پاکستان وچ انٹرنیشنل کھیڈاں دی بحالی وچ پنجاب پُلس دا کردار

سید بدر سعید

کرکٹ ہن محض اک کھیڈ ای نہیں بلکہ بہترین سفارتکاری دا ذریعہ وی بن چکیا اے۔ ایہو وجہ اے کہ کرکٹ دے کھیڈاریاں نوں ملک دا سفیر سمجھیا جاندا اے۔2009وچ اک سانحہ مگروں پاکستان وچ انٹرنیشنل کرکٹ دے بوہے بند کردتے گئے سن تے آکھیا جا رہیا سی کہ ہن شاید کسے وی ملک دا کوئی کھیڈاری پاکستان کرکٹ کھیڈن نہیں آوے گا۔ خوش قسمتی نال پاکستانی حکومت تے شہریاں نے انتہائی گھٹ مدت وچ اپنا تشخص بحال کیتا تے پی ایس ایل دے ذریعے دنیا بھر دے سامنے پاکستان دا سافٹ امیج پیش کیتا۔ پاکستان وچ کرکٹ دی بحالی وچ جتھے پی ایس ایل دا اہم کردار اے اوتھے ای پاک فوج‘ سول حکومت تے پلس نے وی بھرواں کردار ادا کیتا تے ملک وچ کھیڈاں دی رونقاں وی دوبالا ہو گئیاں۔ پی ایس ایل 7تک دا سفر پاکستان نے انتہائی کامیابی نال طے کیتا تے مختلف ملکاں دے کھیڈاری پاکستان کھیڈن لئی آئے جہڑا کہ دنیا بھر لئی واضح پیغام اے۔

ایس سال خاص طور تے لہور وچ ہون والے کرکٹ میچاں وچ عوام دی بھرویں رلت تے لوکاں دے جوش و خروش نے ایہہ ثابت
کردتا اے کہ پاکستان اک پرامن ملک اے تے ایتھے انٹرنیشنل کھیڈاں لئی بے پناہ موقعے موجود نیں۔ ایسے طرحاں ایہہ وی ثابت ہو گیا اے کہ پاکستان دے پرامن ماحول وچ پاکستانی شہریاں دے نال نال باہر دے ملکاں توں آئے پروہنے خصوصاً انٹرنیشنل کھیڈاری وی ایسے طرح محفوظ نیں جیویں یورپ دے کسے وی ملک وچ ہو سکدے نیں۔ ایس حقیقت توں وی انکار نہیں کیتا جا سکدا کہ پاکستان وچ کرکٹ دی بحالی تے انٹرنیشنل کھیڈاریاں دی آمد دے ایس سارے سلسلے وچ پنجاب پلس خصوصاً لہورپلس دی قربانیاں وی انتہائی اہمیت دی حامل نیں۔ پی ایس ایل دے آغاز وچ سماج دشمن عناصر نے ایس کھیڈ نوں متنازعہ بنان دی کوشش کیتی جہنوں پنجاب پلس نے ای اپنی جاناں اتے کھیڈ کے نکام بنایا سی۔ جدوں سماج دشمن عناصر اپنے مقصد وچ کامیاب نہ ہو سکے تے اگلے مرحلے وچ ایہہ پراپیگنڈا وی کیتا گیا کہ اک کھیڈ لئی پورا شہر جام کردتا جاندا اے۔ ایس پراپیگنڈے دا مقصد عوامی سطح اتے شدید ردعمل پیدا کر کے کامیابیاں دے ایس سفر وچ رکاوٹ پانا سی جہنوں باشعور عوام نے نکام بنا دتا۔
