رحمان ملک پیپلز پارٹی دا بہترین اثاثہ سن

چودھری منور انجم

رحمان ملک پاکستان دی تریخ وچ سب توں لمے عرصے تک وزیر داخلہ دے منصب اتے فائز رہے۔ رحمان ملک پاکستان پیپلز پارٹی ولوں 2018توں سینیٹ دے رکن سن۔ اوہناں دی پیدائش 12دسمبر 1951نوں سیالکوٹ وچ ہوئی تے وفات 23فروری 2022نوں۔ مرحوم رحمان ملک نے سوگواراں وچ بیوہ تے 2پتر چھڈے نیں۔ اوہناں دا تعلق متوسط طبقے نال سی۔ اوہ اپنی محنت دے بل بوتے تے پاکستان دے منے پرمنے سیاستدان بنے۔ اوہناں نے 25مارچ 2008 توں 16مارچ 2013 تک وزیر داخلہ دے طور تے خدمات انجام دتیاں۔ قومی سیاست وچ داخل ہون توں پہلے اوہ وفاقی تحقیقاتی ایجنسی (ایف آئی اے) وچ افسر سن۔ 1993توں 1996 تک اوہ ایف آئی اے دے ایڈیشنل ڈائریکٹر جنرل رہے۔ اوہناں نوں جامعہ کراچی نے اعزازیہ ڈاکٹریٹ دی ڈگری دتی۔ نیز سینیٹر رحمان ملک مرحوم نوں اوہناں دی بہترین کارکردگی دے بنیاد تے حکومت پاکستان نے ستارہ شجاعت تے نشان امتیاز نال نوازیا۔ سینیٹر رحمان ملک نے کراچی یونیورسٹی توں ایم ایس سی شماریات دی ڈگری حاصل کیتی تے اوہ 4کتاباں دے مصنف وی سن۔ ’مودی وارڈاکٹرائن‘ اوہناں دی پہلی تصنیف سی۔
رحمان ملک نے محترمہ بے نظیر بھٹو دے چیف سکیورٹی آفیسر دے طور تے فرائض وی نبھائے۔ سیاسی عہد وچ وی اوہ محترمہ بے نظیر بھٹو شہید تے آصف علی زرداری دے بااعتماد تے وفادار ساتھیاں وچوں سن۔ رحمان ملک نے اَت گردی دے خلاف جنگ وچ بہت اہم تے بہادرانہ کردار ادا کیتا۔ جدوں میثاق جمہوریت لئی کوششاں ہو رہیاں سن تے میں ایس سلسلے وچ کلیدی کردار ادا کیتا۔ مگروں رحمان ملک نے وی پیپلز پارٹی تے ن لیگ دے وچ میثاق جمہوریت وچ اہم کردار ادا کیتا۔ اوہ کراچی وچ پی پی پی تے ایم کیو ایم وچ اختلافات دی صورت وچ پل دا کردار وی ادا کردے سن۔پی پی پی وچ شامل ہون مگروں اوہناں دی ترقی دا سفر کدی نہیں رکیا۔ پیپلز پارٹی دی پہلی حکومت آئی تے اوہ پچھلے وزیر داخلہ نصیراللہ بابر تے فیر بے نظیر بھٹو دے کول ہو گئے۔
رحمان ملک نے نواز شریف دے خلاف حدیبیہ کیس دی تحقیقات دے علاوہ اصغر خان کیس تے مرتضیٰ بھٹو کیس دی تحقیقات وی کیتیاں۔ محترمہ بے نظیربھٹو شہید حکومت دا خاتمہ ہویا تے رحمان ملک دے خلاف کیس بنیا تے اوہ گرفتار کر لیتے گئے۔ رہائی مگروں اوہ برطانیہ چلے گئے جتھے اوہناں نے اپنا کاروبار جمایا تے کامیاب کاروباری شخصیت بنے۔ لندن وچ رحمان ملک دے گھر اتے پی پی پی دی مرکزی مجلس عاملہ دی میٹنگ وی ہویا کردی سی۔ مینوں یاد اے جدوں اسیں میٹنگ وچ شریک ہون لئی جاندے اوہ انتہائی خوشدلی نال استقبال کردے سن۔ مئی 2006 وچ میثاق جمہوریت ہوئے یا جہدے تے بے نظیر بھٹو شہید‘ نواز شریف تے دوجے آمریت مخالف سارے سیاستداناں نے دستخط کیتے تے اوتھے وی اوہناں نے اپنا کردار ادا کیتا۔
