شاعر راغب مراد آبادی تے صحافی مختار زمن

ایم آر شاہد

ملک دے معروف شاعر راغب مراد آبادی 1918ء وچ دہلی وچ پیدا ہوئے تے دہلی کالج توں گریجویشن کیتی۔ ایہناں نے کئی نعتیہ مجموع تخلیق کیتے۔ ایہناں نوں فی البدیہہ شعرگوئی تے ملکہ حاصل سی۔ مرحوم نے بڑیاں ودھیا رباعیاں وی لکھیاں تے اوہ علم عروض دے ماہر سن۔ اوہناں دا شمار جوش ملیح آبادی دے قریبی تے عزیز ترین دوستاں وچ ہوندا سی۔ راغب مراد آبادی نے جوش تے دو کتاباں وی لکھیاں۔ اوہناں نے شاعری دا فن یاس یگانہ مولانا ظفرعلی خان توں حاصل کیتا۔ تقسیم ہند دے بعد اوہ کرچی آ گئے جتھے اوہناں نوں سابق وزیراعظم پاکستان لیاقت علی خان ولوں بحالی کمیٹی مہاجرین دا انچارج بنایا گیا۔ مرحوم نے تقریباً 40 کتاباں لکھیاں جہناں وچ غزلاں‘ نظماں‘ نعت‘ پنجابی‘ شاعری‘ قرآنی تے احادیث دے ترجمے تے مشتمل نیں۔ اوہ رباعی دے بہترین شاعر سمجھے جاندے سن۔ اوہناں دی اک کتاب ’’موت‘‘ جہدے وچ پنج سو دے نیڑے رباعیاں موت دے عنوان تے ای چھپ چکیاں نیں۔ ایس طرح اوہناں دی اک کتاب خطوط جوش ملیح آبادی تے دوجی کتاب مقالات جوش اے۔ ایہناں کتاباں توں پتہ چلدا اے کہ اوہ جوش دے کناں نیڑے سن۔ اوہناں دے ہزاراں شاگرد ملک دے ہر پاسے پھیلے ہوئے نیں جہناں وچ نمایاں ناں عوامی تے انقلابی شاعر حبیب جالب دا اے۔ راغب مراد آبادی دا انتقال 93 ورھے دی عمر وچ 19 جنوری 2011ء نوں کراچی وچ ہویا۔
مختار زمن (صحافی)
ممتاز صحافی تے اے پی پی دے سابق ڈائریکٹر جنرل مختارزمن نے 1990ء وچ ڈھاکہ وچ اے پی پی وچ چیف رپورٹر دی حیثیت نال شمولیت اختیار کیتی۔ ایس توں پہلاں اوہناں نے مارننگ نیوز کلکتہ وچ وی کم کیتا۔ اے پی پی وچ اوہ کافی عہدیاں تے فائز رہے۔ ادارے کے بیوروچیف بھی رہے۔ آخر وچ 1983-84ء وچ ایہناں دی تقرری ڈائریکٹر جنرل دی حیثیت نال کیتی گئی۔ اوہ اپنی ریٹائرمنٹ تک ایس عہد یتے فائز رہے۔
مختارزمن نے رائٹر کی حیثیت نال لندن ڈیلکس تے بی بی سی اردو سروس وچ براڈ کاسٹر دی حیثیت نال کم کیتا۔ زمانہ طالب علمی وچ ایہناں دا بہترین ریکارڈ رہیا اے اوہ بڑے ذہین سن اوہ آل انڈیا مسلم سٹوڈنٹس فیڈریشن دے جنرل سیکرٹری سن۔ ایہناں دیاں تصنیف شدہ کجھ کتاباں نیں اوہ ادبی حلقیاں وچ بڑی جانی پہچانی شخصیت سن۔ اوہ سابق اٹارنی جنرل آف پاکستان فیاض علی دے داماد سن۔ مختار زمن دی وفات دے ویلے عمر 80 ورھے سی۔ اوہناں نے پسماندگان وچ بیوہ سلمیٰ زمن جو سرسید گرلز کالج دی سابق پرنسپل نیں تے دو دھیاں نوں سوگوار چھڈیا اے۔
اردو دے مشہور طنزومزاح نگار تے صحافی مختار زمن 21فروری 1923ء نوں بجنور (ہندوستان) وچ پیدا ہوئے سن۔ اوہناں نے الٰہ آباد یونیورسٹی توں انگریزی وچ ایم اے تے ایل ایل بی کیتا فیر اوہ صحافت نال وابستہ ہو گئے۔ مختار زمن نے سیاسی تے ادبی موضوعات تے انگریزی تے اردو وچ دو سو توں ودھ مقالات لکھے۔ طنزیہ و مزاحیہ مضامین دا پہلا مجموعہ ’’باتوں کے خربوزے‘‘ 1974ء وچ تے دوجا مجموعہ ’’دیگر احوال یہ ہے کہ‘‘ 1983ء وچ چھپیا۔ ایہناں دے مضموناں دا اک ہور مجموعہ 1999ء وچ ’’گفتی ناگفتی‘‘ دے ناں توں وی چھپ چکیا اے۔ ایہناں دا انتقال 2جولائی 2003ء نوں کراچی وچ ہویا۔٭٭