اکرم کنجاہی ہمہ جہت شخصیت

تنویر ظہور

جریدہ رنگ ادب کراچی توں چھپن والا کتابی سلسلہ اے۔ ایہدے تحت کجھ وڈیاں تے قدآور شخصیات دے خصوصی نمبر وی چھاپے گئے جہناں وچ ڈاکٹر طاہر سعید ہارون‘ شاعرصدیقی‘ عارف شفیق‘ فضا اعظمی‘ مولانا اقبال سہیل‘ پروفیسر جاذب قریشی‘ مرزا غالب‘ شاہدہ لطیف تے شمس الرحمن فاروقی شامل نیں۔
سجرا شمارہ 58-59 اکرم کنجاہی نمبر اے۔ اکرم کنجاہی دا شمار ایس دور دے عبقری شعرا‘ ناقدین تے محققین وچ ہوندا اے۔ اوہناں دیاں ہن تک 22 کتاباں سامنے آ چکیاں نیں جہناں وچ تنقیدی کتاباں دی گنتی زیادہ اے۔ ایہ بہترین مقرر وی نیں تے فن تقریر تے ایہناں دیاں کتاباں نیں۔ انگریزی‘ اردو تے پنجابی تن زباناں وچ لکھدے نیں۔ آپ سہ ماہی جردیہ غنیمت دی ادارت وی کر رہے نیں۔ پیشے دے لحاظ نال سینئر بینک ایگزیکٹو نیں۔ ایہناں دی پیدائش تے ابتدائی تعلیم کنجاہ (ضلع گجرات) وچ ہوئی۔ بسلسلہ ملازمت 1993ء وچ کراچی شفٹ ہوئے تے فیر مستقل قیام کراچی وچ ای اے۔ رنگ ادب دے مدیر اعزازی شاعر علی شاعر نیں۔ اکرم کنجاہی نمبر 14 ابواب تے مشتمل اے جہدے وچ اوہناں دا تفصیلی انٹرویو وی شامل اے۔ ابتدا وچ ایہناں دا خاکہ تے دوجے ابواب وچ بحیثیت نثرنگار‘ بحیثیت شاعر‘ اک ادبی مقرر تے دانشور‘ اکرم کنجاہی دے فکروفن تے اخباری کالم‘ اخباری و کتابی تبصرے‘ مختصراً آراء‘ منظوم خراج احساس، کلام سے انتخاب (غزلاں‘ نظماں‘ انگریزی نظماں) نثر سے انتخاب، سوانح حیات، یادگار اور نادر تصاویر۔ ایہ خصوصی شمارہ 495 صفحیاں تے مشتمل اے۔ آخر وچ 16 صفحیاں تے اکرم کنجاہی دی وکھووکھ شخصیات تے ادبی تقریبات دیاں رنگین فوٹواں چھاپیاں گئیاں نیں۔ ایس طرح ایہ شمارہ پنج سو توں ودھ صفحیاں تے مبنی اے۔ اکرم کنجاہی دی پیدائش مارچ وچ ہوئی۔ ایہناں دی شخصیت تے فن تے خصوصی شمارہ مارچ وچ ای چھپیا اے۔ ایس طرح شاعرعلی شاعر ولوں ایہ اوہناں دی سالگرہ دے موقعے تے ارمغان اے۔ 23 مارچ دی اپنی تھاں اک اہمیت اے۔ اج توں 82 ورھے پہلاں ایسے دن قرارداد پاکستان منظور ہوئی تے ایسے مہینے پاکستان پلاٹینم جوبلی منائی جاوے گی۔ 16 دسمبر 2021ء وچ جم خانہ کلب گجرات وچ ایہناں دیاں دس کتاباں دی تعارفی تقریب ہوئی۔ ایس خصوصی شمارے وچ اکرم کنجاہی دے بارے ڈاکٹر افضل راز تے ڈاکٹر اظہرمحمود چوہدری دے پنجابی مضمون شامل نیں۔ ایہناں دوہاں حضرات دا تعلق اوہناں دے آبائی شہر گجرات نال اے۔ ایہناں نے کراچی توں پنجابی ٹی وی چینل ’’اپنا‘‘ تے 2007ء تے 2008ء وچ ادبی مبصر دی حیثیت نال سولو پروگرام پیش کیتے۔ اپنے انٹرویو وچ اوہناں دا کہنا سی کہ مینوں بہادر لوگ چنگے لگدے نیں۔ بزدل ناپسند نیں تے منافقاں نال نفرت کرنا واں۔ بزدل برداشت ہو جاندے نیں پر منافقت کرن والیاں تے غصہ آندا اے۔ منافقین جہنم توں سب توں تھلے درجے وچ ہون گے۔ گھٹ صلاحیت پر ذمہ دار میرے نال چل سکدے نیں پر کم چور برداشت نہیں ہوندے اوہناں دے خیال وچ پاکستان ایس ویلے ان گنت مسئلیاں دا شکار اے۔ سب توں وڈا مسئلہ توانائی دا بحران اے۔ تعلیم تے صحت دا شعبہ کسے وی صورت نجی ہتھاں وچ نہیں دینا چاہیدا۔ سی پیک دا منصوبہ بڑا اہم اے۔ پاکستان دنیا دے اوہناں کجھ ملکاں وچ شامل اے جتھے آبادی دی اک وڈی گنتی نوجواناں تے مشتمل اے۔ ایہ چیز ساڈا اثاثہ اے۔ انشاء اللہ اک دن ضرور ساڈے وطن دا شمار ترقی یافتہ ملکاں وچ ہووے گا۔ ایہناں دیاں دو دھیاں نیں۔ ساریاں دھیاں لئی اوہناں دی غزل دے دو شعر ویکھو:
رنگ گہرا ہو نصیبوں میں کہ گہرا بھی نہ ہو
ایک بیٹی کی ہتھیلی تو حنا مانگتی ہے
بوئے گل کے وہ تقاضے ہیں کہ دل کانپتا ہے
میری گڑیا ہے کہ پھولوں کی قبا مانگتی ہے
ایس خصوصی شمارے وچ اکرم کنجاہی دی شخصیت تے فن تے اخباری کالم شامل نیں۔ ایہناں دیاں کتاباں تے میرے چھپن والے کالم وی شامل کیتے گئے نیں۔ میں اپنے اک کالم وچ لکھیا سی کہ اکرم کنجاہی ادب برائے زندگی دے قائل نیں۔ اوہناں دے نزدیک شاعری نوں صرف گل و بلبل یاں محبوب دیاں گلھاں دی تعریف تک محدود نہیں ہونا چاہیدا۔ ایہدے وچ ساڈے آل دوالے دے مسئلے وی بیان ہوندے نیں۔ اکرم کنجاہی دے کلام چوں انتخاب:
گروی پڑی ہے سانس کی ڈوری مری ابھی
دن تو پھرے نہیں مرے قرضوں کے باوجود
٭٭
چھت آرزو کی گر گئی اکرم گھروندے کی
رسوائی کا ہے خوف تو ملبا سمیٹ لو
٭٭
کافی مری خاکسترِ جاں شمع نہیں ہے
کیا دیکھنا باقی ہے ابھی میری لگن اور
٭٭
حال تنکوں کا بگولوں میں جو دیکھا ہوتا
ہم زمیں زاد، زمیں سے نہ بغاوت کرتے