علی اکبر ناطق اردو ادب دے دیو مالائی ادیب

شکیل امجد صادق

اردو زبان تے مشتمل ادب ’’اردو ادب‘‘ کہلاندا اے۔ اردو ادب نثر تے شاعری تے مشتمل اے۔ نثری ادب ناول‘ افسانہ‘ داستان‘ انشائیہ‘ خطوط نگاری تے سفرنامہ نگاری تے مشتمل اے۔ شعری ادب وچ غزل‘ رباعی‘ مرثیہ‘ قصیدہ تے مثنوی شامل نیں۔ اردو ادب وچ نثری ادب نوں وی اوناں ای مقام حاصل اے جناں شعری ادب نوں‘ اردو ادب جناں ملک عزیز وچ مقبول اے اوناں ای گوانڈھی ملک انڈیا وچ مقبول اے۔ اردو زبان افغانستان وچ سمجھی تے پڑھی جاندی اے۔ ایہ گل وکھری اہمیت رکھدی اے کہ اردو ادب وچ نثری ادب توں ودھ نظمی ادب موجود اے پر جدوں گل نثری ادب دی آندی اے تے داستان دی تخلیقات زیادہ نیں۔ ایہناں داستاناں وچ دیومالائی کہانیاں‘ قصے کئی حالات نوں بیان کرن والیاں داستاناں وغیرہ موجود نیں۔ ایہ صنف قصہ گوئیاں تے‘ دلچسپ کہانی قصیاں تے مبنی اے۔ حقائق تے دلائق توں پرے داستاناں ای ایس صنف دے موضوعات سن۔ فارسی مثنوی‘ پنجابی قصے‘ سندھی واقعاتی بیت وغیرہ داستانوی موضوعات بن گئے۔ سب توں قدیم اردو داستان حمزہ نامہ یاں داستان امیرحمزہ اے۔ اردو ادب وچ جنیاں داستاناں لکھیاں گئیاں اوہ 19ویں صدی وچ لکھیاں گئیاں نیں۔ موجودہ دور وچ ایہ کہنا غلط نہیں ہووے گا کہ افسانہ نگاری اصل وچ داستان نگاری دی ای جدید تے ترقی یافتہ شکل اے۔ علی اکبر ناطق موجودہ دور دے جدید نظم نگار‘ خوبصورت افسانہ نگار تے زمانی اعتبار نال جدید ناول نگار نیں۔
’’بے یقین بستوں میں‘‘ شاعری، ’’قائم دین ‘‘افسانے،’’نو لکھی کوٹھی‘‘ناول،’’شاہ محمد کا ٹانگہ ‘‘افسانے، ’’کماری والا‘‘ ناول،’’فقیر بستی میں‘‘ سوانح عمری مولانا محمد حسین آزاد توں علاوہ دوجیاں کئی کتاباں دے لکھاری نیں۔ علی اکبر ناطق دیاں لکھتاں وچ سماج دی مٹی دی خوشبو رچی بسی ہوئی اے۔ آپ دیاں لکھتاں منظرنگاری دا اجیہا سماں پیش کردی اے کہ سارا کردار قاری دے ذہن وچ چلدے پھردے وکھائی دین لگدے نیں۔ علی اکبر ناطق دیاں نظماں ہون یاں افسانے یاں فیر ناول‘ قاری نوں اک نشست وچ پڑھن تے مجبور کر دیندے نیں۔ ایہو علی اکبر ناطق دا خاصا اے کہ اوہ اوتھے اوتھے تواتر نال پڑھیا جاندا اے جتھے جتھے اردو زبان بولی جاندی اے۔ کسمپرسی دے ایس دور وچ علی اکبر دیاں کتاباں کئی ورھیاں توں ’’بیسٹ سیلر‘‘ دا درجہ اختیار کر چکیاں نیں۔ اج اوکاڑہ دی بین الاقوامی ادبی تنظیم ’’ارتعاش‘‘ (جہناں دے روح رواں تے بانی نامور شاعر‘ استاد‘ کلاسیکل‘ نقاد‘ سخن ور نجمی نیں۔ اوہ اپنی اچانک طبیعت دی ناسازی پاروں حاضر نہ ہو سکے تے گورنمنٹ گریجوایٹ کالج برائے خواتین اوکاڑہ دے شعبہ اردو تے اوہناں دی صدر شعبہ محترمہ پروفیسر یاسمین کاشف نے علی اکبر ناطق دے نال اک تقریب دا پربندھ کیتا۔ ایس تقریب دی صدارت پاکستان دے عظیم شاعر جناب مسعوداحمد نے کیتی۔ ایس تقریب دے مہمان خصوصی علی اکبر ناطق تے ممتاز غزل گو شاعر کاشف مجید سن۔ مہمان شاعراں وچ نعت تے غزل دے مہان شاعر جناب پروفیسر رضاء اللہ حیدر (سابق پرنسپل گورنمنٹ گریجوایٹ کالج اوکاڑا) ،جناب احمد جلیل، جناب شفقت رسول قمر،جناب پروفیسر محمد حامد تے راقم الحروف سن۔ جناب کاشف مجید،جناب رضاء اللہ حیدر،جناب احمد جلیل،جناب شفقت رسول تے محترمہ پروفیسر فروا نقوی نے علی اکبر ناطق دے فکر و فن تے بھرویں گل بات کیتی تے علی اکبر ناطق دی ادبی خدمات نوں سراہیا۔
حاضرین وچ کالج ہذا دی طالبات تے استاداں توں علاوہ پروفیسر جنید ثاقب‘ پروفیسر ڈاکٹر حسن رضا اقبالی، پروفیسر احسن سلیم رانا، پروفیسر افتخار اکرم، پروفیسر رائے محمد افضل، پروفیسر چاند عقیل، احسن اقبال صابری، لالہ احمد شہزاد تے سلمان قریشی (صحافی )نے شرکت کیتی۔نظامت دے فرائض پروفیسر یاسمین کاشف تے پروفیسر کاشف مجید نے نبھائے۔ استقبالیہ خطہ کالج ہذا دی پرنسپل پروفیسر ثمینہ زبیر نے دتا۔ ایس خوبصورت تقریب دا سہرا کالج ہذا دی پرنسپل پروفیسر ثمینہ زبیر تے پروفیسر مسز کاشف یاسمین دے سر جاند ااے۔ میں تقریب دی بھرویں کامیابی تے کاشف مجید تے مسز یاسمین کاشف نوں ہدیہ تہنیت پیش کرنا واں۔ واضح رہوے کہ علی اکبر ناطق میرے بی اے کلاس فیلو وی نیں۔ علی اکبر ناطق اک خوبصورت تے سُچے ادیب ہون دے نال اک کھرے تے محبت کرن والے انسان نیں۔ آپ دا دل انسانیت نال محبت تے ہمدردی نال بھریا اے۔ آپ بلاشبہ بے ضر ر انسان نیں۔ سادگی تے سادہ لوحی آپ دی طبیعت وچ کٹ کٹ کے بھری ہوئی اے۔ میں ایہ گل بڑے وثو ق نال کہنا واں کہ آن والا ادبی وقت علی اکبر ناطق دا اے تے ادب وچ نظم‘ افسانہ تے ناول تریخ علی اکبر ناطق دے بناں نامکمل اے۔ ٭٭