پاکستان کالمسٹ ایسوسی ایشن گوجرانوالہ دی چھتر چھاویں ’’ لوک دانش دے چانن لئی ‘‘ سیمینار

آفاق بٹ

پاکستان کالمسٹ ایسوسی ایسن گوجرانوالہ دے پربندھ ہیٹھ ’’سماجی شعور کی بیداری کے لیئے کام‘‘ دے حوالے نال اک سیمینار منعقد ہویا۔ تقریب دی صدارت سینئر کالم نگار‘ شاعر‘ سفیر کتاب‘ سماج سیوک تے صدر ایسوسی ایشن عتیق انور راجہ نے کیتی جد کہ ملک محمد سلمان صدر پاکستان فیڈریشن آف کالمسٹ تے شبیر بٹ اسسٹنٹ کمشنر ہیڈ کوارٹر گوجرانوالہ نے مہمان خصوصی دی حیثیت نال تقریب نوں رونق بخشی۔ نظامت دے فرائض راحت ثمر نے ادا کیتے۔

مفتی عمران صاحب نے قرآن پاک دی مقدس آیتاں دی تلاوت کیتی۔ ایہدے حاضرین محفل نے درود پاک پڑھیا تے سیکرٹری جنرل سجاد سردار نے تنظیم دے مقاصد تے ہن تک کیتی جان والی کوششاں بارے بیانیہ پیش کیتا۔ مقررین جنہاں وچ سلیمان کھوکھر‘ ڈاکٹر طاہر بھلر‘ سید عمران حیدر‘ مہر امین‘ عثمان اشرف‘ سہیل بشیر‘ چودھری محمد شاہد تے دوجیاں نے ایس گل تے زور دتا کہ کالم نگار ای ایس ویلے لوکاں نوں معاشرے دی بہتر تصویر وکھا سکدے نیں۔ شبیر بٹ نے آکھیا کہ کالم نگار نوں کسے وی حال وچ اپنے قلم نوں ویچنا نہیں چاہیدا اے۔ نہ کسے خاص جماعت دے حق وچ کسے دے خلاف لکھن دا وطیرہ بنانا چاہیدا اے بلکہ کالم نگار دا فرض اے کہ اوہ اپنا نقطہ نظر پیش کردے ہوئے سچی تے کھری کہانی بیان کرے۔ ملک محمد سلمان نے آکھیا کہ اوہ پچھلے کئی سالاں توں ملک پاکستان دے روشن پہلو اجاگر کرن دی کوشش کر رہے نیں۔ ایسے مقصد لئی کالم نگاراں‘ ٹی وی اینکراں تے بیورو کریٹس دے نال ملکی سیاحت نوں فروغ دین دی کوشش کر رہے نیں۔ اج توں کجھ سال پہلے تک کیلاش گئے تے ایہدے اتے اینے کالم لکھے گئے‘ ٹی وی پروگرام ہوئے کہ ساڈے ایس سفر دے دو مہینیاں مگروں ای اقوام متحدہ نے کیلاش نوں عالمی ثقافتی ورثے وچ شامل کر لیا۔ عتیق انور راجہ نے آکھیا کہ لکھنا مشاہدے تے احساسات دا ناں اے‘ جہڑے قلم کار دا مشاہدہ چنگا ہووے گا جہدے اندر انسان جنا باشعور ہووے گا اوہدا قلم اوہنا ای کاٹ دار ہووے گا۔ اج بہت ضروری اے کہ دانشور اپنے قلم نال لوکاں نوں امید دوان تے ریاست نوں درپیش مسئلیاں دے حل پیش کرن۔ سلیمان کھوکھر نے اپنے سیاسی سفر تے سیاحت بارے بیان کیتا۔سید عمران حیدر نے مدلل تے پرجوش انداز وچ سماجی شعور دی بیداری وچ کالم نگاراں دی ا ہمیت اتے گل کیتی۔
ہر کسے نے سماجی شعور دی بیداری تے شہر دے مسئلیاں دی نشاندہی لئی اپنے قلم نوں بھرویں انداز وچ استعمال کرن دا عہد کیتا تے ایس گل تے اتفاق کیتا گیا کہ مسئلیاں نوں نہ صرف سامنے لیایا جاوے گا بلکہ ایہدے حل لئی متعلقہ حکام نال گل بات وی کیتی جاوے گی۔ جے کوئی چنگا کم کرے تے اوہدی تعریف تے غلط کم کرن والے دے خلاف لکھن توں ہچکچاہٹ نہ برتی جاوے گی۔ ایس باوقار تقریب وچ سینئر کالم نگار روزنامہ نوائے وقت ڈاکٹر طاہر بھلر،عمر فاروق،مفتی عمران،حسیب مدنی،سینئر نائب صدر سجاد مشتاق،نائب صدر راجہ افضال عزیز ،بلال باٹھ،یعقوب انجم مغل،سہیل بشیر،سجاد سردار وڑائچ،رانا اظہر،عثمان اشرف،عمر فاروق، سفیان مغل تے دوجیاں نے رلت کیتی۔