حکومت دا مثبت پہلو

سعد اللہ شاہ

چلو ایس توں ہٹ کے ایس گل تے خوشی دا اظہار نہ سہی اطمینان تے ہوندا اے کہ حکومت نے پٹرول ڈیزل وچ دس روپیے فی لٹر تے بجلی وچ پنج روپیے فی یونٹ دا عارضی ریلیف دتا اے۔ ایہ وی وعدہ کیتا اے کہ بجٹ آن تک انج ای رہوے گا۔ بس تسیں دعا کرو کہ حکومت اپنے موقف تے قائم رہے نہیں تے محبوب تے گھڑی وچ تولہ تے گھڑی وچ ماشا ہوندا اے۔ پر مزے دی گل ایہ کہ ایس ریلیف نوں تکلیف دے نال جوڑ کے بلاول نے کہیا اے کہ مارچ دے دوجے دن ای پٹرول دس روپیے سستا ہو گیا۔ ظاہر اے ایس ویلے حکومت تے اوکھا ویلا اے تے یقینا ایہ اوس ویلے ٹل سکدا اے جدوں تسیں لوکاں لئی آسانیاں پیدا کرو گے۔ اوہناں دا سوکھا ساہ نکلے گا۔ ایس ویلے اپوزیشن پوری طرح عدم اعتماد لیان تے تلی بیٹھی اے تے حالات وی اوہناں لئی سازگار نظر آندے نیں۔ بلاول دا مارچ زورو شور نال جاری اے تے اوہناں نے دو اڑھائی درجن مطالبے وی کیتے نیں۔ اوہناں نوں کائونٹر کرن لئی شاہ محمود قریشی وی سندھ دے حقوق لئی نکلے نیں۔ کنی پرلطف گل اے کہ قوتاں آمنے سامنے نیں۔ انج اٹھارویں ترمیم دے بعد تے سندھ دے کول بہت کجھ سی۔ عمران خان نوں کئی محاذاں تے لڑنا پے رہیا اے تے اوہناں دی ٹیم وچ شامل ممبران کوئی صلاحیت نہیں رکھدے تے جو صلاحیت رکھدے سن اوہ نظرانداز کر دتے گئے۔ مٹی نال جڑنا تے پرجوش ہونا ضروری اے۔ کجھ پی ٹی آئی دے تھنک ٹینک جے کوئی ہے نیں تے اوہناں دی بے حکمتی اے کہ کسے نان ایشو نوں اپنے گلے وچ پا لیندے نیں۔ مثلاً ریحام خان والا معاملہ کدوں دا دب چکیا سی تے اوہ کتاب لکھ کے آپ ای شرمسار سی کہ اوہدا مال وکیا نہیں۔ جدوں تسیں کسے دا نوٹس لیندے او تے تسیں اوہدی اہمیت نوں قبول کر لیندے او۔ اک پروگرام وچ جے کسے نے مراد سعید تے عمران خان دے حوالے نال گند بکیا وی سی تے ایہ پہلی واری نہیں سی۔ لوک وی سمجھدے نیں کہ سیاسی طور تے گند اچھالنا سیاستداناں دا شیوا اے۔ ایس توں پہلاں وی ن لیگ نے کسے دے خلاف کیہ نہیں کیتا۔ نصرت بھٹو توں لے کے عمران خان تک‘ پر سب کجھ وقت نے زائل کر دتا۔ ہن وی انج ای ہونا سی فیر کیہ لوڑ پئی سی:
ہر طرف ایک شور برپا اور لوگوں کا ہجوم
ہم نے گویا شہر سارا اپنی جانب کر لیا
تے اج ایس نتیجے و چ ریحام خان کراچی وچ پریس کانفرنس کرن دے قابل ہوئی کہ اوہنوں ہمت مراد سعید دے ہتک عزت دے نوٹس نے دتی۔ نوٹس وی اک ارب روپیے دا مطالبہ وی دلچسپ کہ اوہ غیرمشروط معافی منگے ‘ جناب ایہ شرافت دا زمانہ نہیں:
اصل گل اوہی جہڑی فراز نے کہی سی: خلقت شہر تو کہنے کو فسانے مانگے۔ کہنا میں ایہ چاہنا واں کہ تسیں کسے نوں کجھ وی کہن توں منع نہیں کر سکدے۔ تسیں ایہ قدعن کسے حد تک تے لا سکدے او پر حاسدین تے نہیں۔ سعدی نے کہیا کہ اس شہر میں آپ کیا کریں گے جہاں پتھر بندھے ہوں اور کتے آزاد ہوں اور پھر جہاں کتے کاٹے کی ویکسی نیشن دستیاب نہ ہو۔ پر ہاں تسیں جس طرح دے کم کرو جیویں تسیں نوجواناں لئی تریہہ ہزار ماہانہ تے انٹرن شپ رکھی اے پر اپنے ایس منصوبے دی وی خبر تہانوں رکھنی ہووے گی نہیں تے مہنگائی وانگوں نہ ہو جاوے کہ گھٹ ہون دی تھاں ودھدی جاوے۔ وکھری گل تے مینوں وزیراعظم دی چنگی لگدی اے کہ اوہ جنہوں چھوہندے نیں اوہنوں سونا بنا دیندے نیں۔ جیویں کہ اوہ پارس نیں۔ ہن ویکھو ناں کہ ریحام بحیثیت سیاستدان پریس کانفرنس کر رہی اے تے امید رکھدی اے کہ اوہنوں کوئی سیاسی پارٹی چنگی آفر دے کے نال لے لوے۔ ایس توں اگلی گل میں ہور کراں۔ اوہ اگلے مشن اُتے اے۔ ایہ گلی میں انگریزی والا لکھیا اے۔ اسیں تے اپنے ملک دی بقاء تے ترقی لئی دعاگو آں شاید ساڈے چنگے دن آ جان۔ ہر گل تے حکومت دی مخالفت وی تے ٹھیک نہیں۔ چلو روس دے دورے دے حوالے نال جو قدم اٹھایا گیا اوہ بالکل ٹھیک سی کہ بیٹھے بٹھائے اک طے شدہ دورے نوں منسوخ کر کے اسیں روس نوں اللہ واسطے دا دشمن بنا لیندے۔ ایس جنگ نے تے اک گل ہور سمجھائی کہ نوازشریف نے امریکہ دی ساری آفرز ٹھکرا کے ایٹمی معاملے وچ کمزوری نہیں وکھائی جد کہ یوکرائن نے آفر قبول کیتی تے فیر باقی لکھن دی لوڑ ای نہیں۔ ہر کوئی اپنے مفاد وچ سوچدا اے تے سب توں وڈا مفاد اپنی حفاظت اے۔ ایس حوالے نال فوج کسے وی صورت وچ سوچ ای نہیں سکدی۔ ساڈے توں غلطیاں وی ہوئیاں خاص طور تے سی پیک دے حوالے نال کہ اسیں ایہدے وچ کسے ترغیب وچ آئے تے فیر اوہدا قائل ہونا پیا۔ ویلا آن تے نہ تے چھیواں بیڑا اپڑدا اے تے نہ ستواں۔ زاہدفخری نے کہیا سی:
اٹھانا خود ہی پڑتا ہے تھکا ٹوٹا بدن فخری
کہ جب تک سانس چلتی ہے کوئی کندھا نہیں دیتا
تسیں ایس غزل دا اک ہور شعر ویکھو جہڑا مینوں بڑا پسند اے:
وہ ملا تو صدیوں کے بعد بھی میرے لب پہ کوئی گلہ نہ تھا
اسے میری چپ نے رلا دیا جسے گفتگو میں کمال تھا