امت مسلمہ نوں اِک مُٹھ کرنا حیاتی دامقصد : چودھری اورنگزیب

پاکستان تحریک اتحاد دے سربراہ چوہدری اورنگزیب دا لہور پریس کلب وچ میٹ دی پریس نال خطاب
لہور پریس کلب لئی 30لکھ روپے دا عطیہ‘ اپنی ہائوسنگ سوسائٹی وچ صحافیاں لئی جرنلسٹ بلاک بنان دا اعلان

ظ عباس

ایس حقیقت وچ کوئی شبہ نہیں کہ کجھ لوک ایسے ہوندے نیں جنہاں دی زندگی دا مقصد ای عوام دی خدمت کرنا ہوندا اے تے اوہ اپنا ایہہ مقصد پان لئی کوئی وی قربانی دین توں گریز نہیں کردے۔ چوہدری اورنگزیب دا شمار وی اجیہی شخصیات وچ ہوندا اے جنہاں نے عوام دی خدمت لئی اک ایسا شاندار رہائشی منصوبہ شروع کیتا جہڑا اج الکبیر ٹائون دے ناں توں مشہور اے تے شہر لہور دی پہچان بن چکیا اے۔ اوہناں نے سیاسی رہنما دے طور تے وی کجھ ای مہینیاں وچ اپنی وکھری پہچان بنا لئی اے تے ہن اوہناں دا شمار قومی سطح دے سیاسی رہنماواں وچ کیتا جان لگیا اے۔ ایہہ اوہ بنیادی وجہ اے جہدے کارن اگلے دن پاکستان تحریک اتحاد دی الکبیر ٹائون توں لہور پریس کلب تک تریخی ریلی وچ پارٹی دے سپورٹراں نے کثیر تعداد وچ رلت کیتی۔ریلی دے رستے وچ پارٹی کارکناں نے جگہ جگہ اوہناں دا استقبال کیتا تے پھل نچھاور کیتے۔ پارٹی کارکن وزیراعظم چوہدری اورنگزیب دے نعرے لاندے رہے۔ ہو سکدا اے کجھ لوکاں نوں ایہہ نعرہ عجیب محسوس ہووے کیوں جے چوہدری اورنگزیب فی الوقت سیاست وچ نووارد نیں مگر اوہناں نے اپنی سوچ تے متحرک سیاست نال ایہہ ثابت کر دتا اے کہ اوہ بہت چھیتی اپنے ایس سفنے دی تعبیر پان وچ وی کامیاب رہن گے۔

