پنجابی یونین ولوں پنجاب ہائوس وچ اُچیچے اِکٹھ دا پربندھ
بابا گرونانک دیو جی یونیورسٹی دنیا وچ اپنی مثال آپ بنے گی: رلتیاں دی گل بات
رپورٹ: ظ عباس
بابا گورونانک یونیورسٹی دے قیام دا اعلان پچھلے دور حکومت وچ 16سال پہلے متروکہ وقف املاک بورڈ دے پچھلے سربراہ صدیق الفاروق نے 2016 وچ کیتا سی تے آکھیا سی کہ بابا گرونانک یونیورسٹی 400ایکڑ اتے تعمیر کیتی جاوے گی جہدے وچ پنجابی دے علاوہ دوجے مضمون وی پڑھائے جان گے۔
وزیراعلیٰ پنجاب سردار عثمان بزدار ایہہ واضح کر چکے نیں کہ بابا گورونانک یونیورسٹی دا قیام غیر معمولی اہمیت دا حامل اے۔ اوہ ایہہ وی آکھ چکے نیں کہ یونیورسٹی دی تعمیر تے 6ارب روپے لاگت آوے گی جد کہ یونیورسٹی تن مرحلیاں وچ مکمل کیتی جاوے گی۔ایس یونیورسٹی دے قیام نال علاقے دے لوکاں نوں بے پناہ فیدہ پہنچے گا کیوں جے دنیا بھر دے لوک‘ خصوصاًسکھ برادری‘ ایس یونیورسٹی وچ تعلیم حاصل کرن ننکانہ صاحب آئے گی۔ حکام نے ایہہ دعویٰ وی کیتا کہ ایس یونیورسٹی وچ صوفی ازم‘ روحانیات تے بابا گرونانک دی تعلیمات دے حوالے نال پڑھایا جاوے گا تے دنیا بھر وچ ایہہ یونیورسٹی روحانیت دی تعلیم دے حوالے نال جانی جاوے گی۔
تاہم سکھ حکام ایہہ استفسار کردے نیں کہ یونیورسٹی بنان دا اعلان 16سال پہلے کیتا گیا سی لیکن اج تک کوئی حکومت ایہنوں مکمل نہیں کر سکی تاہم اوہ ایہہ تسلیم کردے نیں کہ ایس یونیورسٹی دے قیام نال دنیا بھر وچ پاکستان دا مثبت چہرہ ویکھیا جاوے گا۔حکومت دے ایس اقدام نال دنیا وچ پاکستان توں متعلق شکوک و شبہات وی دور ہو جان گے تے ایہہ تاثر جاوے گا کہ پاکستان مذہبی اقلیتاں دے حقوق دا خیال رکھدا اے۔
ایہہ پس منظر بیان کرن دا مقصد ایہہ ہے کہ اگلے دن پنجاب ہائوس وچ منعقدہ تقریب وچ بابا گرونانک یونیورسٹی دے وائس چانسلر محمد افضل وی تشریف لیائے۔ اوہ اک ایسی علمی درسگاہ دے اولین سربراہ نیں جہدے حکمراناں دے علاوہ عوام نوں وی بہت ساری امیداں وابستہ نیں تے مدثر اقبال بٹ وی پرجوش نیں جہڑے پنجاب ہائوس دے سربراہ دے طور تے غیر رسمی طور تے اک ایسا ادارہ چلا رہے نیں جہدی خدمات کسے وی پنجابی کولوں لکیاں نہیں۔
