پنجابی رہتل دیہاڑدا اِکٹھ

اچیچے پروہنے ڈاکٹرافضل راز،عارف یار سوہلوی تے محمد اشفاق ایاز ہوریں سن

رپورٹ:محمد عبدالرحمن ارشد

پنجابی مجلس ،گورنمنٹ قاضی عبدالحق اسلامیہ ایسوسی ایٹ کالج جلالپور جٹاں وچ پنجابی رہتل دیہاڑ بڑے ای سوہنے تے سلکھنے انداز پنجابی چ منایا گیا اس دا سارا سہراپرنسپل پروفیسر کلیم احسان بٹ تے شعبہ پنجابی دے انچارج پروفیسر عابد حسین اعوان دے سر جاندا اے۔پنجابی رہتل دیہاڑ دے اچیچے پروہنے ڈاکٹرافضل رازصدرورلڈپنجابی فورم تے روزن ادبی فورم چیف ایڈیٹر:تماہی کانگاں ،عارف یار سوہلوی تے محمد اشفاق ایاز سن۔پنجابی رہتل دیہاڑ دے سماگم دا آغازاللہ سوہنے دے پاک کلام توں کیتا گیا تے نبی پاکﷺدے حضورعقیدت دے پھل وی نچھاور کیتے گئے۔شعبہ پنجابی دے انچارج پروفیسر عابد حسین اعوان نے پنجابی رہتل سماگم دی غرض وغایت بارے دسیا تے وکھ وکھ کماں بارے چانن پایا۔پرنسپل پروفیسر کلیم احسان بٹ نے پنجابی رہتل دیہاڑ بارے دسیا کہ اس وار حکومتی سطح تے اس دیہاڑنوں منان دا پربندھ کیتا گیا اے،جہڑا کہ بہت ای سلاہن جوگ اے،اوہناں دسیا ساڈا نوجوان اپنی ثقافت توں بہت دور جا چکیا اے تے ہن ویلا آگیا اے کہ جے اپنی ہوند نوں بچانا اے تے اپنی رہتل توں جانوں ہونا پووے گا،اج ساڈا وڈا تے نکا سب پنجابی زبان توں دور جا چکے نیں پر کیوں؟ ایہہ گل سوچن تے مجبور کردی اے تے اس دا سٹا وی استاد ای کڈھن گے،کیوں جے بچے دی پہلی درسگاہ اوہدا گھر ہوندا اے تے اس توں بعد تعلیمی ادارہ اوہدی تعلیم تے تربیت دا بندوبست کردا اے تے ایہہ موقع ہوندا اے کہ بچے نوں اوہدی مادری زبان بارے دسیا جائے تے اوہدے دوالے ہون والیاں تے زمین نال جڑیاں ساریاں شیواں بارے دسیا جاوے۔کیوں جے بچے لئی ایہہ ضروری اے کہ اوہ جتھے دا جم پالا ہووے اوتھے بارے اوہنوں مکمل جانکاری ہونی چاہی دی اے۔اج ساڈے بچیاں نوں دیسی مہینیاں دا پتا نہیں، جے ایہہ علم نہیں تے اوہ اس دے موسماں بارے وی کجھ نہیں دس سکن گے۔ساڈی زمین وچ جو کجھ اگھ رہیا اے اس دا ویلے نال تے موسم نال تعلق اے،کہڑے موسم وچ کنک گڈھنی چاہی دی اے تے کدوں وڈھنی چاہی دی اے ایہہ سب اپنی زمین تے ایتھے دی بھرویں تاریخ نال جڑنا پووے گا ۔

