’’پاکستان نظریاتی پارٹی‘‘ بنان دیاں تیاریاں

شکیل امجد صادق

اک ٹیلی فونک انٹرویو وچ ریڈیو انائونسر نے اپنے مہمان توں جو اک کروڑ پتی بندہ سی ‘ پچھیا: زندگی وچ سب توں ودھ خوشی تہانوں کس چیز وچ محسوس ہوئی؟
اوہ کروڑ پتی بندہ بولیا: میں زندگی وچ خوشیاں دے چار مرحلیاں توں گزریا واں تے آخر وچ مینوں حقیقی خوشی دا مطلب سمجھ وچ آیا۔ سب تو ںپہلا مرحلہ سی مال تے اسباب اکٹھا کرن دا پر ایس مرحلے وچ مینوں اوہ خوشی نہیں ملی جو مینوں مطلوب سی۔ فیر دوجا مرحلہ آیا قیمتی سامان تے شیواں اکٹھیاں کرن دا پر مینوں افسوس ہویا کہ ایس چیز دا اثر وی وقتی اے تے قیمتی چیزاں دی چمک دمک وی زیادہ دیر تک برقرار نہیں رہندی۔ فیر تریجا مرحلہ آیا وڈے وڈے پراجیکٹ حاصل کرن دا جیویں فٹ بال ٹیم خریدنا‘ کسے ٹورسٹ ریزارٹ وغیرہ نوں خریدنا پر ایتھے وی مینوں اوہ خوشی نہیں ملی جہدا میں تصور کردا سی۔ چوتھی واری انج ہویا کہ میرے اک دوست نے مینوں کہیا کہ میں کجھ معذور بچیاں لئی وہیل چیئرز خریدن وچ حصہ لواں۔ دوست دی گل تے میں فوراً وہیل چیئرز خرید کے دے دتیاں پر دوست دا اصر ار سی کہ میں اوہدے نال جا کے اپنے ہتھ نال اوہ وہیل چیئرز اوہناں بچیاں دے حوالے کراں۔ میں تیار ہو گیا تے اوہدے نال گیا۔ اوتھے میں اوہناں بچیاں نوں اپنے ہتھاں نال اوہ کرسیاں دتیاں۔ میں اوہناں بچیاں دے چہریاں تے خوشی دی عجیب چمک ویکھی میں ویکھیا کہ اوہ سب کرسیاں تے بہہ کے ایدھر اودھر گھم رہے نیں تے جی بھر کے مزا کر رہے نیں۔ انج لگدا سی کہ اوہ کسے پکنک سپاٹ تے آئے ہوئے نیں پر مینوں حقیقی خوشی دا احساس اودوں ہویا جدوں میں اوتھوں جان لگا تے اوہناں بچیاں وچوں اک نے میرے پیر پھڑ لئے۔ میں نرمی دے نال اپنے پیر چھڑان دی کوشش کیتی پر اوہ بچہ میرے چہرے ول بغور ویکھدا ہویا میرے پیراں نوں مضبوطی نال پھڑی رکھیا۔ میں جھک کے اوس بچے توں پچھیا کیہ تہانو کجھ ہور چاہیدا اے؟ اوس بچے نے جو جواب مینوں دتا اوہنے نہ صرف مینوں حقیقی خوشی بارے واقف کرایا سگوں میری زندگی نوں پوری طرح بدل کے رکھ دتا۔ اوس بچے نے کہیا میں تہاڈے چہرے دے نقوش اپنے ذہن وچ بٹھانا چاہنا واں تاں جے جدوں جنت وچ تہانوں ملاں تے تہانوں پچھان سکاں تے اک واری اپنے رب دے سامنے وی تہاڈا شکریہ ادا کر سکاں۔
