایکتا دے مخلصانہ مقصد نوں پورا کرن لئی ناصرف ساہیوال تے دوجیاں شہراں وچ ماں بولی دے ہوالے نال مختلف فنگشنز تے پنجابی لکھتاں دی کتاباں چھپوا کے ونڈدے نیں بلکہ ہر سال’’ جگت ماں بولی دیہاڑ‘‘ دے موقع تے قومی شعور دے فروغ لئی مذہب، فرقہ ، ذات ، گوتھ تے علاقائی لہجیاں بولیاں وچ کھلری ہوئی لوکائی نوں پنجابی قومی ایکتا \ وحدت دی اک ہی مالا وچ پرون لئی ہر سال 21 فروری جگت ماں بولی دیہاڑ دے موقع تے پنجاب دے مختلف شہراں وچ اقوام متحدہ United Nation دے Order مطابق بچیاں نوں مڈھلی تعلیم انہاں دی ماں بولی وچ دین دی منگ کرن وچ اک مثال پیدا کر دیندے نیں۔

سوہنے پڑھن ہاروں :
قسور مبارک بٹ جی دے ساہیوال توں گھلے گئے پنجابی قافلے راہیں انہاں دی بہتر منیجمنٹ دا ہی ایہہ کمال سی کہ لاہور وچ 11جنوری 2020 نوں مادھو لال توں پریس کلب لاہور تک نکلن والی ریلی وچ جہڑا رنگ پنجاب لوک لہر نیں بھریا سی اوہ کسے ہور دے حصے وچ نہیں آیا۔ جس دا کہ سارے شرکاء معترف نیں۔
اس توں بعد پچھلے سال 21 فروری 2021 نوں ساہیوال نیڑے پنجاب دے ہزاراں سال پرانے تہذیبی و تمدنی نشانیاں دے مقام’’ ہڑپہ‘‘ دے میوزم وچ تقریب دا ودھیا پربند کیتا گیا سی۔ جس وچ ضلع دیاں سیاسی ، تعلیمی ، سماجی تے کاروباری سنگتاں نے بھرویں رلت تے منج تے ماں بولی بارے اپنے سوہنے وچار سانجھے کر کے پنجاب ، پنجابی ، پنجابیت نال پیار دا بہت سوہنا ثبوت دتہ سی جس کارن ساہیوال تے باقی پنجابیت نال پیار کرن والے لوکاں تک پنجابی قوم پرستاں دا بہت سوہنا پیغام اپڑیا سی۔
ہر سال منایا جان والا جگت ماں بولی دیہاڑ اس دفع 21 فروری 2022 نوں منان تے پنجاب وچ بچیاں نوں مڈھلی تعلیم انہاں دی اپنی زبان پنجابی وچ دا حق دیوان لئی ٹورا تے ویکھالا کرن لئی پاک پتن وچ پنجابی دے پہلے شاعر بابا فریدالدین گنج شکر دے مزار دا انتخاب کیتا گیا سی۔ قسور مبارک بٹ جی دے گھر نیڑے جوگی چوک توں پنجاب لوک لہر دا قافلہ نکلیا۔ جس وچ کہ ریلی دے انتظامات مثالی سن پینافلکس’’ کارڈز ‘‘ سٹیکرز ، صافے’،ڈھول تے جھمر آلے سب کجھ مکمل کر لیا گیا سی۔ ریلی دے مزار شریف تک پہنچن لئی بساں گڈیاں دا ودھیا پربندھ کیتا گیا سی جہڑیاں کہ جوگی چوک ساہیوال بٹ صاحب دی رہائش گاہ توں روانہ ہویاں۔ بابا تاج الملوک دے قیمتی مشوریاں تے بھائی آتش کیانی ،شاہسوار کیانی، عقیل سجاد ، راجہ جہانگیر قمر ( مرکزی سیکرٹری پنجاب لوک لہر ) دی منیجمنٹ نے ریلی دے انتظامات تے جلوس نوں منظم رکھن وچ اہم کردار ادا کیتا۔
ریلی توں کجھ دن پہلے پنجاب لوک لہر ولوں پنجابی ماں بولی نوں نصابی تعلیم بنان لئی ڈپٹی کمیشنر ساہیوال ملک اویس نوں اک یاداشت پیش کیتی گئی اس وفد وچ راجہ جہانگیر قمر ، آتش کیانی وحید خان بلوچ تے کجھ ہور پنجابی قوم پرست موجود سن ۔ اس موقع تے ڈپٹی کمشنر ساہیوال ملک اویس نے آکھیا کہ ساڈے پیراں ولیاں دی زبان دنیا دی کسے زبان توں گھٹ نہیں۔ حکومت نوں چاہیدا اے کہ اس عوامی منگ تے غور کرے۔
پاک پتن وچ پنجاب لوک لہر ریلی دی پرنٹ ، سوشل تے الیکٹرونک میڈیا نے بہت سوہنی کورج کیتی سی جہانگیر قمر جی تے آتش کیانی جی نے میڈیا راہیں پاکستان دے باقیاں صوبیاں وانگوں پنجاب وچ پنجابی زبان نوں مڈھلی تے نصابی تعلیم بنان دی منگ کیتی ، اپنی تقاریر تے بیانات ریکارڈ کروائے۔ جنہاں نوں کہ بہت سوہنی کورج ملی۔ باقیاں دے نال نال پنجاب لوک لہر دے ذاتی چینل نے وی ریکارڈ تے نشر کر کے اپنی پنجاب دوستی دا ثبوت دتہ۔ ضلع خانیوال وچ پنجاب لوک لہر دے مرکزی نائب صدر تے پنجابی لکھتاں دی ادبی تنظیم ’’پنجابی ادبی ستھ ‘‘ دے چیئرمین حاجی محمد عارف نے عبدالحکیم ، مخدوم پور پہوڑاں ، خانیوال ، میاں چنوں تے تلمبہ وچ پنجاب لوک لہر دی سوہنی نمائندگی نبھائی۔
ایتکی ماں بولی دیہاڑ دے موقع تے پاک پتن وچ پنجابی دے پہلے شاعر بابا فرید دے مزار تے حاضری دے دوران چادر چڑھان دا وی پربند کیتا گیا سی۔ راجہ جہانگیر قمر ، آتش کیانی ، موتیا مسعود ، شاہ سوار کیانی ، عقیل سجاد ، پروفیسر امیر حمزہ ، احمد رمضان ، جمیل فریدی ، اویس عابد ، تے دوجے قوم پرستاں نے چادر پوشی کر کے ریلی دا مان ودھایا تے دعاواں وچ رب اگے ایہہ بنتی کیتی کہ ساڈے پیار تے اتفاق دا سبق دین والے صوفیاء دی بولی پنجابی نوں ساڈے بالاں دی پڑھائی لکھائی دی زبان بنان وچ ساڈی مدد فرما۔
ساڈی دعا اے کہ اللہ تعالی محترم قسور مبارک بٹ صاحب نوں صحت کاملہ عطا فرمائے تے اوہ اسے طرح ساڈی پنجابی قومی قیادت کردے رہن۔ آمین