اچیچے پروہنے ڈاکٹرافضل راز نے ایہنے سوہنے سماگم اتے پرنسپل پروفیسرکلیم احسان بٹ تے شعبہ پنجابی دے انچارج پروفیسرعابد حسین اعوان نوں بھرویں مبارکباد دیندیاں آکھیا کہ جس پیار تے خلوص نال اس کالج وچ پنجابی رہتل دیہاڑ منایا گیا اے ،ایہہ اک تاریخ دا حصہ بن گیا اے،جس بڑھوتری نال طالب علماں نیں اپنے اپنے جوہر وکھائے نیں اوہ وی تاریخ دے صفحیاں وچ لکھے تے یاد رکھے جان گے،ڈاکٹرافضل راز نے دسیا کہ رہتل دیہاڑ ہوندا کیہ اے تے اس نوں کیوں منایا جاندا اے،اوہناں کہیا پنجابی دے جنھے وی دیہاڑنیں او کسے نہ کسے تاریخی واقعے نال جڑے ہوندے نیں،چوداں مارچ پنجابی رہتل دیہاڑاک تے نویں سال دی آمد دا اعلان اے ،ایہہ پنجابیاں واتے خوشی دا دن اے ،نویں سال نوں پنجابی دی ریت روایت نال جوڑ کے منانا چاہی دا اے ،ایہہ چیتر دا مہینہ ہر پاسے بہار رت لے کے ائوندا اے ،ہر پاسے خشبواں کھلر جاندیاں نیں ،جسراں قدرت دی ہر شے ہس دی اے تے ہسن تے مجبور کردی اے ایسے سانوں اپنے ماحول نوں خوشبودار بنانا چاہی دا اے ،ہر اک لئی آسانیاں پیدا کرنیاں چاہی دیاں نیں،کم ائون دی پریرنا دینی چاہی دی اے،اج دے سماگم وچ جہڑا کم بچیاں نے اپنے ذمے لیا سی اس نوں بڑے سوہنے انداز وچ پیش کیتا گیا اے ،چنگے گائون تے بھنگڑاپیش کیتا گیا اے،پنجابی فلماں دے مکالمے ،گانے،ماہیے،ٹپے،گوہر انداز وچ طالب علماں نیں اپنا اپنا حصہ پایا،اس توں پتا چلدا اے کہ ایہناں دے انچارج پروفیسر عابدحسین اعوان نیں بچیاں تے بہت محنت کیتی اے تے ایہہ محنت بچیاں وچ دس وی رہئی اے۔اوہناں کہیا ایہہ رہتل دیہاڑ پنجابیاں دا اپنا دیہاڑ اے تے اس نوں منانا تے اس دی حفاظت کرنا وی ساڈاای بن دا اے ،اس دی حفاظت کسے بگھانے نے نہیں کرنی،اس سنیہے نوں اگے پہنچانا چاہی دا اے ،ساڈا اک اک دیہاڑ خوشیاں نال جڑیا ہویا اے تے سب نوں اپنیاں خوشیاں وچ شامل کرو ،اس رہتل نوں اگے لے کے وی ودھنا چاہی دا اے۔پنجاب دی تاریخ ول جھات پائیے تے سانوں پتا چلدا اے کہ اس خطے دی ریت روایت بڑی مٹھی سی،گھیو شکر ایتھے دے اک جی دی زبان وچ گھلیا ہویا سی،قول دے پکے تے سچے لوک سن،اج اسیں مل کے وعدہ کرئیے کہ اس ریت روایت نوں فیر توں زندہ کراں گے تے لوکاں نوں دساں گے کہ ساڈے وڈے کون سن تے اوہناں اس زمین لئی کیہ کیہ کیتا ،ایتھے دیاں کھیڈاں ول جھات پائیے تے سانوں کوڈی کوڈی کر دا گھبرو نظر آندا اے ،زویں وچ گوڈی کردا دس دا اے ،گھوڑے دوڑاندا نظری پیندا اے ،نیزہ بای کردا وکھائی دیندا اے،میلے ٹھیلے ایتھے دی پہچان سن پر اج اس پنجاب نوں پتا نہیں کس بھیڑے دی نظر لگی اے کہ اسیں کھیرو کھیرو ہو گئے آں،سیانے آکھدے نیں کہ ڈلھیاں بیراں دا اجے وی کجھ نہیں گیا سانوں اپنی ہوند ول پرت ائونا چاہی دا اے ،ساڈی اپنی زمین نال جڑت پکی تے پیڈی ہونی چاہی دی اے ،کیوں جے ساڈے وڈے ساڈے لئی جو چھڈ گئے نیں تے اسیں اس دے وارث آں،ساہنوں صوفی شاعراں نال اپنے آپ نوں جوڑن دی لوڑ اے تے جنہاں ساہنوں امن دا سنیہا دتا تے پیاردا پرچارک بنن ول پریریا۔ساڈی تاریخ قربانیاں نال بھری پئی اے اپنے سورمیاں بارے نویں پیڑی نوں دسنا چاہی دا اے ،اوہناں کہیا حکومت نوں ایہناں دیہاڑاں دے نال نال مڈھلی تعلیم وی پنجابی وچ کر دینی چاہی دی ،جے ایہہ سب کجھ ہوجائے تے ویکھنا ایہہ نویں پود جہڑا کہ ساڈا بھلک اے کامیاب تے کامران ہووے گی نالے حکومت لئی وی فخر دا باعث بنے گی۔پرنسپل پروفیسر کلیم احسان بٹ نے طالب علماں لئی دس ہزارروپئے انعام دا اعلان کیتا تے ایہہ ایہناں اک سوہنا اقدام سی ،جس پاروں طالب علماں نوں آئندہ وی پریرنا ملے گی کہ اوہ ایہو جہے سماگماں وچ اگے ودھ کے حصہ لین،پروفیسر کلیم احسان بٹ نیں اخیر تے سب بچیاں تے پروہنیاں دا شکریہ ادا کیتا تے کہیا کہ مینوں فخر اے کہ اج میرے کالج دے طالب علماں نے ایہناں چنگا سماگم پیش کیتا کہ میں دوجے کالجاں ساتھیاں نوں وی اس بارے دس پاواں گا کہ میرے کالج دے طالب علم واقعی شاندار نیں تے اوہناں دے مستقبل لئی وی دعا گو آں۔شکریہ