ڈھول، ڈھولچی تے بھنگڑا

شکیل امجد صادق

اک سردار دی ماں بیمار ہو گئی اوہنے مقامی معالج توں کافی علاج کرایا پر کوئی افاقہ نہ ہویا۔ کسے نے سردار نوں مشورہ دتا کہ نال والے پنڈ وچ اک حکیم صاحب (حکیم پٹیالے والے) رہندے نیں۔ کافی سیانے نیں تسیں بے بے نوں اوہنوں چیک کرائو۔ سردار نے بے بے نال گل کیتی۔ بے بے کافی کمزور سی ایس لئی جان لئی بڑی مشکل نال راضی ہوئی۔ سردار نے اپنی بے بے نوں سائیکل تے بٹھایا تے نال والے پنڈ دی راہ لئی۔ اجے ادھا سفر ای طے ہویا سی کہ سردار نے راہ وچ ڈھول دی آواز سنی۔ ڈھول دی آوازسن دیاں ای سردار دے اندر دا ’’سردار‘‘ جاگ گیا۔ سردار نے مچھاں نوں تاء دتا‘ پگڑی سدھی کیتی تے ڈھول دی تھاپ تے بھنگڑا پاندے ہوئے کہن لگا بہہ جا بے بے‘ بہہ جا‘ بہہ جا بے بے بہہ جا‘ ذرا بھنگڑا پا لواں فیر اگے چلنے آں۔
اسیں بیمار قوم آں‘ اسیں بے عقل تے جاہل آں۔ اسیں دماغ توں فارغ آں‘ اسیں بریانی دی اک پلیٹ لئی سارا سارا دن دھمال پانے آں‘ نعرے لانے آں‘ میں ایس قوم دا بھنگڑا 1985ء توں ویکھ رہیا واں۔ میرے شعور تے فکر نے میری وسعت نوں اج کرارا جیہا جواب دے دتا تے میں اوس ویلے توں لے کے اج تک دے حالات لکھن تے مجبور ہو گیا واں۔ میرا تعلق ایکس جنریشن نال اے تے میرے اندر اجے تے روایات تے اقدار باقی نیں جہناں دا رونا میںاکثر رونا رہنا واںتے میں اپنے آپ نوں روایات دا امین سمجھنا واں۔ (صادق تے پہلے ای آں) 1988ء وچ جنرل ضیاء الحق جہاز دے حادثے وچ جیل بسے۔ پی پی پی سنے کئی لوکاں نے آمریت توں چھٹکارا پان تے بھنگڑے پائے۔ 1988ء وچ ای بینظیر بھٹو ملک دی پہلی خاتون وزیراعظم بنیاں۔ ایس عوام نے جی بھر کے بھنگڑے پائے۔ 1990ء وچ ایسے بینظیر بھٹو دی حکومت گری ایس قوم نے بھنگڑے پائے۔ ایہدے بعد مسلم لیگ دے قائد نوازشریف وزیراعظم بنے تے ایس قوم نے ڈھول دی تھاپ رقص فرمایا۔
1993ء وچ ایسے نوازشریف دی حکومت گری تے ایس قوم نے بھنگڑے پائے تے شکرانے دے نفل ادا کیتے۔ بینظیر بھٹو فیر وزیراعظم بنی تے ایس قوم نے بناں بریانی دے بھنگڑے پائے۔ 1996ء وچ بی بی بینظیر حکومت دی گری تے ایس قوم نے فیر بھنگڑے پائے ایہدے بعد لیڈر جو لندن وچ اجے علاج کرا رہے نیں اک واری فیر ہیوی مینڈیٹ دے نال وزیراعظم بنے تے ایس قوم نے جی بھر کے بھنگڑے پائے۔ 1999ء وچ نوازشریف دی حکومت ’’منہ پرنے‘‘ ڈگی تے ایس قوم نے بھنگڑے پائے تے کلمہ تشکر ادا کیتا۔ 1999ء وچ اک آمر پرویزمشرف دی حکومت آئی تے لوکاں نے بھنگڑے پائے۔ 