رحمان ملک محترمہ بے نظیر بھٹو شہید دے نال 18 اکتوبر 2007 نوں وطن واپس آئے۔ بے نظیر بھٹو دے چیف سکیورٹی آفیسر دی حیثیت نال اوہ اوہناں دے بہیمانہ قتل دے موقع تے راولپنڈی وچ ای سن۔ رحمان ملک نے مشیر داخلہ تے وزیر داخلہ دی حیثیت نال لما عرصہ وزارت داخلہ دا قلمدان سنبھالے رکھیا۔ سال 19-2018 توں اخباراں وچ مضمون تے کتاباں لکھن وچ مصروف رہے۔ اپنی زندگی وچ اوہ مختلف تنازعیاں دا شکار وی رہے تاہم مردے دم تک اوہ پارٹی نال وفادار رہے۔
سینیٹر رحمان ملک دی وفات تے پیپلز پارٹی دی قیادت تے دوجی سیاسی تے سماجی شخصیات نے گہرے دکھ و غم دا اظہار کیتا تے اوہناں دی مغفرت لئی دعا کیتی۔ پچھلے صدر آصف علی زرداری نے رحمان ملک دے انتقال تے اظہار افسوس کردے ہوئے آکھیا کہ رحمان ملک محنتی تے لائق وزیرداخلہ رہے سن۔ اوہناں دی ملک لئی خدمات ناقابل فراموش نیں۔ پاکستان پیپلز پارٹی دے چیئرمین بلاول بھٹو زرداری نے پی پی پی دی سینٹرل ایگزیکٹو کمیٹی دے رکن رحمان ملک دے انتقال تے اظہار افسوس کیتا۔ بلاول بھٹو زرداری دا آکھنا سی کہ رحمان ملک نے ہمیشہ دیانتداری تے اصولاں دی سیاست کیتی۔ جدوں ملک وچ ات گردی عروج تے سی تے ایہہ رحمان ملک سن جنہاں نے ات گردی دے خاتمے وچ اک اہم کردار ادا کیتا۔ حکومتی تے سیاسی ذمہ واریاں نوں اوہناں نے ہمیشہ طریقے نال نبھایا۔ رحمان ملک دی تصنیفات ایس گل دی گواہ نیں کہ خطے دی صورتحال تے اوہناں دا عبور غیر معمولی سی۔
راجہ پرویز اشرف‘ حسن مرتضیٰ‘ شہزاد چیمہ‘ اسلم گل تے وزیراعلیٰ سندھ سید مراد علی شاہ نے وی رحمان ملک دے انتقال اتے گہرے دکھ دا اظہار کیتا تے آکھیا کہ اوہ ملنسار‘ نفیس انسان تے پارٹی دا سرمایہ سن۔ اوہناں دی پارٹی تے ملک لئی خدمات نوں فراموش نہیں کیتا جا سکدا۔ سینیٹر مولا بخش چانڈیوں دا آکھنا سی کہ رحمان ملک انتہائی محنتی تے بہادر سیاستدان سن۔ ات گردی دے خلاف جنگ وچ بطور وزیر داخلہ رحمان ملک نے تریخی کردار ادا کیتا۔ پی پی پی دے جنرل سیکرٹری نیر بخاری‘ شاہ محمود قریشی‘ شیخ رشید‘ بابر اعوان تے دوجیاں نے وی اوہناں دے انتقال تے گہرے دکھ تے افسوس دا اظہار کیتا۔ صدر مملکت عارف علوی‘ وزیراعظم عمران خان تے وزیراعلیٰ خیبر پختوانخوا محمود خان نے وی رحمان ملک دے انتقال اتے اظہار افسوس کیتا۔