شہباز علی المعروف اللہ والے کون نیں؟

اشفاق کاظمی

سلطان العارفین حضرت سلطان باہوؒ نے اپنی کتاباں وچ انساناں دی تن قسماں بیان کیتیاں نیں (1) طالب دنیا جنہاں دا مقصد دنیا دی زندگی دی لزتاں نوں حاصل کرنا ہوندا اے تے اوہ اوہدے وچ زندگی گزار دیندے نیں (2) طالب عقبی جہڑے عبادت تے ریاضت نال اُخروی زندگی دی بہتری چاہندے نیں(3) طالب مولا جنہاں دا مقصد ہر حالت وچ اللہ کریم دی رضا حاصل
کرنا ہوندا اے۔ سرکار سلطان باہوؒ نے اوہناں دی تشبیہ وی بیان کیتی اے۔ اوہناں نے طالب دنیا نوں خواجہ سرا طالب عقبی نوں عورت طالب مولا نوں مرد قرار دتا اے۔ بندہ ناچیز اج جہڑی شخصیت دا تذکرہ کرن جا رہیا اے اوہناں دے متعلق بزرگاں دا آکھنا اے کہ سید سوہنا تے سخی ہوندا اے تے اللہ نے ایہہ دو شیواں نال اوہناں نوں نواز رکھیا اے۔ میری مراد سید شہباز علی شاہ المعروف اللہ والے توں اے جہڑے تقریباً ادھی صدی توں انساناں‘ چرند پرند تے دوجی مخلوق نوں اللہ دے دِتے لنگر وچوں لنگر پہنچا رہے نیں۔ خوبصورت گل ایہہ ہے بقول اوہناں دے کہ ایہدے وچ اک دن دا ناغہ نہیں اے تے اوہ ایہہ خدمت بلا مذہب و ملت ‘ رنگ تے نسل انسانیت دی خدمت لئی انجام دے رہے نیں۔ بندہ ناچیز سنی سنائی گل نہیں کر رہیا بلکہ اوہناں دے نال اوہناں دی گڈی وچ شرق پور دے کول اوہناں دے فارم ہائوس تے گیا جتھے اوہناں نے پرند چرند رکھے ہوئے نیں تے اک خوبصورت تلاب وی اے تے اوہناںدے نال ڈیوتی وی کیتی اے کیوں جے اوہ ایس خدمت خلق نوں ڈیوٹی قرار دیندے نیں۔ ایدھر گرین ٹائون لہوروچ وی اوہناں دے بوہے خاص و عام لئی کھلے نیں ۔

اوہ ہر موسم دے بدلن تے تہواراں دے موقعے تے کپڑے ‘راشن تے نقدی وی تقسیم کردے نیں۔ اولیا اللہ دے پیراں وچ حاضری دینا سارا سال اوہناں دا مش اے۔ اوہناں دے معتقدین اندرون تے بیرون ملک ہزاراں دی گنتی وچ نیں۔ بندہ ناچیز نوں عمر وچ اک سال وڈا ہون دے ناطے وڈا بھرا آکھدے نیں مگر رتبہ وچ بہت اچے نیں۔ تسیں مینوں وی اوہناں دے معتقدین وچ شمار کر سکدے او۔ اوہناں دی اک گل جہنوں سوشل میڈیا اتے بہت ویکھیا جاندا اے‘ اوہ پاک و ہند دے مشہور گیتاں اتے رقص کناں ہونا اے ۔ جدوں اوہناں نال ایس بابت گل کیتی گئی تے اوہناں دا آکھنا سی کہ اوہ ایہناں گیتاں دے معنی توںاللہ دی معرفت تے قرب دا مزہ لیندے ہوئے جھوم جاندے نیں۔ اوہناں دے معاونین عزیز گناہ گار ماہی سنیاری سعید ملنگ تے ڈرائیور اکثر اوہناں دے نال ہوندے نیں جتھوں تک لوک اوہناں دے باطنی رتبہ تے فیض دی گل کردے نیں تے میرے خیال دے مطابق ایسے لوک جے مٹی دے اتے ہون تے اللہ دی رحمت ہوندے نیں تے مٹی دے تھلے چلے جان تے فیض عام ہوندے نیں۔ اوہناں دے فرمودات جنہاں دا ذکراوہ کردے نظر آندے نیں درج ذیل نیں۔
کھا لیا تو گندگی کھلا دیا تو بندگی
جوجوڑگئے وہ چھوڑ گئے
جودے گئے وہ لے گئے
ایسے لوکاں لئی حضرت اقبال نے فرمایا سی:
یہ غازی یہ تیرے پراسرار بندے
جنہیں تو نے بخشا ہے ذوق خدائی