شروع توں ای انسانی سوچ دے زاویے تے فکری رویے پراسراریت دے حامل رہے نیں پر ایس فلسفے دا دوجا پہلو وی پوری ہمہ گیریت دے نال موجود اے۔ گل نوں سوچنا‘ پرکھنا تے تہہ چوں کڈھنا تحقیق نوں جنم دیندا اے تے اوس تحقیق توں گل نوں سچ ثابت کرنا مفروضہ کہلاندا اے۔ ایسے مفروضے نوں جدوں گنجھلک تے گھمبیر انسانی رویاں تے لاگو کرکے خاطرخواہ نتیجے کڈھے جان تے اوہنوں مثبت تبدیلی دا ناں دتا جاندا اے۔ انج دیاں ای مثبت تبدیلیاں انسانی زندگیاں نوں بدلن وچ بڑا اہم کردار ادا کردیاں نیں انسان جدوں وی مایوس ہوندا اے تے جائے پناہ لبھدا اے۔ سکون دا متلاشی ہوندا اے۔ اوہدیاں ساہواں کسے مترنم روح یاں متلاطم بحر نوں لبھدیاں نیں۔ اوہدی بے قراری اوہنوں اینی بے حال کر دیندی اے کہ اوہ بناں سوچے کسے نادیدہ جزیرے دا رخ کردا اے۔ ایہو حال پاکستانی لوکاں دا ہویا۔ اوہناں نے تنگ آ کے تحریک انصاف نوں اپنا نجات دہندہ سمجھیا پر حالات نے ثابت کر دتا کہ ایہ پارٹی پاکستانی لوکاں دی حقیقی مسیحا نہیں سی۔ ایہدی بنیادی وجہ صرف ایہو اک سی کہ صرف علی بابا سی تے باقی چالھی چور اوہو سن۔ ایس سیاسی ٹیم دا کپتان کرکٹ توں لے لیا گیا تے باقی کھڈاری ’’وانجو‘‘ ہونجا پھیرو تے دوجیاں بدیسی کھیڈاں توں لئے گئے سن۔ ایس طرح ہن دی واری جو حشر غریب لوکاں تے ملک دا ہویا اے ایہدی مثال تریخ وچ نہیں ملدی۔
موجودہ سیاست دی بے چینی نوں ویکھدے ہوئے شہیر حیدر سیالوی نے ’’پاکستان نظریاتی پارٹی‘‘ دے ناں توں اک نویں پارٹی سیاسی میدان وچ لیان دا فیصلہ کیتا اے۔ اوہناں دا خیال اے سگوں ایجنڈا اے کہ موروثی سیاست توں جان چھڑا کے لوکاں نوں جین دا ڈھنگ سکھایا جاوے تے ملک دے ہر بندے نوں اوہدا تشخص چیتے کرایا جاوے۔ کرپشن‘ لاقانونیت‘ اقرباپروری ورگے ناسور نوں جڑوں پٹ دتا جاوے۔ سرمایہ دارانہ نظام نوں جڑوں پٹ دتا جاوے۔ لٹی گئی ملکی دولت واپس خزانے وچ جمع کیتی جاوے۔ دولت جہڑی کجھ خانداناں دی دہلیز تے نچ رہی اے۔ اوہنوں غریباں تک اپڑایا جاوے۔ وسیلے عام بندے دے بوہے تے اپڑائے جان۔ نوجواناں نوں بیروزگاری توں بچایا جاوے جے شہیر حیدری دی ایہ پارٹی واقعی اپنے مقصد تے نصب العین وچ سچی اے تے اوس پارٹی دا مستقبل روشن اے۔ جے شہیر حیدر نوں لوکاں دی خدمات وچ سکون حاصل اے تے یقینا کامیابی دے پیر چُمے گی تے اوہناں نوں اوہو سکون ملے گا جو اوس مہمان نوں اک بچے نوں وہیل چیئر دے کے حاصل ہویا سی۔ بقول نبیل قیصر
جانے کب انقلاب آ جائے
رتجگوں کو بھی خواب آ جائے
جانتا ہوں کہ اب ہے دھوپ نبیل
کیا خبر کب سحاب آ جائے