“اک فرد اک تحریک” قیصر محمود گجر۔

علی احمد گجراتی۔۔۔ بانی و صدر دل دریا پاکستان رجسٹرڈ

بانی رُکن “کمیٹی دتیوال کے پیارے لوگ”
دتیوال گجرات شہر توں ڈنگہ روڈ تے اک معروف پنڈ اے۔ سیاسی و سماجی اعتبار نال اک خاص اہمیت دا حامل اے۔
سیاسی(یا ذاتی) تناو دی وجہ توں پنڈ وچ کئی دھڑے کئی پارٹیاں موجود نیں۔اک واجبی جیہا ماحول سی۔ جس نوں اسیں جے ماڑا نہیں تے آئیڈیل وی نہیں ساں کہہ سکدے۔بلکہ جے کوئی غصہ نہ کرے تے اک خشک جیہا ماحول سی۔ کوئی ادبی یا وسیبی سرگرمی نہیں سی۔پنڈ دی پدھر تے جنازہ گاہ یا مسجد دی حد تیکر کمیٹی یا فنڈ دا سلسلہ موجود سی۔ لیکن عام بندے یا لوکائی دے بھلے لئی پنڈ دی پدھر تے کوئی خاص سسٹم نہیں سی۔
چھ ست سال پہلاں اس پنڈ دے اک جوان نال میری ملاقات ہوئی ۔ تے اس دے ادبی ذوق بارے پتا لگا۔ ایہ جوان شعر تے گیت نگاری دا ٹھرک رکھدا سی۔ میرے نال اس دی شعری جُڑت قائم ہوئی۔ تے اسیں دتیوال اڈے تے اس پنڈ دی تاریخ دا پہلا مشاعرہ منعقد کیتا۔ فیر اس دے بعد دو چنگے تگڑے مشاعرے اس پنڈ دی تاریخ وچ لکھے گئے۔ جنہاں وچ چودھری خالق ہوراں دا اچیچ نال تعاون حاصل ہویا تے نال چودھری وجاہت سرور ہوریں ساڈے بانہہ بیلی بنے۔ اس دوران اس قیصر نامی جوان دی مثبت سوچ نے اس کلراٹھی زِمی چوں ٹِل مار کے اپنا وجود کھڑا کیتا۔ اپنے ہنڈ لئی نظماں لکھدا لکھدا اپنے پنڈ دی لوکائی دی تقدیر لکھن بٙہ گیا۔ مین سڑک تے کڈھے سن اوہناں دی بھرائی لئی فنڈ کٹھا کیتا۔ تے اوہناں دی بھرائی کیتی۔ پنڈ دی صفائی دا خیال آیا تے سارے پنڈ دیاں گلیاں نالیاں دی صفائی لئی اک تحریک شروع کیتی۔ اس دے نال ای اس سوچ دی کُکھ چوں اک ہور بال جمیا تے اس نے فری ڈسپنسری تے کم کرنا شروع کردتا ۔ اس دے نال ای اک ہور مان جوگ تے سلاہن جوگ کم فری ایمبولنس دا کم وی سِرے چڑھیا۔
“دِتیوال کے پیارے لوگ” ناں دی اک کمیٹی وجود وچ آئی۔ جس ویکھدے ای ویکھدے پورے پنڈ دی تقدیر بدل دتی۔ لوڑ وند تے مہاتڑ لوکاں دی مدد کرنا۔ کاروبار لئی بلا سود پیسے دینا تے ویاہ شادی تے ماڑے گھر دیاں دھیاں لئی داج یا جنج دی روٹی دا آہر کرنا ایہ وی اس کمیٹی دے منشور دا حصہ بنیا۔ پِنڈ دی بزرگ پریہا نے اس سارے سسٹم تے تبدیلی نوں مُکھ رکھدیاں ہویا ۔ پنڈ دے مسجد اور جناز گاہ دا فنڈ وی اس کمیٹی دے ہتھ وچ دے دتا۔ پاک اوراق دی بےادبی نوں ڈکن لئی ہر ہفتے پورے پنڈ وچ اک چکر لایا جاندا اے تاں جے کدھرے کوئی پاک ورقہ بالاں دی کوتاہی پاروں ڈگا ہووے تے چُگ لیا جاوے۔۔۔
