وزیر خزانہ اگے اک سوال

خالد مسعود خان

کیہ فیک نیوز تے سزاواں دے نافذ ہون والے ترمیمی آرڈیننس دا اطلاق حکومتی وزیراں ولوں پیش کردہ اعدادوشمار تے بیاناں تے وی ہووے گا یاں ایس آرڈیننس دا ڈنڈا یکطرفہ اپنی صوابدید دا مظاہرہ کردے ہوئے صرف اپوزیشن تے صحافیاں دی طبیعت صاف کرن دے کم آوے گا؟۔
فیک نیوز صرف ایہ نہیں کہ وزیراعظم دی عائلی زندگی بارے افواہ اڑا دتی جاوے فیک نیوز صرف ایہو نہیں کہ غیرملکی سربراہواں ولوں ملن والے تحفیاں نوں مارکیٹ وچ ویچن دیاں خبراں اڑائیاں جان۔ فیک نیوز صرف ایہ نہیں ہوندی کہ کون کہنوں گھر دے خرچے لئی ماہانہ پنجاہ لکھ روپیے ادا کردا رہیا اے۔ فیک نیوز تے ایہ وی اے کہ پاکستان دنیا دے 139 ملکاں وچوں سب توں سستا ملک اے۔ نہ صرف ایہ کہ ایہ خبراں آپ فیک نیوز دے زمرے وچ آندیاں نیں سگوں ایہنوں ٹھیک ثابت کرن لئی جو اعدادو شمار پیش کیتے گئے نیں اوہ آپ حقائق توں کوسوں دور نیں تے جہڑی شے حقیقت توں کوسوں دور ہووے اوہ فیک کہلاندی اے تے جدوں ایہو غیر حقیقی شے خبر بنا کے پیش کیتی جاوے تے اوہنوں فیک نیوز کہیا جاندا اے۔ پچھلے دیہاڑیاں ساڈے ماہر معاشیات ضرب بینکار مساوی شوکت ترین صاحب یعنی ساڈے وزیر خزانہ نے فرمایا کہ پاکستان وچ دنیا دے اک سو انتالی ملکاں دے مقابلے وچ سب توں گھٹ مہنگائی اے اوہناں دی ایس گل توں گھٹو گھٹ ہور کجھ ہووے یاں نہ ہووے اوہناں دی معیشت دے بارے مہارت تے دسترس کھل کے سامنے آ گئی اے۔
اوہناں نے اپنی گل نوں ٹھیک ثابت کرن لئی بڑا دھانسو قسم دا بندوبست کردے ہوئے اپنی آفیشل ٹوئٹر ہینڈل تے نمبیو دے کاسٹ آف لیونگ انڈیکس دا حوالا دتا۔ ایس انڈیکس دے مطابق اک سو انتالی ملکاں تے مشتمل لسٹ وچ پاکستان دا نمبر سب توں سستے ملک وچ ہوندا اے تے پاکستان‘ روانڈا‘ یوگنڈا‘ صومالیہ‘ منگولیا‘ گھانا‘ کولمبیا‘ نکاراگوا‘ زمبابوے حالاں کہ ایتھوپیا توں وی سستا ملک اے۔ ایمانداری دی گل اے ایہ پڑھ کے نہ صرف آپ نوں خوشی ہوئی سگوں حیرانی وی کہ اسیں لاعلم تے نالائق لوک اینے وڈے اعزاز توں نہ صرف بے خبر سی سگوں صرف ایس حقیقت توں لاعلمی پاروں اپنے ایس سستے پن توں مستفید وی نہیں سی ہو رہے۔ ظاہر اے جدوں قوم نوں پتہ ای نہیں کہ ایہ ملک دنیا بھر وچ سب توں سستا ملک اے تے بھلا قوم ایس سستے پن توں لطف اندوز ای کیویں ہو سکدی اے؟۔
ہن میں ایس گل تے بڑا کنفیوژ آں کہ وزیراعظم دی گل مناں یاں اپنے گرائیں شوکت ترین دے دعوے تے یقین کراں۔ وزیرخزانہ دا فرمانا اے کہ ایہ ملک سستا ترین اے دوجے پاسے وزیراعظم نے کجھ عرصہ پہلاں فرمایا سی کہ مہنگائی دا احساس اے۔ میری تنخواہ دو لکھ روپیے ماہانہ اے تے ایس تنخواہ وچ ساڈا دو لوکاں دا گزارا مشکل نال ای ہوندا اے۔ بھلا اوہ ملک دنیا دا سستا ترین ملک کیویں ہو سکدا اے جہدے وزیراعظم دی دو بندیاں تے مشتمل فیملی دو لکھ وچ مشکل نال گزارا کردی ہووے جد کہ اوہناں نوں دفتر آن جان لئی ہیلی کاپٹر دی سواری مفت ملی ہووے‘ گھر اپنا ہووے تے کرایہ وی نہ دینا پیندا ہوے۔ فیک نیوز دے نویں نویں لاگو کردہ قنون دی موجودگی وچ اسیں ایہ وی نہیں کہہ سکدے کہ اوہناں دا گھر‘ جو ظاہر اے ملک دے وزیراعظم دی رہائش گاہ اے دی بجلی تے گیس وغیرہ دا بل وی سرکاری کھاتے توں جاندا ہووے گا پر گمان تے کیتا جا سکدا اے کہ اوہناں دے بنی گالہ والے گھر دے یوٹیلیٹی بلز سرکار دے کھاتے چوں جاندے ہون گے۔ ہن ایس موقعے تے ایہ وضاحت بڑی ضروری اے کہ خوش قسمتی نال ایس فیک نیوز والے ترمیمی آرڈیننس وچ گمان‘ خوش گمانی تے بدگمانی دے بارے سزا دا تعین نہیں کیتا گیا ایس لئی میں صرف گمان کرن تے ای بس کر رہیا واں۔ خیر اوہناں بجلی تے گیس دے بلاں نوں چھڈو تے نمبیو دے سجرے کاسٹ آف لیونگ یعنی روزمرہ دے خرچیاں دے حوالے نال دنیا دے سب توں سستے ملک دے دعوے تے گل کرنے آں۔
