پنجابی رہتل دیہاڑ دا اُچیچا اِکٹھ
رپورٹ: آفاق بٹ
پہلی چیتر نوں ہون والے ایس پروگرام وچ بالاں اپنی رہتل دے رنگ کھلارے تے ہاسے وَنڈے
بلکار نیوز نیٹ ورک تے ایجوکیشن ہائوس فتح پور دی سانجھ نال پہلی چیتر نوں پنجابی رہتل دیہاڑ منان دا آہر کیتا گیا۔ جہدے وچ اچیچے پروہنے منے پرمنے شاعر ، ادیب سی ای او بلکار نیوز نیٹ ورک محمد اویس باسل ہوریں سن ۔ پرنسپل ایجوکیشن ہائوس فتح پور چوہدری محمد ناظم مہر ہوراں آون والے پروہنیاں دا سواگت کیتا ۔ ایس دیہاڑے سکول دے سارے پڑھیار کڑیاں منڈے پنجاب دا روایتی پہناوا پا کے آئے سن۔ منڈیاں نے پنجاب دے روایتی کھیڈ گلی ڈنڈا ، کوکلا چھپاکی ، پٹھو گول گرم ، رسہ کھچائی ، کبڈی کھیڈ کے تے کڑیاں نے پنجاب دے روایتی کھیڈ شٹاپو ، کینال ٹاپ ، رسی ٹپنا ، ککلی پا کے آون والے پروہنیاں وچ ہاسے ونڈے ۔ ایس توں بعد اک بھرویں پروگرام دا آہر کیتا گیا جہدا آغاز تلاوت کلام پاک نال ہویا ۔ کڑیاں منڈیاں پنجابی وچ تقریراں کیتیاں۔ اک پڑھیار کڑی نے پنجابی دی لوک داستان سنا کے داستان گوئی دی روایت دا وکھالا کیتا۔ ایس توں وکھ پنجابی فوج دے جواناں دی جانثاری تے لوک داستاناں دا وکھالا کرن لئی ٹیبلوز کھیڈ وی پیش کیتے ۔ پڑھیار کڑیاں منڈیاں وچ پنجابی رہتل دی جانکاری لئی سوال جواب دا مقابلہ کرایا گیا جہدے وچ تیاری کر کے آئیاں ٹیماں توں وکھ پنڈال وچ موجود دوجیاں لوکاں توں وی سوال کیتے جنہاں جواب دے کے ایہ ثابت کیتا کہ اسیں اپنی رہتل نوں بھلے نہیں۔ پنجابی رہتل دے وکھالے لئی بالاں وچ ڈرائنگ دا مقابلہ وی کروایا گیا جنہاں پنجابی رہتل دے وکھو وکھ پکھاں تے ڈرائنگ بنائی۔ وڈیاں جماعتاں دیاں کڑیاں وچ مضمون نویسی دا مقابلہ ہویا ۔
ایس توں وکھ پنجابی رہتل دے وکھالے لئی اسٹال لائے گئے جنہاں وچ رانگلیاں منجیاں ، حقہ ، چرخہ تے دوجیاں شیواں دا وکھالا کیتا گیا۔ آخر تے پرنسل چوہدری محمد ناظم مہر ہوراں آون والے پروہنیاں دی پنجاب دے روایتی کھابے دال چول ، گڑ والے چول ، مکئی دی روٹی تے سریوں دے ساگ نال سیوا کیتی ۔