2008ء وچ جنرل مشرف صدارت توں گرے تے ق لیگ دا مکمل صفایا ہو گیا تے ایس قوم نے بھنگڑے پائے۔ 2013ء وچ پیپلزپارٹی الیکشن وچ گری تے ایس قوم نے بھنگڑے پائے۔ 2017ء وچ جے آئی ٹی بنی تے ایس قوم نے بھنگڑے پائے۔ 2017ء وچ نوازشریف نوں گھر گھل دتا گیا تے قوم نے بھنگڑے پائے۔ وزیراعظم شاہد خاقان عباسی بنے تے قوم نے بھنگڑے پائے۔ جدوں بین الاقوامی فوک گلوکار عطاء اللہ خان عیسیٰ خیلوی نے (پرائڈ آف پرفارمنس‘ لائف ٹائم اچیومنٹ ایوارڈ‘ ستارہ امتیاز) جب آئے گا عمران‘ بنے گا نیا پاکستان والا ترانہ گایا تے ملک دے مرد تے عورتاں اک پاسے بچیاں تے چوپائیاں نے وی بھنگڑے پائے۔ ادھے لوکاں نے عمران خان لئی تے باقی عوام نے عطاء اللہ عیسیٰ خیلوی لئی بھنگڑے پائے۔ فیر جدوں عمران خان وزیراعظم بنے تے ایس قوم نے صرف وزیراعظم لئی بھنگڑے پائے تے عطاء اللہ عیسیٰ خیلوی نوں صرف ہارمونیم تک محدود کر دتا گیا۔ ہن جدوں وزیراعلیٰ پنجاب جناب عثمان بزدار دے خلاف عدم اعتماد دی مہم چلی تے قوم نے بھنگڑا پان لئی ڈھول تے ڈھولچیاں نوں کھلے پیمانے تے بک کر لیا۔ ایہ صورتحال اینی گھمبیر ہو گئی کہ ڈھول ناپید ہو گئے پر خوشی دی گل ایہ سی کہ ڈھولچی کافی مقدار وچ حکومت وچ ای موجود سن۔ ایتھوں تک کہ مولانا فضل الرحمن نے آپ ’’ڈھول وجان‘‘ دی ذمہ داری تک قبول کر لئی سی حالاں کہ ڈھول کٹن دا تجربہ تے اوہ کافی عرصے توں رکھدے نیں۔
ہن جدوں اسلام آباد دے جلسے وچ بلاول بھٹو زرداری دی ’’کانپیں ٹانگ رہیں تھیں‘‘ اودوں وی ایس عوام نے بھنگڑا پایا۔ ہن جدوں کدی عمران خان دی حکومت اپنے پنج ورھے پوری کرے گی یاں ایس توں پہلے ڈگ جاوے گی تے وی ایہ قوم بھنگڑے پاوے گی تے بہت زیادہ پاوے گی۔ یاد رکھو ایس ویلے ایہ قوم باجماعت شکرانے دے نفل وی ادا کرے گی۔ ایہ قوم ہر آن جان والے دی خوشی وچ بھنگڑے پان نوں اپنا فرض عین سمجھدی اے۔ ایہ قوم اوہناں نوں اپنا لیڈر من رہی اے جہناں دا اپنا نہ کوئی نظریہ اے تے نہ کوئی منشور اے۔ ایہ قوم وی دھمالی اے تے ایس قوم دے حکمران وی بہت وڈے ڈھولچی تے لٹیرے نیں تے سب توں وڈی حیران کن گل ایہہ وے ہر لیڈر نے ایہو کہیا اے کہ ساڈے نال پوری قوم کھڑی اے تے لوک بھنگڑا پانا شروع کر دیندے نیں پر ایہ حکمران یاد رکھو ایہ قوم اگلا بھنگڑا پان لئی وی بڑی بے قرار ہوندی اے ایس لئی تسیں پریشان نہ ہوو ایہ ڈھول‘ ڈھولچی تے بھنگڑے دا کھیڈ ساڈیاں آن والیاں نسلاں تک بڑی کامیابی تک کھیڈیا جاوے گا۔٭٭