عدم اعتماد کہدے سر تے؟

مطلوب ورائچ

اپوزیشن ولوں عمران خان دے خلاف تحریک عدم اعتماد دیاں پرزور تیاریاں دا سلسلہ جاری اے۔ تحریک عدم اعتماد دی آئین وچ گنجائش اے جہدے تحت قنونی طور تے وزیراعظم‘ سپیکرز‘ وزرائے اعلیٰ نوں اوہناں دے عہدیاں توں ہٹایا جا سکدا اے۔ ایس حوالے نال فیئر پلے دی لوڑ اے۔ ساڈے ایتھے تحریک عدم اعتماد لئی قنون دے تحت کاروائی دی ابتدا تے ہوندی اے پر ایہنوں منطقی انجام تک لے جان لئی بہت کجھ غیرقنونی ای نہیں قومی مفادات دے وی خلاف ہوندا رہیا اے۔ 1989ء وچ بینظیر بھٹو دے خلاف تحریک عدم اعتماد لیاندی گئی تے دوہاں پاسیوں پیسے دا انھے واہ استعمال کیتا گیا۔ میاں نوازشریف پنجاب دے وزیراعلیٰ سن اوہناں ولوں سرکاری وسیلے استعمال ہوئے۔ ایم این ایز نوں مری وچ محفوظ کیتا گیا۔ چھانگا مانگا ایس توں پہلاں دی مہم جوئی اے۔ بینظیر بھٹو حکومت نے وی جواباً خریدوفروخت وچ کمی نہ کیتی۔ جنرل اسلم بیگ تے صدر غلام اسحاق خان دی نوازشریف دے نال مکمل سپورٹ سی۔ ایہدے باوجود تحریک نکام ہوئی۔ ایہدے توں کیہ ملیا؟ نفرتاں وچ وادھا ہویا‘ قومی خزانہ برباد ہویا‘ جمہوریت اجہی عدم استحکام دا شکار ہوئی کہ فیر کدی اپنے پیراں تے کھڑی نہ ہو سکی۔ 70ء دی دہائی وچ پی پی پی حکومت دے خلاف اپوزیشن نے محاذ ارائی کیتی۔ ذوالفقارعلی بھٹو دی حکومت دے خلاف احتجاج تے مظاہرے ہون لگے۔ امریکہ ولوں ایٹمی پروگرام توں باز نہ آن دی صورت وچ بھٹو شہید نوں نشان عبرت بنان دی دھمکی دتی جا چکی سی۔ اپوزیشن بیرونی طاقتاں دے اشارے تے بھٹو دے خلاف میدان عمل وچ آئی سی۔ غیرملکی سفارتکار اپوزیشن لیڈراں نال ملاقاتاں کردے سن۔ اک اسلامی ملک دے سفیر زیادہ ای سرگرم سن۔ بھٹو صاحب نوں پھڑ لیا گیا تے اوہناں نوں سکون دی نیندر سون دا موقع ملیا سی۔ اج فیر اپوزیشن دے لیڈراں نال غیرملکی سفارتکار مل رہے نیں۔ حمزہ شہباز نال کجھ دن پہلاں امریکی قونصل جنرل دی ملاقات ہوئی اے۔ شہبازشریف‘ مریم نواز تے چوہدری برادران نال وی غیرملکی سفیر ملاقاتاں کر چکے نیں۔
