پنجابی یونین دی چھتر چھاویں ’’پاکستان زندہ آباد اِکٹھ‘‘

(تحریک پاکستان دے مُڈھلے مقصد حاصل کرن لئی کوششاں جاری رکھاں گے، مدثر اقبال بٹ)

لہور (سٹاف رپورٹر)پنجابی یونین دے پربندھ ہیٹھ 23مارچ یوم پاکستان دی مناسبت نال پچھلے دیہاڑ پنجاب ہائوس وچ ’’پاکستان زندہ آباد اکٹھ‘‘دے سرناویں ہیٹھ اک پروقار تقریب ہوئیجہدی صدارت منے پرمنے پنجابی آگوالیاس گھمن نے کیتی۔ اُچیجے پروہنیاں وچ منے پرمنے صحافی قاضی طارق عزیز‘ میاں آصف علی پنجابی‘ پروفیسر ڈاکٹر کلیان سنگھ کلیان تے بلال مدثر بٹ سن۔ تقریب دی میزبانی پنجابی یونین دے چیئرمین مدثر اقبال بٹ نے کیتی۔ پنجابی میڈیا گروپ دے صدر ندیم رضا نے سٹیج سیکرٹری دے فرائض نبھائے۔ پنجاب یونین دے چیئرمین مدثر اقبال بٹ نے تقریب نال خطاب کردے ہوئے آکھیا کہ پنجاب ہائوس دا مُڈھلا ٹیچا پاکستان تے پنجاب دے سارے معاملات اتے کھل کے گل بات کرنا اے تاں جے اسیں اپنی قومی ضرورتاں دے حوالے نال اپنا حصہ پا سکیے۔ اسیں تحریک پاکستان تے قیام پاکستان دے مُڈھلے مقصد دے حصول لئی اپنی جدوجہد جاری رکھاں گے۔بھاویں سانوں ایس رستے وچ مشکلاں دا سامنا کرنا پووے گا لیکن مسلسل جدوجہد نال اسیں اپنی منزل تیکر ضرور پہنچ جاواں گے۔ قیام پاکستان توں پہلاں پنجاب وچ محرومیاں موجود سن۔ ساڈھی لیڈرشپ نے ایہناں محرومیاں دا ازالہ کرن دے بجائے اوہناں وچ ہور وادھا کیتا۔ قیام پاکستان مگروں اسیں ماں بولی پنجابی توں وی محروم کر دِتے گئے۔ پنجاب سنے ہر صوبے دی مادری زبان نوں اوہدا جائز مقام ملنا چاہیدا اے تے دوجے صوبیاں وانگوں پنجاب وچ وی مادری زبان پنجابی نوں ذریعہ تعلیم ہونا چاہیدا اے۔منے پرمنے صحافی تے دانشور قاضی طارق عزیز نے آکھیا کہ پنجاب نے کدی صوبائیت دی گل نہیں کیتی۔ 23مارچ اتے نظر پائیے تے ہر پاسے پنجابی نظر آن گے۔ قیام پاکستان لئی وی لکھاں پنجابیاں نے جاناں دی قربانیاں دتیاں نیں۔ اسیں مدثر اقبال بٹ دی پنجاب دے حقاں دی تحریک وچ ہر اول دستے دا کردار ادا کراں گے۔ جنرل منیجر پنجابی میڈیا گروپ رضوان اصغر بٹ نے آکھیا کہ ساڈھے قائدین نے اپنی سیاست دا آغاز ہندو مسلم اتحاد توں کیتا سی تے فیر سانوں وکھرے ملک دی لوڑ کیوں پئی کیوں جے ساڈے قائدین نے چھیتی ای جان لیا سی کہ اوہناں نے ایسے طرح ہندوستان دی آزادی دی جدوجہد کیتی تے مگروں اسیں ہندوواں دی غلامی وچ آ جاواں گے۔ اج دے نوجوان نوں قیام پاکستان دے نظریے تے ضرورت نوں سمجھن دی لوڑ اے تاں جے اوہ پاکستان دے بنیادی مقصد دے حصول وچ اپنا کردار ادا کر سکے۔ پنجابی زبان تحریک دے رہنما تے دانشور الیاس گھمن نے آکھیا کہ اصل پنجابی کدی پاکستان دے خلاف گل نہیں کر سکدا۔ اپنے قومی ہیرو تے ملک دے خلاف گل کرنا مناسب نہیں ۔ پنجابی زبان دی تحریک پاکستان دی مقامی تحریک اے جہڑی ایسے سطح اتے اپنے اہداف نوں حاصل کرے گی۔ ایہہ اہداف قومی مفادات نال ہم آہنگ نیں۔ پنجاب دے خلاف نفرت پیدا کرنا مخالفاں دی شروع توں سازش رہی اے۔ مخالفاں نے قرارداد پاکستان نوں قرارداد لاہور دا نام دے کے ایہدا مذاق بنایا۔ ایتھوں تک کہ لفظ پاکستان دا وی مذاق بنایا گیا۔ تحریک پاکستان وچ وزیرآباد دا بہت وڈاکردار اے۔ گاندھی نوں وی دو واری وزیرآباد آنا پیا لیکن قائداعظم دی آواز تے وزیرآباد ے تن وڈیاں نے فیصلہ کر لیتا تے فیر اپنے تن من دھن نال قیام پاکستان لئی ای کم کیتا۔ اوہناں نے آکھیا اک سازش دے تحت پاکستان دے مختلف علاقیاں وچ مصنوعی نفرتاں پھیلائی گئیاں۔ اساںمحبتاں ونڈنیاں نیں اسیں دوجیاں نوں محبت دیاں گے تے جواب وچ سانوں وی محبت ملے گی۔ پنجاب تے پنجابی دے سارے حق اسیں پاکستانیت دے اندر رہندے ہوئے لینے نیں تے اسیں لے کے رہواں گے۔ پروفیسر ڈاکٹر کلیان سنگھ کلیان نے آکھیا کہ 23مارچ نوں قرارداد لاہور نال منسلک کرن دا پس منظر بہت خوبصورت اے۔ 23مارچ دے جلسے وچ ہندو عیسائی تے سکھ سارے موجود سن۔ بھگت سنگھ نوں پھانسی دین دا فیصلہ 25مارچ دا سی۔ 23مارچ دا جلسہ اصل وچ ایسے سلسلے دی کڑی سی جہدے وچ قائداعظم نے آکھیا سی کہ جے کانگرس دا رویہ ایہو رہیا تے فیر اقلیتاں نوں وکھرا ملک لینا پووے گا کیوں جے کانگرس دے دبائو اتے ای بھگت سنگھ نوں پھانسی دتی گئی سی۔ قائداعظم دے پاکستان وچ تن اہم وزارتاں اقلیتاں دے کول سن۔ سانوں 23مارچ دے حوالے نال اپنے بالاں نوں ایہہ دسنا چاہیدا اے کہ سارے مذہباں دے لوکاں نے رل کے پاکستان بنایا سی۔ سٹیج سیکرٹری ندیم رضا نے تقریب دے وکھو وکھ موقعیاں ا تے 23مارچ دے حوالے نال آکھیا کہ 23مارچ نوں پنجابیاں نے پورے ہندوستان دے مسلماناں دی میزبانی کیتی سی۔ پاکستان لئی پنجابیاں دی قربانیاں لازوال نیں جہدی سزا انگریزاںنے پنجاب دی تقسیم کر کے پنجابیاں نوں دتی۔ پنجاب دی تقسیم دے زخم نال دونویں پنجاباں دے لوکی اج تک اَتھرو بہا رہے نیں۔ تحریک پاکستان وچ پنجاب دے صحافیاں نے وی اہم کردار ادا کیتا اے۔ اوہناں نے آکھیا کہ 70سال توں اسیں منزل دی تلاش وچ آں۔ قیام پاکستان دے ویلے اک قوم نوں ریاست دی تلاش سی تے اج اک ریاست نوں اک قوم دی تلاش اے۔