سلطان تے قلندر

حناپرویزبٹ

سیاسی لیگ وچ ہٹ اینڈ ٹرائل میتھڈ دے کھلے عام استعمال دے اعتراف دا سلسلہ واضح اے عوام سمجھ گئے نیں کہ بلاناغہ ٹی 20 سیاسی میچ کھیڈن لئی نویں نکور بساط سجائی گئی۔ ترقیاتی رنز دے دعوے کرکے فیصل آبادی وکٹ بنائی گئی۔ فیلڈ ایمپائرز توں لے کے ٹی وی ایمپائرز تک سارے فکس سن‘ ہومیو پیتھک ایمپائرز دے سافٹ ویئر وچ نو بال‘ وائیڈ بال‘ رن آئوٹ تے ایل بی ڈبلیو دینا تے دور آئوٹ دین دا کوئی آپشن ای نہیں رکھیا گیا۔ فیلڈراں نوں پابند کر دتا گیا کہ غلطی توں وی بال یاں کیچ پھڑن دی کوشش نہیں کرنی‘ اوہناں نوں کہیا گیا کہ انج فیلڈ کرنی اے جیویں ہتھاں وچ موریاں ہون۔ موجودہ سیاسی ٹیم نوں اینی لامحدود آزادی سی جناں کہ جھوٹ بولیا جاوے نہ کسے بغاوت دا ڈر سی تے نہ ای حزب مخالف دا کوئی ڈر‘ اکثریتی ذرائع ابلاغ نوں ہرا ہرا وکھان دا پابند کر دتا گیا۔ نہ صرف ہرا وکھایا تے سنایا گیا سگوں ایہنوں سچ ثابت کرن لئی بار بار دہرایا گیا ایہناں بے مثال آئیڈیل حالات وچ ترقیاتی رنز دے ڈھیر لا کے نویں ریکارڈ بنانا تے ایس ٹیم دے کھبے ہتھ دا کھیڈ ہونا چاہیداسی پر کہانی کجھ ایس طرح رہی ہر میچ وچ ٹارگٹ دے حصول لئی اپنی ٹیم دے مقابل انتظامیہ دی ای بی ٹیم اتاری جاندی رہی۔ لوکاں نوں چھیتی ای ایہ پتہ لگ گیا کہ بی ٹیم مقابلے دی بجائے سہولت کار دا کم سرانجام دے رہی اے۔
غربت تے معاشی ناہمواری نوں بولڈ کرن لئی شعیب اختر قرار دے کے لیائے جان والے گیند باز طاہر نقاش نکلے‘ جہناں نے غربت دیاں وکٹاں اڑان دی تھاں غریباں نوں بائونسر مار مار کے مڈل نوں لوئر مڈل کلاس دی کیٹگری چوں وی کڈھ دتا۔ بابراعظم کہہ کے لیائے جان والے بلے باز سارے دے سارے منصوراختر نکلے‘ لوک اینے وی معصوم نہیں ہوندے کہ اوہناں نوں مستقل بے وقوف بنایا جا سکے اوہ اوس ویلے ہکے بکے رہ گئے جدوں ٹومی گریگ فریب زنی دی انتہا کردے ہوئے سلپ وچ جان والی نامعقول شاٹس نوں خوبصورت کور ڈرائیوز قرار دے دتا۔ سلیکٹڈ کھڈاری کجھ اوورز ای وکٹ تے کھلون دے بعد ڈریسنگ روم نوں پرتدے رہے۔ کدی اوپننگ پلیئر‘ کدی مڈل آرڈر تے کدی ٹیل اینڈرز دھوکہ دیندے رہے تے کپتان ہر ہار دے بعد نویں کھڈاری لیاندا رہیا۔ بیس توں گھٹ قابل ترین کھڈاری رکھن دا اعلان کرن والے نے نالائق ترین سو کھڈاری اکٹھے کر لئے۔ اک پاسے ٹیم سیاسی لیگ دے سارے میچ ہاردی رہی تے دوجے پاسے گھبرانا نہیں ہے دی گردان جاری رہی۔ عوام معاشی رنز لئی ترسدے رہے پر ٹومی گریگ ورگے پلانٹڈ کمنٹیٹرز جعلی خوشحالی دا سامنا آن دا ڈھول کٹدے رہے۔ اللہ دی پناہ ایہ ٹومی نالائق بالراں دی سدھی سدھی میڈیم فاسٹ بالاں نوں محمد آصف دی گھمدی ہوئی ڈلیوری دس دس کے شائقین نوں گمراہ کرن دی نکام کوشش کردے رہے۔ اوہناں نے اینیاں لمیاں لمیاں چھڈیاں کہ اوہ ایہناں ڈھیلی ڈھالی بالاں نوں وسیم اکرم دا یارکر تے وقار یونس دی بل کھاندی ڈلیوری قرار دے کے فلماں چلاندے رہے۔
سیاسی پی ایس ایل وچ تے ایس ٹیم نے تعمیراتی کماں دے چوکے‘ نوکریاں دے چھکے لانے سن جہدے توں ایہ صاف مُکر گئے۔ پچھیا گیا تے ڈھٹائی نال بولے سارے وعدے پورے کردتے نیں ایس عظیم جھوٹ نے لکھاں نوجواناں دی توقعات چکنا چور کر دتیاں حصول فتح لئی برپا کشمکش ای اصل وچ میچ دی جان ہوندی اے جہدا مظاہرہ جے ہووے تے میچ یادگار بن جاندا اے پر موجودہ سیاسی لیگ وچ ذرہ بھر حرکی توانائی نظر نہ آئی جہدی وجہ نال شائقین دا موجودہ سیاسی ٹی 20 لیگ توں دل اچاٹ ہو چکیا اے پاکستان سپرلیگ دا اختتام بڑا ای غیرمتوقع ہویا اے جنہے دنیا بھر وچ موجود قلندراں تے اوہناں دے چاہن والیاں نوں خوشی دے ستویں اسمان تے اپڑا دتا اے دوران میچ مخدوش سیاسی صورتحال توں ڈرے شائقین نے گو گو دے فلک شگاف نعرے لائے جہدی ویڈیو سوشل میڈیا تے خوب وائرل ہو رہی اے شائقین نے ایہنوں مکافات عمل قرار دتا اے۔ تریخ گواہ اے کہ جبر دے سائے کنے ای گہرے کیوں نہ ہون جابر سلطان قلندراں دے سامنے کدی وی مستقل ٹھہر نہیں سکے اوہناں نوں اجہی شکست ہوئی کہ فرعون وانگوں صفحہ ہستی توں ای مٹ گئے۔٭٭