سُلیکھ چیتر ایوارڈدی انعام ونڈن دی تقریب

تیجا ایوارڈ شہزاد اسلم نوں 10 ہزارروپے کیش تے ٹرافی۔ دوجا ایوارڈ جاوید بوٹا نوں30 ہزار روپے، پہلا ایوارڈ رائے محمد خاں ناصرنوں50 ہزار روپئے تے ٹرافی، تنقید دے کھیتر وچ اعجاز ہوراں نوں اُچیچا ایوارڈ 30 ہزار روپے دا دِتا گیا

رپورٹ چاند شکیل

سلیکھ چیتر ایوارڈ 2020ء ۔2021ء دی انعام ونڈن دی تقریب دا مڈھ استاد حنیف نے ونجھلی نال سُر بکھیردیاں رکھیاجیہدے مگروں سلیکھ چیتر ایوارڈ دے چیف ایگزیکٹیو شاہد شیدائی نے سلیکھ ایوارڈ بارے جانکاری دیندیاں کہیا کہ پنجابی ادب وچ نثر بہت تھوڑی لکھی گئی اے، شاعری دے ڈھیر لگے ہوئے نیں ایس ایوارڈ دا مقصد نثر وچ وادھا لیانا تے نثر لکھن والیاں دی حوصلہ افزائی کرنا اے۔ایس لئی فکشن تے تنقید لئی ایوارڈ رکھیا گیا اے،ایہ ایوارڈ اِک سال بعدوں نہیں سگوں دو ورھیاں بعدوں دِتا جائے گا۔
تیجے انعام جیتو دا اعلان بابا نجمی تے ثمینہ اسما جی نے کیتا تے انعام دی حقدار کتاب ’’وا ورولے‘‘ نوں مِتھیا گیا جس دے لکھاری شہزاداسلم نیں۔دوجے ایوارڈ دا اعلان مدثر اقبال بٹ تے ڈاکٹر کلیان سنگھ کلیان نے کیتا تے ایہ انعام جاوید بوٹا دی کہانیاں دی کتاب’’ چولاں دی برکی‘‘ نوں ملیا۔جاوید بوٹا بدیس وسدے نیں ایس لئی ایہ ایوارڈ زبیر احمد نے وصولیا ۔مدثر اقبال بٹ نے ایوارڈ بارے وچار سانجھے کردیاں کہیا کہ سلیکھ چیتر ایوارڈ نوں جی آیاں نوں کہنے آں ایہ عمل پنجابی ادب دے ودھا لئی خوش آئند ثابت ہوئے گا۔پروفیسر ڈاکٹر کلیان سنگھ کلیان نے گل کردیاں کہیا کہ ایہو جیہے ایوارڈاں دی برکت نال شاعر وی نثر لکھن لگ پئے نیں۔ایس توں مگروں تنقید دا اُچیچا ایوارڈ اعجاز دی کتاب ’’افضل احس رندھاوا دی ناول کاری ‘‘نوں دتا گیاایس ایوارڈ دا اعلان پروفیسر امجد علی شاکر تے سرفراز علی حسین ہوراں نے کیتا۔پروفیسر امجد علی شاکر ہوراں دا کہنا سی کہ جویں پنجابی وچ شاعری معیار تے مقدار ولوں ڈاڈھی اے ایسے طرحاں نثر دا معیار تے مقدار وی ہونا چاہیدا اے۔سرفراز علی حسین دا کہنا سی کہ پنجابی نوں کسے تحریک دی ضرورت نہیں ایہ پوری دنیا وچ پسر چکی اے ایس نوں ادبی تحریک کہیا جاوے تے ایس دی قدر ودھدی اے گھٹدی نہیں۔میں جدوں وی حفیظ نوں ویکھدا ساں تے سوچدا ساں کہ ایہ ماں بولی لئی ضرور کُجھ کرے گا تے ایس نے اج ایہ سبھ کر لیا اے جے ایہ ایوارڈ ہر سال بعد دِتا جاوے تاں ودھیا گل ہوئے گی۔ایوارڈ بارے اپنے وچار سانجھے کردے ہوئے اعجاز ہوراں دا کہنا سی کہ ایوارڈاں دی اچیچتا نوں نرپکھ ہو کے دین نوں مِتھیا ۔اوہناں دا کہنا سی کہ کجھ ایوارڈاں نے اپنا وقار گوایا اے تے رسوائی دا کارن بن چکے نیں۔ایس توں مگروں اوہناں نے اپنی کتاب بارے دسیا کہ تنقید کردیاں اوہناں نے گلوب دی جھاکی نال پنجابی ادب وچ ناول کاری نوں پرکھیا اے تے نثر اُتے تنقید ودھ توں ودھ کرن دی لوڑ وی اے۔سلیکھ چیتر ایوارڈ ولوں پہلے انعام دے جیتو دا اعلان کرن واسطے جمیل احمد پال تے الیاس گھمن ہوراں نوں سدیا گیا تے اوہناں نے رائے محمد خان ناصر دی کہانیاں دی کتاب ’’مورتاں‘‘ بارے اعلان کیتا۔رائے محمد خان ناصر ہوراں نے ایوارڈ وصول کرن توں مگروں گل بات کردیاں کہیا کہ پنجابی ادب دی ،پنجابی زبان دی گل اگے نوں ٹری اے تے فیر اوہناں اپنی بولی سنائی:
بس پدھ نوں مرن نہ دیوِیں راہواں آلی تھوڑ کوئی نہیں

