سیاسی کہانی دا اختتام

حمید اللہ بھٹی

سیاسی صورتحال لمحہ لمحہ بدل رہی اے۔ ایسے لئی مستقبل وچ کیہہ ہوے گا؟یقینی جواب کسے دے کول نہیں۔ عمران خان اعتماد دا ووٹ لے سکن گے یا نکامی دی صورت وچ اقتدار توں وکھ ہو جان گے؟ جے تحریک عدم اعتماد کامیاب ہوندی اے تے مستقبل دا سیاسی منظرنامہ کیہہ ہووے گا۔ آیا نویں حکومت تشکیل دتی جاوے گی یا اسمبلیاں توڑ کے نویں انتخابات کرائے جان گے؟ حیران کن طور تے چاہے کسے دے اقتدار دی غلام گردشاں نال تعلق اے یا نہیں سوالاں دے جواب دین توں قاصر نیں۔ ایس بے یقینی دی وجہ سیاسی منظرنامے اتے حیران کن ہلچل اے مگر جدوں مخلص رفقا ساتھ چھڈ جان تے سمجھ لو کہانی دا اختتام ہون والا اے۔ عمران خان نوں اجکل ایسے طرح دے حالات دا سامنا اے۔
موجودہ حالات کیوں بنے تے ایہدا ذمہ دار کون
اے؟ سمجھن وچ کوئی دو رائے نہیں۔ حکمراناں دی ناعاقبت اندیشیاں دی بنا تے حالات سیاسی کہانی دے اختتام دے کول نیں کیوں جے بظاہر عدم اعتماد دی کامیابی وچ اپوزیشن توں ودھ حکمران جماعت دا کردار اے۔ا یس کردار دی وجہ نال آن والے دناں وچ حکومتی جماعت وچ شکست و ریخت ہور ودھ سکدی اے جہدی وجوہات واضح نیں۔ ساتھیاں نوں نظرانداز کرن ‘ رابطیاں وچ فقدان تے ہر سیاستدان دی تذلیل نال ایہہ دن آ گیا اے کہ نہ صرف اتحادی کنارہ کشی دے کول نیں بلکہ اقتدار دے باوجود حکومتی ممبران اسمبلی دا جھکائو اپوزیشن ول اے۔ ظاہر اے جتھے عزت نہ ہووے اوتھے کسے صاحب فہم و دانش دا ٹھہرنا اوکھا ہو جاندا اے۔ پچھلے کجھ دناں توں ناراض ارکان نوں منان دی کوشش ہوئی مگر ایہہ کوششاں اینی دیر نال شروع کیتیاں گئیاں کہ ہن مثبت نتیجہ معجزہ ای ہو سکدا اے۔ ویسے عام انتخاباں وچ کجھ زیادہ عرصہ نہیں رہیا ایسے لئی ممبران اسمبلی فیصلہ کردے ہوئے اپنے سیاسی مستقبل نوں نظرانداز نہیں کر سکدے لہٰذا جہڑے پنچھی اڈ گئے نیں شاید ای واپس لوٹ سکن۔
ٹھوکر لگے تے بندہ سکھدا تے احتیاط کردا اے مگر کئی ٹھوکراں لگیاں لیکن حماقتاں دا سلسلہ نہیں رکیا۔ سندھ وچ گورنر راج لان دی گلاں حماقت ای تے ہے۔ ایسے کسے قدم نال ملکی وحدت کمزور ہووے گی کیوں جے صوبے وچ منتخب حکومت کم کر رہی اے۔ ایمرجنسی یا گورنر راج دی صورت وچ عدالتاں توں بآسانی ریلیف مل سکدا اے۔ پاکستان بار کونسل سنے ماہرین قنون ولوں گورنر راج جئی تجویز دی شدید مخالفت دا عندیہ وی سامنے آ چکیا اے۔ عوامی تائید و حمایت تے تہی دست اک نشست رکھن والے شیخ رشید جیسے لوک تے اہمیت بنان دے چکر وچ تباہ کن مشورے دیندے نیں مگر سنن والیاں نوں تے عمل توں پہلے حالات دا جائزہ لے کے مشاورت نال فیصلہ کرنا چاہیدا اے۔ جماعتی فیصلے دے منافی وفاداریاں تبدیل کرن والے ممبران اسمبلی دے خلاف 63 اے دے تحت کارروائی ہو سکدی اے مگر حکومت بضد اے کہ عدم اعتماد دی تحریک اتے ووٹنگ توں پہلے ای الیکشن کمیشن ایس بارے فیصلہ سنا دیوے۔ ظاہر اے ایسا ممکن نہیں۔ علاوہ ازیں سپریم کورٹ وچ 186 دے تحت ریفرنس دائر کرن دی اک تجویز اتے غور جاری اے تاں جے واضح طور تے ہارس ٹریڈنگ توں حاصل ووٹ دی حیثیت دے تعین تے وفاداریاں بدلن والے نوں دوبارہ انتخاب وچ حصہ لین توں روکن دی راہ کڈی جا سکے۔ بظاہر حکومت دے حق وچ ایسا کوئی فیصلہ آنا آسان نظر نہیں آندا۔ 63 اے دے تحت کارروائی لئی جہڑے ثبوت دی لوڑ اے اوہ اجے موجود نہیں کیوں جے کسے نے جماعت دے خلاف اجے تک ووٹ نہیں دتا۔ نیز کسی نوں تاحیات نااہلی دے سوا نواں مینڈیٹ لین توں روکیا وی نہیں جا سکدا لہٰذا بہتر ایہہ اے کہ سیاسی کہانی دے اختتام ہور کجھ ویلا ٹالن لئی جے کجھ لکھنا اے تے سوچ سمجھ کے قلم نوں حرکت دتی جاوے وگرنہ اندھا دھند تحریر تے پہلے لکھے نوں وی بے اثر بنا سکدی اے۔
عیاں حقیقت اے کہ جہانگیر ترین نوں عمران خان توں دور کرن دی وجہ وزیراعظم دے پرنسپل سیکرٹری اعظم خان بنے جنہاں نے اپنی اہمیت قائم رکھن لئی وزیراعظم نوں دوستاں توں دور کیتا۔ چینی سکینڈل وچ سوچے سمجھے منصوبے دے تحت جہانگیر ترین نوں ملوث تے کرپٹ ثابت کیتا گیا جہدے تے عمران خان حکومت دی تشکیل وچ کلیدی کردار ادا کرن والے دوستاں توں بدظن ہوئے۔ ہن عدم اعتماد دا کاری وار ہویا اے تے جہانگیر ترین دی یاد آئی اے لیکن دوریاں دی خلیج اینی وسیع ہو چکی جہدا آسانی نال خاتمہ نظر نہیں آندا لیکن ایہو اعظم خان جنہاں دا عمران خان دے ہر فیصلے وچ بنیادی کردار اے نے اپنے سرپرست نوں سہارہ دین دے بجائے کہانی دا اختتام تے وگڑدے حالات دا ادراک کردے ہوئے اپنا مستقبل محفوظ کر لیتا اے۔ نہایت ذمہ دار ذرائع دے مطابق اوہناں نے بڑی رازداری نال خود نوں ورلڈبینک دے ایگزیکٹو ڈائریکٹر تعینات کران دی سمری منظور کرا لیتی اے فیر وی تہاڈا خیال اے کہ کہانی دا اختتام نہیں ہویا تے تہاڈا خیال غلط اے تے ہاں جولیس سیزر نے فیر وی قریبی دوست بروٹس ولوں تشدد نال قتل کرن دی کوشش تے یوٹوبروٹس جیا تریخی جملا بول دتا سی مگر عمران خان وچ تے اینی سکت وی نہیں رہی کہ سارے فیصلیاں دے کلیدی کردار توں جواب طلبی ای کر سکن۔