قبلہ شوکت ترین نے اپنے ٹویٹر ہینڈل تے اسیں گھٹ علم تے نالائق لوکاں نوں دسیا کہ پاکستان وچ امریکہ دی نسبت مہنگائی بڑی گھٹ اے۔ پاکستان وچ رہن دی لاگت امریکہ دی نسبت 71.52 فیصد گھٹ اے تے پاکستان وچ رہائش گاہ دا کرایہ امریکہ دی نسسبت 90.64 فیصد گھٹ اے۔ ساڈے پیارے وزیر خزانہ نے ایہ نہیں دسیا کہ امریکہ تے پاکستان وچ گھٹ توں گھٹ تنخواہواں دے درمیان کیہ نسبت اے۔ عام بندے دا ذکر بعد وچ کراں گے‘ اجے پاکستان تے امریکہ وچ امیر ترین تنخواہ لین والے ایگزیکٹو دا موازنہ کر لینے آں۔ پاکستان وچ سب توں ودھ تنخواہ لین والا بندہ اک بینک دا صدر تے چیف ایگزیکٹو افسر اے۔ اوہدی سالانہ تنخواہ 21کروڑ 90 لکھ روپیے اے یعنی ماہانہ تقریباً اک کروڑ تراسی لکھ روپیے۔ اوہدے مقابلے وچ امریکہ دی ٹیسلا کمپنی دا سی ای او ایلون مسک سالانہ چھ اعشاریہ ست ارب ڈالر تنخواہ لیندا اے یعنی پچپن کروڑ تراسی لکھ ڈالر ماہانہ‘ ایس رقم نوں روپیاں وچ بدلو تے بندے دا تراہ نکل جاندا اے۔ ایہ تنخواہ پاکستانی روپیاں وچ سجرے ڈالر ریٹ دے مطابق اٹھانوے ارب روپیے ماہانہ بن دی اے۔ پاکستان دے سب توں ودھ تنخواہ لین والے دی امریکہ دے سب توں ودھ تنخواہ والے توں نسبت اعشاریہ صفر اک اٹھ فیصد بن دی اے۔ یعنی امریکی سی ای او ساڈے پاکستانی سی ای او توں پنج ہزار تن سو پچپن گنا زیادہ تنخواہ لیندا اے تے ترین صاحب مقابلہ کر رہے نیں مہنگائی تے سستے پن وچ 71.52 فیصد دے فرق دا‘ ایہ موازنہ تے امریکہ تے پاکستان دے امیر ترین تنخواہ داراں دا سی‘ ہن ذرا عام بندے دا موازنہ کرکے ویکھ لینے آں۔ پاکستان وچ سرکاری طور تے گھٹو گھٹ تنخواہ ویہہ ہزار روپیے ماہانہ اے جو پنجی ورکنگ دن دی بنیاد تے مبلغ اٹھ سو روپیے یومیہ بن دی اے جد کہ امریکہ وچ گھٹو گھٹ اجرت فی گھنٹہ پندراں ڈالر اے جو اٹھ گھنٹے دی ڈیوٹی دے حساب نال اک سو ویہہ ڈالر یومیہ بن دی اے یعنی پاکستانی روپیاں وچ تقریباً بائی ہزار روپیے یومیہ۔ پاکستانی ورکر تے امریکی دیہاڑی دار دی آمدنی وچ نسبت اک ہور ستائی دی اے۔ پاکستانی مزدور دی آمدنی امریکی مزدور دی آمدنی دا صرف 3.7فیصد اے۔ جے ایہنوںالٹ کراں تے انج سمجھو کہ امریکہ وچ عام بندے دی آمدنی پاکستان دے عام بندے دی آمدنی توں 2750 فیصد ودھ اے جد کہ دوہاں دے روزمرہ دے خرچیاں وچ فرق صرف 71.52 فیصد اے ہن تسیں آپ دسو کہ نمبیو دے ڈیٹا نوں کس کوڑے دے ڈرم وچ سٹیا جاوے؟۔
دنیا دے سب توں وڈے لاگت بارے متعلقہ ڈیٹابیس دے کڈھے نتیجے دا دارومدار جہڑے اعدادوشمار اُتے اے جے ایہناں تے غور کیتا جاوے تے ایس سارے ڈیٹابیس دی ثقاہت ای صفر ہو جاندی اے۔ ایس ڈیٹابیس دے مطابق پاکستان وچ چار بندیاں تے مشتمل گھر دا خرچہ اک لکھ 71 ہزار 783 روپیے ماہانہ (بناں کرائے دے) اے۔ ایسے ڈیٹابیس وچ دسیا گیا اے کہ پاکستان وچ اک بندے دے ماہانہ خرچیاں دا تخمینہ 51798 روپیے اے۔ ہن جے امریکہ تے پاکستان دی مہنگائی وچ موازنے لئی نمبیو نے پاکستان وچ فی کس ماہانہ خرچے نوں بنیاد بنایا اے تے فیر یقینا سوال ایہ پیدا ہوندا اے کہ ایس ملک وچ اوسطاً چار بندیاں تے مشتمل اوہ خاندان جہدی کل آمدنی ویہہ ہزار روپیے ماہانہ اے کیویں گزارا کردا ہووے گا؟۔٭