ایس حقیقت توں وی انکار ممکن نہیں کہ چوہدری اورنگزیب اک ہمہ جہت شخصیت دے مالک نیں۔ اوہناں دے پیش نظر کدی بے تحاشا دولت دا حصول نہیں رہیا۔ اوہ خودنمائی توں وی دور رہندے نیں جد کہ پراپرٹی دے کاروبار وچ اپنی صلاحیتاں دا لوہا منوان دے باوجود اوہناں دا اک ای سفنا اے جہڑا عوام دی خدمت توں شروع ہو کے اوہدے اتے ختم ہو جاندا اے جہدی تعبیر پان لئی اوہ ہر ویلے کوشاں رہندے نیں۔ اوہ سادہ طبیعت دے حامل نیں مگر اوہناں دی سوچ غیر مبہم تے جدت پسند اے۔ اوہ کاروبار دے باب وچ ہووے یا سیاست تے خدمت دے میدان وچ‘ اوہ میڈیا پرسن دے طور تے سماج نوں تبدیل کرن دا عزم ہووے یا پاکستان نوں اک مثالی ریاست بنان دا مقصد‘ چوہدری اورنگزیب دا شمار شہر بے مثل لہور دی اوہناں چند شخصیات وچ ہوندا اے جنہاں نے اپنے عہد نوجوانی وچ ای اوہ سب کجھ حاصل کر لیتا اے جہڑا لوک اک عمر گزار دین مگروں وی حاصل نہیں کر پاندے۔
چوہدری اورنگزیب نے سیاسی جماعت پاکستان تحریک اتحاد قائم کیتی تے مقصد پاکستان نوں مثالی‘ اسلامی‘ فلاحی ریاست بنانا ای سی‘ اوہناں نوں ملک دی قومی سیاسی جماعتاں ولوں اعلیٰ عہدیاں دی پیشکش وی ہوئی مگر اوہناں نے روایتی سیاست توں دور رہندے ہوئے اپنی سیاسی جماعت قائم کیتی جہدا مقصد ای ایہہ ہے کہ اوہ عوام دی خدمت اتے غیر متزلزل یقین رکھدے نیں۔ اوہناں لئی امکانات دے لامتناہی در
کھلے سن مگر اوہناں نے پاکستان نوں مثالی اسلامی فلاحی ریاست بنان دا سفنا ویکھیا تے اوہدی تعبیر پان لئی عملی جدوجہد کرن وچ وی تاخیر نہیں کیتی۔ بہت سارے لوکی بجا طور تے ایہہ استفسار کردے نیں کہ اوہناں نے کسے قومی جماعت وچ شمولیت کیوں نہ اختیار کیتی؟ ایہدی سادہ جئی توجیہہ ایہہ پیش کیتی جا سکدی اے کہ کسے ہور سیاسی جماعت وچ جان دا مطلب ایہہ ہوندا کہ اوہناں نے عارضی کامیابی دے حصول لئی اپنے نظریات قربان کر دتے نیں۔
چنانچہ اپنی وکھری سیاسی جماعت دی بنیاد رکھی تاں جے خدمت دے منشور تے کسے روک ٹوک دے بغیر عمل کیتا جا سکے جد کہ اوہ اک قومی اخبار دے چیف ایگزیکٹو وی نیں جہدے اجرا دا مقصد ای ایہہ ہے کہ عوام نوں حقائق توں باخبررکھیا جاوے تے روایتی دے بجائے متبادل بیانیہ پیش کیتا جاوے جہنوں مرکزی دھارے دا میڈیا عموماً نظرانداز کر دیندا اے تے ایہہ وی درحقیقت اوہناں دے ایس سفنے دی تعبیر ولوں اک اہم پیش رفت اے جہڑی اوہناں نے پاکستان دے باب وچ ویکھیا اے جتھے ہر پاکستانی بچے نوں بلامعاوضہ تے یکساں تعلیم دے موقعے حاصل ہون تے کوئی شہری صرف مالی مشکلات دے باعث صحت دی سہولتاں توں محروم نہ رہ جاوے۔
پاکستان تحریک اتحاد دے چیئرمین چوہدری اورنگزیب نے دو دن پہلے پاکستان تحریک اتحاد دے پربندھ ہیٹھ تریخی ریلی دی قیادت کیتی۔ شہر دی سڑکاں اتے جابجا پاکستان تحریک اتحاد دے پوسٹر آویزاں سن۔ ریلی لہور پریس کلب جا کے اختتام پذیر ہوئی جتھے اوہناں نے لہور پریس کلب دے صدراعظم چوہدری دی دعوت اتے میٹ دی پریس نال خطاب کیتا تے آکھیا:
پاکستان نے سانوں سب کجھ دتا اسیں ایہنوں کیہ دتا تے کیہ دیناچاہیدا اے؟ ایہو مقصد لے کے گھر توں چلے آں۔
اوہناں نے آکھیا:
قیام پاکستان دی تحریک دا آغاز لہور توں ہویا سی۔ اسیں قوم نوں متحد کرن تے پاکستان نوں بہتر بنان دی تحریک دا آغاز آج ایسے شہر بے مثل توں کررہے آں۔
اوہناں دے نال میٹ دی پریس وچ پاکستان تحریک اتحاد دے صدر نبیل کیانی‘ بلال عمر بودلہ‘ میجر رفیق حسرت‘ لہور پریس کلب دے صدر اعظم چوہدری‘ جنرل سیکرٹری عبدالمجید ساجد سنے دوجے صحافی رہنما موجود سن۔
پاکستان تحریک اتحاد دے سربراہ نے اپنے خطاب وچ آکھیا:
قیام پاکستان مگروں اسیں اپنی قوم نوں متحد کرنا بھل گئے۔ اسیں قوم نوں اک شناخت دینا بھل گئے۔ اسیں بھل گئے کہ ایس جھنڈے دے سائے تھلے اسیں سارے اک آں۔ ہن ایہہ کم پاکستان تحریک اتحاد کرے گی۔ میں امت مسلمہ نوں متحد کرن دے مشن تے نکلیا آں۔ قائداعظم تے علامہ اقبال دا پاکستان اوہ نہیں رہیا۔ ایہہ تقسیم ہو گیا اے تے قوم لسانی‘ مذہبی تے علاقائی شناختاں وچ تقسیم ہو چکی اے۔ ساڈا منشور اے کہ قوم نوں تفرقات توں پاک کر کے اک جھنڈے تھلے جمع کیتا جاوے۔ قائداعظم تے علامہ اقبال دا پاکستان سیاسی جماعتاں دی نااہلی دی وجہ نال تقسیم ہویا۔ سیاست دان جے مفاد پرستی تے ناسمجھی دا مظاہرہ نہ کردے تے اینا وڈا سانحہ رونما نہ ہوندا۔ اج فیر سیاستداناں نے ملک نوں مشکل وچ پا دتا اے۔
چوہدری اورنگزیب نے کسے وی شخصیت دا نام لیتے بغیر آکھیا:
اک بندا سندھ توں چلیا جتھے بچے بھک تے افلاس دا شکار نیں مگر اوہ فکرمند نہیں۔اوہناں دے والد نے اوہناں نوں ایہو سکھایا اے کہ اقتدار دی فکر کرنی اے‘ عوام تے افلاس زدہ بالاں دی فکر کرن دی کوئی لوڑ نہیں۔ سندھ وچ پچھلی ادھی صدی توں پیپلز پارٹی دی حکومت اے لیکن اج تک صوبے دے حالات ٹھیک نہیں ہوئے۔ کشکول توڑن دا وعدہ کرن والیاں نے ملک نوں قرضیاں دی دلدل وچ دھکیل دتا اے بلکہ کشکول توڑن دے بجائے ہور کشکول وڈے کر دتے نیں۔

