شیخوپورہ دی دھرتی نے وَڈے وَڈے ادیب، شاعر ، صوفی گائیک تے سُورمے پیدا کیتے

فاطمہ جناح پبلک لائبریری شیخوپورا دے لائبریرین افتخار احمددی روزوار بھُلیکھا نال گل بات

(شیخوپورا ،بیورو رپورٹ)

کتاب انسان دی بہترین دوست اے ۔ ایہ کہنا اے افتخار احمد ہوراں دا جہڑے کہ فاطمہ جناح پبلک لائبریری شیخوپورا دے لائبریرین نیں۔ افتخار احمد ہوراںمعروف شاعر ، ادیب تے روز وار بھلیکھا دے بیوروچیف جاوید پنچھی، تے صحافی و کالمسٹ شیخ محمد طیب نال اک ملاقات وچ گل بات کردیاں آکھیا کہ :
’’ شیخوپورا پنجاب دا اوہ ضلع اے جہنے بڑے بڑے نامی گرامی تے صوفی شاعر پیدا کیتے نیں۔ بڑے دکھ نال کہنا پیندا اے کہ ساڈے سکولاں ، کالجاں وچ کدی وی کسے اُستاد نے ساڈے بالاں نوں ایہ نہیں دسیا کہ شیخوپورا ضلع وچ دوسو توں ودھ لکھاری پیدا ہوئے نیں جہناں بہت چوکھا ناں کمایا اے تے اپنی جمن بھوئیں ، اپنی دھرتی دا ماں ناں روشن کیتا اے‘‘۔

فاطمہ جناح پبلک لائبریری شیخوپورا دے لائبریرن افتخار احمد ہوراںروز وار بھلیکھا دے بیورو چیف جاوید پنچھی نال گل کردیاں آکھیا کہ:’’اُنج تے شیخوپورا شہر دی تاریخ بہت پرانی اے تے ایہ شہر بڑے حوالیاں نال مشہور اے۔ مثال طور تے:سکھ مذہب دے بانی ’’گرونانک دیو‘‘ نے اپنا علمی، ادبی تے مذہبی پندھ شیخوپورا دے نواحی پنڈ ’’سچا سودا‘‘ توں شروع کیتا سی۔ ایہ انکھی لوکاں دا شہر اے جسراں پنجاب دا وڈا ہیرو تے سائو پتّر دُلّا بھٹی وی ایسے ضلعے وچ پیدا ہویا۔ سانوں دُلّا بھٹی جہے انکھی ہیرو تے فخر اے ۔ایہ شہر مغل بادشاہواں دے فنی طرز تعمیر جسراں شاہی قلعہ، ہرن مینار تے شکار گاہ پاروں وی مشہور اے۔

جے ادب و ثقافت تے فنون لطیفا دے اعتبار نال شیخوپورا دی گل کیتی جائے تے فیر ایہ دھرتی بڑی زرخیز اے۔ مثال دے طور تے شاعری دے حوالے نال مشہور پنجابی لوک داستان ’’ہیر رانجھا‘‘ دے خالق تے مزاحمتی صوفی شاعرحضرت سید وارث شاہ رحمۃ اللہ علیہ، تے مصر شہر دی مشہور اسلامی عشقیا داستان ’’یوسف زلیخا‘‘ دے خالق حضرت مولوی عبدالستار رحمۃ اللہ علیہ، عالمی پدھر دے شاعر ہوئے نیں۔ جہڑے کہ شیخوپورا دی دھرتی دے سپتر نیں۔منشاء یاد ، جہڑے کہ سید وارث شاہ رحمۃ اللہ علیہ ہوراں دے آبائی پنڈ ٹھٹھہ قادر شاہ وچ پیدا ہوئے۔ اوہناں نے پنجابی ادب نوں بہت کجھ دان کیتا ۔ بہت ساریاں پنجابی کہانیاں دیاں کتاباں تے خاص طور تے اوہناں دا ناول ’’ٹاواں ٹاواں تارا‘‘ ذکر جوگ اے۔
اجوکے دور وچ ، جہناں شاعراں نے عالمی لیول دیاں کانفرساں وچ کروائے گئے مشاعریاں وچ رلت کیتی اوہناں وچ ،ڈاکٹر میاں ظفر مقبول (پی ایچ ڈی) تے پروفیسر غلام رسول آزاد(مرحوم) دے ناں شامل نیں۔ صوفی گائیک جناب حسنین اکبر ہوری وی گواہنڈی ملک بھارت دے پنجاب وچ کئی وار اپنے فن دے جوہر وکھا کے عالمی پدھر دے دانشوراں توں داد لے چُکے نیں۔ پنجابی صوفی گائیک محمد اسلم باہو ، عرفان انصاری، تیمور افغانی تے ہور بہت سارے صوفی گائیک وی ضلع شیخوپورا وچ پیدا ہوئے۔
ایس توں وکھ ضلع شیخوپورا نے تقریباً دو سو(۲۰۰) توں ودھ لکھاری پیدا کیتے ۔جہناں نے شاعری تے نثر لکھ کے اپنا تے اپنی مٹی دا ناں اُچا کیتا اے۔شیخوپورا دے ادبی، حلقیاں ولوں کیتی گئی پرزور منگ نوں مُکھ رکھدیاں اساں فاطمہ جناح پبلک لائبریری وچ اک کمرا مختص کیتا اے جہدے وچ صرف ضلع شیخوپورا دے لکھاریاں دیاں کتاباں رکھیاں جان گیاں تے اوس پورشن نوں ’’شیخوپورا دے لکھاری ‘‘ دے ناں نال منسوب کیتا جاوے گا۔
فاطمہ جناح پبلک لائبرئیری شیخوپورا دے لائبریرین جناب افتخار احمد ہوراں دسیا کہ جدوں توں میری ڈیوٹی ایتھے لگی اے اسیں شیخوپورا دے ساریاں لکھاریاں نوں نہ صرف اجازت دتی اے کہ اوہ اپنے سارے ادبی پروگرامز ساڈی لائبریری وچ کروان سگوں لائبریری دے سارے ملازم وی اوہناں نال رل کے ادبی پروگرامز دا پربندھ کردے نیں۔ ایس سلسلے وچ ہن تک اسیں کئی ادبی اکٹھ کروان وچ کامیاب ہوئے آں جس پاروں عام لوکائی نوں کتاب پڑھن دی پریرنا ملی اے ۔ ایہو وجھا اے کہ عام لوکائی ساڈے توں منگ کر دی اے کہ ضلع شیخوپورا دے لکھاریاں دیاں کتاباں اک تھاں تے اکٹھیاں کر دتیاں جاون تاں جے پڑھن وچ آسانی ہووے ۔ ایس توں علاوا عالمی پدھر تے شیخوپورا دا تعارف ’’لکھاریاں دے شہر‘‘ وجھوں کرانا وی ساڈی سدھر اے۔