پَندھ وَرتی ’’کافی چاکلیٹ تے پرفیوم‘‘ دا مُکھ وکھالی اِکٹھ
تقریب دا پربند ادبی تنظیم ’’علمی بیٹھک‘‘ ولوں اسلام آباد وچ کیتا گیا
رپورٹ: علی احمد گجراتی
سرپرستِ اعلی دل دریا پاکستان رجسٹرڈ پروفیسر ڈاکٹر عامر ظہیر بھٹی ہوراں دی پنجابی پندھ ورتی کافی، چاکلیٹ تے پرفیوم دا مکھ وِکھالی اکٹھ منگلوار 29 مارچ نوں انٹرنیشنل سنٹر آف ایکسیلینس اسلام آباد وچ ہویا۔ ایس اکٹھ دا پربندھ نمل یونیورسٹی اسلام آباد دے استاداں تے پڑھیاراں ولوں اوہناں دی تنظیم ’’علمی بیٹھک ‘‘ولوں کیتا گیا۔
ایس اکٹھ وچ راولپنڈی اسلام آباد دیاں وکھو وکھ یونیورسٹیاں تے کالجاں دے استاداں تے پڑھیاراں توں اَڈ کئی لکھاریاں تے شاعراں نے وی رَلت کیتی۔ ڈاکٹر عامر ظہیر بھٹی دی پندھ ورتی کافی، چاکلیٹ تے پرفیوم فرانس، بیلجیئم، سویٹزرلینڈ تے کانگو دیاں پھیریاں دا حال دسدی ہے۔جیہناں سوجھواناں نے کتاب بارے گل بات کیتی اوہناں وچ ڈاکٹر عبدالواحد تونسوی پروفیسر، نمل اسلام آباد، عبداللہ ہارون کھوجکار تے پڑھیار شعبہ اردو نمل، اکمل شہزاد گھم کہانی کار تے ریڈیو پروڈیوسر، ڈاکٹر عابد سیال سربراہ، شعبہ پاکستانی زبانیں، نمل تے مشہور شاعر لکھاری اختر عثمان ہوریں شامل نیں۔ ایہناں نے کتاب بارے بھرویں گل بات کیتی تے خوبیاں تے خامیاں دوواں بارے وچار سانجھے کیتے۔ اچیچے طور تے جیہناں سجناں نے رلت کیتی اوہناں وچ علی بھٹی صاحب ڈائریکٹر، فرانسیسی ثقافتی مرکز اسلام آباد، ڈاکٹر واحد بخش بزدارپروفیسر، قائد اعظم یونیورسٹی اسلام آباد، ڈاکٹر منظور احمد ویسریو پروفیسر، قائد اعظم یونیورسٹی اسلام آباد، فیصل شہریار شاہ استاد، شعبہ فرانسیسی، نمل، ادریس چیمہ صاحب چیئرمین، دل دریا پاکستان رجسٹرڈ، آفتاب سندھو صاحب بانی مسلم میڈیا گروپ توں وکھ نمل دے فرانسیسی شعبے دے پڑھیاراں وی رلت کیتی۔ پرفیسر ڈاکٹر عامر ظہیر بھٹی ہوراں دی ایہ پندھ ورتی پنجابی ادب وچ پندھ ورتی دی صنف نوں نویں ساہ دین دے برابر اے۔ علمی و ادبی پدھر تے ایس مان جوگ لکھت دی ڈھیر سلاہنا کیتی جارہی اے۔ ایس اکٹھ توں بعد ایس کتاب لئی لاہور گجرات تے اسلام آباد وچ ہور وی آدری اکٹھ کیتے جان گے۔
