بلوچستان چہ صدارتی تے ایکسیلنس ایوراڈ دِی تقریب دا اِنعقاد
گورنر بلوچستان سید ظہور آغا نے مختلف شعبایاں چہ نامور شخصیات نوں ایوارڈ دیتے
علی قیصر
کوئٹہ( رپورٹ تے تصویراں/ ڈاکٹر عبدالرشید آزادؔ)بلوچستان چہ صدارتی تے ایکسیلنس ایوارڈ دِی تقریب دا انعقاد کیتا گئیا تے گورنر بلوچستان سید ظہور آغا نیں زندگی دے مختلف شعبایاں چہ لوکاں نوں حسنِ کارکردگی ایوارڈ دیتے۔تقریب چہ بلوچستان دیاں کئی نامور شخصیات نوں وِی مدعو کیتا گئیا سی ایس موقع تے ادب، ثقافت، تہذیب ،تعلیم ،صحت،تے دوجیاں شعبایاں نال جڑے ہوئے لوکاں نوں اُونہاں دِی چنگی کارکردگی تے ایوارڈ اں توں نوازایا گئیا۔
سپورٹس دے شعبے چہ فٹ بال دے انٹر نیشنل کھلاڑی زاہد حمید نوں ایکسیلینس ایوارڈ دیتا گئیا یاد رہوئے کہ زاہد حمید نیں 64انٹرنیشنل میچاں چہ پاکستان دی نمائندگی کیتی اُونہاں نیں اپنے کیرئیر دا آغاز مسلم آباد ہائی سکول تو کیتا تے ہدہ محمڈن کلب دی نمائندگی کیتی ایس دوران پی ٹی سی ایل ڈیپارٹمنٹ چہ بحیثیت کھلاڑی منتخب ہوئے تے بھارت دا پہلا دورہ کیتا تے تن گول کرکے ناں کمایا فیر 2005 ء چہ پاکستان واپڈا دی ٹیم چہ شمولیت اختیار کیتی ہور ایس دوران کئی انٹرنیشنل ٹور کیتے ،2004 ء چہ سیف گیمز گولڈ میڈل حاصل کیتا اینہاں نیں انڈیا ،قطر، دبئی، سنگاپور، ملائیشیا ء ،بنگلہ دیش، مالدیپ، تائیوان، بحرین ،کویت ،کرغستان ،تاجکستان ، عمان ایشین گیمز تے ورلڈ کپ لئیی وی کوالیفائی کرکے پاکستان ولوں کھیلے اینہاں دی ایس کارکردگی دی بنیاد تے اینہاں نوں اے ایوارڈ ملیا اے۔
کھیلاں دے ایچ ای دوجا ایکسلینس ایوارڈ سائیکلینگ دے کھلاڑی نجیب اللہ نوں دیتا گئیا اے اینہاں نیں وی سائیکلینگدے شعبے چہ بلوچستان توں پاکستان دا بڑا ناں کیتا عزت کمائی اے،سپورٹس کراٹے چہ محترمہ نرگس ہزارہ نوں ’’حسن کارکردگی ‘‘ چہ صدارتی اعزاز حسن کارکردگی نال نوازیا گئیا اے یاد رہے کہ کراٹے دی اے انٹرنیشنل کھلاڑی بلوچستان دے مایہ ناز کراٹے کوچ جناب شاہ محمد شانؔ دی شاگرد اے تے اینہاں بلوچستان دی کئی واری نمائندگی کردیاں ہویا پاکستان لئیی انٹرنیشنل ایوارڈ تے گولڈ میڈل حاصل کیتے نیں ،یاد رہوئے کہ
نرگس ہزارہ نیں ایشین گیمز 2018ء چہ میڈل لے کے پہلی پاکستانی کڑی بنی جینہاں نیں پاکستان دِی 75سالہ تاریخ چہ اپنا ناں لکھوایا۔
او پہلی کڑی اے جیس نیں کسی وی انفرادی کھیل چہ پاکستان لئیی کسی وی ایشین گیمز چہ کوئی میڈل جیتا اے سائوتھ ایشین گیمز چہ وی اک گولڈ میڈل تے دو سلور میڈل حاصل کیتے نیں۔سپورٹس کراٹے چہ محمد اویس جینہاں نیں انڈر 21ایشین کراٹے چیمپئین شپ چہ ملک لئیی ایوارڈ حاصل کرن آلے پہلے کھلاڑی نیں سائوتھ ایشین گیمز2019 ء چہ پاکستان لئیی دو گولڈ میڈل حاصل کیتے،چوتھی سائوتھ ایشین گیمز کراٹے چیمپئین شپ 2017ء سری لنکا چہ وی گولڈ میڈلسٹ بنے، گذشتہ چار سالاں تو متواتر نیشنل چیمپئین نیں اینہاں نوں ایکسیلنس