چلو جہانگیر ترین دا ناں تے چینی سکینڈل وچ آ گیا سی ایس لئی کجھ لمحیاں لئی تصور کر لینے آں کہ اوہ عمران خان تے جماعت نال مخلص نہیں بلکہ مفاد پرست‘ کرپٹ تے بدنامی دا کارن بنے لیکن علیم
خان دا مسئلہ سمجھ نہیں آندا اوہ کاروباری اک صاحب ثروت تے لہور دے نمایاں سیاسی چہریاں نال چنگے تعلق رکھدے نیں اوہناں دی سرمایہ کاری میڈیا تک وسیع اے۔ عثمان بزدار ولوں مسلسل نظرانداز ہون دی بنا تے وزارت توں مستعفی ہوئے تے عدم اعتماد دے نازک عمل تے لندن جا کے نواز شریف نال رل کے اپنا سیاسی مستقبل محفوظ بنا چکے نیں۔ عثمان بزدار نوں بچاندے بچاندے نوبت ایتھوں تک آ گئی اے کہ ا پنا بچائو وی محال ہو گیا اے۔ جدوں صاحب اختیار دا قریبی حلقہ احباب متنفر ہو جاوے تے بے اختیار حریفاں نال ناطہ استوار کرن لگے تے ذرا دل اتے ہتھ رکھ کے دسو سیاسی کہانی دے اختتام وچ کوئی شک رہ جاندا اے؟
قومی اسمبلی دے اجلاس وچ رلت تے اتحادیاں نوں ویلا دین توں گریزاں عمران خان سیاسی کشتی ڈبدی ویکھ کے اسمبلی ممبراں نال رابطے وچ مصروف نیں۔ پارلیمنٹ لاجز وچ جی ڈی اے دے ارکان نال رل کے حمایت دی درخواست کیتی مگر ایسے شام نجی چینل دے اک پروگرام وچ فہمیدہ مرزا نے ساری شکایتاں رفع ہون دی تردید کردتی۔ باپ پارٹی ولوں حمایت دے متعلق اک وضاحتی بیان آ چکیا اے ایسے طرح ق لیگ نے وی واضح طور تے آکھ دتا اے کہ اپنی جماعت دے ارکان نوں اکٹھا کر لین تے ای حمایت کر سکاں گے بصورت دیگر وکھ ہون دے سوا کوئی چارہ نہیں۔ چوہدری مونس الٰہی دا نازک حالات وچ بیرون ملک سفر الگ اہمیت اختیار کر گیا اے۔
عدم اعتماد دی تحریکاں پہلے وی پیش ہوندیاں رہیاں نیں لیکن ایسا پہلی واری ہو رہیا اے کہ اپوزیشن دے بجائے حکومتی جماعت بکھرن لگی اے تے جہدا جدھر منہ آندا اے نس جاندا اے جنہاں نوں قابو کرن یا تادیبی کارروائی دی قیادت وچ ہمت نہیں حالات ایس نہج اتے چلے گئے نیں کہ حکومتی جماعت دے ممبران سندھ ہائوس وچ پناہ لین تے مجبور نیں۔ ایہناں حالات وچ عالمی رہنما کہلوانا تے اک پاسے ملک دی قیادت توں وی محرومی دا خطرہ اے۔ آزمائش وچ جنہاں اتے تکیہ سی اوہ کنارہ کش ہون دا سامان کر چکے مگر عمران خان نوں اج وی اعظم خان عزیز نیں حالانکہ کوئی اک بندا نظام لئی ناگزیر نہیں ہوندا بلکہ جمہوریت وچ اکثریتی رائے ساریاں توں مقدم ہوندی اے مگر عمران خان نوں اعظم خان‘ مراد سعید تے فیصل واڈا جئے لوک ای بھلے لگدے نیں چاہے سیاسی کہانی دا اختتام ہو جاوے۔