کار خاص

وطن عزیز دے ادارے‘ محکمے تے کمپنیاں وچ موجود اک ناسور

تحریر ۔ پروفیسر حکیم سید عمران فیاض

کار خاص (ٹائوٹ) دا لفظ تہانوں اپنی زندگی وچ اکثر اوقات سنن نوں ضرور ملیا ہووے گا۔ کسی وی ادارے۔ محکمے یا کمپنی وچ کار خاص دے حامل بندے نوں انتہائی اہمیت حاصل ہووے گی۔
کارخاص بندے نوں مختلف ناماں نال پکاریا جاندا اے۔ ایہنوں ٹائوت‘ خاص آدمی‘ اعلیٰ کار‘ دو نمبر کماں دی مشین‘ رازدار سنے مختلف ناں دتے جاندے نیں۔ کسی وی ادارے‘ محکمے یا کمپنی وچ بعض افسراں نے اپنے خفیہ خاص کماں نوںانجام دین لئی کار خاص نوں رکھیا ہوندا اے جہڑا کہ کسی وی عہدہ ہون دے بغیر وی دوجے سارے سینیئرز اتے حاوی ہوندا اے۔ بقول شاعر
ہم کو تو میسر نہیں مٹی کا دِیا بھی
گھر پیر کا بجلی کے چراغوں سے ہے روشن
تسیں اکثر اوقات الیکٹرانک تے پرنٹ میڈیا اتے ایہہ خبراں ضرور ویکھی تے پڑھی ہون گئیاں کہ فلاں ادارے وچ موجود کارخاص دے خلاف کارروائی عمل وچ لیائی گئی تے فلاں دے ناں بے نامی کمپنی دا انکشاف منظر عام اتے آیا۔ کدی ایہناں کار خاص دے بینک اکائونٹس وچ لکھاں‘ کروڑاں حتیٰ کہ ارباں روپے موجودگی دا انکشاف وی ہوندا اے۔ ذرائع دے مطابق ایہناں کار خاص دے ذریعے بعض لوک اپنی ناجائز ذرائع توں کمائی جان والی آمدن نوں ٹھکانے لاندے نیں۔ تہاڈا کوئی وی ناجائز تے غیر قنونی کم جہڑا ڈائریکٹ نہ ہو سکے اوہ ایہناں کار خاص دے ذریعے ممکن ہو جاوے گا۔ ایہناں کارخاص دے بارے ایس ادارے دے سارے لوکاں نوں علم ہوندا اے۔لیکن ایہدے خلاف لب کشائی دی ہمت تے جرات شاید کسی وچ وی نہیں ہوندی۔ بقول شاعر
میراث میں آئی ہے انھیں مسندِ ارشاد
زاغوں کے تصرف میں عقابوں کے نشیمن!
کارخاص درحقیقت اوہ غلیظ تے کراہت نال بھرواں ناں اے جہنوں عوام دی کمزوری پاروں ایہدے تے مسلط ہون دا موقع ملیا اے۔ کارخاص اپنے آپ نوں گاڈ فادر سمجھن لگ جاندے نیں۔ حالاں کہا وہ دن بدن اپنے گناہواں دی گٹھڑی وچ وادھا کر رہے ہوندے نیں۔ ایہہ وی اک تلخ حقیقت اے کہ جنہاں لوکاں نے ایہہ کار خاص رکھے ہوندے نیں اوہ اوہناں دے گناہواں وچ برابر دے شریک ہوندے نیں بلکہ جے آکھیا جاوے تے اوہ اصل گناہگار ہوندے نیں۔ بعض حکومتی ادارے وی ایہناں کار خاص دی چیدہ رستیاں توں پوری طرح آگاہ ہوندے نیں لیکن اوہ وی ایہناں دے خلاف کارروائی کرن توں قاصر نظر آندے نیں۔
کارخاص اپنے آقا دے سارے جائز تے ناجائز کماں بارے پوری طرح آگاہ ہوندا اے۔ اوہ اپنے آقا دے بے نامی اکائونٹس‘ کاروبار‘ جائیداد تے بے نامی کمپنیاں دا وی رکھوالہ ہوندا اے۔ اوہ اپنے آقا دے اوہناں رازاں نال وی واقف ہوندا اے جنہاں بارے جے عوام نوں پتہ چل جاوے تے اوہناں دے چودہ طبق روشن ہو جان۔
میری وزیراعظم پاکستان‘ چاراں صوبائی وزیراعلیٰ‘ گورنراں‘ حکومتی حساس اداریاں کولوں اپیل اے کہ اوہ ملکی مفاد عامہ لئی ایہناں کار خاص تے اوہناں دے کرپٹ آقا دے خلاف سخت توں سخت کارروائی عمل وچ لیان جہڑے کہ ایہناں اداریاں وچ اک غلیظ دھبہ نیں۔
اٹھ کے درد مندوں کے
صبح و شام بدلو بھی
جس میں تم نہیں شامل
وہ نظام بدلو بھی
حکومت وقت نوں چاہیدا اے کہ اوہ ایس کار خاص ٹاپ دی مخلوق تے ایہناں دے آقا دے خلاف خفیہ تحقیقات دا آغاز کرن تے ساری سرکاری اداریاں دے اندر موجود کرپٹ افسراں تے اوہناں دے کارخاص دے خلاف قنون دا شکنجہ تنگ کرن تے پچھلے 15 توں 20ورھیاں دے دوران اوہناں دی مجموعی انکم تے بینک اکائونٹس تے اثاثیاں دی مکمل چھان بین کرن تے ایہناں کرپٹ بندیاں دے خلاف آہنی ہتھاں نال نمٹن۔
پلٹنا جھپٹنا جھپٹ کر پلٹنا
لہو گرم رکھنے کا ھے اک بہانہ