پنجابی یونین دے چیئرمین مدثر اقبال بٹ تے وائس چیئرمین بلال مدثر بٹ ولوں اگلے دن 31ویں انٹرنیشنل پنجابی کانفرنس دے مندوبین دے اعزاز وچ پنجاب ہائوس دے گرونانک دیوجی آڈیٹوریم وچ اک پروقار تقریب دا پربندھ کیتا گیا جہدی صدارت گربجھن سنگھ گل نے کیتی۔ اچیچے پروہنیاں وچ وائس چانسلر گرو نانک دیو جی یونیورسٹی محمد افضل ،سہج پریت مانگٹ،درشن بلندوی،خالد حسین ،دلجیت سنگھ تے الیاس گھمن سن ۔سٹیج سیکرٹری دی ذمہ داری پروفیسر ڈاکٹر کلیان سنگھ کلیان نے ادا کیتی تے کیہ خوب ادا کیتی کہ حاضرین اوہناں دی دانش تے علم دی تعریف کیتے بنا نہ رہ سکے۔
پنجابی میڈیاگروپ دے صدر ندیم رضا نے پروہنیاں نوں پنجاب ہائوس دا تعارف کراندے ہوئے آکھیا۔پنجاب ہائوس اک عمارت نہیں بلکہ ایہہ مدثر اقبال بٹ دا سفنا اے جہدی تعبیر پان لئی اوہناںنے 30ورھیاں تک مسلسل جدوجہد کیتی اے۔
اوہناں نے ہور آکھیا کہ آڈیٹوریم نوں بابا گرونانک دے ناں نال منسوب کرنا فخر دی گل اے۔ پنجاب ہائوس وچ 25 مختلف منصوبیاںاتے کم ہو رہیا اے۔ 31ورھیاں توں مسلسل شائع ہون والے پنجابی زبان دے کثیر الاشاعت اخبار بھلیکھا وچ ہن گورمکھی دے صفحیاں دا وی وادھا کر دتا گیا اے۔ بابا فرید بک فائونڈیشن دے تحت پنجابی وچ لکھی گئی 60 کتاباں دی اشاعت مکمل ہو چکی اے۔ بابا گرونانک آڈیٹوریم اک اجیہا تحقیقی مرکز اے جتھے پنجابی زبان دی مختلف جہتاں وچ تحقیق کرن والے طلبا تے طالبات نوں ہر طرح دی مدد بلامعاوضہ فراہم کیتی جا رہی اے جد کہ اوہناں دی مالی اعانت وی کیتی جاندی اے۔ پنجاب ہائوس پنجابی لئی کم کرن والی تحریکاں تے انجمناں دا مرکز اے۔ پنجابی زبان دے سب توں ودھ ویکھے جان والے بھلیکھا چینل دے سارے انتظامی تے تخلیقی امور وی ایسے عمارت وچ انجام دتے جا رہے نیں جہڑا چھیتی سیٹلائٹ اتے وی آ جاوے گا۔ پروڈکشن ہائوس تکمیل دے آخری مراحل وچ اے جتھے پنجاب ہائوس دے تحت ایس شعبہ وچ تحقیق کرن والیاں دی ہر قسم دی معاونت کیتی جاوے گی۔
ندیم رضا دا آکھنا سی‘ پنجاب ہائوس وچ پنجابی ڈیرہ بنایا جا رہیا اے جتھے پنجاب دے روایتی کھابیاں نال پروہنیاں دی تواضع کیتی جاوے گی۔ ابتدائی طور تے ہفتہ وار بنیاداں اتے پروگرام دا آغاز کیتا جا رہیا اے۔پنجاب ہائوس وچ پنجابی دی مختلف جہتاں دے حوالے نال ہون والی تحقیق دی نگرانی مدثر اقبال بٹ دی صاحبزادی ڈاکٹر ثنا مدثر بٹ کر رہیاں نیں جنہاں نے پنجابی وچ پی ایچ ڈی کیتی اے تے پنجابی زبان دی درس و تدریس نال جڑیاں نیں۔
اوہناں نے آکھیا مدثر اقبال بٹ لئی پنجاب دو نہیں‘ صرف تے صرف اک اے تے پنجاب ہائوس پنجابیاں دی خدمت لئی ہر ویلے حاضراے۔ پنجاب ہائوس محبت تے امن دی علامت اے۔
