کیہ تریخ اپنے آپ نوں دہرا رہی اے؟

مطلوب ورائچ

وزیراعظم عمران خان دا اسلام آباد وچ جلسہ ہجوم دے لحاظ نال تریخی سی تے ایس جلسے نال اوہناں دا خطاب تریخ ساز سی۔ اوہناں نے ایس جلسے وچ بہت سارے حقائق تے سازشاں بے نقاب کرن دا اعلان کیتا سی۔ بہت سارے لوکاں نوں شکوا اے کہ اوہناں نے ایس حوالے نال بہت گھٹ دسیا اے حقیقت ایہ وے کہ اوہناں نے سوائے ایہدے کہ اوہناں نوں دھمکی آمیز خط کنہے لکھیا سب کجھ دس دتا۔ اوہناں دا کہنا بین السطور سی جو سیاست دی سوجھ بوجھ رکھن والیاں نوں پوری طرح سمجھ آ گیا۔ عمران خان نے شہید ذوالفقارعلی بھٹو دا ذکر کیتا اوہناں دے قتل تے قاتلاں دی گل کیتی۔ مولانا فضل الرحمن دے ولد مفتی محمود پاکستانی قومی اتحاد دی اوس تحریک نوں لیڈ کر رہے سن جہدے پاروں بھٹو دی حکومت دا تختہ الٹیا گیا تے بھٹو نوں آخر کار پھاہے لا دتا گیا۔ وزیراعظم عمران خان کہندے نیں کہ اج فیر حالات اوسے طرح دے بنادتے گئے نیں پر فرق ایہ وے کہ اج سوشل میڈیا دا دور اے۔ عمران خان اپنی صوابدید دے مطابق ٹھیک کہندے ہون گے پر سوشل میڈیا تے ایناں وی انحصار مناسب نہیں۔ مشرف دے دس لکھ فالورز سن جہناں نوں ویکھ کے اوہ الیکشن وچ حصہ لین پاکستان آ گئے تے دھر لئے گئے۔
زخم خوردہ نوازشریف انتقام لین تے تیار سن۔ نوازشریف توں ودھ افتخارمحمد چوہدری دا اوہناں نوں پہرے وچ رکھن تے خون خول رہیا سی۔ مشرف ایہناں دوہاں دے بے رحم شکنجے وچ آئے جہدے توں اوہناں نوں کڈھیا گیا۔ عمران خان نے جنرل مشرف دا ذکر کردے ہوئے اوہناں دے این آر او نوں ظلم قرار دتا جہدے پاروں دس ورھے مسلم لیگ ن تے پیپلزپارٹی دیاں حکومتاں نے ملکی معیشت دا بیڑا غرق کر دتا تے ایہناں پارٹیاں دیاں قیادتاں پاکستان نوں لٹ کے کنگال کر گئیاں۔ پی پی تے ن لیگ دی لیڈرشپ نے اک دوجے تے مقدمے قائم کیتے تے کجھ عمران خان دی حکومت دے دوران درج ہوئے۔ ایہناں کیساں وچ دوہاں پارٹیاں دی اعلیٰ ترین قیادت جیلاں وچ گھٹو گھٹ اک واری تے جا چکی اے۔ میاں نوازشریف نو ںجس کیس وچ نااہلی‘ دس ورھے قید تے جرمانے دی سزا ہوئی اوہ اوہناں دے اپنے وزارت عظمیٰ دوران وچ درج ہویا سی۔ اج پی پی تے ن لیگ دی اعلیٰ لیڈرشپ صرف احتساب تو ںبچن لئی اک دوجے دے گلے مل رہی اے۔ عدم اعتماد دے بعد کیہ پروگرام اے؟ کیہ ایجنڈا اے؟ ایس بارے اک لفظ نہیں کہیا گیا۔ بس عمران خان وزارت عظمیٰ توں نکل جاوے۔ ایہدے بعد جو ہووے گا ویکھیا جاوے گا۔
مولانا فضل الرحمن تے عمران خان نال دشمنی وچ ایس حد تک چلے گئے نیں کہ کہندے نیں خزاں جائے‘ ایہدے بعد بہار آوے یاں نہ آوے۔ الطاف دے چمچے کسے دور وچ کہندے سن منزل نہیں رہنما چاہیدا اے۔ اجہے رہنما دی خواہش صرف خوشامدی کاسہ لیس یاں مفاد پرست تے عہدیاں دے لالچی کر سکدے نیں جو اج ہر پارٹی وچ موجود نیں۔ عمران خان وانگوں ذوالفقارعلی بھٹو نے وی پنڈی دے راجا بازار وچ امریکہ ولوں انج دا ای خط لہراندے ہوئے لوکاں نوں کہیا سی کہ سفیدہاتھی نے مینوں ایٹمی پروگرام دی شروعات توں باز نہ آن دی صورت وچ عبرت دا نشان بنان دی تڑھی لائی اے تے فیر ایس تڑھی تے امریکہ نے عمل وی کر دتا سی۔ اللہ عمران خان دی خیر کرے۔ بھٹو وانگوں دلیر اے تے قوم اوہدے نال اے۔ بھٹو نوں عبرت دا نشان امریکہ بنانا چاہندا سی اوہدے ولوں اپنی دھمکی تے عمل پاکستان دے اندروں کرایا گیا۔
عمران خان کہندے نیں کہ اج وی بیرونی سازش تے عمل پاکستان دے اندروں کرایا جا رہیا اے۔ اندروں کجھ لوک جان بجھ کے تے کجھ انجانے سازش نوں پروان چڑھا رہے نیں۔ کل تک اک دوجے دے لہو دے پیاسے اج بھائی بھائی بن گئے۔ ڈھڈ پاڑن تے سڑک تے دھرون دے اعلان کرن والے آپس وچ جپھیو جپھی ہو گئے۔ اوہناں نوں ایس طرح اکٹھا کرن والے جو وی نیں عمران خان دا دعویٰ اے کہ اوہ ایہدے توں جانوں نیں۔ شاید عمران خان اوہناں دے خلاف وی ان ایکشن ہو جاندے پر اوہ ذرا صبر‘ تحمل تے برداشت توں کم لے رہے نیں پر کدوں تک؟ شاید عدم اعتماد دی تحریک دے عمل دوران اوہ کوئی اجیہا وڈا فیصلہ کر دین جو بھٹو صاحب ولوں کسے وجہ نال نہیں سی کیتا گیا۔ ساڈا اج دا وڈا سوال ایہ وے کہ کیہ اج تریخ ادھی صدی بعد فیر اپنے آپ نوں دہرا رہی اے۔ اگے اگے ویکھو کیہ ہوندا اے۔ عمران خان نے بہت وڈا جلسہ کیتا۔ ایس جلسے تے ایہ لیبل تے رہوے گا کہ حکومتی جلسہ سی ایس لئی بہت وڈا سی۔ ایہدے دوجے دن اپوزیشن نے وی جلسہ کیتا اوہ وی وڈا جلسہ سی تے اپوزیشن دے کول پیسہ وی بہت اے۔ موازنہ ایہ وی کرنا اے کہ عمران خان دی پارٹی نے اکلے جلسہ کیتا جد کہ ایہدے مقابلے وچ جلسہ 9 جماعتاں دا سی۔٭٭