اوہناں نے آکھیا:
تحریک عدم اعتماد نے سیاسی ماحول نوں گرما دتااے۔ ساڈے قومی اسمبلی وچ ست تے پنجاب دی صوبائی اسمبلی وچ 12 ارکان نیں۔ میری مختلف سیاسی پارٹیاں دے سربراہواں نال ملاقاتاں دا سلسلہ جاری اے۔ اسیں ویلا آن تے ملک تے قوم دے مفاد وچ فیصلہ کراں گے۔
ایس موقع تے اوہناں نے لہور پریس کلب نوں 30 لکھ روپے دا عطیہ دین تے پریس کلب دے ملازماں لئی تحفے تے اپنی ہائوسنگ سوسائٹی وچ جرنلسٹ بلاک بنان دا اعلان وی کیتا جہدے وچ لہور پریس دے ارکان نوں بغیر منافع دے پلاٹ تے مکان دتے جان گے۔ اوہناں دے ایس اعلان تے ہال تالیاں نال گونج اٹھیا۔
میٹ دی پریس دے اختتام تے لہور پریس کلب دے صدر اعظم چوہدری تے سیکرٹری عبدالمجید ساجد نے پاکستان تحریک اتحاد دے چیئرمین ولوں لہور پریس کلب نوں عطیہ دین تے اپنی ہائوسنگ سوسائٹی وچ جرنلسٹ بلاک بنان دے اعلان تے اوہناں دا شکریہ ادا کیتا۔ ایس موقع تے چوہدری اورنگزیب نوں لہور پریس کلب دی اعزازی رکنیت دین دا اعلان وی کیتا گیا۔
خیال رہوے کہ چیئرمین چوہدری اورنگزیب نے کجھ دن پہلے پاکستان تحریک اتحاد دے سالانہ ورکرز کنونشن نال خطاب کردے ہوئے آکھیا سی۔
اقتدار وچ رہن والے سیاسی جماعتاں نے اپنے نااہل چہیتیاں نوں اہم عہدیاں اتے تعینات کر کے ملک نوں تباہی دے دہانے اتے پہنچا دتا اے جنہاں قوماں نے اپنی فوج دی قدر نہیں کیتی تے ادارے نوں کمزور کیتا‘ اوہ ملک تباہ ہو گئے۔ عراق‘ شام تے ہن یوکرین دا انجام ساڈے سامنے اے جیویں کہ یوکرین وچ ہر طرح دا انفراسٹرکچر ہون دے باوجود کمزور فوج ہون پاروں اوہ کجھ گھنٹے وی روس دا مقابلہ نہیں کر سکیا۔ پاکستانی فوج دا شمار دنیا دی بہترین فوجاں وچ ہوندا اے جہڑی ہر ویلے حب وطن دے جذبے نال سرشار دشمن دے خلاف برسر پیکار اے۔
چوہدری اورنگزیب دا پاک فوج ولوں ایہہ جھکائو ایہہ ظاہر کردا اے کہ سیاست دا انتخاب اوہناں نے دنیاوی مقصداں دے حصول لئی نہیں کیتا بلکہ اوہ اک وڈے مقصد لئی سیاسی میدان وچ اترے نیں جہنوں پان وچ اوہ یقینا کامیاب رہن گے۔