مدثر اقبال بٹ نے آکھیا کہ میری ایہہ دیرینہ خواہش سی کہ پنجاب ہائوس دے گروونانک دیوجی آڈیٹوریم وچ 31ویں عالمی پنجابی کانفرنس دے مندوبین نوں جی آیاں نوں آکھا۔ پنجاب ہائوس پنجابی دی ترویج لئی بلا تفریق ہر طرح دی معاونت لئی حاضر اے۔
آسٹریلیا توں آئے ہوئے پروہنے عظیم شیکھر نے آکھیا جدوں دے لاہور آئے آںایتھے اینی محبتاں ملیاں نیں کہ ہر دن ایہو دل کردا اے کہ دن وی تے رات وی لمی ہو جان۔ محبت نال سرشار چہرے ویکھنا تے اوہناں نال گل کرنا اک نویں طلسماتی دنیا دی سیاحت کرواندا اے۔ سانوں ایتھے اوہو چہرے نظر آ رہے نیں‘ پنجاب ہائوس آنا کسے زیارت توں گھٹ نہیں ۔
منے پرمنے پنجابی شاعر بابا نجمی نے ایس موقع تے پنجابی یونین دے چیئرمین مدثر اقبال بٹ دی پنجابی لئی خدمات نوں خراج تحسین پیش کردے ہوئے اپنا شعر سنایا۔
تسی جے چلو جوڑ موہڈا میرے نال
میں دھرتی توں کالی رات مکا دیواں
اوہناں نے آکھیا پنجاب ہائوس دی محبت اجیہی اے کہ میں مختلف بہانیاں نال ہفتے وچ پنج واری ایتھے آئونا واں۔انگلینڈ توں آئے ہوئے پروہنے درشن بلدیو نے آکھیا پنجابی دا مستقبل پنجاب ہائوس نال جڑیا اے۔ پنجابی صرف ساڈی زبان ای نہیں بلکہ ایہہ ساڈی پہچان وی اے۔ محبت ای اک ایسی شے اے جہڑی سانوں ساریاں نوں اکٹھا کر سکدی اے۔
امریکا توں آئے ہوئے دلجیت سنگھ نے آکھیا میں اک صحافی آں تے میرا لہور نال رشتہ بہت گہرا اے۔ پنجاب ہائوس توں بھلیکھا اخبار شائع ہوندا اے لہٰذا میرا پنجاب ہائوس نال دوہرا تعلق اے۔بھارت بیر کور نے آکھیا اسیں گورونانک دیو یونیورسٹی دی ہر طرح دی معاونت کرن لئی تیار آں۔ ایتھے آ کے ایہہ لگ ای نہیں رہیا کہ اسیں کسے دوجے ملک وچ آئے آں۔سہج پریت مانگٹ نے آکھیا کہ کجھ عرصہ پہلے گربجھن سنگھ دے نال ننکانہ صاحب وی گرونانک سکول دا دورہ کیتا سی اوس ویلے دل وچ خواہش پیدا ہوئی سی کہ ننکانہ صاحب وچ گرونانک صاحب دے ناں نال یونیورسٹی وی ہونی چاہیدی اے۔ اج میں ایس خواہش دی تکمیل ویکھ رہیا واں۔
اوہناں نے ہور آکھیامدثر اقبال بٹ
اوہناں معدودے چند لوکاں وچوں اک نیں جنہاں نے پنجابی دے فروغ دا بیڑا چکیا اے۔ اوہ جنون دے نال پنجابی لئی کم کردے نیں۔بھلیکھا اخبار نے سانوں ہمیشہ بہترین کوریج دتی اے۔خالد حسین نے آکھیا مدثر اقبال بٹ میرے کشمیری بھراں نیں‘ میں اک کشمیری ماں دا ددھ پیتا اے۔ میں پہلا کشمیری آں جہنوں پنجابی وچ سولاں دا سالن کتاب لکھن تے نیشنل اکیڈمی آف لیٹرز نیو دہلی ولوں ایوارد ملیا۔ پنجابی زبان تحریک دے سربراہ دانشور الیاس گھمن نے آکھیا سکھاں دی پرانی ریت اے کہ اوہ کسے دا احسان ذمے نہیں رکھدے۔ اوہناں نے مینوں ایہہ احساس دوایا اے کہ میں اک وی آئی پی آں۔امریکہ جان تے بھارت وچ جس طرح اوہناں نے میرا استقبال کیتا اوہدی کوئی دوجی مثال نہیں ملدی۔اوہناں نے آکھیا میں گرودواریاں دے متعلق لکھیا اے۔ اوہناں نے مدثر اقبال بٹ تے بابا گرونانک یونیورسٹی دے وائس چانسلر نوں مخاطب کردے ہوئے آکھیا کہ سکھ برادری دے نال رل کے یونیورسٹی قائم کرنا تے پنجابی لئی کم کرنا بہت وڈی ذمہ واری اے ایہنوں نبھان لئی تہانوں تیار رہنا چاہیدا اے۔
گورونانک دیو یونیورسٹی دے وائس چانسلر محمد افضل نے آکھیا میری خواہش اے کہ ایہہ یونیورسٹی دنیا وچ اپنی مثال آپ ہووے‘ مینوں ایتھے آ کے بہت خوشی ہوئی۔ مینوں جدوں پنجاب ہائوس وچ آن دی دعوت ملی تے میں دوجی مصروفیات ترک کر دتیاں۔ ننکانہ وچ پیدا ہویا واں ایسے لئی دوجی جامعات دی پیشکشاں نوں چھڈ کے گرونانک دیوجی یونیورسٹی دے وائس چانسلر دا عہدہ قبول کیتا۔
گربجھن سنگھ گل نے اپنے صدارتی خطاب وچ آکھیا میری مدثر اقبال بٹ نال 2001 وچ پہلی ملاقات ہوئی سی تے اوہناں نے بنا کسے تذبذ دے اپنے دفتر وچ لگے ہوئے بلھے شاہ‘ بابا گرونانک‘ محمد بخش تے شاہ حسین دے سکیچ مینوں دے دتے‘ مدثر اقبال دی پنجابی لئی خدمات نوں ہمیشہ یاد رکھیا جاوے گا۔ اوہناں نے ہور آکھیا الیاس گھمن نے صرف پنجاب دے حوالے نال لکھیا اے۔ بھارتی پنجاب دے اخباراں وچ اوہناں دے کالم شائع ہوندے سن۔ اوہناں نے درحقیقت محبتاں ونڈیاں نیں۔ ایس لئی ساڈے ول سارے ای ایہناں نال محبت نہیں کردے بلکہ ایہناں نوں پوجدے نیں۔ گرونانک دیو یونیورسٹی بھارتی پنجاب دی یونیورسٹیاں دے نال رل کے کم کرے گی تے ایہنوں بہت زیادہ فیدہ ہووے گا۔ اوہناں نے وائس چانسلر دے حوالے نال آکھیا کہ اوہناں نوں بابا گورونانک نے چنیا اے۔
گربجھن سنگھ گل نے آکھیا جدوں لوکاں دے کول کجھ وی نہیں سی اوس ویلے وی پنجاب وچ جامعات سن۔ جانے کیوں پنجابی اگے ودھن توں کتراندے نیں۔ سانوں نفرتاں پھیلان والیاں کولوں بچنا اے تے محبت پھیلان والیاں نوں نال جوڑنا اے۔
تقریب وچ پنجابی یونین دے چیئرمین تے الیاس گھمن ولوں مندوبین نوں پنجاب دی پہچان سروپے دتے گئے۔ تقریب دے اخیر وچ مختلف مصنفین دی پنجابی وچ لکھی گئی کتاباں دی رونمائی وی کیتی گئی جد کہ پروہنیاں دی پرتکلف کھانیاں نال تواضع کیتی ۔ مدثر اقبال بٹ نے فرداً فرداً سارے پروہنیاں دی آمد دا شکریہ ادا کیتا۔