شاہد شیدائی ہوراں نے سبھ جیتوواں نوں ودھائیاں دین توں بعد دسیا کہ انعام لئی وصولیاں کتاباں نوں جدوں انعام دین دا ویلا آیا تاں بڑی اوکھت سی کیوں جے کتاباں وچکار دو تِن نمبراں دا ای فرق سی ایس لئی اوہناں نے جیہناں لکھاریاں نے وی کتاباں گھلیاں سن سبھ نوں سلیکھ چیتر ایوارڈ ولوں ودھائی دتی۔محبوب عالم منہاس نے ایوارڈ دے مڈھ رکھن بارے دسیا تے آون والے ویلے وچ ترجمہ کاری دے کھیتر اتے وی ایوارڈ دین بارے سوچن دی خبر دسی۔ایس توں مگروں جمیل احمد پال،اقبال قیصر،افضل ساحر،عبد الحفیظ،نورالعین سعدیہ تے عاشق علی فیصل ہوراں نے رویل دفتر نال جڑیاں یاداں توں وکھ پنجابی تحریک دے بتی ورھیاں اُتے جھات پائی جس نوں سنن والیاں نوں ڈھیر جانکاری ملی۔تقریب دے آخر تے راشد رحمان نے گلبات کردیاں کہیا کہ ذریعہ معاش معاشرے وچ بہت اہم ہوندا اے کوئی وی زبان معاش نوں ودھاون لئی کم کردا تاں لوکیں اوس ول نوں ٹر پیندے نیں پر ایہ وی گل گوہ گوچری اے کہ زندگی صرف ذریعہ معاش ای نہیں۔جو قوم اپنی زبان توں دور ہو کے اپنا وجود چھڈ دیندی اے کیہ اوہ قوم ہوندی اے؟کیہ اسیں اکثریت دی زبان نوں نظر انداز کر کے اگے ودھ سکنے آں پنجابی دا کاذ پنجاب دا کاذ اے پنجاب دا کاذ لوکائی دا کاذ اے تے لوکائی دا کاذ پاکستان دا کاذ اے۔ سلیکھ چیتر ایوارڈ تقریب وچ بلار دے فرائض چاند شکیل نے سچجے ڈھنگ نال نبھائے۔ایس رنگا رنگ تقریب دے مکن تے چاہ پانی نال سبھ دی سیوا کیتی گئی۔