ایہدے وچ کوئی شک نہیں کہ پی ایس ایل سیریز دے آغاز وچ پنجاب پلس نے سکیورٹی تھریڈ ملن پاروں شہر دی سکیورٹی بوہتی سخت کیتی سی جہدے پاروں شہریاں نوں وی مشکلات دا سامنا کرنا پیا لیکن آن والے ہر سال وچ پنجاب پلس نے بتدریج جدید ٹیکنالوجی تے سمارٹ اینڈ کمیونٹی پولیسنگ راہیں ایس سلسلے نوں وی ختم کردتا تے ایس سال پی ایس ایل سیون دے موقعے اتے سارا شہر رواں دواں رہیا تے صرف ٹیماں دی موومنٹ دے دوران انتہائی گھٹ ویلے لئی ٹریفک نوں روکیا گیا۔ سب توں چنگا اقدام ایہہ سی کہ پنجاب پلس دی قیادت نے تھاں تھاں اہلکار کھڑے کرن تے ناکے لان دی بجائے شہر بھر وچ لگے سیف سٹی دے سینکڑاں کیمریاں دی مدد نال ٹیم تے شہر دی سکیورٹی لئی مانیٹرنگ کیتی جہدی وجہ نال شہریاں نوے بے جا پریشانی دا سامنا نہیں کرنا پیا۔ دوجے پاسے سی ٹی او لہور نے بہترین ٹریفک سٹریٹجی بنا کے شہر وچ ٹریفک دا بہائو معمول دے مطابق قائم رکھیا تے اہم شاہراہواں اتے ٹریفک پلس دی اضافی نفری تعینات کر کے شہر نوں ٹریفک جام توں بچا یا گیا۔ اوہ شہر جتھے اک منٹ لئی کسے سڑک نوں بند کردتا جاوے تے کئی کئی گھنٹیاں تک پورا شہر جام ہو جاندا سی۔ اوتھے ٹریفک ایس طرح ڈرائیورٹ کیتی گئی کہ ٹریفک دا بہائو جاری رہیا۔ ٹریفک پلس ولوں ہر دن ٹریفک ایڈوائزری پلان وی جاری کیتا گیا تاں جے شہریاں نوں کسے قسم دی مشکلاں دا سامنا نہ کرنا پووے۔ ایسے طرحاں سوشل میڈیا اتے پنجاب پلس دے آفیشل پیچز توں وی شہریاں دی رہنمائی کیتی جاندی رہوے تے آئی جی پنجاب رائو سردار علی خان دی قیادت وچ پلس دی ساری فارمیشناں نے بھرویں انداز وچ اپنا کردارادا کیتا۔
ایتھے ایہہ گل وی قابل ذکر اے کہ پی ایس ایل دے فائنل میچ دے موقعے تے جنہے بوہتے لوکی میچ ویکھن آئے اوہنے لوکی 2009مگروں ہن تک نہیں آئے سن۔ ایہہ عوام دا اپنی حکومت تے سکیورٹی اداریاں اتے اعتماد دا منہ بولدا ثبوت اے۔ پاکستان دے ایس سافٹ امیج نوں بحال کرن اتے وزیراعلیٰ پنجاب سردار عثمان خان بزدار مبارکباد دے حقدار نیں جنہاں نے انتظامات وچ کسے قسم دی کوئی کسر نہ رہن دتی تے سارے انتظاماں دی خودنگرانی کیتی۔ اوہناں نے بہترین انتظاماں تے سہولتاں دی فراہمی نال شائقین کرکٹ دے دل جت لئے۔ ایسے طرح وزیر قنون راجہ بشارت نے جس طرح پی ایس ایل دی سکیورٹی دی ذمہ واری لتی تے ہر موقعے تے پنجاب پلس نوں سپورٹ کیتا اوہنے پلس ملازماں دا مورال ہور اچا کردتا۔ ایتھے اہلیان لہور وی تعریف