اپوزیشن دیاں سرگرمیاں وچ ابال تے کھولائو عمران خان دے روس دے دورئہ پاروں آیا امریکہ ایس دور ے تے سیخ پا اے۔ یورپی یونین تے برطانیہ ورگے مغربی ملک امریکہ دی کاسہ لیسی وچ اک دوجے توں اگے ودھن وچ کوشاں رہندے نیں۔ پاکستان اک خودمختار ملک اے ایہدی اپنی خارجہ پالیسی اے۔ اقوام متحدہ دے اجلاس وچ یوکرائن تے حملے دے حوالے نال پاکستان نے روس دی مذمت نہیں کیتی۔ پاکستان‘ بھارت تے امارات سنے 35 ملک ایس اجلاس وچ نہیں گئے جہدے وچ یوکرائن تے حملے دی مذمت کیتی گئی ایہدے تے کجھ ملک امریکہ نوں بھوتریا ویکھ کے آپ وی بھوتر گئے۔ برطانیہ‘ جاپان‘ ناروے تے آسٹریلیا سنے کجھ امریکہ دم چھلا ملکاں دے سفیراں تے ہائی کمشنراں ولوں پاکستان نوں یوکرائن تے روسی حملے دی مذمت کرن تے عالمی قنوناں دی حمایت کرن تے اصرار کیتا گیا سی۔ ایہد یتے پاکستان ولوں ردعمل وچ ایس بیان نوں رد کردے ہوئے پاکستان وچ مداخلت قرار دتا گیا سی جہدے تے اوہناں ملکاں ولوں بظاہر چپ وٹ لئی گئی اے۔ اندر کھاتے کیہ کھچڑی پک رہی ہووے گی ایہدے توں خبردار رہن دی لوڑ اے۔ لوکاں نوں ایہناں معاملیاں تے چپ نہیں بیٹھ جانا چاہیدا حکومت دے ہتھ مضبوط کرن دی لوڑ اے۔ ایہناں ملکاں توں پچھیا جانا چاہیدا اے کہ بھارت تے امارات حکومتاں نوں وی کیہ انج ای کہیا گیا اے؟ اج ملکی حالات کس نہج تے نیں تے اپوزیشن نے کیہ پاکھنڈ بنا رکھیا اے۔ اودھر دہشت گرد سرگرم نیں اودھر اپوزیشن حکومت دے خلاف دم تے کھڑی اے کہدے لئی صرف اپنی واری لئی۔ حکومت نے تیل تے بجلی دی قیمت گھٹ کیتی اے اوہ وی اپوزیشن نوں گوارا نہیں۔ عمران خان اوہناں دیاں واریاں دے جوڑاں وچ بہہ گئے نیں۔ اوہ اج سندھ وچ پی پی حکومت دی حمایت کرن‘ ہائوس آف زرداری تے ہائوس آف شریف دے مقدمیاں تے مٹی پا دین تے اج ای ایہ پارٹیاں عمران خان دے نال کھڑیاں ہون گئیاں۔ حکومت گران لئی پی ڈی ایم بنی تے سندھ حکومت نوں بچان لئی پی پی پی ڈی ایم چوں نکل گئی۔ اج فیر پی ڈی ایم تے پی پی پی عمران خان دے خلاف عدم اعتماد لئی اکمٹھ ہو گئے نیں۔
مولانا فضل الرحمن نے کجھ دیہاڑ پہلاں 48 گھنٹیاں وچ اپنے حمایتیاں نوں خوشخبری سنائی سی۔ بلاول تے مریم پنج دن وچ حکومت گران دے دو ورھیاں توں دعوے کر رہے نیں۔ کتھے گئے اڑتالی گھنٹے تے پنج دن‘ ہن بلاول نے کہیا اے ضروری نہیں عدم اعتماد سوفیصد کامیاب ہووے جے کامیاب نہیں ہونی تے بڑھکاں دی کیہ لوڑ اے۔ لوہلے‘ لنگڑے لانگ مارچ نال کیہ حکومت گر جاوے گی؟ میں اک واری فیر کہنا واں کہ عدم اعتماد اک قنونی راہ اے۔ جو اپنے سر تے‘ تے فیر ہونا چاہیدا اے۔ بڑے فخر نال دسیا جا رہیا اے فوج ہن ساڈے نال اے۔ کیہ اپوزیشن اپنے سر تے عدم اعتماد لیا رہی اے؟۔٭٭