ایوارڈ توں نوازایا گیا اے۔
سپورٹس چہ چوتھا ایکسیلینس ایوارڈ شاہدہ عباسی نوں ملیا اے او گذشتہ اٹھ سالاں تو متواتر نیشنل چیمپئین نیں ،سائوتھ ایشین گیمز 2019ء چہ پاکستان لئیی پہلا گولڈ میڈل حاصل کرن دا اعزاز کراٹے چہ شاہدہ عباسی نوں حاصل اے ۔نرگس ہزارہصدارتی ایوارڈ برائے حسن کارکردگی ،محمد اویس تے ،شاہدہ عباسی اینہاں تیناں نوں ایکسیلنس ایوارڈ ملیا اے اے تینوں شاہ محمد شان دے شاگرد نیں ۔
گائیکی دے شعبے چہ لیجنڈ اُستاد عید محمد علی نوں ایکسلینس ایوارڈ توں نوازیاگئیا اے اُونہاں نیں 45سال دے کیرئیر چہ ریڈیو تے ٹی وی چہ ڈھائی ہزار توں ود براہوئی ،بلوچی، پشتو تے اُردو چار زباناں چہ گانے گائے یء اک ہزار توں ود گانے کمپوز کیتے گلوکاری تے موسیقاری چہ ملک گیر مقابلیاں چہ بلوچستان دی نمائندگی کیتی اُونہاں نیں براہوئی زبان دی پہلی آڈیو کیسٹ وی اینہاں نیں ریلیز کیتی تے فوک گلوکاری نوں نوئی نسل تک پہنچایا اینہاں نوں اینہاں دی اعلیٰ خدمات تے ایکسیلنس ایوارڈ توں نوازیا گئیا اے۔
ادب دے شعبے چہ بلوچستان دے مایہ ناز لکھکھ ،ادیب ،شاعر، کمپئیر، اداکار ، صدا کار، تے ماہر تعلیم جناب پروفیسر حسین بخش ساجد ؔ نوں شاعری دے شعبے چہ اعلیٰ خدمات دے اعتراف چہ ایکسلینس ایوارڈ 2019ء توں نوازیا گئیا اے یاد رہوئے کہ پروفیسر حسین بخش ساجد
نیں بالاں دے ادب لئی وی بڑا کم کیتا اے تے ہن تک اُونہاں دے تن شعری مجموعے بالاں لئی شائع ہوکے ملک گیر شہرت حاصل کر چکے نیں۔ ادب چہ اک ہور ایکسیلنس ایوارڈ بلوچستان دے معروف شاعر نسیم اکبر نوں دیتا گئیا اے او براہوئی زبان دے شاعر نیں ۔
پشتو ادب چہ بلوچستان دے معروف پشتو شاعر شفیق العالم معذور یارؔ جیڑے پیدائش توں فوراً بعد اکھیاں تو انہے ہوگئے سن تے نوجوانی چہ شاعری شروع کیتی ، معذور یار دا پہلا شعری پراگا 1995ء نوں ’’تاتمول‘‘ دے ناں توں چھپیا تے ایدھے فوراً بعد دوجا پراگہ ’’سکاسہ‘‘دے ناں تو آیا اے پشتو دے قادر الکلام شاعر نیں تے اپنی معذوری دے باجود عالی ہمت نیں تے مارکر الکلائیڈی دی دوا ساز کمپنی چہ کم کر دے نیں۔اُونہاں نوں پشتو شاعری چہ اعلیٰ خدمات تے ایکسیلنس ایوارڈ دیتا گئیا اے اُردو ادب لئی ایکسیلنس ایوارڈ جامعہ بلوچستان دے شعبہ اُردو دے انچارج جناب خالد خٹک نوں دیتا گئیا اے اے اُردو دے اُستاد دِی حیثیت نال صوبے دا فخر نیں تے بلوچستان چہ بڑی قدر دِی نگاہ نال ویکھے جاندے نیں ۔ساڈی ولوں بلوچستان دے سارے لوکاں جیناں نوں ایکسیلنس ایوراڈ ملیا اے ودایاں ہون تے اللہ پاک اینہاں نوں ہور خدمت دی توفیق دیوئے۔ امین ۔