دے حقدار نیں جنہاں نے ضلعی انتظامیہ تے پنجاب پلس دے اقدامات وچ اوہناں دا ساتھ دتا تے زندہ دلان لہور دی اصل پہچان تے رونقاں نوں واپس لیان وچ اپنا بھرواں کردار ادا کیتا۔ وزیراعلیٰ پنجاب دی ہدایت تے ضلعی انتظامیہ نے ایس موقع تے انتظامات وچ کسے قسم دی کوئی کسر نہیں چھڈی تے دوجے پاسے پلس نے وی سکیورٹی تے ٹریفک انتظامات نوں کنٹرول رکھیا۔ ایسے طرح سٹیڈیم وچ میچ توں پہلے آئی جی پنجاب رائو سردار علی خان خود اپنی ٹیم دے نال سکیورٹی انتظامات دا جائزہ لین پہنچے تے ہدایات جاری کیتیاں جد کہ سی سی پی او لہور فیاض احمد دیو تے ڈی آئی جی آپریشنز لہور ڈاکٹر عابد خان وی فیلڈ کمانڈر وانگوں سکیورٹی دے معاملیاں دی نگرانی کردے رہے۔ کرکٹ میچاں دے دوران سی ٹی او لہور منتظر مہدی وی سانوں فیلڈ وچ متحرک نظر آئے جد کہ سٹیڈیم تے اوہدے گردونواح وچ ایس پی ماڈل ٹائون وقار عظیم ولوں کیتے گئے سکیورٹی انتظامات وی قابل دید سن۔ مجموعی طور تے پنجاب پلس خصوصاً لہور پلس نے سکیورٹی تے ٹریفک تے معاملیاں نوں احسن انداز وچ حل کیتا تے سارے افسران دفتراں وچ بیٹھن دے بجائے خود فرنٹ لائن اتے نظر آئے۔

پی ایس ایل دے میچاں دے دوران اک موقع ایسا وی آیا جدوں لہور پلس دے شہیداں دی فیملیاں میچ ویکھن آئیاں ۔ ایس موقع تے شہریاں نے جس طرح پنجاب پلس زندہ باد دے نعرے لا کے اپنے شہیداں نوں خراج تحسین پیش کیتا اوہ منظر دیدنی سی۔ زندہ قوماں اپنے ہیروواں نوں کدی نہیں بھولدیاں تے لہور دے شہریاں نے ایہہ ثابت کردتا کہ اسیں سارے اپنے شہیداں دی فیملیاں دے نال آں۔ بلاشبہ پاکستان دے سافٹ امیج نوں بحال کرن وچ پلس شہیداں دا اہم کردار اے جہڑے تریخ وچ ہمیشہ لئی محفوظ ہو چکیا اے تے ایہہ شہید ای ساڈے اصل ہیرو نیں۔
پی ایس ایل دے موقعے تے سول انتظامیہ‘ پنجاب پلس تے زندہ دلان لہوریاں نے جس طرح اک منظم قوم ہون دا مظاہرہ کیتا اوہنوں ویکھ کے آکھیا جا سکدا اے کہ پاکستان تیزی نال انٹرنیشنل کرکٹ دی بحالی دا سفر طے کر رہیا اے تے انٹرنیشنل کھیڈاریاں دے آمد مگروں ہن پاکستان دے سٹیڈیم وچ انٹرنیشنل میچاں دا سلسلہ وی شروع ہو چکیا اے جہدے لئی آسٹریلیا دی ٹیم پاکستان پہنچ چکی اے۔ ایہہ میچ راولپنڈی ، کراچی تے لہور وچ کھیڈے جان گے۔ ایہہ پاکستان دی بہت وڈی کامیابی اے۔ایتھے کھیڈ کے جان والے کھیڈاری ای پاکستان دی خوبصورتی‘ جوش وجذبہ تے پرامن ماحول دے ترجمان نیں۔ سانوں یقین اے کہ انٹرنیشنل میچاں دے دوران وی پاکستانی شہری اپنے مہماناں نوں جوش و خروش نال خوش آمدید آکھن گے تے پلس سنے ضلعی انتظامیہ نال بھرواں تعاون کرن گے۔ پاکستان وچ انٹرنیشنل میچاں دا بوہا کھلن تے شہریاں سنے سارے سٹیک ہولڈرز مبارک باد دے حقدار نیں۔