میں نہیں سمجھدا کہ ایہ سارا کم کوئی اک بندہ کرسکدا سی۔ اس عمل نوں کامیاب بنان لئی سارے سارا پنڈ تے اچیچ نال پنڈ دے پردیسی لوکاں دی سانجھ سلاہن جوگ رہی۔ اک واٹس ایپ گروپ بنایا گیا۔ جس وچ پنڈ دے دوجے ملکاں وچ وسدے افراد نوں ایڈ کیتا گیا۔ تے اوہناں دے سامنے پنڈ دی بھلیائی لئی تجاویز رکھیاں گیاں۔ اس دے نال ای فنڈ واسطے عرضوئی کیتی گئی۔
بس ایہ ای اوہ لمحہ سی جدوں قیصر دیاں سوچاں دے وجود نوں ساہ لبھے تے ہر اک فرد نے بلا تفریق قوم ذات طبقہ پارٹی دھڑا اس کمیٹی وچ فنڈ دین دا اعلان کیتا۔ اک عجیب جہی کیفیت سی۔ اوہ لوک جیہڑے اک دوجے نوں ویکھ کے اک دوجے دی من کے راضی نہیں سن۔ اس نیک کم وچ اک دوجے دی صلاح نوں من وی رہے سن تے اس تے عمل وی کر رہے سن۔ پنڈ دی بھلیائی تے فلاح دے نال نال اک وڈا فیدہ ایہ وی ہویا کہ لاگت بازی تے جتھا بندی دا زور ٹُٹیا۔پنڈ وچ بھائی چارہ امن سکون تے آشتی دی ہوا ٹُری۔
ایس ویلے اس کمیٹی دی چھتر چھاویں عملی طور تے پنڈ وچ صفائی دا کم، فری ڈسپنسری فری ایمبولینس دھیاں دے ویاہ تے مدد کرنا بلاسود پنڈ دی حد تیکر قرض حسنہ دی فراہمی دا کم جاری اے۔ فری ڈسپنسری وچ کوالیفائڈ ڈاکٹر۔ لیڈی ڈاکٹر تے لیڈی سٹاف موجود اے۔
صرف پنجاہ روپے دی پرچی تے تسی اک ایم بی بی ایس ڈاکٹر توں چیک اپ وی کروا سکدے او تے دوا وی فری حاصل کر سکدے او۔ ایس سیوا توں دتیوال ای نہیں سگوں جھنڈیوال ساروچک چیچیاں پوڑ تے ہور وی کئی پنڈ فیدہ چُک رہے نیں۔ پنجاہ روپے دی پرچی تے ملن والی دوا کسے وی میڈیکل سٹور توں 3 سو روپے دی تے جے اوہ ای دوا کسے ڈاکٹر دے چیک اپ سمیت ہووےگی تے یقینا اس دے تیراں سو روپے بنن گے کہ اج کوئی وی پرائیویٹ ایم بی بی ایس ڈاکٹر ہزار توں گھٹ فیس نہیں لیندا۔
اک نکی جہی مثال تصویری شکل وچ سامنے وے۔کہ تن سو دی دوا پنجاہ روپے دی پرچی تے حاصل کیتی گئی اے۔
اس کمیٹی دے سبھناں ممبراں لئی ڈھیر دعا۔ اس دے روحِ رواں اپنے نگھے مِتر تے بِیبے ویر قیصر محمود گجر دتیوال لئی دھن شاوا۔ ایہ مان تے فخر اے کہ اجہے متر میری سنگت وچ نیں۔۔۔(میرے لئی ایہ اعزاز تے آدر رہی اے کہ قیصر محمود ہر کم دی مشاورت میرے نال کیتی۔ اور اس دی باڈی نوں تشکیل دین واسطے میری ہلا شیری تے مشاورت ہر دم اس دے نال رہی۔ اور اس گل دا دتیوال دے کسے وی دوست نواں شاید نہ پتا ہووے)